ក្នុងឱកាសនៃការស្នាក់អាស្រ័យនៃការអញ្ជើញបំពេញទស្សនកិច្ចការងារ ចូលរួមពិព័រណ៌ចិន អាស៊ានលើកទី១៣ នៅទីក្រុងណាននីង ខេត្តក្វាងស៊ី ប្រទេសចិន នៅរសៀលថ្ងៃទី១១ ខែកញ្ញា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឲ្យគណៈប្រតិភូក្រុមហ៊ុនស្រ្ពីង ដឹកនាំដោយលោក វ៉ាង ចឹងហ៊ួរ ប្រធានក្រុមហ៊ុនអាកាសចរណ៍សៀងហៃស្រ្ពីង ចូលជួបសំដែងការគួរសម និងពិភាក្សាការងារ។
ក្នុងជំនួបពិភាក្សាគ្នានោះ លោក វ៉ាង ចឹងហ៊ួរ មានប្រសាសន៍ជូនសម្តេចតេជោនាយករដ្ឋមន្រ្តី អំពីផែនការវិនិយោគរបស់ក្រុមហ៊ុនរបស់លោកក្នុងប្រទេសកម្ពុជា លើវិស័យអាកាសចរណ៍ស៊ីវិល និងទេសចរណ៍។ លោក វ៉ាង ចឹងហ៊ួរ មានប្រសាសន៍បន្តថា បច្ចុប្បន្នក្រុមហ៊ុនរបស់លោកមានយន្តហោះដឹកអ្នកដំណើរចំនួនជាង ៦០គ្រឿង និងកំពុងបញ្ជាទិញចំនួន ជាង១០០គ្រឿងទៀតដើម្បីបម្រើឲ្យសេវាដឹកជញ្ជូនអ្នកដំណើរតាមផ្លូវអាកាស ពិសេសការដឹកជញ្ជូនអ្នកទេសចរណ៍ចិន ឆ្ពោះមកកាន់ប្រទេសកម្ពុជាឲ្យកាន់តែមានចំនួនច្រើនឡើង។
សម្តេចតេជោនាយករដ្ឋមន្រ្តី សូមស្វាគមន៍ចំពោះ ក្រុមហ៊ុនអាកាសចរណ៍សៀងហៃស្រ្ពីង ក្នុងការបើកការិយាល័យក្នុងប្រទេសកម្ពុជា ពិសេសការជួយបណ្តុះបណ្តាល លើភាសាចិន និងសេវាទេសចរណ៍ជូនដល់ជនជាតិកម្ពុជា។ សម្តេចតេជោនាយករដ្ឋមន្រ្តីមានប្រសាសន៍បន្តថា s០,០០១% នៃប្រជាជនចិនសរុប ទៅធ្វើទេសចរណ៍ក្នុងប្រទេសកម្ពុជា តាមរយៈការបង្កើតជើងហោះហើររបស់ក្រុមហ៊ុនអាកាសចរណ៍ស្រ្ពីង ពីបណ្តាខេត្តនានារបស់ប្រទេសចិន មកកាន់ប្រទេសកម្ពុជាតាមរយៈគោលនយោបាយបើកចំហរជើងមេឃរបស់កម្ពុជា។ សម្តេចតេជោនាយករដ្ឋមន្ត្រី ក៏បានស្វាគមន៍ ចំពោះក្រុមហ៊ុនដែលមានបំណងបណ្តុះបណ្តាលធនធានមនុស្សលើសេវាកម្មទេសចរណ៍ ដល់កម្ពុជា ដើម្បីវិស័យទេសចរណ៍កាន់តែមានភពរីកចម្រើនទ្វេឡើងថែមទៀត។