បន្ទាប់មកសម្តេចតេជោនាយករដ្ឋមន្រ្តី អនុញ្ញាតឲ្យគណៈប្រតិភូក្រុមហ៊ុនហ៊ូវ៉ៃ ដឹកនាំដោយលោក លី ជឹងកឺ អនុប្រធានក្រុមប្រឹក្សាភិបាលក្រុមហ៊ុនហ៊ូវ៉ៃ ចូលជួបសំដែងការគួរសម និងពិភាក្សាការងារ នៅរសៀលថ្ងៃទី១១ ខែកញ្ញា ឆ្នាំ២០១៦។
លោក លី ជឹងកឺ មានប្រសាសន៍ជំរាបជូនសម្តេចតេជោនាយករដ្ឋមន្រ្តីថា ក្រុមហ៊ុនរបស់លោកបានបណ្តាក់ទុនវិនិយោគក្នុងប្រទេសកម្ពុជា ក្នុងឆ្នាំ១៩៩៩ រហូតមកដល់ពេលនេះមានរយៈពេលជាង១៧ឆ្នាំរួចមមកហើយ។ ទាក់ទិនទៅនិងអាជីវកម្មរបស់ក្រុមហ៊ុនកាលពីឆ្នាំ២០១៥កន្លងទៅ ក្រុមហ៊ុនបានធ្វើការលក់ផលិតផលស្មាតហ្រ្វូនរបស់ក្រុមហ៊ុនមានរហូតដល់៦០ ពាន់លានដុល្លា នៅលើទីផ្សាររបស់ពិភពលោក។ នៅក្នុងទីផ្សារនៃប្រទេសកម្ពុជា ក្រុមហ៊ុនរបស់លោកនឹងពង្រីកទីផ្សារឲ្យកាន់តែមានទំហំធំឡើង ពោលគឺបច្ចុប្បន្នក្រុមហ៊ុនកំពុងដំណើរការសាងសង់អគារការិយាល័យ និងមជ្ឈមណ្ឌលព័ត៌មានដ៏ធំនៅកម្ពុជាដែលគ្រោងនឹងបញ្ចប់នៅក្នុងឆ្នាំ២០១៧ខាងមុខ។
ជាមួយនិងការវិនិយោគនៅកម្ពុជាលោក លី ជឹងកឺ មានប្រសាសន៍បន្តថា ក្រុមហ៊ុនរបស់លោកបានធ្វើការសហការក្នុងការ ជួយបណ្តុះបណ្តាលធនធានមនុស្ស ជូនដល់មន្រ្តីរាជរដ្ឋាភិបាលកម្ពុជា ការសហការជាមួយនិងក្រសួងប្រៃសណី និងទូរគមនាគមន៍ ជួយដល់ការងារមនុស្សធម៌ របស់កាកបាទក្រហមកម្ពុជា និងសហភាពសហព័ន្ធយុវជនកម្ពុជា។ លោកប្រធានក៏បានគូសបញ្ជាក់ដែរថា នៅកម្ពុជាក្រុមហ៊ុនរបស់លោកមានបុគ្គលិកចំនួនជាង៤០០នាក់ក្នុងចំនួននោះប្រមាណ៨០%ជាជនជាតិ កម្ពុជា ដែលទទួលបាននូវការបណ្តុះបណ្តាលប្រកបដោយសមត្ថភាពខ្ពស់។
ជាការឆ្លើយតប សម្តេចតេជោ នាយករដ្ឋមន្រ្តីមានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះក្រុមហ៊ុនហ៊ូវ៉ៃ ដែលបានរួមចំណែកជួយដល់ការបណ្តុះបណ្តាលធនធានមនុស្សនៅកម្ពុជា។ ជាមួយគ្នានេះសម្តេចបានសំដែងនូវការរីករាយចំពោះភាពរីកចម្រើនរបស់ក្រុមហ៊ុន ហ៊ូវ៉ៃ ក្នុងការបណ្តាក់ទុនវិនិយោគក្នុងប្រទេសកម្ពុជា ហើយសម្តេចសន្យាថាសម្តេច និងអញ្ជើញទៅចូលរួមក្នុង ពិធីសម្ពោធដាក់ឲ្យប្រើប្រាស់ជាផ្លូវការ អគារការិយាល័យថ្មីរបស់ក្រុមហ៊ុននៅពេលដំណើរការសាងសង់រួចរាល់ ។