សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា
បានជម្រាបឯកឧត្តម Hugnh Dam សមាជិកការិយាល័យនយោបាយបក្សកុម្មុយនីស្តវៀតណាម
និង ជាប្រធានប្រតិភូមជ្ឈឹមរណសិរ្សមាតុភូមិវៀតណាម នៅក្នុងជំនួបនៅ
វិមានសន្តិភាព នៅថ្ងៃទី ៣០ ខែវិច្ឆិកា ឆ្នាំ ២០១១ ថាសម្តេចមានសេចក្តីរីករាយចំពោះកិច្ចសហប្រតិបត្តិការលើគ្រប់
វិស័យរវាងប្រទេសទាំង ៣ គឺកម្ពុជា វៀតណាម និង ឡាវ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តី
បានឲ្យដឹងថា សម្តេចតេជោនាយករដ្ឋមន្ត្រី
មានប្រសាសន៍ថា
កិច្ចសហប្រតិបត្តិការទាំងនោះគឺមានការចូលរួមចំណែកយ៉ាងសកម្មពីរណសិរ្សប្រទេសទាំង
៣ ដែលត្រូវលើកទឹកចិត្តឲ្យមានការពង្រីកកិច្ចសហប្រតិបត្តិការរវាងប្រទេសទាំង
៣ ឲ្យបាន កាន់តែប្រសើរឡើងថែមទៀត ជាពិសេសលើវិស័យ សេដ្ឋកិច្ច ពាណិជ្ជកម្ម និង
ការអភិវឌ្ឍសង្គមផងដែរ។ សម្តេចនាយករដ្ឋមន្ត្រីក៏បានផ្តល់អនុសាសន៍ឲ្យរណសិរ្សប្រទេសទាំង
៣ ធ្វើយ៉ាងណាយកចិត្ត ទុកដាក់ដល់កម្មវិធីអភិវឌ្ឍរបស់ប្រទេសទាំង ៣
ក្នុងតំបន់ត្រីកោណកម្ពុជា វៀតណាម ឡាវនោះ។
នៅក្នុងជំនួបនោះឯកឧត្តម Hugnh Dam
បានជំរាបជូនសម្តេចតេជោនាយករដ្ឋមន្ត្រីថា
លោកមានសេចក្តីរីករាយយ៉ាងខ្លាំងដោយបានមកបំពេញទស្សនកិច្ចនៅក្នុងព្រះរាជាណាចក្រកម្ពុជា
ហើយទស្សនកិច្ចនេះ
គឺដើម្បីចូលរួមប្រជុំរវាងរណសិរ្សទាំង៣ប្រទេស(កម្ពុជា-វៀត ណាម-ឡាវ)និង
ដើម្បីជំរុញកិច្ចសហប្រតិបត្តិការរវាងប្រទេសទាំង ៣
ដែលកន្លងមកមានកិច្ចសហ ប្រតិបត្តិការទ្វេភាគី ប៉ុន្តែនៅពេលនេះសន្និសីទរវាងប្រទេសទាំង
៣ នេះគឺដើម្បីជំរុញកិច្ចសហប្រតិបត្តិ ការលើគ្រប់វិស័យទាំងអស់៕