ការដ្ឋានជួសជុល និង
សាងសង់ផ្លូវកៅស៊ូ ២ ជាន់ប្រភេទ DBST ប្រវែងជាង ៨០ គម
នៅក្នុងខេត្តពោធិ៍សាត់ ដែលជាគម្រោងមួយ
ស្ថិតនៅក្នុងគម្រោងកែលំអផ្លូវលំជនបទប្រវែងជាង ៥០៥ គម
ក្នុងខេត្តគោលដៅចំនួន ៧ ស្ថិតនៅក្រោមឥណទានរបស់ធនាគារអភិវឌ្ឍអាស៊ី
កំចីពីសាធារណរដ្ឋកូរ៉េ បដិភាគរបស់រាជ រដ្ឋាភិបាល និង ជំនួយឥតសំណងរបស់មូលនិធិអភិវឌ្ឍន៍ណ័រឌិក
ត្រូវបានប្រកាសបើកដោយ សម្តេចអគ្គមហាសេនាបតីតេជោ
ហ៊ុន សែន នាព្រឹកថ្ងៃទី ១ ខែធ្នូ ឆ្នាំ ២០១១ ស្ថិតនៅស្រុកបាកាន។ ក្រៅពីការដ្ឋាននៅក្នុងខេត្តពោធិ៍សាត់
ការដ្ឋាន ជួសជុលនិងសាងសង់កែលម្អផ្លូវលំជនបទស្ថិតក្នុង ខេត្តកំពង់ស្ពឺ
កំពង់ឆ្នាំង បាត់ដំបង សៀមរាប កំពង់ធំ និងកំពង់ចាម ជាខេត្តដែលស្ថិត
នៅក្នុងគម្រោងការនេះដែរ ក៏ត្រូវបានប្រកាសបើក នៅក្នុងថ្ងៃតែមួយ។
ការដ្ឋាននៅខេត្តកំពង់ស្ពឺត្រូវបានបើកដោយឯកឧត្តម សាយ ឈុំ អនុប្រធានទី ២ រដ្ឋសភា ។
ការដ្ឋាននៅខេត្តកំពង់ឆ្នាំង ប្រកាសបើកដោយសម្តេចចៅហ្វាវាំង គង់ សំអុល ឧបនាយករដ្ឋមន្ត្រី
រដ្ឋមន្ត្រីក្រសួងព្រះបរមរាជវាំង និង
ការដ្ឋាននៅខេត្តបាត់ដំបងបានបើកដោយឯកឧត្តម ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ក្នុងឋានៈជាតំណាងដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី។
ថ្លែងនៅក្នុងពិធីសម្ពោធការដ្ឋាននៅក្នុងខេត្តពោធិ៍សាត់
សម្តេចតេជោនាយករដ្ឋមន្ត្រីមានប្រសាសន៍ថា
នេះជាជំហានថ្មីមួយទៀតនៅក្នុងការអភិវឌ្ឍប្រទេសជាតិរបស់យើង
ដែលកាលពីពេលមុននេះយើងមានផ្លូវថ្មើរជើង និង ផ្លូវរទេះ ហើយ
នៅពេលបន្ទាប់មកយើងមានផ្លូវលំ។
ឥឡូវនេះយើងចាប់ផ្តើមប្រែក្លាយផ្លូវលំក្រាល
គ្រួសក្រហមឲ្យទៅជាផ្លូវលំចាក់កៅស៊ូ ដែលយើងសង្ឃឹមថា
គម្រោងដែលចាប់ផ្តើមនេះមិនបញ្ចប់ត្រឹមតែ ៥០០ គម នេះទេ
ប៉ុន្តែវានឹងឈានទៅដល់ការបញ្ចប់ដ៏វែងឆ្ងាយ ព្រោះការអភិវឌ្ឍប្រទេសមួយវាមិនមាន
ត្រឹមតែ ៥០០ គម នោះទេ
ហើយគឺមានតែប្រជាពលរដ្ឋតែប៉ុណ្ណោះដែលបានទទួលផលពីផ្លូវនេះ។
សម្តេចតេជោមានប្រសាសន៍ថា «សម្រាប់ខ្ញុំ
ខ្ញុំមានមោទនភាពនៅត្រង់ថា ខ្ញុំមានចក្ខុវិស័យត្រូវ ដែលនៅក្រោយឆ្នាំ
២០០០ នៅពេលប្រទេសជាតិមានសន្តិភាពពេញលេញ និង នៅក្រោយទឹកជំនន់នោះ
យើងបានខិតខំកសាងផ្លូវលំ និង ស្ពានដើម្បីតភ្ជាប់
ហើយបានចាប់ផ្តើមធ្វើឲ្យកំណើនសេដ្ឋកិច្ច ជនបទកក្រើកឡើង»។ សម្តេចតេជោមានប្រសាសន៍ថា
សម្រាប់អ្នកជំនាន់ក្រោយត្រូវតែខិតខំធ្វើយ៉ាងណា កសាងផ្លូវនៅគ្រប់បណ្តាញទាំងអស់ក្លាយទៅជាបណ្តាញដែលក្រាលកៅស៊ូ
និង ចាក់បេតុង ប៉ុន្តែក្នុងដំណាក់កាលដែលខ្ញុំដឹកនាំពីដំណាក់កាល ១
ទៅកាន់ដំណាក់កាល ១ គឺបានដំណើរការរួចមកហើយៗបានចាប់ផ្តើមពីបាតដៃទទេ។
សម្តេចតេជោនាយករដ្ឋមន្ត្រីថ្លែងឲ្យដឹងថា «អាទិភាពដែលខ្ញុំបានប្រកាសតាំងពីឆ្នាំ
១៩៨៧ មកគឺអភិវឌ្ឍផ្លូវ ទឹក ភ្លើង និង មនុស្ស
គឺយើងដោះស្រាយទឹកសម្រាប់ការធ្វើស្រែរបស់ប្រជាកសិករ ដោះស្រាយផ្លូវ
កំពង់ផែ ព្រលានយន្តហោះ ក្នុងផ្នែកគមនាគមន៍ ដោះស្រាយបញ្ហាអគ្គិសនី និង
ដោះស្រាយការបណ្តុះបណ្តាលធនធានមនុស្ស
ដូច្នេះយើងកំពុងធ្វើសកម្មភាពយ៉ាងមមាញឹក បើគ្មានចំណុចទាំង ៤
នេះទេយើងពិបាកដើរហើយ»។
ឯកឧត្តម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទបានថ្លែងឲ្យដឹងថា
គម្រោងផ្លូវជនបទ ដែលត្រូវសាងសង់ដោយក្រាលកៅស៊ូមានចំនួន ១៩ ខ្សែ
ស្ថិតនៅក្នុងខេត្តចំនួន ៧ ក្នុងនោះមាន ខេត្តកំពង់ចាម ចំនួន៣ខ្សែប្រវែង ៦៨,៧
គម ខេត្តកំពង់ធំ ចំនួន១ខ្សែប្រវែង ៦៦,២គម ខេត្តសៀមរាប ចំនួន២ខ្សែប្រវែង ៧៥,៨
គម ខេត្តកំពង់ស្ពឺ ចំនួន២ខ្សែប្រវែង៦៩,៣គម ខេត្តកំពង់ឆ្នាំង ចំនួន៣ខ្សែ ប្រវែង៧២,៨
គម ខេត្តបាត់ដំបង ចំនួន៣ខ្សែប្រវែង៧២គម និង ខេត្តពោធិសាត់
ចំនួន៥ខ្សែប្រវែង៨០,៦គម។
ឯកឧត្តម ជា សុផារ៉ា បានឲ្យដឹងថា ការដ្ឋាននៃការសាងសង់មានរយៈពេលចំនួន
៣០ ខែគឺរហូតដល់ខែឧសភា ឆ្នាំ ២០១៤ ក្នុងនោះរាជរដ្ឋាភិបាលកម្ពុជាបានចំណាយថវិកាបដិភាគចំនួន
៧,២៥លានដុល្លារអាមេរិក រួមជាមួយឥណទានរបស់ធនាគារអភិវឌ្ឍន៍អាស៊ីចំនួន ៣៥
លានដុល្លារអាមេរិក ឥណទានបស់សាធារណរដ្ឋកូរ៉េចំនួន ២១លានដុល្លារអាមេរិក និង
ហិរញ្ញប្បទានឥតសំណងរបស់មូលនិធិអភិវឌ្ឍន៍ណ័រឌិក ចំនួន ៥,៤០
លានដុល្លារអាមេរិក។
ទាក់ទងនឹងថវិកាជំនួយ
និងកម្ចីពីអង្គការ និងប្រទេសជាដៃគូរអភិវឌ្ឍន៍នោះ សម្តេចតេជោនាយករដ្ឋមន្ត្រី
បានលើកឡើងពន្យល់ថា "មានអ្នកខ្លះ និយាយថា
ជំនួយបរទេសមកច្រើនណាស់ក្នុងមួយឆ្នាំៗ ហេតុម៉េចក៏រដ្ឋាភិបាល
មិនយកមកចែកឲ្យប្រជាជន?។ ខ្ញុំសូមបកស្រាយថា នៅលើពិភពលោកនេះ
គ្មានប្រទេសណាមួយ ដែលគេយកលុយទៅចែកឲ្យប្រជាជនទេ។ ជាងនេះទៅទៀត ជំនួយ ឬក៏ប្រាក់កម្ចីមកពីក្រៅប្រទេស
គឺគេអត់ដែលយកទៅចែកប្រជាជនទេ។ លើកលែងតែមានគ្រោះទឹកជំនន់
ដូចរយៈកាលកន្លងទៅនេះ ក៏មានជំនួយពីបរទេសមកមួយចំនួន
ដែលយើងយកមកចែកតាមរយៈកាកបាទក្រហមកម្ពុជា
ឬគណៈកម្មការជាតិគ្រប់គ្រងគ្រោះមហន្តរាយ និងអាជ្ញាធរដែនដី
ដើម្បីចែកជូនប្រជាជន"។
សម្តេចតេជោមានប្រសាសន៍ថា
ឥឡូវអាចសួរទៅតំណាងធនាគារអភិវឌ្ឍន៍អាស៊ី ADB ប្រចាំកម្ពុជា
ដែលមានវត្តមាននៅទីនេះ តើ ADB ធ្លាប់ឲ្យលុយមកចែកប្រជាជនទេ?
ហើយចាំទៅសួរនាយករដ្ឋមន្ត្រីជប៉ុន ចិន កូរ៉េ អូស្ត្រាលី ណូវែលហ្សេឡង់
អាមេរិក រុស្ស៊ី និងឥណ្ឌា ដែលនឹងមកប្រជុំនៅកម្ពុជា នៅឆ្នាំក្រោយ ហើយយកល្អចាត់តាំងមនុស្ស
ឲ្យទៅជួបតែម្តង ដើម្បីទៅសួរថា តើគេឲ្យលុយមកនោះ
ធ្លាប់ឲ្យយកមកចែកប្រជាជនដែរ ឬក៏អត់?
សម្តេចអគ្គមហាសេនាបតីតេជោ ហ៊ុនសែន
បានគូសបញ្ជាក់ថា "លើពិភពលោក អត់មានទេ សូម្បីតែបញ្ហាទទួលបានឥណទាន
ហើយឥណទាននោះ កុំភ្លេចយើងខ្ចីគេទេ ហើយមាននីតិវិធីស្មុគស្មាញ
និងចំណាយពេលយូរឆ្នាំ។ ដូច្នេះខ្ញុំត្រូវតែបកស្រាយរឿងនេះ
កុំឲ្យមានការភូតភរប្រជាជន"។
