ឯកឧត្តម Phanh Douangchit Vongsa សមាជិកគណៈកម្មាធិកាកណ្តាលមជ្ឈឹមបក្សប្រជាជនបដិវត្តឡាវ
និង ជាប្រធានគណៈកម្មាធិការមជ្ឈឹមរណសិរ្សកសាងជាតិឡាវ បានជម្រាបជូនសម្តេចអគ្គមហាសេនាបតីតេជោ ហ៊ុន សែន ថា
រូបឯកឧត្តមផ្ទាល់ក៏ដូចជាថ្នាក់ដឹកនាំឡាវដែរបានតាមដានអំពីការអភិវឌ្ឍនៅកម្ពុជា
ហើយបានឃើញកម្ពុជាមានការអភិវឌ្ឍយ៉ាងឆាប់រហ័ស
ដែលនេះផ្តើមចេញពីការដឹកនាំដ៏ត្រឹមត្រូវរបស់ថ្នាក់ដឹកនាំជាន់ខ្ពស់កម្ពុជា
ហើយការធ្វើជាម្ចាស់ផ្ទះនៃកិច្ចប្រជុំអាស៊ានរបស់កម្ពុជានៅឆ្នាំ ២០១២
ខាងមុខនេះនឹងនាំកម្ពុជា
ឲ្យមានកិត្យានុភាពកាន់តែខ្ពស់ថែមទៀតនៅលើឆាកអន្តរជាតិនោះ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីថ្លែងថា
នៅក្នុងជំនួបជាមួយសម្តេចតេជោនាយករដ្ឋមន្រ្តី
នៅវិមានសន្តិភាពនាថ្ងៃទី ៣០ ខែ វិច្ឆិកា ឆ្នាំ ២០១១ ឯកឧតត្តម Phanh
Dpuangchit Vongsa ក៏បានជំរាបជូនសម្តេចតេជោអំពីដំណើរទស្សនកិច្ចរបស់លោកគឺដើម្បីចូលរួមក្នុងសន្និសីទរណសិរ្សរវាងប្រទេសទាំង
៣ (កម្ពុជា វៀតណាម ឡាវ) ហើយក៏បានសុំអនុសាសន៍ពីសម្តេចតេជោផងដែរ។ ឯកឧត្តម Phanh Dpuangchit Vongsa
សមាជិកគណៈកម្មាធិកាកណ្តាល មជ្ឈឹមបក្សប្រជាជនបដិវត្តឡាវ និង
ជាប្រធានគណៈកម្មាធិការមជ្ឈឹមរណសិរ្សកសាងជាតិឡាវ បានពាំនាំនូវការផ្តាំផ្ញើសាកសួរសុខទុក្ខពីថ្នាក់ដឹកនាំឡាវជូនចំពោះសម្តេចតេជោនាយករដ្ឋមន្ត្រី
និង បានពាំនាំនូវការចូលរួមរំលែកទុក្ខពីថ្នាក់ដឹកនាំឡាវជូនចំពោះប្រជាជនកម្ពុជា
ដែលបានជួបប្រទះ និង រងគ្រោះដោយទឹកជំនន់នាពេលកន្លងមកនោះ។
ឯកឧត្តម អ៊ាង សុផល្លែត បានឲ្យដឹងថា សម្តេចតេជោនាយករដ្ឋមន្ត្រីបានជំរាបជូនឯកឧត្តមVongsa
វិញ អំពីការលើកឡើងរបស់សម្តេចជាមួយគណៈប្រតិភូវៀតណាម ដោយសម្តេចបានផ្តល់អនុសាសន៍ឲ្យរណសិរ្សនៃប្រទេសទាំង
៣ យកចិត្តទុកដាក់ និង គាំទ្រដល់គម្រោងការអភិវឌ្ឍតំបន់ត្រីកោណ កម្ពុជា
វៀតណាម ឡាវ។ សម្តេចតេជោក៏បានថ្លែងអំណរគុណចំពោះរដ្ឋាភិបាល
និង ប្រជាជនឡាវ ដែលបានផ្តល់នូវជំនួយដល់ប្រជាជនកម្ពុជាដែលរងគ្រោះដោយទឹកជំនន់
និង បានវាយតម្លៃខ្ពស់អំពីការអភិវឌ្ឍន៍រីកចម្រើននៅក្នុងប្រទេសឡាវផងដែរ៕