ល្ងាចថ្ងៃទី ២០ធ្នូ ឆ្នាំ
២០១១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាក្រកម្ពុជា
និងប្រតិភូជាន់ខ្ពស់អមដំណើរបានធ្វើមាតុភូមិនិវត្តន៍បន្ទាប់ពីបានធ្វើដំណើរទៅចូលរួមក្នុងកិច្ចប្រជុំមហាអនុតំបន់មេគង្គ(GMS)លើកទី៤នៅសាធារណរដ្ឋសហភាពមីយ៉ាន់ម៉ាកាលពីថ្ងៃទី១៩
ខែធ្នូ ឆ្នាំ ២០១១។
ក្នុងពេលស្នាក់អាស្រ័យនៅរដ្ឋធានីណៃពិដោរនៃសហភាពមីយ៉ាន់ម៉ា
សម្តេចតេជោនាយករដ្ឋមន្ត្រីបានចូលជួប សំដែងការគួរសមជាមួយឯកឧត្តម ថេន សេន
ប្រធានាធិបតីនៃសាធារណរដ្ឋសហភាពមីយ៉ាន់ម៉ានៅវិមានប្រធានាធិបតី និងបានទទួលជួបគណៈប្រតិភូជាន់ខ្ពស់ចិនដឹកនាំដោយឯកឧត្តម
DAI BINGGUO សមាជិកក្រុមប្រឹក្សា កិច្ចការរដ្ឋចិន ព្រមទាំងបានអនុញ្ញាតឲ្យសមណនិស្សិតកម្ពុជា
ចូលសំដែងការ គួរសមផងដែរ។
ប្រភពពីទូទស្សន៍ជាតិកម្ពុជាបានឲ្យដឹងថា
ឯកឧត្ត ថេន សេន មានប្រសាសន៍សំដែងនូវការស្វាគមន៍យ៉ាងកក់ក្តៅបំផុត
ចំពោះវត្តមានរបស់សម្តេចតេជោនាយករដ្ឋមន្រ្តី
និងគណៈប្រតិភូទាំងអស់ ដែលបានចំណាយពេលវេលាដ៏មានតំលៃ អញ្ជើញមកចូលរួមក្នុងកិច្ចប្រជុំកំពូលមហាអនុតំបន់មេគង្គលើកទី៤
នៅសាធារណរដ្ឋសហភាពមីយ៉ាន់ម៉ា។ ឯកឧត្តមប្រធានាធិបតី សាធារណរដ្ឋសហភាពមីយ៉ាន់ម៉ាបានប្រសាសន៍ថ្លែងនូវអំណរគុណ ចំពោះរាជរដ្ឋាភិបាលកម្ពុជា
ដែលបានផ្តល់ការគាំទ្រដល់ប្រទេសមីយ៉ាន់ម៉ា ក្នុងការធ្វើជាម្ចាស់ផ្ទះនៃកិច្ចប្រជំកំពូលអាស៊ាននៅឆ្នាំ២០១៤ខាងមុខ។
ឯកឧត្តមបន្តថា នឹងសហការជាមួយគ្នា ក្នុងការរៀបចំកិច្ចប្រជុំកំពូលនោះឲ្យទទួលបានជោគជ័យទាំងសំរាប់កម្ពុជាក្នុងឆ្នាំ២០១២ និងទាំងសំរាប់មីយ៉ាន់ម៉ាក្នុងឆ្នាំ២០១៤ខាងមុខ។
សម្តេចតេជោនាយករដ្ឋមន្រ្តី មានប្រសាសន៍សំដែងនូវការរីករាយ
កាលដែលបានអញ្ជើញមកកាន់ទីក្រុងណៃពីដោសាជាថ្មីម្តងទៀត បន្ទាប់ពីដំណើរទស្សនកិច្ចផ្លូវការរបស់សម្តេចកាលពីឆ្នាំ២០០៧។
ជាមួយគ្នានេះ សម្តេចក៏បានស្វាគមន៍ចំពោះរដ្ឋាភិបាល និងប្រជាពលរដ្ឋមីយ៉ាន់ម៉ា
ដែលបានផ្តល់ជំនួយជួយដល់រាជរដ្ឋាភិបាល និងប្រជាពលរដ្ឋកម្ពុជា ដែលបានរងគ្រោះដោយគ្រោះទឹកជំនន់កាលពីពេលកន្លងមក។
សម្តេចតេជោនាយករដ្ឋមន្រ្តី មានប្រសាសន៍បន្តថា
បើទោះបីជាប្រទេសទាំងពីរ បានបើកធ្វើការហោះហើរត្រង់ពី ទីក្រុងហ្យាំងហ្គូន
ទៅក្រុងសៀមរាប និងរាជធានីភ្នំពេញក៏ពិតមែន ប៉ុន្តែវាមិនទាន់គ្រប់គ្រាន់នៅឡើយទេ
គឺទាមទារឲ្យមានការចូលរួមអនុវត្តន៍នូវរាល់កិច្ចព្រមព្រៀង ដែលយើងបានចុះហត្ថលេខាជាមួយគ្នារួចហើយនោះ
ពិសេសរិៈរកវិស័យផ្សេងៗទៀត ដែលប្រទេសទាំងពីរមានសក្តានុពលដូចគ្នា តួយ៉ាងលើវិស័យកសិកម្មជាដើម។
សម្តេចតេជោនាយករដ្ឋមន្រ្តី ក៏បានស្នើដល់ប្រទេសមីយ៉ាន់ម៉ា
ទី១ចូលរួមក្នុងគណៈកម្មាធិការទន្លេមេគង្គ ដើម្បីឲ្យតំបន់នេះកាន់តែកាន់តែមានការសហការ
និងសាមគ្គីភាពរវាងគ្នានិងគ្នា និងទី២ជំរុញឲ្យមានការបង្កើនទំនាក់ទំនងលើគ្រប់កំរិតទាំងអស់សំរាប់ប្រទេសទាំងពីរ។
ឯកឧត្តមប្រធានាធិបតីសាធារណរដ្ឋសហភាពមីយ៉ាន់ម៉ា បានឯកភាពទៅនិងប្រសាសន៍លើកឡើងរបស់
សម្តេចតេជោនាយករដ្ឋមន្រ្តី
ក្នុងនោះឯកឧត្តមនិងស្នើឲ្យមានការផ្លាស់ប្តូរដំណើរទស្សនកិច្ចក្រប់កំរិតទាំងអស់
ដើម្បីផ្លាស់ប្តូរបទពិសោធន៍ពីគ្នាទៅវិញទៅមក ឲ្យកាន់តែរឹងមាំថែមទៀត។ ប្រមុខថ្នាក់ដឹកនាំនៃប្រទេសទាំងពីរ
ក៏បានធ្វើការពិភាក្សាគ្នាយ៉ាងយកចិត្តទុកដាក់ ពីការជំរុញឲ្យមានការតភ្ជាប់ហេដ្ឋារចនាសម្ពន្ធ័ដឹកជញ្ជូន
នៃប្រទេសក្នុងមហាអនុតំបន់មេគង្គ។
ដោយឡែកឯកឧត្តម Dai Bingguo សមាជិកក្រុមប្រឹក្សាកិច្ចការរដ្ឋចិនពេលជួបសម្តែងការគួរសមជាមួយសម្តេចតេជោ
នាយករដ្ឋមន្រ្តី បានមានប្រសាសន៍សំដែងនូវអំណរគុណ
និងបង្ហាញពីការសប្បាយរីករាយក្នុងការធ្វើកិច្ចសហប្រតិបតិ្តការជាមួយ សម្តេចតេជោនាយករដ្ឋមន្រ្តីនៃព្រះរាជាណាចក្រកម្ពុជា
ដើម្បីធ្វើឲ្យកិច្ចប្រជុំកំពូលមហាអនុតំបន់មេគង្គនេះ ប្រព្រឹត្តទៅប្រកបដោយជោគជ័យ។
ក្នុងនោះប្រទេសចិន បានធ្វើការយកចិត្តទុកដាក់បំផុត ចំពោះមហាអនុតំបន់មេគង្គ
និងវេទិកាតំបន់ផ្សេងៗទៀត បន្ទាប់ពីដំណើរការអស់រយៈពេល២០ឆ្នាំកន្លងមក
។ ក្នុងជំនួបពិភាក្សាគ្នានោះដែរ ឯកឧត្តម Dai Bingguo មានប្រសាសន៍ថ្លែងនូវអំណរគុណជូនចំពោះ
សម្តេចតេជោនាយករដ្ឋមន្រ្តី និង
រាជរដ្ឋាភិបាលកម្ពុជា ដែលប្រកាន់ខ្ជាប់នូវការគាំទ្រចំពោះបុព្វហេតុរបស់
រដ្ឋាភិបាលនិងប្រជាជន ចិន ក្នុងបញ្ហាតៃវ៉ាន់ ទីបេ និងបញ្ហាខេត្តស៊ីជាំង
ក៏ដូចជាការគាំទ្រនិងពិគ្រោះពិភាក្សាគ្នាលើបញ្ហា តំបន់ និងអន្តរជាតិដែលមានការយកចិត្តទុកដាក់ដូចគ្នា។
មានប្រសាសនក្នុងជំនួបពិភាក្សានោះ សម្តេចតេជោនាយករដ្ឋ មន្រ្តី មានប្រសាសន៍ចាត់ទុក
ការគោរពអធិបតេយ្យភាពរបស់ចិន ដូចគ្នានិងការគោរពអធិបតេយ្យភាព របស់ខ្លួនឯងផងដែរ
ពិសេសទាក់ទិនទៅនិងកោះតៃវ៉ាន់ ទីបេ និងខេត្តស៊ីជាំងនោះ។ សម្តេចតេជោមានប្រសាសន៍បន្តថា ប្រទេសចិនដ៏ធំមួយនៅក្នុងមហាអនុតំបន់មេគង្គ
ដែលបានផ្តល់ការជួយឧបត្ថម្ភ ដល់ការអភិវឌ្ឍន៍របស់តំបន់។ ជាមួយគ្នានេះសម្តេចតេជោនាយករដ្ឋមន្រ្តី មានប្រសាសន៍ថ្លែងនូវអំណរគុណចំពោះប្រទេសចិន
ដែលមិនគ្រាន់តែបានសន្យាគាំទ្រ ចំពោះបេក្ខភាពរបស់កម្ពុជា
ជាសមាជិកមិនអចិន្រ្តៃយ៍ របស់ក្រុមប្រឹក្សាសន្តិសុខ អង្គការសហប្រជាជាតិប៉ុណ្ណោះទេ
ប៉ុន្តែថែមទាំងបានសន្យាជួយកៀរគរ ដល់បណ្តាប្រទេសជាមិត្តភក្តិរបស់ប្រទេសចិន
ក្នុងការគាំទ្រចំពោះបេក្ខភាពរបស់កម្ពុជាផងដែរ។ នៅក្នុងជំនួបពិភាក្សាគ្នានោះដែរ
ភាគីចិនបានប្រកាសពីការផ្តល់កម្ចីឥតការប្រាក់ចំនួន១០០លានយន់ ដើម្បីឲ្យកម្ពុជាធ្វើការអភិវឌ្ឍន៍សមិទ្ធផលសង្គមឡើងវិញ។
នៅក្នុងពេល អនុញ្ញាតឲ្យព្រះសង្ឃជាសាមណនិស្សិតចំនួន១១អង្គ
និងនិស្សិតកម្ពុជាចំនួន២រូប ចូលជួបសំដែងការគួរសម សម្តេចតេជោនាយករដ្ឋមន្រ្តី មានប្រសា សន៍វាយតំលៃខ្ពស់
និងកោតសរសើរដល់កិច្ចខិតខំប្រឹងប្រៃងរបស់ សាមណនិស្សិត និងនិស្សិត ទាំងអស់
ដែលបានពុះពារនូវរាល់ការលំបាក់គ្រប់បែបយ៉ាង ក្នុងការសិក្សារៀនសូត្រនៅសាធារណរដ្ឋសហភាពមីយ៉ាន់ម៉ា។
សាមណនិស្សិត និងនិស្សិតទាំងអស់ ដែលមានវត្តមានក្នុងពិធីនោះ មានសង្ឃដិកា
និងសំដែងនូវការគោរពដឹងគុណយ៉ាងជ្រាលជ្រៅបំផុត ជូនចំពោះសម្តេចតេជោ នាយករដ្ឋមន្រ្តី និងលោកជំទាវកិត្តិព្រឹទ្ធបណ្ឌិត
ដែលបានបរិច្ចាកនូវធនធានដ៏មានតំលៃសំរាប់ការ ចំណាយលើការធ្វើលិខិតឆ្លងដែន
ការទិញសំបុត្រយន្តហោះ ដល់ការនិមន្តនិងធ្វើដំណើរមកសិក្សារៀនសូត្រនៅសហភាពមីយ៉ាន់ម៉ា
និងនៅពេលនេះទៀតសោត សម្តេចតេជោនាយករដ្ឋមន្រ្តី
បានអនុញ្ញាតឲ្យសាមណនិស្សិត និងនិស្សិតទាំងអស់ បានចូលជួបសំដែងការគួរសម ដើម្បី
ទទួលនូវដំបូន្មានដ៏ល្អនិងជាប្រទីបបង្ហាញផ្លូវ ពីសម្តេចតេជោនាយករដ្ឋមន្រ្តី ដើម្បីឲ្យការសិក្សា រៀនសូត្រកាន់តែទទួលបានជោគជ័យខ្ពស់ខ្ពស់ថែមទៀត។
តាមរយៈឯកឧត្តម ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីដែលបានថ្លែងឲ្យដឹងនៅព្រលានយន្តហោះអន្តរជាតិភ្នំពេញ
មុនការចេញដំណើររបស់គណៈប្រតិភូជាន់ខ្ពស់កាលពីថ្ងៃទី ១៩ ខែ ធ្នូ ឆ្នាំ ២០១១
ថា នៅក្នុងកិច្ចប្រជុំមហាអនុតំបន់មេគង្គ(GMS)លើកទី៤នៅសាធារណរដ្ឋសហភាពមីយ៉ាន់ម៉ានេះមេដឹកនាំ
នៃប្រទេសកម្ពុជា ថៃ វៀតណាម ឡាវ និង ប្រទេសចិនត្រូវធ្វើជាសាក្សីក្នុងពិធីចុះ
ហត្ថលេខាលើអនុស្សរណៈយោគយល់គ្នាសម្រាប់សកម្មភាពរួមគ្នាសំដៅកាត់បន្ថយភាពងាយរងគ្រោះដោយជំងឺអេសដ៍
បញ្ហាទាក់ទងនឹងពលករចំណាកស្រុក អនុស្សរណៈស្តីពីកិច្ចសហប្រតិបត្តិការ
ដើម្បីអភិវឌ្ឍបណ្តាញព័ត៌មានល្បឿនលឿន និង ការចុះហត្ថលេខាលើលក្ខន្តិកៈ
នៃសមាគមអ្នកដឹក ជញ្ជូនទំនិញក្នុងមហាអនុតំបន់មេគង្គ
ដែលចុះហត្ថលេខាដោយលោកឧកញ៉ា គិត ម៉េង
ប្រធានសភាពាណិជ្ជកម្មកម្ពុជា
ដោយសារតែសភាពាណិជ្ជកម្មកម្ពុជាបានបង្កើតសមាគមមួយដើម្បីដឹកជញ្ជូន
ទំនិញឆ្លងកាត់ក្នុងមហាអនុតំបន់មេគង្គនោះ។
ឯកឧត្តម ស្រ៊ី ថាមរុង្គ មានប្រសាសន៍ថា កិច្ចប្រជុំលើកនេះមានការពិភាក្សាក្នុងក្របខណ្ឌយុទ្ធសាស្ត្រថ្មី
សម្រាប់ឆ្នាំ ២០១២-២០២២ ដោយផ្អែកលើបទពិសោធន៍កន្លងមក ជាមួយនឹងសភាពការណ៍ជាក់ស្តែង
នៅក្នុងតំបន់ ក៏ដូចជាសកលលោក ដែលមានការប្រែប្រួលទាំងនយោបាយ ទាំងការប្រែប្រួលអាកាស
ធាតុ ដែលជាកង្វល់សម្រាប់ថ្នាក់ដឹកនាំ
នៃបណ្តាប្រទេសក្នុងមហាអនុតំបន់មេគង្គ ហើយនៅក្នុងកម្ម វិធី ១០
ឆ្នាំខាងមុខនេះ
បណ្តាមេដឹកនាំមហាអនុតំបន់មេគង្គនឹងពិភាក្សាគ្នាដើម្បីធ្វើយ៉ាងណាគៀងគរ
ធនធានពីដៃគូអភិវឌ្ឍសម្រាប់ការស្ថាបនាសេដ្ឋារចនាសម្ព័ន្ធនោះ។
ឯកឧត្តមរដ្ឋមន្ត្រីអមនាយករដ្ឋមន្ត្រីថ្លែងថា
យុទ្ធសាស្ត្រសម្រាប់រយៈពេល ១០ ឆ្នាំ (២០១២-២០២២)ទៅមុខមានកិច្ចសហប្រតិបត្តិការលើវិស័យជាច្រើនដូចជា
ការធ្វើសមាហរណកម្ម ការតភ្ជាប់ ការដឹកជញ្ជូន ការកសាងផ្លូវ ផ្លូវដែក ធារាសាស្ត្រ
បរិស្ថាន ទេសចរណ៍… និង ពាណិជ្ជកម្មផងដែរ។ ឯកឧត្តម ស្រ៊ី ថាមរុង្គ មានប្រសាសនន៍ថា
ក្នុងរយៈពេលកន្លងមក ប្រទេសមហាអនុតំបន់មេគង្គបានអនុ
វត្តកម្មវិធីរបស់ខ្លួនប្រកបដោយជោគជ័យ
ដោយបានប្រែក្លាយតំបន់មួយដែលកាលពីមុនពោរពេញទៅ ដោយការបែកបាក់
មកជាតំបន់មួយដែលត្រូវបានស្តារ និង អភិវឌ្ឍ ជាពិសេស កម្រិតជីវភាពរស់នៅ
របស់ប្រជាជនបានកើនឡើងជាលំដាប់។
កិច្ចប្រជុំមហាអនុតំបន់មេគង្គកំណត់រយៈពេល
៣ ឆ្នាំម្តង។ កិច្ចប្រជុំលើកទី ១ បានប្រព្រឹត្ត
ទៅនៅរាជធានីភ្នំពេញក្នុងឆ្នាំ ២០០២ កិច្ច ប្រជុំលើកទី ២
នៅទីក្រុងគុនម៉ិញប្រទេសចិន ហើយកិច្ច
ប្រជុំមហាអនុតំបន់មេគង្គលើកទី៣បានប្រព្រឹត្តទៅនៅទីក្រុងវៀងច័ន្ទ
ប្រទេសឡាវកាលពីឆ្នាំ២០០៨ ។