ភូមិ
កុមារ SOS រតនគីរី
ដែលជាសមិទ្ធផលថ្មីមួយទៀតនៃកិច្ចសហប្រតិបត្តិការរវាងក្រសួង
សង្គមកិច្ច អតីតយុទ្ធជន និង យុវនីតិសម្បទា ជាមួយអង្គការភូមិកុមារ
SOS អន្តរជាតិ ត្រូវបានសម្ពោធដាក់ឲ្យប្រើប្រាស់នៅ ថ្ងៃទី ២១
ខែធ្នូ ឆ្នាំ ២០១១ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ។
ភូមិ
កុមារ SOS រតនគីរី បានចាប់ផ្តើមសាងសង់កាល ពីខែកក្កដា ឆ្នាំ ២០១០
និង បញ្ចប់នៅក្នុងខែសីហា ឆ្នាំ ២០១១ ដោយក្រសួងសង្គមកិច្ច
អតីតយុទ្ធជន និង យុវនីតិសម្បទា បានផ្តល់ដីទំហំ ១៩ ៨៨៥ ម៉ែត្រក្រឡា
និង អង្គការ SOS អន្តរជាតិរួមជាមួយ សប្បុរសជន ជនជាតិស៊ុយអែត
ដោយចំណាយ ថវិកាសាងសង់ ជាង ១ លាន ២ សែន ៨ ម៉ឺនដុល្លារសហរដ្ឋអាមេរិក។
សម្តេចតេជោនាយករដ្ឋមន្ត្រី
មានប្រសាសន៍ថា អំណោយដ៏សប្បុរសនេះគឺជាកាយវិការបង្ហាញ
ពីការយកចិត្តទុកដាក់របស់អង្គការភូមិកុមារ SOS អន្តរជាតិ
ក៏ដូចជាសប្បុរសជននានាចំពោះកុមារនៅ កម្ពុជា
រួមជាមួយការយកចិត្តទុកដាក់របស់រាជរដ្ឋាភិបាល និង
ស្ថាប័នពាក់ព័ន្ធនានាដើម្បីចូលរួមថែទាំ កុមាររបស់យើង។
ខ្ញុំសូមថ្លែងអំណរគុណចំពោះលោក ហែល មុត ពូទីន ក៏ដូចជាអង្គការ SOS ដែលបានផ្តល់ជំនួយដ៏សប្បុរសសម្រាប់ការកសាងនូវសមិទ្ធផល សម្រាប់អនាគតរបស់កុមារកម្ពុជានេះ។
សម្តេចតេជោនាយករដ្ឋមន្ត្រី
មានប្រសាសន៍ឲ្យដឹងថា ថ្វីត្បិតតែប្រទេសកម្ពុជាពោរពេញទៅដោយការ
ឈឺចាប់កាលពីអតីតកាល ដែលបានកន្លងផុតទៅអស់រយៈពេលជាង ៣០ ឆ្នាំទៅហើយ
ប៉ុន្តែកុមារ កំព្រា និង កុមារក្រីក្រនៅប្រទេសរបស់យើងក៏នៅតែមាន
ដូច្នេះយើងមានតម្រូវការនៅក្នុងការកសាង ភូមិកុមារឡើង
ដើម្បីដោះស្រាយបញ្ហាជូនពួកគេ និង ជៀសវាងបណ្តែតបណ្តោយឲ្យពួករស់នៅ
តាមចិញ្ចើមថ្នល់ឬក៏រស់នៅក្នុងស្ថានភាពមួយ
ដែលខ្វះការយកចិត្តទុកដាក់ឬមិនបានថែទាំនោះ។
ឯកឧត្តម អ៊ិត សំហេង
រដ្ឋមន្ត្រីក្រសួងសង្គមកិច្ច អតីតយុទ្ធជ និងយុវនីតិសម្បទា
មានប្រសាសន៍ឲ្យដឹងថា ជាសរុប អង្គការភូមិកុមារ SOS អន្តរជាតិ
បានចំណាយលើគម្រោងទាំង ៧ អស់ថវិកាចំនួនជាង ១០ លានដុល្លារ អាមេរិក
ហើយជារៀងរាល់ឆ្នាំការចំណាយសម្រាប់ប្រតិបត្តិការទាំងភូមិ និង
ទាំងសាលារៀនគឺពី ១ ៥៤៨ ៤៩០ ទៅ ១ ៩៦០ ២៥៤ ដុល្លារសហរដ្ឋអាមេរិក។
ឯកឧត្តមរដ្ឋមន្ត្រីមានប្រសាសន៍ថា តាងនាមក្រ សួងសង្គមកិច្ច
អតីតយុទ្ធជន និង យុវនីតិសម្បទា និង អង្គការភូមិកុមារ SOS
កម្ពុជាសូមសម្តែងនូវកតញ្ញូតាធម៌យ៉ាងជ្រាលជ្រៅបំផុតជូនចំពោះសម្តេចតេជោនាយករដ្ឋមន្ត្រី ដែលបានផ្តល់គោលការណ៍ដឹកនាំប្រកបដោយគតិបណ្ឌិតធ្វើឲ្យគម្រោងរបស់អង្គការ SOS ទទួលបានជោគជ័យជាបន្តបន្ទាប់នោះ។
ក្រសួង
សង្គមកិច្ច អតីតយុទ្ធជន និង យុវនីតិសម្បទា និង អង្គការភូមិកុមារ
SOS អន្តរជាតិបាន
ចុះអនុស្សរណៈលើកិច្ចព្រមព្រៀងសហប្រតិបត្តិការតាំងពីឆ្នាំ ១៩៩៩
មកម្លេះ ហើយនៅក្នុងរយៈពេល ជាង ១០
ឆ្នាំភាគីទាំងពីរបានសម្រេចនូវគម្រោងចំនួន ៧ ដែលរួមមាន ទី១
ភូមិកុមារ SOS ភ្នំពេញថ្មី នៅ ក្នុងរាជធានីភ្នំពេញសម្ពោធនៅឆ្នាំ
២០០២ ទី២ ភូមិកុមារ SOS អង្គរ ខេត្តសៀមរាបសម្ពោធនៅឆ្នាំ ២០០៣ ទី៣
ភូមិកុមារ SOS ហ័រម៉ានម៉ៃន័រ អង្គរសៀមរាបសម្ពោធឆ្នាំ២០០៥ ទី៤
ភូមិកុមារ SOS បាត់ដំបង ទី៥ សម្ពោធនៅឆ្នាំ ២០០៦ សាលារៀន SOS
ហ័រម៉ានម៉ៃន័រ បាត់ដំបង សម្ពោធនៅឆ្នាំ ២០១០ ទី៦ សាលារៀន SOS
ហ័រម៉ាន ម៉ៃន័រ ភ្នំពេញសម្ពោធនៅខែមករាឆ្នាំ ២០១១ និង ទី៧
ភូមិកុមារ SOS រតនគីរី ដែលបានសម្ពោធនៅថ្ងៃទី ២១ ធ្នូនេះឯង។
គម្រោងទី៨ នៃការ សាងសង់ភូមិកុមារ SOS
នេះគឺស្ថិតនៅក្នុងខេត្តក្រចេះប់ផ្តើមដែលនឹងចាប់ផ្តើមសាងសង់នៅ
ដើមឆ្នាំ ២០១២ ខាងមុខនេះ។