សម្តេចអគ្គមហាសេនាបតីតេជោ ហ៊ុន សែន បានកំណត់យកថ្ងៃទី២១ ខែកញ្ញា ឆ្នាំ២០១២ ខាងមុខនេះ សម្រាប់កម្មវិធីប្រគល់ប័ណ្ណកម្មសិទ្ធិស្ថាពរលើកដំបូងជូនប្រជាពល រដ្ឋនៅក្នុងស្រុកស្នួល ខេត្តក្រចេះ នៅក្នុងយុទ្ធនាការសកម្មភាពថ្មី នយោបាយចាស់ស្តីពីការវាស់វែងប្រគល់កម្មសិទ្ធិដីធ្លី៣ ប្រភេទជូនប្រជាពលរដ្ឋ។
នៅក្នុងពិធីប្រគល់សញ្ញាបត្រដល់និស្សិតសកលវិទ្យាល័យឯកទេសនៃកម្ពុជា នៅមជ្ឈមណ្ឌលសន្និសីទកោះពេជ្រ ក្នុងរាជធានីភ្នំពេញនាថ្ងៃទី៤ ខែកញ្ញា ឆ្នាំ២០១២ ថា សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ខ្ញុំសូមធ្វើការប្រកាសនៅថ្ងៃនេះថា គឺផ្តល់ កម្មសិទ្ធិស្ថាពរជូនប្រជាពលរដ្ឋតែម្តង បន្ទាប់ពីការវាស់វែងរួចរាល់ ដែលការនេះជាការជាកាត់បន្ថយការបំបាត់ដំណាក់កាលអន្តរកាល នៃការផ្តល់កម្មសិទ្ធិបឋម ហើយផ្តល់ជូនកម្មសិទ្ធិស្ថាពរតាមរយៈនៃការចុះបញ្ជីដីធ្លី ជាប្រព័ន្ធដូចដែលបានធ្វើកន្លងទៅនោះ។ខ្ញុំសូមអំពាវនាវសូមបងប្អូនប្រជាពលរដ្ឋកុំលក់ដីដែលរដ្ឋបានប្រគល់កម្មសិទ្ធិជូន សូមរក្សាតកូនតចៅឲ្យបានយូរអង្វែង ព្រោះរយៈពេល៥០ឆ្នាំ ៦០ឆ្នាំ ឬ១០០ឆ្នាំទៀត ដីនៅតែជាដីរបស់យើង ហើយកម្មសិទ្ធិនេះ មិនមែនជាកម្មសិទ្ធិក្លែងក្លាយនោះឡើយ ។
ទាក់ទងនឹងការយឺតយ៉ាវក្នុងការវាស់វែងដីធ្លីជូនប្រជាពលរដ្ឋ ក្នុងសកម្មភាពថ្មី នយោបាយចាស់នោះ សម្តេចតេជោមានប្រសាសន៍ថា ខ្ញុំសូមផ្តាំទៅប្រជាពលរដ្ឋគ្រប់ទីកន្លែងសូមកុំមានការព្រួយបារម្ភ ព្រោះវាគ្រាន់តែជាបញ្ហាពេលវេលា តែការវាស់វែងនៅតែវាស់។ ឯរឿងដែលមិនព្រមវាស់ឲ្យ គឺមានបញ្ហាតែមួយទេ គឺដីដែលមានទំនាស់គ្នាឯងទុកឲ្យប្រជាពលរដ្ឋ ដោះស្រាយគ្នាឯង។ រឿងនេះ បើភាគីទំនាស់ព្រមតាមផ្លូវតុលាការទុកឲ្យតុលាការជាអ្នកដោះស្រាយ ប៉ុន្តែបើប៉ះពាល់ជាមួយដីរដ្ឋ យើងដោះស្រាយជូនព្រោះដោយសារគាត់កាន់កាប់អត់ត្រូវច្បាប់ហ្នឹង ហើយទើបយើងទៅតម្រង់ច្បាប់ឲ្យគាត់ប្រគល់ដីឲ្យគាត់។ ពាក់ព័ន្ធនឹងដីបរិស្ថាន យើងកាត់ឲ្យគាត់ពាក់ព័ន្ធនឹងដីក្រុមហ៊ុនដែលមិនទាន់ដាំដុះ យើងកាត់ឲ្យគាត់វាមិនបញ្ហាទេ។
សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងផងដែរអំពីមូលហេតុ និងនីតិវិធីដែល រាជរដ្ឋាភិបាលសម្រេចផ្តល់កម្មសិទ្ធិជូនដល់បងប្អូនប្រជាពលរដ្ឋ គឺអាស្រ័យដោយសារកត្តាជាច្រើនដែលរួម មាន៖
-ចំណុចទី ១-ក្រោមការអនុវត្ថនីតិវិធីនៃការវាស់វែងកន្លងមក ក្រុមការងារបច្ចេកទេសវាស់វែងបានអនុវត្តយ៉ាងត្រឹមត្រូវនូវស្មារតី នៃអនុក្រឹត្យលេខ៤៦ ស្តីពីការចុះបញ្ជីដីធ្លីមានលក្ខណជាប្រព័ន្ធ។ គោលការណ៍សំខាន់នៃនីតិវិធីនេះ គឺកិច្ចដំណើរការនៃការអនុវត្ត ត្រូវមានការចូលរួមរបស់សហគមន៍ ពិសេសការចូលរួមការព្រមព្រៀងគ្នារវាងអ្នកម្ចាស់ដី ដែលមានព្រំដីជាប់គ្នាក្នុងពេលបោះបង្គោលព្រំដី។
-ចំណុចទី២-គណៈកម្មការរដ្ឋបាល ត្រូវបានចាត់តាំងដោយអភិបាលខេត្តមានភារកិច្ចទទួលខុសត្រូវគ្រប់គ្រងការងារវិនិច្ឆ័យ និងលើកសំណើសុំផ្តល់សិទ្ធិលើដីជូនអ្នកកាន់កាប់ ដែលមានសមាសភាពជាអភិបាលខេត្តជាប្រធាន មន្រ្តីគ្រប់គ្រងការងារតំបន់វិនិច្ឆ័យ ជាសុរិយោដីជាសមាជិក មន្រ្តីទទួលខុសត្រូវការងាររដ្ឋបាលសុរិយោដី នៃមន្ទីររៀបចំដែនដី នគររូបនីយកម្មសំណង់ និងសុរិយោដីខេត្តជាសមាជិក អភិបាលស្រុក មេឃុំ ចៅសង្កាត់ចាស់ព្រឹទ្ធាចារ្យក្នុងទីតាំងធ្វើការវិនិច្ឆ័យ។
-ចំណុចទី៣-មុនការចុះប្រតិបត្តិការនៅតំបន់វិនិច្ឆ័យ អភិបាលខេត្តត្រូវជូនដំណឹងជាសាធារណៈចំនួន៧ ថ្ងៃមុនអំពីពេលវេលា និងទីកន្លែងនៃការប្រជុំផ្សព្វផ្សាយមុនការចុះទៅជួប ប្រជាពលរដ្ឋនៅក្នុងតំបន់ដែលត្រូវធ្វើការវិនិច្ឆ័យ។
-ចំណុចទី៤-ក្នុងការងារនេះប្រជាពលរដ្ឋចូលរួមជា ច្រើនដំណាក់ដោយដំណាក់កាលទី១ គឺប្រជាពលរដ្ឋបានចូលរួមក្នុងពេលបំពេញសាលាកបត្រក្បាលដី ដំណាក់កាលទី២ ប្រជាពលរដ្ឋចូលរួមក្នុងពេលចុះទៅបង្ហាញក្បាលដីជាក់ស្តែង និងបោះបង្គោលព្រំដីដំណាក់កាលទី៣ ប្រជាពលរដ្ឋចូលរួមក្នុងពេលផ្ទៀងផ្ទាត់ចំនួនគ្រួសារដំណាក់កាលទី៤ ចូលរួមក្នុងការវាស់វែង ព្រំដីរបស់ខ្លួន ដំណាក់កាលទី៥ ប្រជាពលរដ្ឋចូលរួមក្នុងពេលបំពេញទម្រង់បែបបទក្បាលដី ដែលចាំបាច់នានា និងដំណាក់កាលទី៦ ប្រជាពលរដ្ឋចូលរួមក្នុងត្រួតពិនិត្យឯកសារវិនិច្ឆ័យ ដែលមានប្លង់ដី និងបញ្ជីឈ្មោះម្ចាស់ដីក្នុងពេលបោះផ្សាយជាសាធារណៈក្នុងរយៈពេល១ ខែដើម្បីទុកពេលឲ្យធ្វើការផ្ទៀងផ្ទាត់ និងមានសិទ្ធិសុំឲ្យគណៈកម្មការរដ្ឋបាលធ្វើការកែតម្រូវទិន្នន័យ ដែលមិនគ្រប់គ្រាន់ឬខុសឆ្គង។
-ចំណុចទី៥ ចំពោះការងារបច្ចេកទេស ការវាស់វែងត្រូវបានប្រើឧបករណ៍ទំនើបប្រភេទ GPS MAP 60S ដូច្នេះថ្ងៃក្រោយនៅក្នុងប័ណ្ណកម្មសិទ្ធិត្រូវតែមានដាក់បញ្ជាក់ថា នៅពេលណាមាន ការវាស់វែង ក្រោយត្រូវប្រើឧបករណ៍ដដែល បើមិនដូច្នេះទេនឹងនាំឲ្យមានបញ្ហាខុសឆ្គងជា មិនខាន។
បញ្ហានេះសម្តេចតេជោបានណែនាំថា ដើម្បីធានាចំពោះបញ្ហាព្រំដីនេះ សូមប្រជាពលរដ្ឋប្រើប្រាស់បង្គោលធំៗ ឬក៏បង្គោលថ្មតែម្តងទៅ ព្រោះភាពចាំបាច់របស់ប្រជាពលរដ្ឋ គឺបង្គោលព្រំដីត្រូវតែរឹងមាំ អត់មានអ្នកណារំកិនបាន។
សម្តេចតេជោនាយករដ្ឋមន្រ្តីថ្លែងថា បញ្ហាអាទិភាពរបស់យើង គឺផ្តល់ដីជូនប្រជាពលរដ្ឋ បើទោះដីនោះជាគម្របព្រៃឈើដីហ្នឹងជាផ្នែកមួយ នៃបរិស្ថានដែលត្រូវការពារក៏ដោយ ប៉ុន្តែប្រជាជនទៅដាំដុះដីហ្នឹង ដែលយើងបានផ្តល់ប្រគល់ឲ្យក្រុមហ៊ុនក៏យើងត្រូវកាត់ចេញពីក្រុមហ៊ុនត្រឡប់មកវិញប្រគល់ឲ្យប្រជាពលរដ្ឋ។
សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា សូមប្រជាពលរដ្ឋនៅតំបន់ដែលក្រុមយុវជនស្ម័គ្រចិត្ត មិនទាន់បានចុះទៅវាស់វែង កុំអស់សង្ឃឹមឲ្យសោះ ព្រោះការវាស់វែងគង់តែទៅដល់ទីនោះទេ ព្រោះរាជរដ្ឋាភិបាលបាន និងកំពុងតែត្រៀមបញ្ជូនកម្លាំងថ្មីបន្ថែមទៀតហើយ។ ឥឡូវនេះយើងមិនចាំបាច់ចំណាយប្រាក់ទៅបោះប័ណ្ណកម្មសិទ្ធិបឋម និងទៅវាស់ដីនៅកន្លែងដដែលនោះទេ៕