សុ ន្ទ រ ក ថា
ឯកឧត្តមបណ្ឌិតសភាចារ្យ សុខ អាន
ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
ក្នុងពិធីសម្ពោធអគារសិក្សាថ្មីសាលាមត្តេយ្យឈុងជឹង
រាជធានីភ្នំពេញ ថ្ងៃទី០៥ ខែកញ្ញា ឆ្នាំ២០១២
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ
- គណៈគ្រប់គ្រងសាលា លោកគ្រូ អ្នកគ្រូ ក្មួយៗសិស្សានុសិស្ស និងចៅៗកុមារាកុមារីទាំងអស់ជាទីស្រលាញ់!
សមិទ្ធផលថ្មីនេះ ឆ្លុះបញ្ចាំងឱ្យឃើញពីការរីកលូតលាស់ជាលំដាប់របស់សាលារៀន ឈុង ជឹង ក្រោមការជួយជ្រោមជ្រែងយ៉ាងពេញទំហឹងប្រកបដោយការយកចិត្តទុកដាក់ និងការទទួលខុសត្រូវខ្ពស់របស់សមាគមចិនខិកម្ពុជា ព្រមទាំងមានការឧបត្ថម្ភគាំទ្រពីគ្រប់មជ្ឈដ្ឋានក្នុងសង្គម។ កាយវិការដ៏សប្បុរស ទាំងនេះ ពិតជាបានរួមចំណែកយ៉ាងច្រើនដល់ការអភិវឌ្ឍធនធានមនុស្ស។ ខ្ញុំសូមឱ្យស្មារតីនៃកិច្ចខិតខំប្រឹងប្រែងនេះបន្តកើតមានជានិរន្តរ៍ ដើម្បីបុព្វហេតុនៃការអប់រំ និងការអភិវឌ្ឍធនធានមនុស្សនៅកម្ពុជា ហើយខ្ញុំសង្ឃឹមថា សាលារៀននេះនឹងបន្តទទួលបាននូវកិត្តិនាមជា «សាលាគំរូអប់រំវប្បធម៌ចិនដ៏ប្រសើរនៅបរទេស»។
ការអប់រំបណ្តុះបណ្តាលធនធានមនុស្ស គឺជាកិច្ចការដ៏សំខាន់និងចាំបាច់សម្រាប់រួមចំណែកដល់ការកសាងសង្គមអារ្យធម៌មួយប្រកបដោយសុខដុមរមនា សុភមង្គល សណ្តាប់ធ្នាប់ និងការរីកចម្រើនជាលំដាប់។ ដោយឡែក ការអប់រំដំបូងពីថ្នាក់មតេ្តយ្យដល់បឋមសិក្សា គឺជាការកសាងមូលដ្ឋានគ្រឹះដ៏មានសារៈសំខាន់សម្រាប់ការអភិវឌ្ឍមូលធនបញ្ញារបស់កុមារាកុមារី ដើម្បីឱ្យពួកគេក្លាយខ្លួនជាកោសិកាសង្គមប្រកបដោយសក្តានុពល។ ក្នុងន័យនេះ ការកសាងអគារសិក្សាថ្មីសម្រាប់ថ្នាក់មត្តេយ្យ របស់សាលារៀន ឈុង ជឹង ពិតជាបានឆ្លើយតបទៅនឹងតម្រូវការចាំបាច់សម្រាប់ការអប់រំ បណ្ដុះបណ្ដាលកុមារតូចៗមុនពេលចាប់ផ្តើមរៀននៅសាលាបឋមសិក្សា។
ការធានាបាននូវគុណភាពនៃការអប់រំដំបូងសម្រាប់កុមារតូចៗ គឺមានភាពចាំបាច់ណាស់សម្រាប់ជួយអភិវឌ្ឍសម្បទា និងសមត្ថភាពរបស់កុមារឱ្យមានការរីកចម្រើនទាំងផ្នែករាងកាយនិងបញ្ញាស្មារតី។ ការស្វែងយល់របស់កុមារក្នុងដំណាក់កាលអប់រំនៅថ្នាក់មតេ្តយ្យ គឺមានសភាពក្លៀវក្លាណាស់។ ដូច្នេះ ការអប់រំនៅថ្នាក់មត្តេយ្យ មិនគ្រាន់តែជាដំណាក់កាលមួយសម្រាប់បន្សាំកុមារទៅនឹងបរិយាកាសសង្គមប៉ុណ្ណោះទេ ប៉ុន្តែថែមទាំងជួយបណ្ដុះគំនិតកុមារតូចៗ ឱ្យស្រឡាញ់និងចូលចិត្ត ការសិក្សាទៀតផង។ ក្នុងដំណាក់កាលនេះ កុមារតូចៗអាចចាប់ផ្តើមស្វែងយល់និងសិក្សាអំពីបញ្ហាផេ្សងៗក្នុងជីវិតដូចជា វិន័យ ការអត់ធ្មត់ ការចេះតស៊ូ និងការយល់ដឹងអំពីហេតុនិងផលជាដើម។ ម្យ៉ាងវិញទៀត ការរៀនបន្សាំខ្លួនទៅនឹងបរិយាកាសសង្គមតាំងពីវ័យក្មេងខ្ចី គឺជាចំណុចចាប់ផ្តើមដ៏ល្អសម្រាប់កុមារតូចៗ ក្នុងការរស់នៅប្រកបដោយភាពថ្លៃថ្នូរ ដឹងខុសដឹងត្រូវ ជាពិសេស ចេះប្រុងប្រយ័ត្ន និងចេះបន្សាំខ្លួនទៅនឹងគ្រប់មជ្ឈដ្ឋានសង្គម។
រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវគោលនយោបាយសំខាន់ៗជាច្រើន សំដៅសម្រេចឱ្យបាននូវគុណភាពខ្ពស់ក្នុងការអប់រំកុមារ ជាពិសេសគឺធ្វើឱ្យកុមារមានសុខភាពល្អ មានសមត្ថភាព មានការប្រាស្រ័យទាក់ទងល្អជាមួយអ្នកដទៃ និងមានការចង់ចេះចង់ដឹង និងឧស្សាហ៍ព្យាយាមក្នុងការសិក្សារៀនសូត្រ។ ដើម្បីសម្រេចបាននូវគោលដៅខាងលើនេះ រាជរដ្ឋាភិបាលបានបើកទូលាយឱ្យមានការចូលរួមឧបត្ថម្ភគាំទ្រពីគ្រប់ភាគីពាក់ព័ន្ធទាំងក្នុងនិងក្រៅប្រទេស។ ជាក់ស្តែង សមាគមចិនខិកម្ពុជា បានចូលរួមអប់រំបណ្ដុះបណ្ដាលក៏ដូចជាកសាងបន្ថែមនូវអគារសិក្សាថ្មីៗ សំដៅជំរុញឱ្យការអនុវត្តគោលនយោបាយរបស់រាជរដ្ឋាភិបាលទទួលបានជោគជ័យ។ ខ្ញុំសូមយកឱកាសនេះ សម្ដែងនូវការអបអរសាទរ និងស្វាគមន៍យ៉ាងកក់ក្តៅចំពោះសមិទ្ធផលនិងសកម្មភាពអប់រំរបស់សមាគមចិនខិកម្ពុជា ដែលបាននិងកំពុងដំណើរការនៅកម្ពុជា។
ជាមួយគ្នានេះដែរ ខ្ញុំសូមអំពាវនាវដល់គ្រប់សាលារៀនទាំងអស់ សូមយកចិត្តទុកដាក់ខ្ពស់ចំពោះកម្មវិធីសិក្សាដែលអាចជួយឱ្យកុមារទទួលបាននូវគុណវុឌ្ឍិមួយចំនួនដូចខាងក្រោម៖ (១)អាចយល់ដឹងអំពីអ្វីដែលខុសនិងអ្វីដែលត្រូវ (២)មានគំនិតច្នៃប្រឌិត (៣)មានសមត្ថភាពទំនាក់ទំនងជាមួយអ្នកដទៃនិងអាចចូលរួមធ្វើការងារជាក្រុម (៤)អាចសម្តែងចេញនូវអារម្មណ៍របស់ខ្លួនតាមរយៈពាក្យសំដី និង ចេះស្តាប់ក៏ដូចជាយល់អំពីអារម្មណ៍របស់អ្នកដទៃ (៥)ចេះគោរពនិងចេះប្រើពាក្យសំដីនិងអាកប្បកិរិយា គួរសម (៦)ចេះស្រឡាញ់ខ្លួនឯង គ្រួសារ និងអ្នកដទៃ (៧)ចូលចិត្តសកម្មភាពដែលនាំមកនូវសុខភាពល្អ និងការរីកចម្រើនទាំងផ្នែករាងកាយនិងបញ្ញា និង(៨)អាចធ្វើសុភវិនិច្ឆ័យនិងការសម្រេចចិត្តដ៏ត្រឹមត្រូវ។
ជាថ្មីម្តងទៀត ខ្ញុំសូមសម្តែងនូវការអបអរសាទរចំពោះសាលារៀន ឈុង ជឹង ដែលបានកសាងអគារសិក្សាថ្មីសម្រាប់កុមារតូចៗ សំដៅរួមចំណែកដល់ការអភិវឌ្ឍវិស័យអប់រំនៅកម្ពុជា ក៏ដូចជាការផ្សារភ្ជាប់ចំណងមិត្តភាព និងទំនាក់ទំនងជាភាតរភាពរវាងព្រះរាជាណាចក្រកម្ពុជានិងសាធារណរដ្ឋប្រជាមានិតចិន ឱ្យកាន់តែរឹងមាំថែមទៀត។
ឆ្លៀតក្នុងឱកាសនេះ ខ្ញុំសូមផ្តាំផ្ញើដល់គណៈគ្រប់គ្រងសាលា លោកគ្រូ អ្នកគ្រូទាំងអស់ សូមបន្តលើកកម្ពស់ស្មារតីវិជ្ជាជីវៈនិងយកចិត្តទុកដាក់ខ្ពស់ក្នុងការបង្ហាត់បង្រៀន និងផ្តល់ការអប់រំ ដល់កុមារតូចៗ កុមារាកុមារី សិស្សានុសិស្ស និងសូមផ្តាំផ្ញើដល់ចៅៗ ក្មួយៗ សិស្សានុសិស្សទាំងអស់ សូមខិតខំសិក្សារៀនសូត្រ បង្កើនសមត្ថភាព និងកសាងខ្លួនឱ្យក្លាយទៅជាសិស្សល្អ មិត្តល្អ កូនល្អ និងពលរដ្ឋល្អក្នុងសង្គម ឱ្យស័ក្តិសមជាទំពាំងស្នងឫស្សី ជាសសរទ្រូងដ៏រឹងមាំរបស់ប្រទេសជាតិ ហើយចៀសវាងដាច់ខាត នូវរាល់អំពើអសកម្ម និងអំពើអបាយមុខដែលនឹងបំផ្លាញខ្លួនឯងផងនិងសង្គមជាតិផង។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ លោកឧកញ៉ា អស់លោក លោកស្រី គណៈគ្រប់គ្រងសាលា លោកគ្រូ អ្នកគ្រូ ចៅៗ កុមារាកុមារី ក្មួយៗសិស្សានុសិស្សទាំងអស់ សូមទទួលបានជោគជ័យគ្រប់ភារកិច្ច មានសុខភាពល្អ និងសុភមង្គលក្នុងក្រុមគ្រួសារ។
សូមអរគុណ!