ភ្នំពេញ: សមាគមអន្តរជាតិរបស់អង្គភាពប្រឆាំងអំពើពុករលួយ (IAACA) ត្រូវប្រជុំប្រចាំឆ្នាំលើកទី៦ នៅទីក្រុងគូឡាឡាំពួរ ប្រទេសម៉ាឡេស៊ី ចាប់ពីថ្ងៃទី៤ ដល់ថ្ងៃទី៧ ខែតុលា ឆ្នាំ២០១២។ ក្នុងនោះ មន្ត្រីក្រសួងយុត្តិធម៌ អ្នកច្បាប់ ព្រះរាជអាជ្ញា និងចៅក្រម របស់ប្រទេសកម្ពុជា ក៏បានទៅចូលរួមកិច្ចប្រជុំនោះផងដែរ។
លោកស្រី ជា លាង អគ្គព្រះរាជអាជ្ញា នៃមហាអយ្យកាអមតុលាការកំពូល និងជាសហព្រះរាជអាជ្ញាភាគីកម្ពុជា នៅតុលាការខ្មែរក្រហម បានដឹកនាំប្រតិភូ ១ ទៅចូលរួមកិច្ចប្រជុំនោះ។ លោក ច័ន្ទ តារារស្មី ព្រះរាជអាជ្ញា នៃមហាអយ្យការអមតុលាការកំពូល លោក ផាន់វណ្ណារ័ត្ន ព្រះរាជអាជ្ញា នៃអយ្យការអមសាលាដំបូង ខេត្តបន្ទាយមានជ័យ លោក ស្រ៊ាង រតនៈ ព្រះរាជអាជ្ញារងអមតុលាការ ខេត្តសៀមរាប លោក កិ ម៉ានេរ៉ា ចៅក្រមសាលាដំបូង ខេត្តព្រៃវែង ព្រមទាំងមន្ត្រីពីក្រសួងយុត្តិធម៌ និងមន្ត្រីអង្គភាពប្រឆាំងអំពើពុករលួយ បានអញ្ជើញទៅចូលរួមប្រជុំ នៃសមាគមអន្តរជាតិនៃអង្គភាពប្រឆាំងអំពើពុករលួយនោះ។
បំណងនៃកិច្ចប្រជុំប្រចាំឆ្នាំនោះ ដើម្បីចែករំលែកបទពិសោធន៍ ផ្លាស់ប្ដូរព័ត៌មាន និងផ្ដល់ជំនួយផ្នែកច្បាប់ និងបច្ចេកទេស ស្ដីពី តួនាទីព្រះរាជាអាជ្ញា និងចៅក្រម និងមន្ត្រីអាជ្ញាធរជំនាញនានា ក្នុងការប្រឆាំងអំពើពុករលួយ ក្នុងចំណោមប្រទេស ១៥០ ជាសមាជិក នៃសមាគម ( IAACA )។
តាមគម្រោង លោកស្រី ជា លាង អគ្គព្រះរាជអាជ្ញា អយ្យការអមតុលាការកំពូល នឹងជួបពិភាក្សាការងារ និងសំដែងគួរសមនឹងលោក ចាវ ជានមីង អគ្គរដ្ឋអាជ្ញា នៃមហាអយ្យការអមតុលាការ នៃសាធារណរដ្ឋប្រជាមានិតចិន នៅទីក្រុងកូឡាឡាំពួរ ដោយផ្ដោតលើកិច្ចសហប្រតិបត្តិការ។ ជំនួបនោះ ធ្វើនៅថ្ងៃទី៥ ខែតុលា ឆ្នាំ២០១២ កន្លងមក។
លោកស្រី ជា លាង ក៏នឹងអញ្ជើញលោក ចាវ ជានមីង អគ្គរដ្ឋអាជ្ញាប្រទេសចិន មកទស្សនកិច្ច នៅប្រទេសកម្ពុជា ក្នុងពេលវេលាសមស្របណាមួយផងដែរ៕