ដោយ ៖ វណ្ណៈ ថ្ងៃទី 06 តុលា 2012ម៉ោង 16:51:50
ខេត្ដកំពង់ចាម ៖ នៅព្រឹកថ្ងៃទី៦ ខែតុលា ឆ្នាំ២០១២ នៅសាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាម បានរៀបចំពិធីបើកបវេសនកាលជាផ្លូវការឆ្នាំសិក្សា២០១២-២០១៣ ក្រោមអធិបតីភាពលោក ហ៊ុន ម៉ាណែត ប្រធានអាហារូបករណ៍និស្សិតក្រីក្រ និងជាអនុប្រធានក្រុមការងារថ្នាក់កណ្ដាលគណបក្សប្រជាជនកម្ពុជា ចុះជួយខេត្ដកំពង់ចាម ទទួលបន្ទុកការងារយុវជន ព្រមទាំងមាន មន្ដ្រីរាជការ កងកម្លាំងប្រដាប់អាវុធ លោកគ្រូអ្នកគ្រូ និងសិស្ស និស្សិតយ៉ាងច្រើនកុះករ ។
លោក យាន សំបូរ នាយកប្រតិបត្ដិសាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាមបានថ្លែងឱ្យដឹងថា សាខាសាកលវិទ្យាល័យ ជា ស៊ីម កំចាយមារ កំពង់ចាម បានបណ្ដុះបណ្ដាលលើកម្រិតបរិញ្ញាបត្រ បរិញ្ញាបត្ររង និងបរិញ្ញាបត្រជាន់ខ្ពស់ (អនុបណ្ឌិត) ដែលនៅក្នុងកម្រិតនោះ រួមមានជំនាញ គណនេយ្យ ទីផ្សារ ការគ្រប់គ្រងធនធានមនុស្ស ព័ត៌មានវិទ្យា ភាសាអង់គ្លេស អភិវឌ្ឍន៍ជនបទ ក្សេត្រសាស្ដ្រ ការគ្រប់ គ្រងធនធានធម្មជាតិនិងគ្រប់គ្រងពាណិជ្ជកម្មនិងហិរញ្ញវត្ថុ ។ បច្ចុប្បន្នសាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាម មាននិស្សិតកំពុងសិក្សា ១.២៤៦នាក់ក្នុងនោះស្រី៥៦៦នាក់។
លោកនាយកបានបន្ដថា កាលពីដើមមានឈ្មោះថា សាខាសាកលវិទ្យាល័យវេទមហាឫសី ហើយបានធ្វើការផ្លាស់ប្ដូរឈ្មោះថ្មីនៅឆ្នាំ២០០៨ ។ ដំបូងឡើយសាខាសាកលវិទ្យាល័យនេះ ស្ថិតក្នុង ទីតាំងមិនអំណោយផល អគារនិងបន្ទប់ សិក្សាមិនសមរម្យ ទើបមកដល់ឆ្នាំ ២០១២នេះសាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាម បានប្រែមុខមាត់ថ្មីផ្លាស់ប្ដូរទីតាំងកសាងអគារថ្មី ស្កឹមស្កៃដែលមានបន្ទប់សិក្សា យ៉ាងល្អប្រណីត ។ ជាមួយគ្នានោះដែរ សាខាសាកលវិទ្យាល័យ ជា ស៊ីម កំចាយមារ បានផ្ដល់អាហារូបករណ៍រដ្ឋដល់ និស្សិត ថ្នាក់បរិញ្ញាបត្រ ក្នុង១ឆ្នាំមាន ចំនួន៥០នាក់ បើគិតពីឆ្នាំទី១ ដល់ឆ្នាំទី៤ មានចំនួន២០០នាក់ ។ ចំណែកនិស្សិត បានបញ្ចប់ការសិក្សាកន្លងមកមានចំនួន ១.៩៧១នាក់ ក្នុងនោះមានស្រី៥៧៩នាក់ ។
ក្នុងឱកាសនោះលោក ហ៊ុន ម៉ាណែត បានអានសារលិខិតរបស់សម្ដេចអគ្គមហា សេនាបតីតេជោ ហ៊ុន សែន ថ្លែងក្នុង ឱកាសបើកបវេសនកាលឆ្នាំ២០១២-២០១៣ ផ្ញើជូនសិស្សានុសិស្ស ។ ជាមួយគ្នានោះ លោក ហ៊ុន ម៉ាណែត បានថ្លែង កោតសរសើរចំពោះសាកលវិទ្យាធិការ, សាកលវិទ្យាធិការរង, នាយកប្រតិបត្ដិ, លោកនាយកប្រតិបត្ដិរង, លោកគ្រូអ្នកគ្រូ និងបុគ្គលិកទាំងអស់ នៃសាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាម ដែលបានខិតខំបរិច្ចាគទាំង កម្លាំងកាយចិត្ដនិងបញ្ញា គ្រប់គ្រង បង្ហាត់បង្រៀននិស្សិតឱ្យទទួលបានលទ្ធផល គួរជាទីមោទនៈ ។ លោកបន្ដថា ការកែប្រែមុខមាត់របស់សាខាសាកលវិទ្យាល័យ ជា ស៊ីម កំចាយមារ ខេត្ដកំពង់ចាម គឺ ជាការរួមចំណែកអនុវត្ដយុទ្ធសាស្ដ្រ ចតុកោណដំណាក់កាលទី២លើវិស័យអប់រំ របស់រាជរដ្ឋាភិបាលអាណត្ដិទី៤ដែលមាន សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី ។
នៅក្នុងឱកាសនោះដែរ ក៏មានពិធីចែកអំណោយដល់បុគ្គលិក សាស្ដ្រាចារ្យ និស្សិត ព្រមទាំងកងកម្លាំងប្រដាប់អាវុធ និងប្រគល់វិញ្ញាបនបត្រថ្នាក់ឆ្នាំសិក្សាមូលដ្ឋាន (២០១១-២០១២)ជានិមិត្ដរូប ចំនួន៥០នាក់៕
.jpg)
.jpg)