ថ្ងៃទី ០៤ ខែមិនា ឆ្នាំ២០១៣
លោក សត្យា រក្ស
សំណួរ៖ ឥឡូវនេះ យើងឃើញថា មានលេចចេញនូវរូបរាងថ្មីមួយទៀត រវាងគណបក្សប្រឆាំង និងគណបក្សប្រឆាំង ថ្វីត្បិតតែគេបង្កើតជាសំបកថ្មីមួយ ប៉ុន្ដែពួកគេមានទស្សនៈនយោបាយផ្ទុយគ្នា គួរឲ្យប្រឈម។ ទាក់ទងទៅនឹងទស្សនៈផ្ទុយគ្នានេះ សូមលោកបណ្ឌិតធ្វើការបំភ្លឺដើម្បីឲ្យបងប្អូនជនរួមជាតិយើង ពិសេសសមាជិកអ្នកដែលគាំទ្រគណបក្សប្រឆាំងហ្នឹង ស្វែងយល់ឲ្យដឹងអំពីមាយាថនយោបាយរបស់មេបក្សគាត់ហ្នឹងឯង។
អ្វីដែលគួរឲ្យចាប់អារម្មណ៍នោះ គឺលោក សម រង្ស៊ី និង លោក កឹម សុខា ដែលគេសរសេរស្លាកមួយជ្រកជាមួយគ្នាក្រោមស្លាកថា បង្រួបបង្រួម។ ប៉ុន្ដែខ្ញុំមើលទិដ្ឋភាពនយោបាយនៃអ្នកទាំងពីរ ឃើញថាកំពុងតែមានការផ្ទុយគ្នា។ ភាពផ្ទុយគ្នាទីមួយ គឺត្រង់ថា ថ្មីៗនេះ លោក សម រង្ស៊ី បានចេញសេចក្ដីថ្លែងការណ៍ និងធ្វើការអំពាវនាវ សុំឲ្យអ្នកសង្កេតការណ៍អន្ដរជាតិកុំមកសង្កេតការណ៍នៅកម្ពុជា ក្នុងអំឡុងពេលបោះឆ្នោតឆ្នាំ ២០១៣។
ប៉ុន្ដែផ្ទុយទៅវិញ លោក កឹម សុខា ដែលយើងហៅថា ជាសម្ព័ន្ធភាពអីរបស់គាត់ហ្នឹង មានទស្សនៈផ្ទុយទៅនឹង លោក សម រង្ស៊ី គឺសំណូមពរ សុំឲ្យអន្ដរជាតិ មកសង្កេតការណ៍ឲ្យបានច្រើន ហើយឲ្យបានយូរ រាយគ្រប់ខេត្ត ខណ្ឌ រហូតទៅដល់ភូមិ ឃុំ ទៅទៀត ដើម្បីជាការឃ្លាំមើលនូវដំណើរការនៃការបោះឆ្នោត ដែលរៀបចំដោយ គ.ជ.ប សម្រាប់អាណត្តិទី ៥។
អញ្ចឹងទិដ្ឋភាពដែលយើងឃើញថា មានលក្ខណៈផ្ទុយគ្នាទាំងស្រុងបែបនេះ លោកបណ្ឌិតយល់ឃើញយ៉ាងម៉េច ដើម្បីពន្យល់ជូនទៅដល់ជនរួមជាតិ?
លោកបណ្ឌិត ឈឹម ផលវរុណ
ចម្លើយ៖ នេះគឺជាទឡ្ហីករណ៍ដែលស្ដែងចេញជូនប្រជាពលរដ្ឋបានឃើញហើយ គឺ លោក សម រង្ស៊ី និងលោក កឹម សុខា ពីដើមឡើយ គ្មានសារធាតុណាដូចគ្នាទេ ប៉ុន្ដែចេះតែនាំគ្នាបង្ខំចិត្ត រួមគ្នា ហើយអស់ពីជេរគ្នា ក៏ទៅចូលជុំគ្នាវិញទៅ។ ហើយយើងមើលទៅ ការជុំគ្នាវិញនេះ វាគ្រាន់តែជុំគ្នាជាសំបកដូចលោក សត្យា រក្ស បានលើកអំបាញ់មិញហ្នឹង។ ប៉ុន្ដែសារធាតុនយោបាយរបស់បុគ្គលមេដឹកនាំរបស់ គណបក្សទាំងពីរហ្នឹង គឺខុសគ្នា។ លោក សម រង្ស៊ី មានមាយាទនយោបាយរបស់គាត់ មួយបែបផ្សឹង។ លោក កឹម សុខា មានមាយាទនយោបាយរបស់គាត់ ផ្សេងពីលោក សម រង្ស៊ី។ ចង់និយាយថា របៀបទំនើងចិត្ត គេហៅថាឆ្នាស់បែបទំនើងចិត្ត ហ្នឹង គឺលោក សម រង្ស៊ី ហើយ។ មាយាទនយោបាយឆ្នាស់តាមទំនើងចិត្ត នឹកឃើញថាអី បា្រវគ្មានគិតអីទាំងអស់។ ឯលោក កឹម សុខា វិញ មិនមែនឆ្នាស់តាមទំនើងចិត្តទេ គឺអួតតាមទំនើងចិត្ត។ លោក កឹម សុខា នេះ អួតតាមទំនើងចិត្តណាស់ សុទ្ធតែបរទេសហ្នឹងជួយគាត់។ ហើយ លោក សម រង្ស៊ី ឆ្នាស់តាមទំនើងចិត្ត អញ្ចឹងដល់ពេលសារធាតុនយោបាយខុសគ្នាហ្នឹង វាបង្ហាញឲ្យឃើញថា ទោះបីជាគាត់ស្ថិតនៅក្នុងសំបកពងមាន់ថ្មីក៏ដោយ ក៏នៅតែមិនមែនជាកូនភ្លោះពិតទេ គឺកូនភ្លោះសិប្បនិម្មិតទៅវិញទេ។
ឥឡូវយើងមើលទាំងអស់គ្នា កុំឲ្យថាកម្មវិធីយើងចេះតែនិយាយ។ បងប្អូនប្រជាពលរដ្ឋធា្លប់តាមដាន លោក កឹម សុខា ហើយ។ ថ្មីៗហ្នឹង មិនទាន់យូរខែទេ យ៉ាងច្រើនមួយខែ ចាប់ផ្ដើមវិញហើយ ។ គេទៅក្រៅប្រទេសរហូតដល់ទៅបារាំង។ ប៉ុន្មានថ្ងៃថ្មីៗនេះទៀត ទៅអំពាវនាវសហគមន៍អន្ដរជាតិ ឲ្យចូលមកសង្កេតការណ៍បោះឆ្នោតនៅកម្ពុជា។ គេបញ្ជាក់ទៅអ្នកគាំទ្រគាត់ហ្នឹង ថាបងកុំភ័យ បរទេសតាមខ្ញុំ រឿងនេះគេមិនមែនមកសង្កេតការណ៍តែមួយភ្លែតទេ គេមកច្រើននាក់ ហើយយូរថ្ងៃទៀត ហើយរាយគ្រប់ភូមិស្រុក ដើម្បីមកមើល។ គេសុទ្ធតែចោទ គ.ជ.ប ហ្នឹងលួចសន្លឹកឆ្នោតអីអញ្ចឹង។ ហើយស្រាប់ដល់ងាកមកលោក សម រង្ស៊ី វិញ គឺចេញផ្សឹងពី កឹម សុខា ទៅជាអំពាវនាវឲ្យបរទេសកុំមកចុះសង្កេតការណ៍ទៅវិញ។
នេះជាព្រឹត្តិការណ៍ដែលយើងមើលឃើញទស្សនៈពីរនាក់ហ្នឹងខុសគ្នា តើហេតុអី? ។ បើសិនជារឿងវាពិតដែល កឹម សុខា អួតទៅប្រជាពលរដ្ឋហ្នឹងថា ឈ្នះ ថាដូរ យើងឈ្នះហើយពាក្យអស់ហ្នឹង។ បើសិនជាលោក សម រង្ស៊ី ក៏យល់ដូច លោក កឹម សុខា ថាពិតជាដូរមែន ពិតជាឈ្នះមែន ចុះម៉េចក៏មិនឲ្យបរទេសមកទៅ។ ក្រែងថា គ.ជ.ប ហ្នឹង លួចសន្លឹកឆ្នោតឲ្យគណបក្សប្រជាជន។ ហើយចុះបើខ្លួនឯងសង្ឍឹមថាឈ្នះ កុំឲ្យគេលួច សុំឲ្យបរទេសមកមើលមក កុំឲ្យបាត់សម្លេង។ ចុះហេតុអីបានជា លោក សម រង្ស៊ី មិនឲ្យបរទេសមកទៅវិញ។ បានន័យថា លោក សម រង្ស៊ី ទទួលស្គាល់ថាចាញ់រួចទៅហើយ ហើយទទួលស្គាល់ថា ការបោះឆ្នោតហ្នឹង ជាការចាញ់ពិត មិនមែននរណាលួចសន្លឹកឆ្នោតទេ។ ពីព្រោះ គាត់ដឹងដែរតើ ដូចជាការស្ទង់មតិរបស់ IRI ក៏គេមើលឃើញពីការគាំទ្ររបស់ប្រជាពលរដ្ឋខ្មែរ ចំពោះការអភិវឌ្ឍប្រទេស ចំពោះការដឹកនាំប្រទេស ដោយគណបក្សប្រជាជន មើលទៅវាឆ្លុះបញ្ចាំងនឹងសម្លេងឆ្នោតនោះដែរ។
លោក សម រង្ស៊ី ក៏គាត់ដឹងពីសន្ទុះនយោបាយរបស់គាត់ធ្លាក់ចុះយ៉ាងណា ក៏គាត់មើលដឹងដែរ។ ប៉ុន្ដែលើកនេះ លោក សម រង្ស៊ី អត់បានប្រយោជន៍ពីការបោះឆ្នោតទេ ខុសពី ២០០៣ ២០០៨។ តើដោយសារអី? ២០១៣ នេះ លោក សម រង្ស៊ី អត់មានសិទ្ធិបោះឆ្នោត និងឈរឈ្មោះឲ្យគេបោះឆ្នោតទេ។ ដល់អញ្ចឹងការបោះឆ្នោតហ្នឹង អត់មានបានអីទៅគាត់សោះ បានន័យថាគាត់អត់អាចធ្វើតំណាងរាស្ដ្រផងហ្នឹង។ អញ្ចឹងគាត់ដឹងច្បាស់ហើយ អញ្ចឹងចរឹតលោក សម រង្ស៊ី គឺថាឆ្នាស់តាមទំនើងចិត្ត គឺថា បើអញមិនបានស៊ី ឈូសចោលមិនបានស៊ីទាំងអស់គ្នា។ បានន័យថា មិនឲ្យគណបក្សប្រឆាំងដទៃទៀត ឬក៏សមាជិកគណបក្សប្រឆាំងដ៏ទៃទៀតស៊ីបានទេ គឺត្រូវ ឈូសចោលទាំងអស់ ។
លោក សត្យា រក្ស
សំណួរ៖ ដូច្នេះ បើតាមប្រសាសន៍របស់លោកបណ្ឌិតដែលបានលើកឡើង ទាក់ទងទៅនឹងចរឹតឆ្នាស់ ហើយនិងមានះរបស់លោក សម រង្ស៊ី ហ្នឹង ជុំវិញការឃាឃាំង និងមានចេតនាមិនឲ្យអ្នកសង្កេតការណ៍អន្ដរជាតិចូលមកកាន់កម្ពុជា គឺមានន័យថា លោក សម រង្ស៊ី បានបង្កប់ពិសពុលមួយ ដែលចង់លាក់នូវភាពអាសោចរបស់ខ្លួន ចំពោះលទ្ធផលនៃការបោះឆ្នោត ។ចង់និយាយថា ពេលដែលអ្នកសង្កេតការណ៍អន្ដរជាតិ អញ្ជើញមកគ្រប់ច្រកល្ហក ទូទាំងប្រទេសកម្ពុជា គ្រប់ស្ថានីយ៍បោះឆ្នោតទាំងអស់ គេនឹងបានមើលឃើញថា គណបក្សសម រង្ស៊ី ពុំមានសម្លេងគាំទ្រ គឺគាត់ចង់លាក់នូវភាពអាម៉ាស់ហ្នឹង លោកបណ្ឌិតចង់មានប្រសាសន៍រឿងហ្នឹង ឬយ៉ាងម៉េច?
លោកបណ្ឌិត ឈឹម ផលវរុណ
ចម្លើយ៖ ទីមួយ គឺគាត់អត់បានប្រយោជន៍អីទេ។ ទីពីរ ក្នុងន័យគណបក្សរបស់គាត់ គឺទោះបីជាគាត់ដូរប្រធានគណបក្សសម រង្ស៊ី មកប្រធានគណបក្សរួមគ្នាជាមួយ កឹម សុខា ក៏គាត់ដឹងថា ជួសជុលវាមិនកើតដែរ។ កាលដែលគាត់ឈរឈ្មោះក្នុងនាមប្រធានគណបក្សសម រង្ស៊ី វាបាក់មុខអស់ហើយ ដូច្នេះឈរម្ដងទៀត ក៏អត់ប្រយោជន៍ដែរ។ អញ្ចឹងបានជាគាត់បង្ខំចិត្តរួមជាមួយលោក កឹម សុខា បង្កើតសំបកពងមាន់ថ្មី ។ បានន័យថា ជាសម្ព័ន្ធភាពគណបក្សនយោបាយថ្មី។ យ៉ាងហោចណាស់ ក៏អាចរក្សាស្ថានភាពកុំឲ្យដាំដូងដែរ។ ប៉ុន្ដែឥឡូវនេះ គាត់ដឹងថា វាអត់ជួសជុលបានទេ។ ដោយសារ វាអត់ជួសជុលបាន សូម្បីតែឲ្យបរទេសមកដាក់សម្ពាធឲ្យ លោក សម រង្ស៊ី មកចូលរួមបោះឆ្នោត ក៏ដាក់អត់បានទៅហើយ។ អញ្ចឹងគាត់មានតែវិធីមួយទៀតដែលថា ដើម្បីកុំឲ្យការអង្កេតការណ៍អន្ដរជាតិមើលឃើញថា ការបោះឆ្នោតហ្នឹង រលូនល្អនោះ។ ឯរឿងអន់ គឺអន់ គណបក្សរបស់ លោក សម រង្ស៊ី ខ្លួនឯងទេ ដែលប្រជាពលរដ្ឋអត់គាំទ្រហ្នឹង។ អញ្ចឹងលោក សម រង្ស៊ី ដឹងខ្លួនហើយ គឺលាងមុខទុកមុន គឺនិយាយបង្ការទុកមុនកុំឲ្យគេដឹងពីភាពអន់របស់ខ្លួន។ ពីព្រោះ លោក សម រង្ស៊ី ដឹងច្បាស់ណាស់ថា ប្រជាពលរដ្ឋកាលពីមុនៗបោះឆ្នោតឲ្យគាត់ ដោយគេជឿថា គាត់ជាបុគ្គលម្នាក់ដែលមានឥទ្ធិពលទៅលើបរទេស និយាយមានទឹកមាត់ប្រៃ បរទេសជឿ អាចមកជជែកជាមួយប្រមុខរាជរដ្ឋាភិបាល ដើម្បីសម្រួលករណីខ្លះដល់ លោក សម រង្ស៊ី។ ហើយទិដ្ឋភាពពីមុនមក យើងឃើញថា មានការសម្របសម្រួលខ្លះដែរ។ តែឥឡូវនេះ ៣ ឆ្នាំជាងមកហើយ លោក សម រង្ស៊ី ដែលសន្យាថា គាត់នឹងមកកម្ពុជាឆាប់ៗហ្នឹង វាអត់ឃើញមានអីសោះ។ អញ្ចឹងលោក សម រង្ស៊ី ដឹងថា បើទាញប្រជាប្រិយភាពតាមការអូសទាញបរទេសឲ្យនាំគាត់មកស្រុកខ្មែរហ្នឹង វាអស់ត្រឹមថ្ងៃដែលលោក អូបាម៉ា មកកម្ពុជាហ្នឹងឯង។ មកភ្នំពេញ គឺអត់មានឃើញលោក សម រង្ស៊ី តោងកន្ទុយមកផងហ្នឹង។ អញ្ចឹងបានន័យថា គាត់ដឹងថាប្រជាពលរដ្ឋ លែងជឿគាត់ទៀតហើយ ទឹកមាត់គាត់សាបហើយ។
លោក សត្យា រក្ស
សំណួរ៖ ទាក់ទងទៅនឹងការលើកឡើងរបស់លោក សម រង្ស៊ី នេះផងដែរ ដែលពុំមានចេតនាល្អចំពោះដំណើរការបោះឆ្នោតនៅកម្ពុជា ដែលនឹងប្រព្រឹត្តនៅថ្ងៃទី ២៨ ខែ កក្កដា ឆ្នាំ ២០១៣។ តើអំណះអំណាង និងការអំពាវនាវរបស់ លោក សម រង្ស៊ី ហ្នឹង លោកបណ្ឌិតមើលឃើញថា វាមានប្រសិទ្ធភាពទេ សម្រាប់បណ្ដាប្រទេសនានា ដែលគេស្ម័គ្រក្នុងការសង្កេតការណ៍ ហ្នឹង?
លោកបណ្ឌិត ឈឹម ផលវរុណ
ចម្លើយ៖ ត្រង់ហ្នឹង យើងអាចឲ្យប្រជាពលរដ្ឋថ្លឹងជាមួយយើងទាំងអស់គ្នា កុំឲ្យថាយើងចេះតែថាភូតគាត់ ឬក៏ទាញគាត់។ ឲ្យប្រជាពលរដ្ឋទាំងអស់គ្នាថ្លឹងជាមួយយើង កាលដែលលោក សម រង្ស៊ី ប្រើវិធីទប់ស្កាត់កុំឲ្យលោក អូបាម៉ា មកកម្ពុជាហ្នឹង យើងឃើញថា ទប់វាមិនកើតទេ ព្រោះលោក អូបាម៉ា មិនមែនប្រធានលោក សម រង្ស៊ី ទេ លោក អូបាម៉ា ជាប្រធានាធិបតីសហរដ្ឋអាមេរិក។ គេការពារផលប្រយោជន៍ប្រជាជនអាមេរិក និងផលប្រយោជន៍ប្រទេសអាមេរិក គឺ មិនមែនទៅការពារផលប្រយោជន៍ លោក សម រង្ស៊ី ឯណា អញ្ចឹងទប់មិនឈ្នះទេ។ ដល់អញ្ចឹងលើកនេះ គាត់លេងអាល្បែងហ្នឹងទៀត ដើម្បីបំភន័្តប្រជាពលរដ្ឋមួយសារទៀត តែការបំភន្ត័នេះ មិនមែនបំភន្ត័ដើម្បីថាគាត់ឈ្នះទេ គឺបំភន្ត័ថាគាត់អត់បានចាញ់ ពីព្រោះគាត់អត់បានឈរឈ្មោះបោះឆ្នោតទេ ហើយអន្ដរជាតិអត់បានមកមើល។ រឿងតែប៉ុណ្ណេះទេ នៅក្នុងរឿងបំភន្ត័កុំឲ្យគេទទួលស្គាល់ថាគាត់ចាញ់ប៉ុណ្ណឹងឯង។ ការបំភន្ត័នេះ គឺជាការបំភន្ត័ដើម្បីគាត់យកលេសថា គាត់អត់បានចាញ់ គឺដោយសារមូលហេតុ ក ខ គ ឃ ង អញ្ចឹងទៅ។ ដល់ងាកមកលោក កឹម សុខា គាត់ប្រើវិធីបំភន្ត័ផ្សេង។ លោក សម រង្ស៊ី បំភន្ត័តាមរយះយកបរទេសមកបិទបាំងតាមបែបផ្សេង លោក កឹម សុខា បំភន្ត័តាមវិធីអួតថា ឈ្នះៗ បរទេសស្រឡាញ់គាត់ ជឿគាត់ គាំទ្រគាត់។ លោក កឹម សុខា ថាឈ្នះ ប៉ុន្ដែ លោក កឹម សុខា ដាក់សំណួរពី គ.ជ.ប អញ្ចឹងលោក កឹម សុខា ចាប់ផ្ដើមរេហើយ ចាប់ផ្ដើមទាល់ហើយ។ ដល់ចាប់ផ្ដើមទាល់ ពួកគាត់ហ្នឹងធ្វើវិទ្ធង្សនា ឬយុទ្ធនាការចោទប្រកាន់ វាយប្រហារ គ.ជ.ប ថាជាស្ថាប័ននយោបាយគាំទ្រគណបក្សប្រជាជនកម្ពុជា មិនមែនជាស្ថាប័នបច្ចេកទេស លោក កឹម សុខា គាត់ខូច។
ដល់អញ្ចឹងគេហៅថា កាំបិតចិតដងឯង។ នៅពេលដែលគាត់ទៅចោទថា គ.ជ.ប អាក្រក់អញ្ចឹងប្រជាពលរដ្ឋធ្វើម៉េចនឹងជឿ បើ គ.ជ.ប អាក្រក់ធ្វើម៉េច កឹម សុខា ឈ្នះឆ្នោត យើងគិតឲ្យជ្រៅបន្ដិចមើល។ ដល់អញ្ចឹង កឹម សុខា ភូតខ្លួនឯង ដឹងច្បាស់ដូចតែ សម រង្ស៊ី ដូចគ្នា ។ កឹម សុខា ដឹងថា មិនអាចឈ្នះគណបក្សប្រជាជនទេ ប៉ុន្ដែគាត់ត្រូវតែភូត ដល់គាត់ទៅភូតកាំបិតចិតដងឯង នៅត្រង់ថាគាត់បានភូតប្រជាពលរដ្ឋថា គ.ជ.ប បន្លំសន្លឹកឆ្នោត។ អញ្ចឹងធ្វើឲ្យប្រជាពលរដ្ឋសួរថា តើឈ្នះម៉េចនឹងកើត បើ គ.ជ.ប ខាងគេ។ ដល់អញ្ចឹង កឹម សុខា ចេញពាក្យមួយទៀត ខ្ញុំបាននិយាយជាមួយបរទេសហើយ ជាមួយសហគមន៍អន្ដរជាតិ ខ្ញុំទើបតែមកពីបរទេសថ្មីៗហ្នឹង កឹម សុខា និយាយអញ្ចឹង។ ថាអន្ដរជាតិគាំទ្រសំណូមពរខ្ញុំគេនឹងចុះមកអង្កេតការណ៍ ៦ខែ មុនការបោះឆ្នោត គេនឹងមើលស៊ីជម្រៅ មិនមែនមកខ្លីៗអញ្ចឹងទៅ។ តាមពិតជាវិធីដោះទាល់ អួតច្រើនៗចាញ់អាត្មា។ ដល់ប្រជាពលរដ្ឋសួរភ្លាមអញ្ចឹងទៅដោះសារ ពីរនាក់ហ្នឹងចេញមកខុសគ្នា មួយឆ្នាស់តាមទំនើងចិត្ដ មួយអួតតាមទំនើងចិត្ត ។ កាំបិតវាចិតដងឯងអញ្ចឹង។
លោក សត្យា រក្ស
សំណួរ៖ ទាក់ទងទៅនឹងអំនួតរបស់លោក កឹម សុខា នេះ សូម្បីតែមេគណបក្សសម រង្ស៊ី ក៏ធ្លាប់ចាត់ទុកដែរថា កឹម សុខា នេះជាជើងឯកខាងអួតពីអង្កាល នេះគឺជាការលើករបស់ សម រង្ស៊ី ពេលដែលគេមិនទាន់ចុះសម្រុងនឹងគ្នានោះ។ តែឥឡូវហ្នឹង ក៏មិនប្រាកដថាចុះសម្រុងគ្នាផងដែរ គឺជាជើងឯកខាងអួតដែលជាប្រសិទ្ធិនាមដែលគណបក្សសម រង្ស៊ី គេប្រគល់ឲ្យ កឹម សុខា។
ទាក់ទងទៅនឹងប្រាក់ខែកម្មករ ១៥០ ដុល្លារ ដែលឥឡូវហ្នឹងពេលខ្លះគេថា ឡើងដល់ ២០០ ដុល្លារទៀត។ មន្ដ្រីរាជការ ១លាន ចាស់ៗអាយុ ៦៥ ឆ្នាំ ហ្នឹង ១០ ដុល្លារ ប៉ុន្ដែគាត់បែរជាអួតថា ត្រកួនមួយគីឡូក្រាមជាង ១០ដុល្លារ អញ្ចឹងត្រង់ហ្នឹងគឺច្រឡំបល់មួយទៀតហើយ។
អញ្ចឹងត្រង់ចំណុចនេះ ខ្ញុំចង់ឲ្យលោកបណ្ឌិតជួយបញ្ចេញយោបល់ផងដែរ ដោយសារតែលោកបណ្ឌិតបានលើកឡើងពីភាពអស់សង្ឃឹមរបស់គណបក្សប្រឆាំងនៅកម្ពុជា។ ទាំង កឹម សុខា ក៏ជាមនុស្សដែលកំពុងតែអស់សង្ឃឹម ទាំងលោក សម រង្ស៊ី ក៏ជាមនុស្សដែលកំពុងតែអស់សង្ឃឹមដូចគ្នា ចំពោះជោគជ័យ ឬក៏ការដណ្ដើមប្រជាប្រិយភាពក្នុងថ្ងៃបោះឆ្នោត។ លោកបណ្ឌិតយល់ឃើញថា តើដោយសារតែភាពអស់សង្ឃឹមដែលគាត់ពុំបានឃើញសញ្ញាណាមួយរឿងថា អាចនឹងយកឈ្នះគណបក្សប្រជាជនកម្ពុជា បានទេដឹង បានជាគាត់សន្យាជ្រុលហួសហេតុបែបនេះ?
លោកបណ្ឌិត ឈឹម ផលវរុណ
ចម្លើយ៖ ទស្សនៈវិភាគរបស់លោក សត្យារក្ស គឺស្រដៀងគ្នា និងការពិចារណារបស់ប្រជាពលរដ្ឋដែរ គឺស្រដៀងគ្នា។ កាលដែលគាត់លេងល្បិចកាលបោះឆ្នោត ឃុំ សង្កាត់ គឺ កឹម សុខា អួតជ្រុលដោយសារខ្លួនឯងនឹកឃើញថា វាមិនអាចឈ្នះបានធ្វើមេឃុំណាមួយទេ។ អញ្ចឹងគាត់អួតហ្នឹងវាហួសដែលថា ឃុំមានមជ្ឈមណ្ឌលកសិកម្ម មួយភូមិមានមត្តេយ្យសាលាមួយ ហើយឃុំយ៉ាងហោចណាស់ក៏មាន ៥ ភូមិ មត្ដេយ្យសាលា ៥ ដែរ។ កឹម សុខា អួតអញ្ចឹងទៅ ឬក៏សន្យាអញ្ចឹងទៅ ក៏មិនជាប់ឆ្នោត ក៏មិនបំពេញកិច្ចសន្យាដែរ។
អញ្ចឹងដូចលោក សត្យារក្ស បានទាញអញ្ចឹង ឥឡូវនេះសន្យាអញ្ចឹងទៀតហើយ។ ទោះសន្យាប៉ុន្មានរយបា្រក់ខែកម្មករ សន្យាឲ្យនេះឲ្យនោះ ក៏គាត់មិនឈ្នះដែរ។ដូច្នេះវាអត់ជាប់ពាក់ព័ន្ធរឿងជំពាក់កិច្ចសន្យាទេ។ ព្រោះ កឹម សុខា ដឹងច្បាស់ថាមិនឈ្នះទេ ប៉ុន្ដែការសន្យារបស់លោក កឹម សុខា សម្រាប់ការបោះឆ្នោតឃុំសង្កាត់ និងសម្រាប់ការបោះឆ្នោតជាតិហ្នឹង វាមានគោលដៅ និងផលប្រយោជន៍ខុសគ្នា។ គោលដៅឃុំសង្កាត់ កឹម សុខា គាត់អត់ចង់បានប្រយោជន៍ពីឃុំសង្កាត់ទេ។ អញ្ចឹងគាត់សន្យាដោយគ្មានការទទួលខុសត្រូវ ឲ្យវារួចទៅ តែដល់វាចៃដន្យ វាជាប់បាន ១៨ កៅអី ធ្វើឲ្យគាត់កេងយកចំណេញរឿងហ្នឹង។ ធ្វើឲ្យរំភើបថានឹងអាចបានសន្លឹកឆ្នោតល្អដែរនៅបោះឆ្នោតជាតិដើម្បីដាក់សម្ពាធទៅលោក សម រង្ស៊ី ទេ។ អញ្ចឹងហើយបាន ១៨ ឃុំ នេះមិនមែនជា ១៨ ឃុំដាក់សម្ពាធទៅគណបក្សប្រជាជនទេ ព្រោះ ១៦៣០ ឃុំជាង ហើយបានតែ ១៨ តែ ១ភាគរយជាងហ្នឹង។ ហើយរឿងអីទៅដាក់សម្ពាធអ្នកដែលគេឈ្នះដល់ ៩៩ ឬ ៩៨ ភាគរយនោះ វាទៅមិនរួច។ អញ្ចឹងគាត់យក ១៨ ឃុំហ្នឹង ទៅដាក់សម្ពាធ សម រង្ស៊ី។ ម៉េច ល្មមចងសម្ព័ន្ធភាពល្មមស្រលាញ់គ្នាបានឬនៅ។ ប៉ុន្ដែទន្ទឹមនឹងគាត់មានមោទនភាព នឹងនយោបាយដែលគាត់ឈ្នះការបោះឆ្នោតឃុំសង្កាត់ដើម្បីដាក់សម្ពាធ សម រង្ស៊ី ហើយ កឹម សុខា ក៏ជាប់ជំពាក់ដែរ។ យើងមិនបាច់និយាយអីទេ គ្រាន់តែប្រមូលរកកុំព្យូទ័រ ហើយនិងម៉ាស៊ីនកូពី សម្រាប់ ១៨ ឃុំ កឹម សុខា ចង់ប្រកាច់ប្រកិន ដើរបោកលុយគេនៅក្រៅប្រទេសនោះ ហើយសរុបទៅអស់តែ មួយម៉ឺន ពីរម៉ឺន ហ្នឹង សម្រាប់ ១៨ ឃុំ កុំព្យូទ័រ មួយគ្រឿងក្នុងមួយឃុំនោះ។ ចុះនៅជំពាក់រឿងឡាន។ ឡានមិនចាំបាច់ទិញអាថ្លៃទេ ទិញតែឡានមួយ ២៥០០ ទៅ ៣០០០ ក៏បានដែរ។ ១៨ ឃុំ តើប៉ុន្មានម៉ឺន យើងគិតមើល ប៉ុន្មានម៉ឺន ហើយ កឹម សុខា ទៅរកលុយឯណាបាន មិនទៅបោកគេ។ ហើយសព្វថ្ងៃនេះ ឡានទិញបានប៉ុន្មាន មិនទាន់គ្រប់ ១៨ ឃុំទេ ហ្នឹងមិនទាន់និយាយពីសង់មត្តេយ្យសាលាផង។ ដូច្នេះ កឹម សុខា កំពុងតែដោះការជំពាក់ហ្នឹងរួចហើយ ហើយឥឡូវនេះ គាត់គិតថា គាត់យកសម្ពាធហ្នឹងដាក់ទៅ សម រង្ស៊ី ប៉ុន្ដែដល់ពេលគាត់ទៅក្រៅប្រទេស ទៅរកលុយពីរូបភាពរួមជាមួយ សម រង្ស៊ី ដើម្បីមកដោះបញ្ហាជំពាក់ឃុំសង្កាត់អត់បាន កឹម សុខា ទៅបារាំងកាលមុន នៅសល់តែ ៨០០ យូរ៉ូ គឺប្រហែលតែ ១ពាន់ដុល្លារ ទៅដោះអីចេញ។
ដល់ឥឡូវនេះ ចូលដល់បោះឆ្នោតជាតិ កឹម សុខា សន្យាទៀតហើយ ដោយសារគិតថា វាគ្មានចៃដន្យឈ្នះទេ។ ចៃដន្យឈ្នះម៉េច គ្រាន់តែរឿង សម រង្ស៊ី និង កឹម សុខា ការរៀបចំបញ្ជីបេក្ខជនហ្នឹង មិនដឹងជាវ៉ៃគ្នាបាក់បង្អួចបាក់ទ្វារយ៉ាងម៉េចផង បាក់គ្រែបាក់អីអស់ហើយមិនស្រួលហ្នឹង និយាយអញ្ចឹងឃើញបញ្ហាមួយបាត់ហើយ។ អញ្ចឹង កឹម សុខា ត្រូវលេងមួយក្បាច់ទៀតសន្យាឲ្យហួស ព្រោះដូចលោក សត្យារក្ស បានលើកការសន្យាហ្នឹងដែលវាមិនអាចក្លាយជាការពិតនោះ ដូច្នេះ វាគ្មានជាប់ជំពាក់អ្វីទេ។ ព្រោះគាត់សន្យាបងប្អូនប្រជាពលរដ្ឋគិតទៅ មិនមែនគាត់សន្យាថា បើគាត់ជាប់ជាតំណាងរាស្ដ្រ នឹងឲ្យលុយបងប្អូនចាស់ៗម្នាក់ ១០ដុល្លារក្នុងមួយខែទេ គាត់មិនសន្យាអញ្ចឹងទេស្ដាប់ឲ្យច្បាស់ ទាល់តែគាត់ធ្វើនាយករដ្ឋមន្ដ្រី ទើបបាន ១០ ដុល្លារណា និយាយគ្នាឲ្យច្បាស់។
អញ្ចឹងបើ កឹម សុខា ជាប់ជាតំណាងរាស្ដ្រ ហើយប្រពន្ធលោក កឹម សុខា ជាប់ជាតំណាងរាស្ដ្រទៅទៀត គឺបងប្អូននៅតែគ្មាន ១០ ដុល្លារដែរ។ ចាំចំណុចហ្នឹងឲ្យច្បាស់ មើលចំណុចហ្នឹងឲ្យច្បាស់ អញ្ចឹង ទីមួយ កឹម សុខា បាន ២ពាន់ដុល្លារ ប្រពន្ធ ២ពាន់ដុល្លារ ៤ពាន់សម្រាប់រស់ក្រុមគ្រួសាររបស់គេមុន នេះប្រសិនបើឈ្នះ។ ចំណែករឿង ១០ ដុល្លារចាំដល់សេះដុះស្នែង ទៅ។ អញ្ចឹងបងប្អូនត្រូវចាំឲ្យច្បាស់ កឹម សុខា បញ្ជាក់ហើយ អញ្ចឹងការសន្យារបស់ លោក កឹមសុខា គឺជាការសន្យាដែលគ្មានថ្ងៃចៃដន្យកើតមាន។ អញ្ចឹងហើយការទទួលខុសត្រូវនយោបាយរវាង កឹម សុខា និង សម រង្ស៊ី គឺស្ថិតនៅក្នុងស្ថានភាពខុសគ្នា កឹម សុខា ឈរនៅត្រើយម្ខាងនៃសមុទ្រ ឯ សម រង្ស៊ី ឈរនៅត្រើយម្ខាងទៀតនៃសមុទ្រ។
-មតិលោកសត្យា រក្ស
នៅក្នុងឱកាសនេះ ខ្ញុំក៏ចង់ជម្រាបជូនបងប្អូនដែរ ជាពិសេសគឺបងប្អូនដែលកំពុងតែដោចរោយជាមួយ កឹម សុខា ទាំងងងឹតងងុលនោះ។ បងប្អូនគួរតែភ្ញាក់រលឹក ហើយអ្វីដែលខ្ញុំបានផ្ដែផ្ដាំសុំឲ្យភា្ញក់រលឹក គឺនៅត្រង់ថាមិនចង់ឃើញបងប្អូនចំណាយពេលវេលាដែលអត់ប្រយោជន៍។ ពីព្រោះថាសញ្ញានៃការឈ្នះរបស់ កឹម សុខា ក្ដី ឬក៏សញ្ញានៃការឈ្នះរបស់ សម រង្ស៊ី ក្ដី មកទល់ម៉ោងនេះ គឺអត់ទាន់មានសញ្ញាណាមួយដែលថា ឆ្ពោះទៅរកការឈ្នះ ឬក៏ឆ្ពោះទៅរកជោគជ័យនោះនៅឡើយទេ។ ហើយមួយទៀតសូមបងប្អូនចងចាំថា បក្សដែលគេថានឹងបង្កើតថ្មីនេះ វាគ្រាន់តែជាសំបកមួយទេ ហើយអ្នកដឹកនាំគឺដដែល។ ហើយអ្នកទាំងពីរនេះទាំង សម រង្ស៊ី ទាំង កឹម សុខា ក្ដី មិនមែនមនុស្សមិនធ្លាប់ចាញ់ឆ្នោតទេ ចាញ់ឡើងជ្រេញ មុខដដែលៗ ការឃោសនាក៏ដដែលៗ។ និយាយឲ្យចំបើគេហៅថា ចាញ់ៗឡើងអស់សាច់ លោកបណ្ឌិត គឺអស់សាច់រលីងគួរណាស់បើដឹងថា ខ្លួនអន់ សម រង្ស៊ី ក្ដី កឹម សុខា ក្ដី បើដឹងថាខ្លួនអន់ហើយ វាគួរណាស់តែលាចេញពីមេបក្សទៅ ទុកឲ្យក្មេងៗជំនាន់ក្រោយគេធ្វើការម្ដងទៅ ក្រែងអាចមានប្រជាប្រិយភាពជាងខ្លួន ឬក៏គណបក្សប្រឆាំងនៅកម្ពុជាគ្មានអ្នកដែលស្នងទេ គ្មានយុវជនទេ បានជាទុកឲ្យអ្នកចាញ់ហើយនិងដឹងថា ចាញ់ហើយហ្នឹង ចេះតែរុញឲ្យឡើងប្រកួតនេះ ហើយបើប្រដាល់គេទះងាប់ហើយ។
អញ្ចឹងជុំវិញព្រឹត្តិការណ៍ថ្មីបន្ដទៀត ដោយសារតែគណបក្សប្រឆាំងនេះ គឺកំពុងតែសាបព្រោះនូវល្បិចកលនៃការបោកប្រាស់គ្រប់ប្រភេទតែម្ដង។ ហើយនិយាយឲ្យចំទៅការបោកប្រាស់របស់ពួកគាត់ដដែលៗ ហើយទង្វើខុសឆ្គងរបស់គាត់ហ្នឹង គឺដដែលៗទៀត ។
លោក សត្យា រក្ស
សំណួរ៖ ថ្មីៗនេះ លោក គង់ គាំ ដែលគេហៅថាជាប្រធានចាំផ្ទះប្រធានស្ដីទីអីនេះ ឬបើ កឹម សុខា គាត់ហៅ គង់ គាំ ប្រធានទីងមោង ហើយអនុប្រធានទីងមោង។ មុននឹងនិយាយអីទាល់តែសុំយោបល់ពីគេសិន បានហាននិយាយគ្មានអំណាចសិទ្ធិអីទេ ទូងៗដូចស្គរនៅចាំផ្ទះទេ ហ្នឹងខ្ញុំនិយាយតាម កឹម សុខា ទេ។ អញ្ចឹងប៉ុន្មានថ្ងៃនេះ គេកំពុងតែយកគម្រូតាមលោក សម រង្ស៊ី យកពាក់កណ្ដាល ឃើញរបៀបទៅអើតអើមព្រំដែនអីនោះណា ហើយប្រកាសថាខ្លួនជាអ្នកស្នេហាជាតិទៀតហើយ។
អញ្ចឹងទង្វើនេះ លោកបណ្ឌិតមានអីដើម្បីជាការពន្យល់ទៅដល់ប្រជាពលរដ្ឋ ហើយទុកជាបទពិសោធន៍ និងទុកជាមេរៀនខ្លះ ក្រែងលោក គង់ គាំ គាត់អត់យល់ដឹងអំពីច្បាប់ ឬក៏មិនបានស៊ីជម្រៅទៅនឹងតួនាទីនៃការគ្រប់គ្រងរដ្ឋនោះ?
លោកបណ្ឌិត ឈឹម ផលវរុណ
ចម្លើយ៖ មេបក្សដែលស្នងពីលោក សម រង្ស៊ី ដែលលោក កឹម សុខា ហៅថាអនុប្រធានទីងមោងនោះ ឥឡូវនេះបានឡើងទៅជាប្រធានទីងមោងហើយ។ ប្រធានទីងមោងនេះ តែងតែនិយាយដោយភ្លេចគិតអំពីសាវតារបស់ខ្លួន គឺមានន័យថា នៅពេលដែលខ្លួនកាន់កាប់គណបក្សហើយ ហើយ សម រង្ស៊ី លែងជាប្រធានបក្សក៏ដោយ នៅពេលដែលមានរឿងនៅផ្ទៃក្នុងគណបក្ស ក៏នៅតែកាន់ក្រដាសទៅសុំយោបល់ លោក សម រង្ស៊ី នៅបារាំងដែរ។ ប៉ុន្តែ មិនទាន់បានទៅដល់ជួប សម រង្ស៊ី ផង ក៏ត្រូវកូនចៅនៅក្នុងគណបក្សនេះ ដែលមានឥទ្ធិពល ខ្លាំងជាងមេបក្សទីងមោងនេះ បានទូរស័ព្ទទៅលោក សម រង្ស៊ី ដើម្បីដេញចោល ឬក៏ព្រមានដល់ពួកដែលចង់ងើបបះបោរនៅផ្ទៃក្នុងបក្សរួចទៅហើយ ដោយលោកប្រធានទីងមោង មិនទាន់បានដឹង ហើយដែលចង់ការពារអ្នកចង់បះបោរក្នុងបក្សទាំងនោះ។ ដោយសារគាត់មិនស្គាល់អំពីសាវតាខ្លួនបែបនេះហើយ ទើបគាត់ក្លាយទៅជាប្រធានទីងមោង ហើយបានដើរទៅចោទគេ ថាគេចំណុះអ្នកនេះ ឬអ្នកនោះ ជាដើម។
ឥឡូវនេះ ប្រធានទីមោងនេះ បានទៅធ្វើរបៀប សម រង្ស៊ី ទៀតហើយ។ កាលលោក សម រង្ស៊ី គឺគាត់ទៅដកបង្គោល ចំណែកមេបក្សទីងមោងនេះមិនហ៊ានធ្វើឲ្យដូច សម រង្ស៊ី ទេ គឺនៅញញើតខ្លាចច្បាប់ខ្លះដែរ។ យើងសូមផ្តាំទៅលោកប្រធានទីងមោងថា រឿងបង្គោលព្រំដែននេះ គឺធ្លាប់មានបទពិសោធន៍ពេលដែល លោក សម រង្ស៊ី បានធ្វើ គាត់បានទៅញុះញង់ប្រជាពលរដ្ឋឲ្យមកប្រព្រឹត្តិជាមួយគាត់ ដោយប្រជាពលរដ្ឋ លោកមិនបានដឹងអំពីផ្លូវច្បាប់ថាអាចជាប់ទោស។ ដូច្នេះសង្ឃឹមថា លោក ប្រធានទីងមោងពេលនេះ មិនធ្វើឲ្យប្រឡាក់ប្រឡូកទៅដល់ប្រជាពលរដ្ឋទេ គឺទុកឲ្យប្រជាពលរដ្ឋរកស៊ីមុខរបររបស់ពួកគាត់ ដើម្បីជីវភាពគ្រួសារគាត់ទៅចុះ។ ប្រសិនបើលោកប្រធានថ្មីនេះ គាត់ចង់ជាប់គុគ ជាប់ច្រវ៉ាក់ ឬចង់ឲ្យតុលាការផ្តន្ទាទោសគឺជាប់តែលោកម្នាក់ទៅចុះ និងសូមឲ្យបងប្អូនប្រជាពលរដ្ឋគិតថាមុននឹងធ្វើអ្វីគឺត្រូវគិតអំពីអធិបតេយ្យភាពរបស់ប្រទេស គិតអំពីផ្លូវច្បាប់ និងគិតអំពីអ្វីដែលជាសម្បត្តិសាធារណៈ និងមិនត្រូវធ្វើតាមការចញ្ចើចបញ្ជោររបស់អ្នកនយោបាយទុច្ចរឹតឡើយ ពីព្រោះវាអាចធ្វើឲ្យបងប្អូនប្រឈមជាមួយច្បាប់។
រឿងនេះ ប្រសិនបើមេបក្សទីងមោង ដែលជាសមាជិកព្រឹទ្ធសភា និងអ្នកតំណាងរាស្ត្រ សម រង្ស៊ី និងតំណាងរាស្ត្រ កឹម សុខា ដែលទៅជាមួយគ្នានោះបានប្រព្រឹត្តិនូវការបំផ្លាញបង្គោលព្រំដែនទៀតនោះ គឺប្រាកដជាមិនអាចឲ្យលោក អូបាម៉ា ជួយ ឬប្រទេសបារាំងជួយបានទេ គឺបណ្តាប្រទេសនៅសហគមន៍ អឺរុបក្តី គេមានតែជម្រុញឲ្យរដ្ឋាភិបាលដាក់ទោសក្រមព្រហ្មទណ្ឌ ទៅលើអ្នកទាំងអស់នោះថែមទៀត។
លោក សត្យា រក្ស
សំណួរ៖ ទាក់ទងនិងរឿងព្រំដែននេះ យើងឃើញថាអស់លោកបក្សប្រឆាំងកំពុងតែបន្លឺសម្លេងថាខ្លួនស្រឡាញ់ខ្លាំងណាស់ ហើយថាខ្លួនចង់ការពារ ចង់ថែរក្សា ចង់អភិវឌ្ឍ នឹងរឿងព្រំដែននេះខ្លាំងណាស់។ ប៉ុន្តែមកទល់ពេលនេះ តើអ្វីទៅដែលជាសមិទ្ធផល ឬជាស្នាដៃដែលបក្សប្រឆាំងបានកសាង ដើម្បីជាប្រយោជន៍នៅក្នុងការការពារអធិបតេយ្យភាព ការពារបូរណភាពទឹកដី ការពារនូវអ្វីដែលជាបំណងរបស់ប្រជាពលរដ្ឋ ដើម្បីជាមរតកសម្រាប់មនុស្សជំនាន់ក្រោយដូចការអះអាងរបស់ពួកគេដែរឬទេ?
លោកបណ្ឌិត ឈឹម ផលវរុណ
ចម្លើយ៖ ប្រសិនបើគណបក្សប្រឆាំងពិតជាស្រឡាញ់ទឹកដី ស្រឡាញ់ប្រទេសជាតិពិតមែន នៅពេលដែលកម្ពុជាប្រឈមមុខការពារបូរណភាពទឹកដីនៅប្រាសាទព្រះវិហារ និងតំបន់ជុំវិញប្រាសាទព្រះវិហារ ដែលជារបស់ខ្មែរ ហេតុអ្វីបានជាលោក សម រង្ស៊ី និងលោក កឹម សុខា មិនទៅចូលរួមលើកទឹកចិត្តកងទ័ព? លោក កឹម សុខា ប្រមូលស្បៀងបានបន្តិចបន្តួច មិនបានប្រគល់ទៅឲ្យក្រសួងការពារជាតិ ឬប្រគល់ទៅឲ្យគណៈកម្មការការពារជាតិនៃរដ្ឋសភាទេ គឺគាត់ធ្វើដើម្បីចង់កេញចំណេញនយោបាយ ឬដើម្បីបង្ហាញមុខតែប៉ុណ្ណោះ។ ផ្ទុយទៅវិញ កាលពីព្រឹត្តិការណ៍នោះ គឺមានតាំងពីកុមារា កុមារី អាជីវករ រួមទាំងបងប្អូនអ្នករត់ម៉ូតូឌុបក៏បានចូលរួមថវិការរបស់ខ្លួនមកចូលជាមួយមូលនិធិបាយ៍នដែរ។ ការដែលគណបក្សប្រឆាំងមិនបានចូលរួមវិភាគទានឧបត្ថម្ភដល់កងទ័ព នៅពេលប្រទេសជាតិមានបញ្ហានោះ ជាការបញ្ជាក់ថា គណបក្សប្រឆាំងមិនបានមានចិត្តជួយការពារទឹកដីនោះទេ ផ្ទុយទៅវិញគឺពួកគេចង់កេងចំណេញនយោបាយទៅវិញទេ។
ចំណុចដែលគណបក្សប្រឆាំងបានប្រើនូវនយោបាយញុះញង់ប្រជាពលរដ្ឋឲ្យមកដកបង្គោលព្រំដែន គឺមិនមែនជានយោបាយការពារជាតិនោះទេ តែវាជានយោបាយបង្ករឿងឈ្លោះទាស់ទែងគ្នាជាមួយប្រទេសជិតខាងទៅវិញទេ។ ឧទាហរណ៍ ដូចក្រុមអាវលឿងថៃ ដែលចង់មកដកបង្គោលព្រំដែន គឺជាការបង្ករឿងជាមួយកម្ពុជា ដូច្នេះរដ្ឋាភិបាលថៃមិនអនុញ្ញាត្តិឲ្យធ្វើទេ។ ដូច្នេះកម្ពុជាក៏មិនអាចធ្វើបែបនេះបានដែរ ពីព្រោះវានាំឲ្យមានការបង្ករឿងជាមួយជាតិដ៏ទៃ ហើយអន្តរជាតិក៏មិនគាំទ្រដែរ ហើយយើងក៏មិនអាចឈ្នះលើឆាកអន្តរជាតិទេ ប្រសិនបើយើងប្រើនយោបាយការពារជាតិបែបនេះដូចគណបក្សប្រឆាំងធ្លាប់ធ្វើ។ ផ្ទុយទៅវិញ គឺជាទង្វើបំផ្លាញនយោបាយការពារជាតិទៅវិញទេ។ សរុបមក ទង្វើរបស់ លោក សម រង្ស៊ី និងមេបក្សទីងមោង រួមទាំងទង្វើរបស់លោក កឹម សុខា ក្តីគឺជាទង្វើបំផ្លាញនយោបាយការពារជាតិ។
នយោបាយរបស់គណបក្សប្រឆាំង គឺគ្មាននយោបាយសម្រាប់ជីវិតជាតិទេ។ ឧទាហរណ៏ បញ្ហាព្រំដែន គឺការកំណត់អំពីខ្សែរបន្ទាត់ព្រំដែន។ ពួកគណបក្សប្រឆាំងតែងតែយករឿងអតីតកាលមកលងរឿងបច្ចុប្បន្នកាល។ ការលើកបែបនេះគឺជាការបញ្ឆេះកំហឹងជាតិនិយមដើម្បីបំផ្លាញជាតិខ្មែរ។ កាលណាភ្លើងសង្គ្រាមកើតឡើង ជីវិតមនុស្សត្រូវជួបប្រទះនូវសោកនាដកម្ម ហើយកម្ពុជា គឺកំពុងតែទ្រុឌទ្រោម គឺយើងទើបតែបានរីកលូតលាស់តែជាង១០ឆ្នាំ ចុងក្រោយនេះទេបន្ទាប់ពីនយោបាយឈ្នះឈ្នះ របស់សម្តេចតេជោ ហ៊ុន សែន ។ ចំណុចមួយទៀត គឺការគូសវាសខ្សែរបន្ទាត់ព្រំដែន បើអស់លោកទាំងអស់នោះទទួលស្គាល់ការពិត គឺត្រូវបញ្ចប់បញ្ហាអស់ហ្នឹងដោយការគូសវាសខ្សែរបន្ទាត់ និងការបោះបង្គោលហើយ ដើម្បីកុំឲ្យបញ្ហាព្រំដែនក្លាយទៅជាបរិបទនយោបាយ កំប្លែងសម្រាប់គណបក្សប្រឆាំង កម្ទេច បំផ្លាញជីវិតមនុស្ស។ សព្វថ្ងៃនេះ គណបក្សប្រឆាំងតែងតែលើកយករឿងខ្សែរបន្ទាត់ព្រំដែន ទឹកដីរបស់ខ្មែរត្រឹមនេះ ឬត្រឹមនោះ មកលេងសើច ពីព្រោះរឿងអតីតកាលគឺជារឿងឈឺចាប់មួយរួចទៅហើយ ដូច្នេះយើងមិនត្រូវលើកឲ្យវាឈឺចាប់តទៅទៀតទេ។ ដូច្នេះដើម្បីជំនះនូវរឿងអតីតកាលទាំងនោះ គឺត្រូវចូលរួមដោយស្មោះស្មគ្រជាមួយគ្នា គាំទ្រការអារកាត់របស់ប្រមុខរដ្ឋាភិបាល ក្នុងការធ្វើឲ្យបានសម្រេចនូវការគូសវាសខ្សែរបន្ទាត់ព្រំដែន និងការបោះបង្គោលព្រំដែនជាមួយបណ្តាប្រទេសជិតខាងទាំងបី ពីព្រោះចំនួនបង្គោលនៅសល់បន្តិចបន្តួចប៉ុណ្ណោះ។ត្រង់នេះហើយគឺជានយោបាយធានាផ្តល់នូវលទ្ធភាពក្នុងការអភិវឌ្ឍ និងសន្តិភាពនៅតាមព្រំដែន ដើម្បីដឹកនាំប្រទេសឈានទៅមុខ ហើយគ្រប់គណបក្សនយោបាយអាចប្រកួតប្រជែងគ្នានៅក្នុងនយោបាយ លើទីលាននយោបាយប្រជាធិបតេយ្យសេរីពហុបក្ស។
-មតិលោក សត្យា រក្ស
សរុបមក ក្រោយពីបានស្តាប់នូវការបកស្រាយរបស់លោកបណ្ឌិត គឺបងប្អូនប្រជាពលរដ្ឋអាចពិចារណា និងអាចដោះខ្លួនឲ្យរួចផុតពីឥទ្ធិពល និងក្រញ៉ាំនៃការបោកប្រាស់របស់បក្សប្រឆាំងជាមិនខាន។ បងប្អូន អាចមើលឃើញអំពីហេតុផល ជាពិសេសគឺប្រវត្តិរបស់គណបក្សប្រឆាំងឲ្យបានច្បាស់ ថាតើប៉ុន្មានអាណត្តិមកហើយដែលគណបក្សប្រឆាំងបានចាញ់ឆ្នោត? ហើយការដែលគណបក្សប្រឆាំងចាញ់ឆ្នោតកន្លងមកនោះ តើគោលនយោបាយ និងចរឹតនៃការឃោសនារបស់គាត់នោះយ៉ាងម៉េច? សរុបមក ការឃោសនារបស់គាត់គឺដដែលៗ គឺគ្មានអ្វីក្រៅពីយួនយកដី រំកិលព្រំដែន ពុករលួយ ហើយគណបក្សរបស់គេនោះនឹងឈ្នះដោយសារការទទួលការគាំទ្រពីអន្តរជាតិ ជាពិសេសអាមេរិក គឺដដែលៗ។ ផ្ទុយទៅវិញ បើនិយាយអំពីលទ្ធផលវិញគឺគណបក្សប្រឆាំងកាន់តែដុនដាបទៅជាលំដាប់។ អញ្ចឹងសូមបងប្អូនប្រជាពលរដ្ឋឈប់ចាញ់បោកគេតទៅទៀតទៅ។ បងប្អូនគួរតែងាកមករកអ្វីដែលជាភាពចម្រុងចម្រើនសម្រាប់សង្គមជាតិ ពីព្រោះប្រជាពលរដ្ឋជាកម្លាំងរបស់ប្រទេស។ ជាតិមួយដែលអាចរីកចម្រើនទៅមុខបាន អាស្រ័យដោយសារតែប្រជាពលរដ្ឋមានឆន្ទៈ មានសេចក្តីក្លាហាន ស្មោះត្រង់នឹងជាតិ បម្រើជាតិដោយសុទ្ធចិត្ត និងចូលរួមពូនជ្រុំជាមួយរាជ្យវង្ស និងរាជរដ្ឋាភិបាល ដើម្បីអភិវឌ្ឍប្រទេសជាតិឲ្យកាន់តែប្រសើរឡើង និងធ្វើឲ្យជីវភាពប្រជាពលរដ្ឋកាន់តែប្រសើរឡើង។
បើនិយាយអំពីចរឹតរបស់អ្នកនយោបាយប្រឆាំងមកទល់សព្វថ្ងៃនេះ គឺគ្មានអ្វីក្រៅពីការអួត ក្រៅពីការសន្យាទេ។ ការសន្យានេះ គឺជាការបោកប្រាស់យ៉ាងពិតប្រាកដ។ បងប្អូនអាចពិចារណាមើលថា នៅពេលដែលកម្ពុជាធ្លាក់ទៅក្នុងគ្រោះមហន្តរាយនៃរបប ប៉ុល ពត បើសិនណាជា សម្តេច ទាំងបី ពេលដែលចេញទៅក្រៅប្រទេស ហើយគាត់បំពងសម្លេងពីក្រៅប្រទេសដោយប្រើពាក្យសន្យាដូចគណបក្សប្រឆាំង ដែលកំពុងតែប្រើប្រាស់តាមប្រព័ន្ធឃោសនាពីក្រៅប្រទេសមកវិញនោះ ប្រហែលជាបងប្អូនប្រជាពលរដ្ឋយើងមិនអាចរស់រានមានជីវិតមកដល់ពេលនេះទេ ហើយក៏មិនអាចទទួលបាននូវការហូបចុកគ្រប់គ្រាន់ និងមិនអាចជួបជុំគ្រួសារដូចពេលនេះទេ។ ដូច្នេះ ការសន្យាគឺមិនអាចជាការពិតបានទេ បងប្អូនគួរតែងាកមកទទួលយកនូវអ្វីដែលជាការពិត អ្វីដែលជាភាពជាក់ស្តែង អ្វីដែលជាសមិទ្ធផលកំពុងទទួលបាន ដែលយើងអាចទាញយកមកអភិវឌ្ឍជាតិ និងចម្រុងចម្រើនដល់ក្រុមគ្រួសាររបស់យើង៕
សម្រង់ព័ត៌មាន៖ លោក នូ សាវុធឌី