ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោកជំទាវ នាព្រឹកថ្ងៃទី១២ ខែមីនា ឆ្នាំ២០១៣ បានឧបត្ថម្ភថវិកាចំនួន៤០លានរៀល ដែលជាថវិកាផ្ទាល់ខ្លួន និងសប្បុរសជន ជូនកាយរឹទ្ធិជាតិកម្ពុជាខេត្តមណ្ឌលគីរី និងបានអំពាវនាវឲ្យអាជ្ញាធរដែនដី ជួយសម្រួលដល់កាយរឹទ្ធិជាតិកម្ពុជាខេត្តមណ្ឌលគីរី ក្នុងការរៀបចំទីតាំងបោះជំរុំ ដើម្បីទុកជាកន្លែងជួបជុំកាយរឹទ្ធិជាតិ និងអន្តរជាតិ ក៏ដូចជាសម្រាប់ជាគោលដៅទេសចរណ៍ក្នុងទឹកដីខេត្តខ្ពង់រាបដែលមានខ្យល់អាកាសបរិសុទ្ធ និងមានទេសភាពដ៏ត្រកាលនេះផងដែរ។
នៅក្នុងឱកាសអញ្ជើញជាអធិបតីក្នុងពិធីសច្ចាប្រណិធាន និងបំពាក់កន្សែងដល់នវកាយរឹទ្ធជាតិកម្ពុជាខេត្តមណ្ឌលគីរីចំនួន ២៩៧៩៤នាក់ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា កាយរឹទ្ធិជាតិកម្ពុជាបានបង្កើតឡើងតាំងពីទស្សវត្សរ៍ទី២០ មកម្ល៉េះ តែទើបត្រូវបានអង្គការកាយរឹទ្ធិតំបន់ និងពិភពលោកទទួលស្គាល់ជាសមាជិកក្នុងអំឡុងឆ្នាំ២០០៨ ក្រោយពីកាយរឹទ្ធិត្រូវបានប្តូរឈ្មោះជាកាយរឹទ្ធិជាតិកម្ពុជានាឆ្នាំ២០០៦។
ឯកឧត្តមបណ្ឌិតសភាចារ្យ សុខ អាន បានសម្តែងនូវការដឹងគុណចំពោះសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ប្រធានកាកបាទក្រហមកម្ពុជា ជាគរុគុណនៃកាយរឹទ្ធិជាតិកម្ពុជា ដែលបានជួយឧបត្ថម្ភគាំទ្រជានិច្ចដល់ដំណើរការកាយរឹទ្ធិជាតិកម្ពុជា ឲ្យពង្រឹងបាននូវតួនាទី និងគម្រូល្អរបស់ខ្លួននៅក្នុងសង្គមសម្តៅធ្វើឲ្យមានការប្រែប្រួលនូវឥរិយាបថរបស់យុវជន ឆ្ពោះទៅរកភាពវិជ្ជមាន និងភាពជឿនលឿនប្រកបដោយសេចក្តីក្លាហាន និងផ្សារភ្ជាប់ខ្លួនទៅនឹងភារកិច្ចចំពោះប្រទេសជាតិ និងព្រះពុទ្ធសាសនា ចេះអប់រំកសាងខ្លួនឯងឲ្យមានសុខភាពល្អ កម្លាំងកាយមាំមួន ប្រាជ្ញាឈ្លាសវៃ ប្រកបដោយការភ្ញាក់រលឹក និងមានសីលធម៌ល្អ ចេះគោរព និងជួយដល់អ្នកដទៃ។ ឯកឧត្តមបណ្ឌិតសភាចារ្យ សុខ អាន បានដាក់ចេញនូវអនុសាសន៍ចំនួន ៧ចំណុច ដើម្បីពង្រីក និងពង្រឹងសកម្មភាពកាយរឹទ្ធិជាតិកម្ពុជាខេត្តមណ្ឌលគីរី ដែលជាអាទិ៍ឲ្យរៀបចំបទបញ្ជាផ្ទៃក្នុង និងផែនការសកម្មភាព រៀបចំវគ្គបណ្តុះបណ្តាល ជម្រុញការធ្វើតេស្តតម្លើងឋានន្តរស័ក្តិដល់សមាជិកកាយរឹទ្ធិ រៀបចំទីស្នាក់ការ និងទីតាំងសម្រាប់បោះជំរុំជាដើម។
ជាមួយនឹងការថ្លែងអំណរគុណ និងវាយតម្លៃខ្ពស់ចំពោះមាតាបិតា អាណាព្យាបាល លោកគ្រូអ្នកគ្រូ នៅទូទាំងខេត្តមណ្ឌលគីរី ដែលបានជម្រុញ និងលើកទឹកចិត្តក្មួយៗជាសិស្សានុសិស្ស ឲ្យមកទទួលការបណ្តុះបណ្តាល និងចូលជាសមាជិកជាតិកាយរឹទ្ធិកម្ពុជា ឯកឧត្តមបណ្ឌិតសភាចារ្យ សុខ អាន ក៏បានអំពាវនាវដល់សប្បុរសជន និងអាជ្ញាធរដែនដីខេត្តមណ្ឌលគីរីសុំឲ្យជួយពង្រឹង និងពង្រីកចលនាកាយរឹទ្ធិជាតិកម្ពុជាឲ្យមានចលនារីកចម្រើនខ្លាំងក្លា ដើម្បីផ្សារភ្ជាប់ខ្លួនទៅនឹងចលនាកាយរឹទ្ធិពិភពលោក។
លោក ស្វាយ សំអ៊ាង អភិបាលរងនៃគណៈអភិបាលខេត្តមណ្ឌលគីរី និងជាអនុប្រធានក្រុមប្រឹក្សាកាយរឹទ្ធិជាតិកម្ពុជាខេត្តមណ្ឌលគីរី បានមានប្រសាសន៍ឲ្យដឹងថា កាយរឹទ្ធិជាតិកម្ពុជាខេត្តមណ្ឌលគីរីបានបដិសន្ធិឡើងនៅថ្ងៃទី២៨ ខែមេសា ឆ្នាំ២០០២ ដែលមានសមាជិកតែ ៥៦អ្នក (ស្ត្រី ២២នាក់) ប៉ុណ្ណោះ។ លុះដល់ថ្ងៃទី២៨ ខែមេសា ឆ្នាំ២០០៣ សមាគមកាយរឹទ្ធិកម្ពុជាខេត្តមណ្ឌលគីរី ត្រូវបានបង្កើនមានសមាជិក ១០០នាក់ (ស្ត្រី ៣៧នាក់)។ ឆ្នាំ២០១៣ នេះ កាយរឹទ្ធិជាតិកម្ពុជាខេត្តមណ្ឌលគីរី មានសមាជិកកើនដល់ ២៧៩៤នាក់ (ស្ត្រី ១២៦៣នាក់)។
សមាជិកកាយរឹទ្ធិជាតិកម្ពុជាខេត្តមណ្ឌលគីរី បានចូលរួមធ្វើសកម្មភាពសង្គមជាច្រើន ដូចជា ការអប់រំសុខភាពខ្លួនឯង និងមិត្តភ័ក្តិ ចូលរួមទប់ស្កាត់ការរីករាលដាលនៃមេរោគអេដស៍ និងជម្ងឺអេដស៍ ប្រយុទ្ធប្រឆាំងការប្រើប្រាស់គ្រឿងញៀន ទប់ស្កាត់បាតុភាពក្មេងទំនើង ការជួញដូរស្ត្រី និងកុមារ ចូលរួមអនុវត្តគោលនយោបាយភូមិ-ឃុំមានសុវត្ថិភាព ក៏ដូចជា ចូលរួមធ្វើអនាម័យសម្អាតបរិស្ថានតាមសាលារៀន។
កាយរឹទ្ធិជាតិកម្ពុជាខេត្តមណ្ឌលគីរី បានពង្រីកទំនាក់ទំនងកិច្ចសហប្រតិបត្តិការជាមួយយុវជនខេត្តដាក់ឡាក់ ខេត្តដាក់ណុង និងខេត្តប៊ិញភឿក នៃសាធារណដ្ឋសង្គមនិយមវៀតណាម តាមរយៈការសម្តែងសិល្បៈ ការប្រកួតកីឡា និងការជជែកពិភាក្សាតុមូល។
ជាគោលការណ៍កាយរឹទ្ធិជាតិកម្ពុជាត្រូវភ្ជាប់សកម្មភាពរបស់ខ្លួន ទៅនឹងភារកិច្ច៣ ទី១,ភារកិច្ចចំពោះសាសនា ទី២,ភារកិច្ចចំពោះប្រទេសជាតិ និងមនុស្សផងទាំងពួង និងទី៣, ភារកិច្ចចំពោះខ្លួនឯង៕