សុន្ទរកថា
ឯកឧត្តម បណ្ឌិតសភាចារ្យ សុខ អាន
ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី
ក្នុងពិធីរាត្រីសមោសរមូលនិធិ “យុវជនក្នុងបុព្វហេតុមាតុភូមិ”
រាជធានីភ្នំពេញ ថ្ងៃទី0៩ ខែមីនា ឆ្នាំ២០១៣
œœ
- ឯកឧត្តម ទេសរដ្ឋមន្ត្រី រដ្ឋមន្ត្រី
- ឯកឧត្តម លោកជំទាវ លោកឧកញ៉ា
- អស់លោក លោកស្រី ភ្ញៀវកិត្តិយសជាតិនិងអន្តរជាតិ និងក្មួយៗយុវជនទាំងអស់ ជាទីមេត្រី!
ថ្ងៃនេះ ខ្ញុំនិងភរិយា មានសេចក្តីសោមនស្សរីករាយ ដោយបានមកចូលរួមក្នុងពិធី រាត្រីសមោសរមូលនិធិ «យុវជនក្នុងបុព្វហេតុមាតុភូមិ» ជាមួយឯកឧត្តម លោកជំទាវ លោកឧកញ៉ា អស់លោក លោកស្រី សប្បុរសជន ភ្ញៀវកិត្តិយសជាតិ និងអន្តរជាតិទាំងអស់ ជាពិសេស ក្មួយៗ យុវជននៃសហភាពសហព័ន្ធយុវជនកម្ពុជា។ ខ្ញុំសូមកោតសសើរ និងវាយតម្លៃខ្ពស់ចំពោះគំនិតផ្តួចផ្តើម និងកិច្ចខិតខំប្រឹងប្រែងរបស់ក្មួយ ហ៊ុន ម៉ានីនិងក្មួយៗជាថ្នាក់ដឹកនាំនៃសហភាពសហព័ន្ធយុវជនកម្ពុជា ដោយមានការចូលរួមឧបត្ថម្ភគាំទ្រពីសំណាក់បណ្តាស្ថាប័នរដ្ឋ ក្រុមហ៊ុននិងសហគ្រាសឯកជន សមាគម អង្គការមិនមែនរដ្ឋាភិបាល និងសប្បុរសជនទាំងឡាយក្នុងការរៀបចំឱ្យមានការជួបជុំគ្នាដ៏មហោឡាឫកនេះ។
ការជួបជុំគ្នាថ្ងៃនេះគឺជាព្រឹត្តិការណ៍ដ៏សំខាន់ដែលឆ្លុះបញ្ចាំងឱ្យឃើញនូវគំនិតច្នៃប្រឌិតដ៏ឈ្លាសវៃ និងសមិទ្ធផលការងារជាបន្តបន្ទាប់របស់សហភាពសហព័ន្ធយុវជនកម្ពុជា ដែលខ្ញុំមានមោទនភាពនិងគាំទ្រជានិច្ច ចាប់តាំងពីពេលដែលសហភាពនេះត្រូវបានបង្កើតឡើង។ យើងទាំងអស់គ្នាមានសេចក្តីសប្បាយរីករាយ ដោយបានឃើញយុវជនកម្ពុជាកំពុងបំពេញសកម្មភាពការងារក្នុងបេសកកម្មដ៏ឧត្តុង្គឧត្តមរបស់ខ្លួន ដើម្បីចូលរួមក្នុងការអភិវឌ្ឍសង្គមជាតិប្រកបដោយចិរភាព ដោយទទួលបានផ្លែផ្កាគួរឱ្យកត់សម្គាល់ ។
ខ្ញុំបានស្តាប់យ៉ាងយកចិត្តទុកដាក់នូវសុន្ទរកថាស្វាគមន៍ និងរបាយការណ៍របស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានបង្ហាញអំពីសមិទ្ធផលការងារ សំខាន់ៗរបស់ខ្លួននាពេលកន្លងមក ក៏ដូចជាចក្ខុវិស័យសម្រាប់អនាគត។ ខ្ញុំសូមកោតសសើរនិងវាយតម្លៃខ្ពស់ចំពោះស្នាដៃការងារដែលស្តែងចេញ តាមរយៈសកម្មភាពសំខាន់ៗរបស់សហភាពសហព័ន្ធយុវជនកម្ពុជា មានជាអាទិ៍ ការលើកកម្ពស់ការយល់ដឹងរបស់យុវជនអំពីប្រវត្តិសាស្រ្តកម្ពុជា ការជំរុញឱ្យយុវជនចូលរួមក្នុងការងារសង្គមនិងមនុស្សធម៌ និងការជួយដល់យុវជនក្នុងការអប់រំ បណ្តុះបណ្តាលវិជ្ជាជីវៈ កីឡា និងការទទួលបានព័ត៌មានអំពីទីផ្សារការងារ ជាដើម។ សកម្មភាពទាំងនេះ ពិតជាមានសារៈសំខាន់ណាស់នៅក្នុងបរិបទនៃការអភិវឌ្ឍប្រកបដោយចិរភាព ដែលទាមទារឱ្យមានតួនាទីនិងការចូលរួមយ៉ាងសកម្មរបស់យុវជនក្នុងការរួមចំណែកដោះស្រាយបញ្ហាប្រឈមក្នុងដំណើរការអភិវឌ្ឍសេដ្ឋកិច្ចសង្គម ។ ការចូលរួមរបស់យុវជនមិនត្រឹមតែចូលរួមចំណែកជាមួយរាជរដ្ឋាភិបាលក្នុងការអភិវឌ្ឍប្រទេសប៉ុណ្ណោះទេ ប៉ុន្តែថែមទាំងជាការផ្តល់ឱកាសដ៏ល្អសម្រាប់យុវជនក្នុងការពង្រឹងសមត្ថភាពរបស់ខ្លួន ដើម្បីក្លាយជាសរសរទ្រូងរបស់ប្រទេសជាតិនិងសក្តិសមជា “ទំពាំងស្នងឫស្សី” ពិតប្រាកដថែមទៀតផង។ ក្នុងន័យនេះ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តែងតែយកចិត្តទុកដាក់ខ្ពស់ក្នុងការលើកកម្ពស់តួនាទីរបស់យុវជនឱ្យបានចូលរួមក្នុងការអភិវឌ្ឍសេដ្ឋកិច្ច-សង្គម ការការពារជាតិ ការថែរក្សាវប្បធម៌ និងការអភិរក្សបេតិកភណ្ឌជាតិ និងថែមទាំងទទួលបានសិទ្ធិក្នុងការធ្វើនយោបាយទៀតផង។ ជាក់ស្តែង ការចូលរួមរបស់យុវជនក្នុងការអនុវត្ត “គោលនយោបាយចាស់សកម្មភាពថ្មី” គឺជាសក្ខីភាពដ៏លេចធ្លោ ដែលបង្ហាញនូវគំរូវីរៈភាពរបស់យុវជនស្ម័គ្រចិត្តសម្តេចតេជោក្នុងបេសកកម្មជាប្រវត្តិសាស្រ្តរបស់ខ្លួន ក្នុងការងារវាស់វែងដីធ្លី ដើម្បីផ្តល់ប័ណ្ណកម្មសិទ្ធិជូនប្រជាពលរដ្ឋ ។
ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយស និងក្មួយៗយុវជនទាំងអស់
យើងទាំងអស់គ្នាដឹងហើយថា ប្រទេសកម្ពុជាមានវប្បធម៌ដ៏សម្បូរបែប ហើយត្រូវបានអ្នកជំនាញការមួយចំនួនទទួលស្គាល់ថា កម្ពុជាជាអធិរាជាណាចក្រនៃបេតិកភណ្ឌ។ ជាក់ស្តែង ពិភពលោកបានទទួលស្គាល់នូវតម្លៃលេចធ្លោជាសកលរបស់បេតិកភណ្ឌជាតិយើង និងបានចុះតំបន់រមណីយដ្ឋានអង្គរ ទៅក្នុងបញ្ជីបេតិកភណ្ឌពិភពលោកដែលងាយរងគ្រោះថ្នាក់នៅឆ្នាំ១៩៩២ និងក្រោយមកត្រូវបានដកចេញពីបញ្ជីងាយរងគ្រោះនេះនៅឆ្នាំ២០០៤ រីឯប្រាសាទព្រះវិហារត្រូវបានចុះក្នុងបញ្ជីបេតិកភណ្ឌពិភពលោកនៅថ្ងៃទី០៨ ខែកក្កដា ឆ្នាំ២០០៨។ ពិភពលោកក៏កោតសរសើរផងដែរ ចំពោះបេតិកភណ្ឌអរូបីពីរទៀតរបស់កម្ពុជាគឺ របាំព្រះរាជទ្រព្យដែលត្រូវបានចុះបញ្ជីនៅឆ្នាំ២០០៣ និងល្ខោនស្បែកធំ នៅឆ្នាំ២០០៥។
ជាងនេះទៀត នៅឆ្នាំ២០១៣នេះ ព្រះរាជាណាចក្រកម្ពុជានឹងរៀបចំអបអរសាទរខួបលើកទី២០ នៃការចុះបញ្ជីតំបន់អង្គរជាបេតិកភណ្ឌពិភពលោក ហើយដែលពិធីរំលឹកខួបអបអរសាទរនោះនឹងប្រព្រឹត្តទៅចំពេលដែលរាជរដ្ឋាភិបាលកម្ពុជា ធ្វើជាម្ចាស់ផ្ទះនៃកិច្ចប្រជុំលើកទី៣៧ និងជាប្រធានរបស់គណៈកម្មាធិការបេតិកភណ្ឌពិភពលោក ដែលមាន ១៩០រដ្ឋភាគីជាសមាជិក។ ព្រឹត្តិការណ៍ដ៏សំខាន់នេះឆ្លុះបញ្ចាំងឱ្យឃើញអំពីជោគជ័យនៃកិច្ចសហ-ប្រតិបត្តិការរវាងរាជរដ្ឋាភិបាល និងអង្គការយូណេស្កូ ក្រោមក្របខ័ណ្ឌនៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរ (ICC-Angkor) ដែលជាគំរូនៃកិច្ចសហប្រតិបត្តិការអន្តរជាតិប្រកបដោយជោគជ័យ ដែលអង្គការយូណេស្កូបានយកទៅអនុវត្តនៅប្រទេសដទៃទៀត ។
នៅក្នុងវិស័យបេតិកភណ្ឌនេះដែរ យុវជនក៏ត្រូវបានអង្គការយូណេស្កូផ្តោតការយកចិត្តទុកដាក់ និងបានផ្តល់តួនាទីយ៉ាងសំខាន់ ដូចដែលបានឆ្លុះបញ្ចាំងនៅក្នុងទស្សនទានរួមមួយក្រោមពាក្យស្លោកថា «យុវជននិងបេតិកភណ្ឌ» ឬ «បេតិកភណ្ឌនៅក្នុងដៃយុវជន» ដើម្បីឱ្យយុវជនបានស្វែងយល់អំពីតម្លៃវប្បធម៌និងបេតិកភណ្ឌរបស់ខ្លួន និងរបស់ជាតិសាសន៍ដទៃ ដែលនាំឱ្យមានការគោរពស្រឡាញ់វប្បធម៌ និងបេតិកភណ្ឌរបស់ខ្លួននិងរបស់អ្នកដទៃផង សម្រាប់ជាមូលដ្ឋានក្នុងការបង្កើនការយោគយល់គ្នាទៅវិញទៅមក ដែលនាំដល់ការកាត់បន្ថយជម្លោះ និងរួមចំណែកដល់ការពូនជ្រុំវប្បធម៌សន្តិភាព។ ជាក់ស្តែង វេទិកាយុវជនគឺជាផ្នែកមួយមិនអាចកាត់ផ្តាច់បាននៅក្នុងសម័យប្រជុំរបស់គណៈកម្មាធិការបេតិកភណ្ឌពិភពលោកជារៀងរាល់ឆ្នាំ ហើយនៅក្នុងឆ្នាំ២០១៣នេះ ព្រះរាជាណាចក្រកម្ពុជាដែលធ្វើជាម្ចាស់ផ្ទះនៃកិច្ចប្រជុំ គណៈកម្មាធិការបេតិកភណ្ឌពិភពលោកលើកទី៣៧ បានរំលេចឡើងនូវប្រធានបទដ៏សំខាន់មួយគឺ «បេតិកភណ្ឌរស់ ៖ ប្រាសាទ បរិស្ថាន និងប្រជាជន»។ ប្រធានបទនេះ មានគោលដៅសំខាន់ដើម្បីបញ្ជ្រាបការយល់ដឹងអំពីទំនាក់ទំនងប្រកបដោយភាពសុខុដុមរមនានឹងគ្នា រវាងវប្បធម៌ បរិស្ថានដែលរួមមានទឹកនិងព្រៃឈើ និងសហគមន៍។ ក្នុងការអនុវត្តកិច្ចការដ៏មានសារៈសំខាន់នេះ ខ្ញុំសង្ឃឹមយ៉ាងមុតមាំថាយុវជនកម្ពុជានិងយុវជនអន្តរជាតិ ដែលស្ថិតក្រោមការដឹកនាំរបស់សហភាពសហព័ន្ធយុវជនកម្ពុជា នឹងសម្រេចបានជោគជ័យថ្មីៗថែមទៀត សំដៅចូលរួមលើកមុខមាត់កម្ពុជាក្នុងឆាកអន្តរជាតិក្នុងកិច្ចការការពារ និងអភិរក្សបេតិកភណ្ឌជាតិនិងបេតិកភណ្ឌពិភពលោក។
ឆ្លៀតឱកាសនេះដែរ ខ្ញុំសូមសម្តែងនូវការកោតសសើរនិងវាយតម្លៃខ្ពស់ចំពោះសហភាពសហព័ន្ធយុវជនកម្ពុជាដែលមានគម្រោងរៀបចំកម្មវិធី «អង្គរសង្រ្កាន្ត» ដែលនេះគឺជាការចូលរួមចំណែកថ្មីថែមទៀតដល់ការលើកស្ទួយ និងអភិរក្សវប្បធម៌ ទំនៀមទំលាប់ និងបេតិកភណ្ឌរបស់កម្ពុជាដែលមានចំណាស់ដ៏យូរលង់។ ការរៀបចំកម្មវិធីនេះ មិនត្រឹមតែចូលរួមផ្សព្វផ្សាយនិងលើកកម្ពស់វប្បធម៌ ប្រពៃណី និងអរិយធម៌ខ្មែរដល់មហាជននិងយុវជន ឱ្យបានជ្រួតជ្រាបប៉ុណ្ណោះទេ ប៉ុន្តែថែមទាំងចូលរួមចំណែកដល់ការអភិវឌ្ឍវិស័យទេសចរណ៍វប្បធម៌ និងបេតិកភណ្ឌ ដែលជាប្រភពបង្កើតការងារដ៏ចម្បងសម្រាប់ប្រជាជននិងយុវជន និងចូលរួមដោយផ្ទាល់ក្នុងការកាត់បន្ថយភាពក្រីក្ររបស់ប្រជាពលរដ្ឋនៅមូលដ្ឋាន។ អាស្រ័យហេតុនេះ ដើម្បីឱ្យគម្រោងនេះទទួលបានជោគជ័យ ទាមទារឱ្យមានការចូលរួមនិងសហការយ៉ាងជិតស្និទ្ធពីសំណាក់អាជ្ញាធរពាក់ព័ន្ធទាំងអស់ ជាពិសេស អាជ្ញាធរខេត្តសៀមរាប និងអាជ្ញាធរអប្សរា ព្រមទាំងវិស័យឯកជន និងសប្បុរសជននានា។
ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយស និងក្មួយៗយុវជនទាំងអស់
ជោគជ័យនៃសកម្មភាពទាំងឡាយរបស់សហភាពសហព័ន្ធយុវជនកម្ពុជា ពិតជាមិនអាចកាត់ផ្តាច់ពីការចូលរួមគាំទ្រយ៉ាងផុលផុសពីគ្រប់មជ្ឈដ្ឋានទាំងអស់ ដូចដែលក្មួយ ហ៊ុន ម៉ានី បានលើកឡើងនៅក្នុងសុន្ទរកថាស្វាគមន៍ ។ ក្នុងនាមរាជរដ្ឋាភិបាល ខ្ញុំសូមកោតសរសើរ និងថ្លែងអំណរគុណចំពោះការចូលរួមវិភាគទានដ៏ថ្លៃថ្លាពីបណ្តាក្រុមហ៊ុន សហគ្រាស អង្គការ សមាគម ក៏ដូចជា ឯកឧត្តម លោកជំទាវ លោកឧកញ៉ា អស់លោក លោកស្រី និងសប្បុរសជនទាំងអស់។ អាស្រ័យហេតុនេះ ការជួបជុំគ្នាដ៏សប្បាយរីករាយនៅថ្ងៃនេះ គឺជាឱកាសដ៏ល្អប្រសើរសម្រាប់ឯកឧត្តម លោកជំទាវ លោកឧកញ៉ា អស់លោក លោកស្រី និងសប្បុរសជនទាំងអស់ ចូលរួមជាមួយរាជរដ្ឋាភិបាល ក្នុងការបន្តឧបត្ថម្ភគាំទ្រដល់ «ចលនាយុវជនក្នុងបុព្វហេតុមាតុភូមិ» តាមការអំពាវនាវរបស់លោកប្រធានសហភាពសហព័ន្ធយុវជនកម្ពុជា ដើម្បីឱ្យចលនានេះបន្តសម្រេចបាននូវបេសកកម្មដ៏ឧត្តុង្គឧត្តមរបស់ខ្លួន និងសមិទ្ធផលថ្មីៗជាច្រើនទៀតជូនសង្គមជាតិ។
ជាទីបញ្ចប់ ខ្ញុំសូមឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយស និងក្មួយៗយុវជនទាំងអស់ រីករាយជាមួយនឹងរាត្រីសមោសរដ៏អធិកអធមនេះ និងសូមជូនពរសុខភាពល្អ ជោគជ័យគ្រប់ភារកិច្ច និងសុភមង្គលក្នុងក្រុមគ្រួសារ៕
សូមអរគុណ!!