វិមានសន្តិភាព ថ្ងៃទី២ ខែមេសា ឆ្នាំ២០១៣
- លោកស្រី Setsuko Yamazakiនាយកអង្គការUNDP ប្រចាំនៅកម្ពុជា!
- លោក StanislavDamjanovic នាយករងកម្មវិធីរបស់អង្គការ HALO Trust ប្រចាំនៅកម្ពុជា!
- ឯកឧត្តម លោកជំទាវ អស់លោក លោកស្រី តំណាងដៃគូអភិវឌ្ឍន៍ អង្គការជាតិ អន្តរជាតិ និងសមាជិក សមាជិកា នៃអង្គសន្និបាតទាំងមូលជាទីមេត្រី!
ថ្ងៃនេះ ខ្ញុំមានសេចក្តីសោមនស្សរីករាយចូលរួមជាមួយឯកឧត្តម លោកជំទាវ អស់លោក លោកស្រី ដែលជាតំណាងសហគមន៍ជាតិ អន្តរជាតិ ដៃគូអភិវឌ្ឍន៍ និងប្រតិបត្តិករទាំងអស់ ក្នុងពិធីបើកសន្និបាតជាតិ វិស័យសកម្មភាពមីន ដ៏មានសារៈសំខាន់នេះ។ ខ្ញុំសូមយកឱកាសនេះសម្តែងនូវការកោតសរសើរ និងវាយ តម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំអាជ្ញាធរ មីនកម្ពុជា អគ្គលេខាធិការដ្ឋាន និងអង្គភាពពាក់ព័ន្ធទាំងអស់ ដែលបានសហការរៀបចំសន្និបាតជាតិនេះឡើង ដើម្បីឱ្យយើងទាំងអស់គ្នាបានយល់ដឹងកាន់តែស៊ីជម្រៅ អំពីវឌ្ឍនភាពការងាររយៈពេល បីឆ្នាំដំបូងនៃការអនុវត្តផែនការយុទ្ធសាស្ត្រជាតិសកម្មភាពមីន២០១០- ២០១៩ ក៏ដូចជាការយល់ដឹងអំពីស្ថានភាពទូទៅនៃប្រតិបតិ្តការបោសសំអាតមីននៅកម្ពុជា។
ការជួបជុំគ្នានៅថ្ងៃនេះ មិនត្រឹមតែជាសក្ខីភាពបញ្ជាក់នូវការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការបោសសំអាតមីនដើម្បីធានាបាននូវសុវត្ថិភាពជូនប្រជាពលរដ្ឋគ្រប់ រូបប៉ុណ្ណោះទេ ប៉ុន្តែថែមទាំងបានឆ្លុះបញ្ចាំងឱ្យឃើញយ៉ាងច្បាស់អំពីកម្លាំងរួបរួមសាម គ្គីភាព ដើម្បីសកម្មភាពមនុស្សធម៌និងការអភិវឌ្ឍនៅកម្ពុជាទៀតផង។ ក្នុងនាមរាជរដ្ឋាភិបាល ខ្ញុំសូមសម្តែងនូវការកោតសរសើរនិងថ្លែងអំណរគុណ យ៉ាងជ្រាលជ្រៅដល់សហគមន៍ជាតិ អន្តរជាតិ និងដៃគូអភិវឌ្ឍន៍ទាំងអស់ ដែលបានជួយឧបត្ថម្ភគាំទ្រ និងជំរុញឱ្យយុទ្ធនាការបោស សំអាតមីននៅកម្ពុជាប្រព្រឹត្តទៅប្រកបដោយជោគជ័យក្នុងរយៈកាលកន្លងមក។
ឯកឧត្តម លោកជំទាវ សមាជិក សមាជិកានៃអង្គសន្និបាតទាំងមូលជាទីមេត្រី
សង្រ្គាមនៅកម្ពុជាជាច្រើនទសវត្សកន្លងមក បានបន្សល់ទុកនូវតំបន់ដែលនៅមានការគំរាមកំហែង និងគ្រោះថ្នាក់ដោយសារគ្រាប់មីននិងសំណល់ជាតិផ្ទុះយ៉ាងច្រើន ហើយផលប៉ះពាល់ដោយសារសំណល់ជាតិផ្ទុះពីសង្គ្រាម ភាគច្រើនគឺជាគ្រាប់ទម្លាក់ពីលើអាកាស ជាពិសេស គ្រាប់បែកចង្កោមនិងយុទ្ធភ័ណ្ឌមិនទាន់ផ្ទុះជាច្រើនទៀត។ ដោយមើលឃើញពីផលវិបាកយ៉ាងធ្ងន់ធ្ងរនេះ ក្នុងនាមជាប្រទេសរងគ្រោះ និងក្នុងនាមជារដ្ឋភាគីនៃអនុសញ្ញាអូតាវ៉ា រាជរដ្ឋាភិបាលបានយកចិត្តទុកដាក់យ៉ាងខ្លាំងចំពោះបេសកកម្មបោសសំអាត មីន និងសំណល់ជាតិផ្ទុះពីសង្គ្រាម។ តាមរយៈសុន្ទរកថារបស់ ឯកឧត្តម ប្រាក់ សុខុន អនុប្រធានអាជ្ញាធរមីនកម្ពុជា បានបញ្ជាក់ឱ្យឃើញថា សកម្មភាពដោះមីនជាលក្ខណៈមនុស្សធម៌នៅកម្ពុជា ដោយមានជំនួយឧបត្ថម្ភជាថវិកា បច្ចេកទេស និងសម្ភារៈពីសំណាក់ដៃគូអភិវឌ្ឍន៍នានាត្រូវ បានចាប់ផ្តើមជាផ្លូវការតាំងពីឆ្នាំ១៩៩២មកម្ល៉េះ ហើយមកទល់ពេលនេះបេសកកម្មបោសសំអាតមីននៅតែជាកិច្ចការដ៏ចំបង និងមានភាពចាំបាច់ ដែលតម្រូវឱ្យរាជរដ្ឋាភិបាលត្រូវបន្តយកចិត្តទុកខ្ពស់ក្នុងការ ជំរុញនិងលើកទឹកចិត្តឱ្យអាជ្ញាធរមីនកម្ពុជា ដៃគូអភិវឌ្ឍន៍ និងភាគីពាក់ព័ន្ធទាំងអស់បំពេញតួនាទីរបស់ខ្លួន ស្របតាមផែនការយុទ្ធសាស្រ្តជាតិសកម្មភាពមីន ឱ្យកាន់តែមានប្រសិទ្ធភាពថែមទៀត។ តាមរបាយការណ៍នៃការស្រាវជ្រាវទិន្នន័យមូលដ្ឋានបានឱ្យដឹងថា បច្ចុប្បន្ន ផ្ទៃដីគ្របដណ្តប់ដោយគ្រាប់មីន និងសំណល់ជាតិផ្ទុះពីសង្គ្រាមជាពិសេសមីនប្រឆាំង មនុស្សនិងមីនតោនគឺនៅសល់ប្រមាណជាង ១៧០០គីឡូម៉ែត្រក្រឡា ដែលផ្ទៃដីទាំងនេះភាគច្រើនស្ថិតក្នុងដែនដីនៃ បណ្ដាខេត្តភាគខាងលិចឆៀងខាងជើងជាប់ព្រំដែនកម្ពុជា-ថៃ។
គ្រាប់មីន និងសំណល់ជាតិផ្ទុះពីសង្រ្គាមបានធ្វើឱ្យប្រជាជនយើងទទួលរងនូវផលប៉ះពាល់ជា អវិជ្ជមានស្ទើរគ្រប់វិស័យ ដែលជាឧបសគ្គរារាំងដល់ដំណើរការអភិវឌ្ឍន៍ប្រទេសជាតិ។ គ្រាប់មីននៅក្នុងដីបានកម្រិតលទ្ធភាពប្រើប្រាស់ធនធានធម្មជាតិ ពិសេសធនធានដីធ្លីនៅតាមទីជនបទ។ ជាក់ស្តែង ប្រជាជននៅមានការព្រួយបារម្ភចំពោះសុវត្ថិភាពរបស់ខ្លួន ក្នុងការអាស្រ័យផលលើផ្ទៃដីមិនទាន់បោសសំអាត។ ក្នុងន័យនេះរាជរដ្ឋាភិបាលនៅតែបន្តចាត់ទុកសកម្មភាពកំចាត់មីន ជាអាទិភាពដ៏ចំបងនៅក្នុងសកម្មភាពស្ដារ និងអភិវឌ្ឍប្រទេសជាតិ ជាពិសេស ឈានទៅសម្រេចបានការកាត់បន្ថយភាពក្រីក្រ និងជំរុញកំណើនសេដ្ឋកិច្ច។
សកម្មភាពកំចាត់មីន គឺមិនត្រឹមតែជាការដោះស្រាយបញ្ហាសន្តិសុខសង្គម ដើម្បីផ្តល់សុវត្ថិភាពជូនប្រជាពលរដ្ឋគ្រប់រូបប៉ុណ្ណោះទេ ក៏ប៉ុន្តែថែមទាំងជាបេសកកម្មបោសសំអាតដីធ្លី និងប្រែក្លាយដីទាំងនោះឱ្យទៅជាតំបន់អភិវឌ្ឍសេដ្ឋកិច្ច-សង្គមទៀតផង។ ជាក់ស្តែង ក្នុងការចុះវាស់វែងដីធ្លីដើម្បីធានាកម្មសិទ្ធិដីធ្លីស្រប ច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌ និងស្ថេរភាពសង្គម រាជរដ្ឋាភិបាលបានដាក់ចេញនូវគោលនយោបាយចាស់សកម្មភាពថ្មី ដែលចុះអនុវត្តដោយក្រុមវីរៈយុវជនស្ម័គ្រចិត្តសម្តេចតេជោ និងមន្ត្រីជំនាញមកពីក្រសួងរៀបចំដែនដី នគរូបនីយកម្មនិងសំណង់ គឺពិតជាត្រូវការកិច្ចសហការយ៉ាងជិតស្និទ្ធពីមន្រ្តីបច្ចេកទេសជំនាញខាង ដោះមីនដោយខាងពុំបាន។ ដូចនេះ ការចុះវាស់វែងដីធី្ល និងផ្តល់ដីធ្លីមានសុវត្ថិភាពជូនប្រជាពលរដ្ឋសម្រាប់តាំង លំនៅដ្ឋាននិងប្រកបរបរផ្សេងៗដើម្បីចិញ្ចឹមជីវិត គឺពិតជាមិនអាចកាត់ផ្តាច់ចេញពីការងារបោសសំអាតមីន និងសំណល់ជាតិផ្ទុះបានឡើយ។
យោង តាមរបាយការណ៍ជនរងគ្រោះរបស់អាជ្ញាធរមីនបានឱ្យដឹងថា ចំនួនប្រជាពលរដ្ឋដែលរងគ្រោះថ្នាក់បណ្ដាលមកពីការផ្ទុះគ្រាប់មីន និងសំណល់ជាតិផ្ទុះពីសង្គ្រាម ទាំងរបួស និងស្លាប់ពីឆ្នាំ១៩៧៩ ដល់ឆ្នាំ២០១២ មានចំនួនសរុប ៦៤០០០នាក់ ក្នុងនោះប្រមាណ ៧០% ត្រូវបាត់បង់កម្លាំងពលកម្ម និងបាត់បង់ផ្នែកខ្លះនៃកាយសម្បទាហើយប្រមាណ ៣០% ទៀតត្រូវបាត់បង់អាយុជីវិត។ និន្នាការតួលេខជនរងគ្រោះដោយសារមីន និងសំណល់ជាតិផ្ទុះពីសង្រ្គាម បានធ្លាក់ចុះពីមួយឆ្នាំទៅមួយឆ្នាំគឺក្នុងឆ្នាំ២០១០ មានជនរងគ្រោះចំនួន២៨៦នាក់ ក្នុងឆ្នាំ២០១១ មានចំនួន ២១១នាក់ ហើយក្នុងឆ្នាំ២០១២ តួលេខជនរងគ្រោះបានធ្លាក់មកនៅត្រឹមចំនួន ១៨៦នាក់។ នេះជាលើកទីមួយហើយដែលតួលេខចំនួនអ្នករងគ្រោះបានធ្លាក់មកនៅ ក្រោមបន្ទាត់ ២០០នាក់ ក្នុងមួយឆ្នាំ។
ការធ្លាក់ចុះនេះ គឺដោយសារមានកិច្ចខិតខំប្រឹងប្រែង និងការយកចិត្តទុកដាក់ខ្ពស់របស់រាជរដ្ឋាភិបាល ប្រតិបត្តិករ ភាគីពាក់ព័ន្ធ និងដៃគូអភិវឌ្ឍន៍ ដែលបានចូលរួមយ៉ាងសកម្មក្នុងការបោសសំអាតចំគោលដៅដែលរងផល ប៉ះពាល់ខ្លាំង ក៏ដូចជា មានការផ្សព្វផ្សាយអប់រំប្រជាពលរដ្ឋដល់មូលដ្ឋាន ឱ្យបានយល់ដឹងអំពីគ្រោះថ្នាក់ដោយសារគ្រាប់មីននិង សំណល់ជាតិផ្ទុះពីសង្រ្គាម។ ថ្វីបើមានការធ្លាក់ចុះបែបនេះក្តី ចំនួនជនរងគ្រោះនៅតែខ្ពស់ បើប្រៀបធៀបនឹងប្រទេសដែលរងគ្រោះដោយសារមីននិងសំណល់ជាតិផ្ទុះពី សង្រ្គាមដទៃទៀត។
លើសពីនេះទៅទៀត អនុវត្តតាមរបៀបវារៈនិងកាតព្វកិច្ចដែលមានចែងនៅក្នុងអនុសញ្ញាអូតាវ៉ា ដែលកម្ពុជាជារដ្ឋភាគី និងធ្លាប់ធ្វើជាប្រធានដឹកនាំកិច្ចប្រជុំប្រកប ដោយជោគជ័យកាលពីឆ្នាំ២០១២ រាជរដ្ឋាភិបាលកម្ពុជាចាប់ពីឆ្នាំ២០១០មក បានផ្ដល់ថវិកាជាច្រើនលានដុល្លារ អាមេរិកសម្រាប់ទ្រទ្រង់ដំណើរការប្រព្រឹត្តទៅរបស់ស្ថាប័នពាក់ព័ន្ធ និងការត្រួតពិនិត្យតាមដានការអនុវត្តយុទ្ធសាស្ត្រជាតិសកម្មភាពមីន ហើយក៏បានរួមចំណែកថវិការាប់សិបលានដុល្លារអាមេរិកថែមទៀត តាមរយៈការបង់ពន្ធជាបន្ទុករបស់រដ្ឋទៅលើការនាំចូលសម្ភារៈបរិក្ខារ ឧបករណ៍ប្រើប្រាស់ រថយន្ត និងគ្រឿងចក្រនានា។
ឯកឧត្តម លោកជំទាវ សមាជិក សមាជិកានៃអង្គសន្និបាតទាំងមូលជាទីមេត្រី
បន្តិចទៀតនេះ ក្រុមការងារនៃអគ្គលេខាធិការដ្ឋានអាជ្ញាធរមីន និងតំណាងក្រសួងស្ថាប័នពាក់ព័ន្ធនឹងធ្វើបទបង្ហាញជូនអង្គសន្និបាត ជ្រាបអំពីសមិទ្ធផលដែលយើងសម្រេចបានក្នុងរយៈពេលបីឆ្នាំ គិតចាប់ពីដើមឆ្នាំ២០១០ រហូតដល់ចុងឆ្នាំ២០១២។ បទបង្ហាញទាំងនេះនឹងគ្របដណ្ដប់លើទិដ្ឋភាពយ៉ាងច្រើន ដែលរួមមានការស្រាវជ្រាវទិន្នន័យមូលដ្ឋាន ការរំដោះផៃ្ទដីសង្ស័យ ការធ្វើផែនការនិងការចាត់អាទិភាព ការអប់រំពីគ្រោះថ្នាក់មីន ការសង្រ្គោះជនរងគ្រោះ ការកសាងនិងការធានានិរន្តរភាពនៃសមត្ថភាពជាតិ និងការសម្របសម្រួលការរក្សាស្ថិរភាពក្នុងតំបន់និងអន្តរជាតិជាដើម។ តាមរយៈបទបង្ហាញនេះ យើងនឹងបានឃើញកាន់តែច្បាស់អំពីកិច្ចខិតខំប្រឹងប្រែងយ៉ាងប្ដូរផ្ដាច់ របស់រាជរដ្ឋាភិបាល ក្នុងការធ្វើឱ្យកម្ពុជាបានរួចចាកផុតពីការគំរាមកំហែង ដោយសារមីននិងសំណល់ជាតិផ្ទុះពីសង្រ្គាមគ្រប់ប្រភេទ ក៏ដូចជា ការការពារសិទ្ធិជនពិការដោយសារមីននិងសំណល់ជាតិផ្ទុះពីសង្រ្គាម ជាពិសេស ការលើកកម្ពស់សហគមន៍ជនពិការឱ្យកាន់តែមានភាពប្រសើរឡើងថែមទៀត។
តាមរយៈសនិ្នបាតរយៈពេលពេញមួយថ្ងៃនេះ ឯកឧត្តម លោកជំទាវ លោក លោកស្រី នឹងបានយល់ដឹងកាន់តែច្បាស់ថែមទៀតអំពីសមិទ្ធផល ការប្រឈម តម្រូវការ និងដំណោះស្រាយនានា ដែលអាជ្ញាធរមីន និងភាគីពាក់ព័ន្ធទាំងអស់ត្រូវបន្តយកចិត្តទុកដាក់អនុវត្ត សំដៅជំរុញឱ្យវិស័យសកម្មភាពមីនទាំងមូលសម្រេចបានលទ្ធផលជាវិជ្ជមាន និងប្រកបដោយប្រសិទ្ធភាព។ សកម្មភាពកំចាត់មីននៅកម្ពុជាកំពុងស្ថិតនៅក្នុងរបត់ ដ៏សំខាន់មួយដែលរាជរដ្ឋាភិបាលត្រូវបន្ថែមភាពជាម្ចាស់និងភាពជាអ្នកដឹកនាំឱ្យបានខ្លាំងក្លាថែមទៀត ដើម្បីពន្លឿនការដោះស្រាយបញ្ហាលើវិស័យដ៏មានសារៈសំខាន់នេះ។ ខ្ញុំមានជំនឿយ៉ាងមុតមាំថា សមាជិក សមាជិកា នៃអង្គសន្និបាតទាំងមូលនឹងយកអស់កម្លាំងកាយ កម្លាំងចិត្ត និងកម្លាំងបញ្ញា ចូលរួមពិភាក្សា និងផ្លាស់ប្ដូរយោបល់ ដើម្បីពិនិត្យ វាយតម្លៃចំនុចខ្លាំង ចំនុចខ្សោយ និងបទពិសោធល្អៗ សំដៅរួមគ្នាធ្វើឱ្យសម្រេចបានជោគជ័យផែនការយុទ្ធសាស្រ្តជាតិ សកម្មភាពមីន ២០១០-២០១៩។
សមិទ្ធផលសំខាន់ៗ ដែលសម្រេចបានលើវិស័យសកម្មភាពមីនកន្លងមក ពិតជាមិនអាចកាត់ផ្ដាច់ចេញពីជំនួយសប្បុរសដ៏ថ្លៃថ្លា និងកិច្ចសហការយ៉ាងជិតស្និទ្ធពីសំណាក់ដៃគូអភិវឌ្ឍន៍ឡើយ។ ឆ្លៀតឱកាសដ៏វិសេសវិសាលនេះ ខ្ញុំសូមថ្លែងអំណរគុណយ៉ាងជ្រាលជ្រៅបំផុតជូនចំពោះប្រទេសផ្ដល់ ជំនួយដៃគូអភិវឌ្ឍន៍ និងភាគីពាក់ព័ន្ធទាំងអស់ ដែលបានចូលរួមយ៉ាងសកម្មក្នុងការផ្ដល់ជំនួយទាំងបច្ចេកទេស និងហិរញ្ញវត្ថុដល់វិស័យសកម្មភាពមីននាពេលកន្លងមកក្នុងបុព្វហេតុនៃ ការអនុវត្តសកម្មភាពកំចាត់មីន សំដៅរួមចំណែកក្នុងការកាត់បន្ថយភាពក្រីក្រ និងកំណើនសេដ្ឋកិច្ចនៃព្រះរាជាណាចក្រកម្ពុជា។ ក្នុងនាមរាជរដ្ឋាភិបាល ខ្ញុំសូមអំពាវនាវដល់បណ្ដាដៃគូអភិវឌ្ឍន៍ទាំងអស់ សូមមេត្តាបន្តរក្សា និងបង្កើនជំនួយឧបត្ថម្ភដល់ប្រតិបត្តិករជាតិ និងអន្តរជាតិទាំងអស់នៅកម្ពុជា តាមរយៈអាជ្ញាធរមីនក្ដី តាមរយៈទ្វេភាគី ឬជាពហុភាគីក្ដី ដើម្បីឱ្យការអនុវត្តផែនការសកម្មភាពមីនជាតិ២០១០-២០១៩ សម្រេចបានលទ្ធផលជាវិជ្ជមានតាមការគ្រោងទុក។
មុននឹងបញ្ចប់ ខ្ញុំសូមកោតសរសើរ និងថ្លែងអំណរគុណជាថ្មីម្តងទៀតចំពោះថ្នាក់ដឹកនាំអាជ្ញាធរមីនកម្ពុជា អគ្គលេខាធិការដ្ឋាន និងអង្គភាពពាក់ព័ន្ធទាំងអស់ ដែលបានខិតខំបំពេញភារកិច្ចរបស់ខ្លួន ប្រកបដោយការទទួលខុសត្រូវខ្ពស់ក្នុងបេសកកម្មបោសសំអាតមីននិងសំណល់ ជាតិផ្ទុះពីសង្រ្គាម។ ខ្ញុំមានជំនឿយ៉ាងមុតមាំថា គ្រប់អង្គភាពនិងដៃគូពាក់ព័ន្ធទាំងអស់នឹងបន្តអនុវត្តគោលនយោបាយជាតិ សកម្មភាពមីនឱ្យកាន់តែខ្លាំងក្លាថែមទៀតនិងទទួលបានជោគជ័យ ដើម្បីជាប្រយោជន៍ដ៏ថ្លៃថ្លាជូនជាតិមាតុភូមិជាទីស្នេហានៃយើង។
ជាទីបញ្ចប់ ខ្ញុំសូមជូនពរឯកឧត្តម លោកជំទាវ អស់លោក លោកស្រី សមាជិក សមាជិកា នៃសន្និបាតទាំងមូល សូមមានសុខភាពល្អ ទទួលបានជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ។
ខ្ញុំសូមប្រកាសបើកសន្និបាតជាតិវិស័យសកម្មភាពមីននៅកម្ពុជាចាប់ពីពេលនេះតទៅ៕
សូមអរគុណ!