លោក សម រង្ស៊ី ដែលគេស្គាល់ថាជាមនុស្សសម្បូររឿងអាស្រូវច្រើនជាងគេ បានប្រកាសថាយុទ្ធសាស្រ្តឈ្នះ -ឈ្នះ គឺមិនចូលរួមបោះឆ្នោតក្នុងគោលបំណងស្រែកឲ្យបរទេសគាំទ្រនូវ គំនិតរបស់ខ្លួនក្នុងការបដិសេធលទ្ធផលនៃការបោះឆ្នោតសកល នាខែកក្កដា ខាងមុខ។
តាមរយៈវិទ្យុបរទេសផ្សាយជាខេមរៈភាសាបានដកស្រង់សំដីលោក សម រង្ស៊ី កាលពីថ្ងៃទី២៦ ខែមិនា ឆ្នាំ២០១៣ ថា«យុទ្ធសាស្រ្តឈ្នះ-ឈ្នះចុងក្រោយរបស់គណបក្សសង្រ្គោះជាតិ គឺលោក នឹងមិនវិលត្រឡប់មកកម្ពុជាដើម្បីចូលរួមការបោះឆ្នោត ដើម្បីឲ្យសហគមន៏អន្តរជាតិកុំទទួលស្គាល់លទ្ធផលបោះឆ្នោត និងរដ្ឋាភិបាលថ្មី»។
វាមិនអាចទៅរួចនោះទេ គេនៅចាំបានថា កាលពីឆ្នាំ ២០០៨ ការបោះឆ្នោតសកល សូម្បីតែវត្តមានរបស់លោក សម រង្ស៊ី នៅឆ្នាំនោះ គ្រាន់តែដឹងថាចាញ់ឆ្នោតភ្លាម លោក សម រង្ស៊ី និងលោក កឹម សុខា ប្រកាសមិនទទួលស្គាល់លទ្ធផល ហើយចោទថាគណៈកម្មាធិការជាតិរៀបចំការបោះឆ្នោត មិនឯករាជ្យ អយុត្តិធម៌ និងបាននាំគ្នាស្ពាយឯកសារទៅប្តឹងសហគមន៏អន្តរជាតិ ប៉ុន្តែការប្តឹងត្រូវបរាជ័យ ពីព្រោះ ការបោះឆ្នោតសម័យនោះក៏ដូចការបោះឆ្នោតសកលឆ្នាំ២០១៣ ខាងមុខនេះប្រាកដជាមានអ្នកសង្កេតការណ៏ជាតិ អន្តរជាតិ ជាពិសេសអ្នកសង្កេតការណ៏ តំណាងនៃគណបក្សនយោបាយរបស់បក្សនីមួយៗបាន និងកំពុងតែត្រៀមនូវគ្រូបង្គោល ឬសកម្មជនរបស់គណបក្សនិមួយៗក្នុងការបណ្តុះបណ្តាលរបៀបសង្កេតការណ៏ ក៏ដូចជារបៀបរាប់សន្លឹកឆ្នោត។សូម្បីតែលោក យឹម សុវណ្ណ ធ្លាប់ប្រាប់វិទ្យុបរទេសផ្សាយជាខេមរៈភាសា កាលពីកំឡុងពេលបោះឆ្នោតក្រុមប្រឹក្សាឃុំសង្កាត់ថា ទោះបីលោក សម រង្ស៊ី មិនមានវត្តមានក៏គណបក្សរបស់ខ្លួន មិនមានបញ្ហាអ្វីដែរ ហើយលោក សម រង្ស៊ី ខ្លួនឯងផ្ទាល់ក៏ធ្លាប់និយាយថា លោក ធ្វើការតាមវិញ្ញាណ វត្តមានរបស់ខ្លួនមិនសំខាន់នោះទេ។ល។
ប្រជាពលរដ្ឋបានឃើញយ៉ាងច្បាស់នូវទង្វើមិនទៀងទាត់របស់លោក សម រង្ស៊ី ដែលរកជឿមិនបានទាល់តែសោះចំពោះមេបក្សមួយនេះ ពីព្រោះប៉ុន្មានឆ្នាំនេះលោក សម រង្ស៊ី តែងតែចោទប្រកាន់មកលើរាជរដ្ឋាភិបាលម្តងហើយម្តងទៀតថា រាជរដ្ឋាភិបាលហាមឃាត់រូបលោក មិនឲ្យចូលស្រុក។ប្រមុខរាជរដ្ឋាភិបាលធ្លាប់ប្រកាសហើយថា សម្តេច មិនបានហាមឃាត់លោក សម រង្ស៊ី ក្នុងការចូលស្រុកនោះទេ ។
គួរំលឹកផងដែរថា លោក សម រង្ស៊ី ត្រូវបានតុលាការ កាត់ទោសកំបាំងមុខផ្តន្ទាទោសឲ្យជាប់គុក១២ឆ្នាំក្រោមបទដកតម្រុយ បង្គោលព្រំដែនកម្ពុជាវៀតណាម និងបទក្លែងផែនទីកម្ពុជាវៀតណាម និងបទបរិហាកេរ្តិ៏ ឯកឧត្តម ហោ ណាំហុង ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ ។
លោក សម រង្ស៊ី ក៏ធ្លាប់បានដើរបញ្ចុះបញ្ចូល សហគមន៏អ៊ឺរ៉ុប សភាអន្តរជាតិ ក្នុងបំណងចង់ចូលស្រុកហើយនិយាយដដែលៗថា«បើអត់រូបខ្ញុំ ការបោះឆ្នោតគ្មានតម្លៃ ហើយក៏គ្មាននណាទទួលស្គាល់រដ្ឋាភិបាល នឹងឈានចូលស្ថានការណ៏ ពីព្រោះអត់មានរដ្ឋាភិបាលស្របច្បាប់»។ ការពិតមិនដូចជាការអះអាងរបស់លោក សម រង្ស៊ី នោះទេ សហគមន៏ជាតិ អន្តរជាតិ តែងតែទទួលស្គាល់ថាការបោះឆ្នោតនៅកម្ពុជាមានលក្ខណៈត្រឹមត្រូវ លិទ្ធិប្រជាធិបតេយ្យ យុត្តិធម៌ ថែមទាំងមានកិច្ចសហប្រតិបត្តិការនូវរាល់ដំណើរការបោះឆ្នោត។
លើសពីនេះទៅទៀត លោក សម រង្ស៊ី ធ្លាប់ប្រកាសប្រាប់សមាជិករបស់ខ្លួនថា លោក នឹងមកជាមួយ លោក បារ៉ាក់ អូបាម៉ា ប្រធា នាធិបតីសហរដ្ឋអាមេរិក ក្នុងខណៈពេលដែលប្រធានាធិបតីរូបនេះមកចូលរួមប្រជុំកំពូលអាស៊ាន នៅកម្ពុជាកន្លងមក។ជាលទ្ធផលលោក សម រង្ស៊ី មិនឃើញស្រមោលទាល់តែសោះនៅកម្ពុជាគឺឃើញតែ លោក បារ៉ាក់ អូបាម៉ា តែប៉ុណ្ណោះ តើសំដីរបស់ លោក សម រង្ស៊ី នេះរកជឿមិនបាន ឬមួយដោយលោក សម រង្ស៊ី ដឹងថាការបោះឆ្នោតខែកក្កដា ខាងមុខគណបក្សសង្រ្គោះជាតិ បរាជ័យ ហើយម្យ៉ាងទៀតរូបលោក ត្រូវបានគណៈកម្មាធិការជាតិរៀបចំបោះឆ្នោតលប់ឈ្មោះ ចេញពីបញ្ជីបោះឆ្នោតរួចហើយ ម្ល៉ោះហើយមានតែមិនចូលស្រុក ហើយយកលេសប្រកាសមិនទទួលស្គាល់លទ្ធផលបោះឆ្នោតទៅ។
ទង្វើនេះ វាមិនមានអ្វីថ្មីនោះទេសំរាប់រូប លោក សម រង្ស៊ី ធ្លាប់ប្រើស្នៀតដដែលនេះច្រើនដងហើយ ដោយឃើញសកម្មភាពរបស់មេបក្សប្រឆាំងដូច្នេះប្រជាពលរដ្ឋរកជឿមិនបាន។
ដោយៈរួម ជាតិ