ក្នុងនាមរាជរដ្ឋាភិបាលកម្ពុជា
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
បានអំពាវនាវដល់បណ្តាដៃគូអភិវឌ្ឍន៍ទាំងអស់ឲ្យបន្តរក្សានិង
បង្កើនជំនួយឧបត្ថម្ភដល់ប្រតិបត្តិការជាតិ
និងអន្តរជាតិទាំងអស់នៅកម្ពុជា
ដើម្បីឲ្យការអនុវត្តន៍ផែនការសកម្មភាពមីន២០១០-២០១៩
សម្រេចបានលទ្ធផលជាវិជ្ជមានតាមការគ្រោងទុក។
នៅក្នុងឱកាសអញ្ជើញជាអធិបតីក្នុងពិធី
បើកសន្និបាតជាតិវិស័យសកម្មភាពមីន
នៅវិមានសន្តិភាពនាព្រឹកថ្ងៃទី២ ខែមេសា ឆ្នាំ២០១៣
ឯកឧត្តមបណ្ឌិតសភាចារ្យ សុខ អាន
បានចាត់ទុកការរៀបចំសន្និបាតជាតិវិស័យសកម្មភាពមីន
ធ្វើឲ្យមានការយល់ដឹងកាន់តែស៊ីជម្រៅអំពីវឌ្ឍនៈភាពបីឆ្នាំដំបូងនៃ
ការអនុវត្តន៍ផែនការយុទ្ធសាស្ត្រជាតិសកម្មភាពមីន ២០១០-២០១៩
ក៏ដូចជាយល់ដឹងពីស្ថានភាពទូទៅនៃប្រតិបត្តិការបោសសម្អាតមីននៅ
កម្ពុជា។
សូមបញ្ជាក់ថា
សង្គ្រាមនៅកម្ពុជាជាច្រើនទសវត្សរ៍កន្លងមក
បានបន្សល់ទុកនូវការគំរាមកំហែង និងគ្រោះថ្នាក់ដោយសារគ្រាប់មីន
និងសំណល់ជាតិផ្ទុះយ៉ាងច្រើន
ហើយផលប៉ះពាល់ដោយសារសំណល់ជាតិផ្ទុះពីសង្គ្រាម
ភាគច្រើនគឺជាគ្រាប់ទម្លាក់ពីលើអាកាស ពិសេសគ្រាប់បែកចង្កោម
និងយុទ្ធភ័ណ្ឌមិនទាន់ផ្ទុះជាច្រើនទៀត។
ឯកឧត្តមបណ្ឌិតសភាចារ្យ សុខ អាន
បានមានប្រសាសន៍បញ្ជាក់ថា
ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតី
តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាការ
បោសសម្អាតមីនមិនត្រឹមតែ
ដើម្បីធានាបាននូវសុវត្ថិភាពជូនប្រជាពលរដ្ឋគ្រប់ៗរូបប៉ុណ្ណោះទេ
ប៉ុន្តែថែមទាំងបានឆ្លុះបញ្ចាំងឲ្យឃើញយ៉ាងច្បាស់អំពីសកម្មភាព
មនុស្សធម៌ និងការអភិវឌ្ឍន៍នៅកម្ពុជាទៀតផង។
ជាក់ស្តែងក្នុងការវាស់វែងដីធ្លី
ដើម្បីធានាកម្មសិទ្ធិដីធ្លីស្របច្បាប់របស់ប្រជាពលរដ្ឋ
ក្រុមយុវជនស្ម័គ្រចិត្តសម្តេចតេជោ
និងមន្ត្រីជំនាញមកពីក្រសួងរៀបចំដែនដី នគររូបនីយកម្ម និងសំណង់
ក្នុងការអនុវត្តន៍នូវនយោបាយចាស់ សកម្មភាពថ្មី
ពិតជាត្រូវការកិច្ចសហប្រតិបត្តិការយ៉ាងជិតស្និទ្ធពីមន្ត្រី
បច្ចេកទេសជំនាញខាងដោះមីន ក្នុងការងារបោសសម្អាតមីន
និងសំណល់ជាតិផ្ទុះ។
ឯកឧត្តម ប្រាក់ សុខុន
អនុប្រធានអាជ្ញាធរមីនកម្ពុជា បានឲ្យដឹងថា
សកម្មភាពដោះមីនជាលក្ខណៈមនុស្សធម៌ ដោយមានជំនួយឧបត្ថម្ភជាថវិកា
បច្ចេកទេស និងសម្ភារ និងដៃគូអភិវឌ្ឍន៍នានា
បានចាប់ផ្តើមជាផ្លូវការតាំងពីឆ្នាំ១៩៩២មកម្ល៉េះ។
យោងតាមរបាយការណ៍ជនរងគ្រោះរបស់អាជ្ញាធរមីនបានឲ្យដឹងថា
ចំនួនប្រជាពលរដ្ឋដែលរងគ្រោះថ្នាក់បណ្តាលមកពីការផ្ទុះមីន
និងសំណល់ជាតិផ្ទុះពីសង្គ្រាមទាំងរបួស និងស្លាប់ ពីឆ្នាំ១៩៧៩
ដល់ឆ្នាំ២០១២ មានចំនួនសរុប ៦៤០០០នាក់ នៅក្នុងនោះប្រមាណជា ៧០%
ត្រូវបាត់កម្លាំងពលកម្ម និងបាត់បង់ផ្នែកខ្លះនៃកាយសម្បទារ ហើយ
ប្រមាណជា ៣០%ទៀត ត្រូវបាត់បង់អាយុជីវិត។
និន្នាការតួលេខជនរងគ្រោះដោយសារគ្រាប់មីន
និងសំណល់ជាតិផ្ទុះពីសង្គ្រាមបានធ្លាក់ចុះពីមួយឆ្នាំទៅមួយ
ឆ្នាំ។ ក្នុងឆ្នាំ២០១០ មានជនរងគ្រោះសារគ្រាប់មីន
និងសំណល់ជាតិផ្ទុះពីសង្គ្រាមមានចំនួន ២៨៦នាក់។ ឆ្នាំ២០១១
មានចំនួន២១១នាក់ ហើយក្នុងឆ្នាំ២០១២
តួលេខជនរងគ្រោះបានធ្លាក់មកនៅត្រឹម ១៨៦នាក់ ដែលបញ្ហានេះ
ឯកឧត្តមបណ្ឌិតសភាចារ្យ សុខ អាន បានចាត់ទុកថា ជាលើកទីមួយហើយ
ដែលតួលេខអ្នករងគ្រោះបានធ្លាក់ចុះមកនៅក្រោមបន្ទាត់
២០០នាក់ក្នុងមួយឆ្នាំ។ ឯកឧត្តមបណ្ឌិតសភាចារ្យ សុខ អាន
បានចាត់ទុកការធ្លាក់ចុះនេះ គឺដោយសារមានការខិតខំប្រឹងប្រែង
និងការយកចិត្តទុកដាក់ខ្ពស់របស់រាជរដ្ឋាភិបាល ប្រតិបត្តិករ
ភាគីពាក់ព័ន្ធ
និងដៃគូអភិវឌ្ឍន៍ដែលបានចូលរួមយ៉ាងសកម្មក្នុងការបោសសម្អាតចំគោល
ដៅ ដែលរងផលប៉ះពាល់ខ្លាំង
ក៏ដូចជាការផ្សព្វផ្សាយអប់រំប្រជាពលរដ្ឋដល់មូលដ្ឋាន
ឲ្យបានយល់ដឹងអំពីគ្រោះថ្នាក់ដោយសារគ្រាប់មីន
និងសំណល់ជាតិផ្ទុះពីសង្គ្រាម។
ទោះបីជាមានការធ្លាក់ចុះបែបនេះក្តី ឯកឧត្តមបណ្ឌិតសភាចារ្យ សុខ អាន
នៅតែទទួលស្គាល់ថា ចំនួនជនរងគ្រោះនៅតែខ្ពស់
បើប្រៀបធៀបនឹងប្រទេសដែលរងគ្រោះដោយសារមីន
និងសំណល់ជាតិផ្ទុះពីសង្គ្រាមដទៃទៀត។
យោងតាមការស្រាវជ្រាវទិន្នន័យមូលដ្ឋាន
បានឲ្យដឹងថា បច្ចុប្បន្នផ្ទៃដីគ្របដណ្តប់ដោយសារគ្រាប់មីន
និងសំណល់ជាតិផ្ទុះពីសង្គ្រាម ជាពិសេសមីនប្រឆាំងមនុស្ស
និងមីនតោននៅសល់ប្រមាណជាង ១៧០០គីឡូម៉ែត្រក្រឡា
ដែលផ្ទៃដីទាំងនេះស្ថិតនៅក្នុងដែនដីភាគខាងលិចឈៀងខាងជើង
ជាប់ព្រំដែនកម្ពុជា-ថៃ។
សូមបញ្ជាក់ថា
ក្រៅពីប្រតិបត្តិការបោសសម្អាតមីននៅកម្ពុជា រាជរដ្ឋាភិបាលកម្ពុជា
ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ
ហ៊ុន សែន
បានសម្របសម្រួលបញ្ជូនកម្លាំងបោសសម្អាតមីននៃកងយោធពលខេមរៈភូមិន្ទ
ទៅបំពេញបេសកកម្មអន្តរជាតិនៅប្រទេសស៊ូដង់
ក្រោមឆ័ត្រអង្គការសហប្រជាជាតិលើកដំបូងជាប្រវត្តិសាស្ត្រ
កាលពីថ្ងៃទី១២ ខែមេសា ឆ្នាំ២០០៦ ចំនួន ១៣៥នាក់។
បើគិតចាប់តាំងពីឆ្នាំ២០០៦ មកដល់បច្ចុប្បន្ន
កម្ពុជាបានបញ្ជូនកងកម្លាំងចូលរួមបេសកកម្ម
ក្នុងនាមអង្គការសហប្រជាជាតិសរុប ១៤៤៥នាក់ នៅក្នុងប្រទេសស៊ូដង់ ឆាត
អាហ្វ្រិកកណ្តាល ស៊ូដង់ខាងត្បូង និងប្រទេសលីបង់៕