ឯកឧត្តមបណ្ឌិត សុខ អាន ឧបនាយក
រដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
បានថ្លែងថា ឯកឧត្តមនឹងយក
មជ្ឈមណ្ឌលភូមិមួយផលិតផលមួយសុខអានទន្លាប់ នៅក្នុងស្រុកគីរីវង្ស
ខេត្តតាកែវជាកន្លែង ដើម្បីជួយលើកស្ទួយជីវភាពប្រជាពលរដ្ឋ
និងជម្រុញការផលិត។ សេចក្តីថ្លែងអះអាងរបស់ឯកឧត្តមបណ្ឌិត សុខ អាន បាន
ធ្វើឡើងក្នុងពិធីចែកអំណោយនាព្រឹកថ្ងៃទី ៩ ខែតុលា ឆ្នាំ ២០១១
នៅស្រុកគីរីវង្ស ជូនប្រជាពលរដ្ឋចំនួន ៦៨០ គ្រួសារ
មកពីបណ្តាឃុំមួយចំនួន នៃស្រុកគីរីវង្ស កោះអណ្តែត និងបុរីជលសារ
ខេត្តតាកែវ ដែលទទួលរងគ្រោះដោយសារទឹកជំនន់។
ឯកឧត្តមបណ្ឌិត សុខ អាន បាន
មានប្រសាសន៍ថា
«ការចែកអំណោយជូនប្រជាពលរដ្ឋជារឿងមួយសម្រាប់ជួយដោះស្រាយការ
លំបាកចំពោះមុខ
តែអ្វីដែលខ្ញុំគិតគូរនោះគឺការរកវិធីជួយផ្គត់ផ្គង់លើកកំពស់
ជីវភាពប្រជាពលរដ្ឋ ក្នុងខេត្តតាកែវ
ដោយឡែកសម្រាប់ស្រុកគីរីវង្សឲ្យបានកាន់តែប្រសើរឡើង។
ព្រោះក្រៅពីការផ្គត់ផ្គង់ជីវភាពប្រជាពលរដ្ឋគាត់ត្រូវការថវិកា
ដើម្បីទិញសម្ភារៈប្រើប្រាស់
និងផ្គត់ផ្គង់ដល់កូនចៅដែលចូលរៀនថ្នាក់មហាវិទ្យាល័យផងដែរ»។
ឯកឧត្តមបណ្ឌិត សុខ អាន បាន
មានប្រសាសន៍ឲ្យដឹងថា ឯកឧត្តមបានចំណាយថវិកាប្រមាណ ៥០
ម៉ឺនដុល្លារអាមេរិក ដើម្បីសាងសង់
មជ្ឈមណ្ឌលភូមិមួយផលិតផលមួយសុខអានទន្លាប់ ព្រមទាំងថវិកាជាង ១០
ម៉ឺនដុល្លារទៀតសម្រាប់រៀបចំ
គឺក្នុងគោលបំណងចង់ធ្វើឲ្យមជ្ឈមមណ្ឌលនេះក្លាយជាកម្លាំងជម្រុញ
មួយសម្រាប់ការងារបង្កបង្កើនផល និងផលិត
ដោយឲ្យប្រជាពលរដ្ឋចូលលក់ដូរមិនយកថ្លៃឈ្នួលតូប
និងមិនយកភាស៊ី ។ ប៉ុន្តែកន្លងមកក្រោយពីសាងសង់ហើយរយៈពេល ៦ ខែ
គ្មានមនុស្សចូលលក់សោះ ដោយសារតែការចាញ់ឃោសនារបស់ជនមួយចំនួនថា
នឹងយកថ្លៃតូបខ្ពស់ពេលចូលលក់ ហើយផ្សារដំណើរការល្អ។
ឯកឧត្តមបណ្ឌិត សុខ អាន បានបញ្ជាក់ថា
«នេះជាពាក្យភូតកុហក»។
គោលបំណងរបស់ឯកឧត្តមក្នុងការសាងសង់មជ្ឈមណ្ឌលនេះ
គឺដើម្បីជួយលើកកំពស់ជីវភាពប្រជាពលរដ្ឋខេត្តតាកែវ
និងប្រជាពលរដ្ឋនៅស្រុកជុំវិញ។
ឯកឧត្តមឧបនាយករដ្ឋមន្រ្តី
បានមានប្រសាសន៍ឲ្យដឹងថា នៅពេលខាងមុខឆាប់ៗនេះ
នឹងបំពាក់នូវម៉ាស៊ីន ស្រាវសូត្រចំនួន ៣ គ្រឿង
ដើម្បីជួយសម្រួលដល់ប្រជាកសិករណា
ដែលចិញ្ចឹមដង្កូវនាងសម្រាប់ផលិតសូត្រ។
មជ្ឈមណ្ឌលភូមិមួយផលិតផលមួយសុខអានទន្លាប់នេះមានរថយន្តសម្រាប់
ជួយដឹកជញ្ជូនកសិផល ដែលប្រជាពលរដ្ឋផលិតបានច្រើន
ហើយគ្មានមធ្យោបាយដឹកជញ្ជូនយកមកទីផ្សារផងដែរ។
ក្នុងផែនការលើកកំពស់ការផលិតសូត្រជូនដល់ប្រជាពលរដ្ឋ ឯកឧត្តមបណ្ឌិត សុខ អាន បាន
ឲ្យដឹងថា នៅក្នុង ១ ឆ្នាំ ប្រទេសកម្ពុជា ត្រូវការសូត្រប្រមាណ ៤០០
តោន តែការផលិតក្នុងស្រុកផ្គត់ផ្គង់បានប្រមាណ ៥ តោន
ប៉ុណ្ណោះក្នុង១ ឆ្នាំ ក្រៅពីនេះគឺត្រូវនាំចូលក្នុង ក្នុង ១ គីឡូ
តម្លៃប្រមាណជាង ៥០ ដុល្លារ។ ឯកឧត្តមបណ្ឌិត សុខ អាន បាន
ប្រសាសន៍ថា នៅក្នុងស្រុកគីរីវង្សអាចធ្វើស្រែបាន ២ ឬ ៣ ដងក្នុង១
ឆ្នាំ តែប្រជាពលរដ្ឋ ក្រៅពីការធ្វើស្រែគឺអាចបង្កបង្កើនផល
ដាំដំណាំរួមផ្សំផ្សេងៗបាន ក្នុងនោះគឺដាំមន
និងចិញ្ចឹមដង្កូវនាង ដើម្បីផលិតសូត្រ។
ប្រសិនបើកសិករផលិតសូត្របាន
មជ្ឈមណ្ឌលភូមិមួយផលិតផលមួយសុខអានទន្លាប់ នឹងទទួលទិញក្នុងតម្លៃ
៥០ ដុល្លារក្នុង ១ គីឡូក្រាម
ហើយឯកឧត្តមនឹងផ្តល់ការលើកទឹកចិត្តនូវថវិកាចំនួន ៥
ដុល្លារអាមេរិកផ្សេងទៀត។ ប្រសិនបើគ្រួសារប្រជាពលរដ្ឋណាដាំមនបាន
១៥០០០ គុម្ភ ឯកឧត្តមនឹងជួយនូវម៉ាស៊ីនបូមទឹកមួយគ្រឿង ហើយ
មជ្ឈមណ្ឌលភូមិមួយផលិតផលមួយសុខអានទន្លាប់
អាចនឹងជួយទិញស្លឹកមនថែមទៀត ក្នុងតម្លៃ ៨០០ រៀលក្នុង ១
គីឡូក្រាម ដើម្បីផ្គត់ផ្គង់ដល់អ្នកចិញ្ចឹមដង្កូវនាង។
លោក
តឹក តុងលីម អភិបាលស្រុកគីរីវង្ស បានមានប្រសាសន៍ឲ្យដឹងថា
ក្នុងស្រុកគីរីវង្សមានកន្លែងចិញ្ចឹមដង្កូវនាង
ដើម្បីផលិតសូត្រចំនួន ៤ កន្លែង ហើយកសិករដាំដើមមនបានចំនួន ៥០៣៣
គុម្ភ ដែលបច្ចុប្បន្នអាចបេះបានចំនួន ជាង ១០០០ គុម្ភ ហើយ។ នៅឆ្នាំ
២០១២ ខាងមុខនេះស្រុក នឹងម្ចាស់ការបណ្តុះកូនមន
ដើម្បីចែកជូនប្រជាពលរដ្ឋ
ក៏ដូចជាជម្រុញបរិមាណនៃការផលិតសូត្រថែមទៀតផងដែរ។
សម្រាប់
មជ្ឈមណ្ឌលភូមិមួយផលិតផលមួយសុខអានទន្លាប់ក្រៅពីទទួលទិញសូត្រ
ក៏នឹងអាចជួយប្រមូល និងរកទីផ្សារសម្រាប់កសិផលមួយចំនួន ដូចជា
ឆៃថាវ ស្លឹកគ្រៃ ខ្ញី ម្ទេស ...ផងដែរ។ ឯកឧត្តមបណ្ឌិត សុខ អាន បាន
មានប្រសាសន៍បញ្ជាក់ថា ឯកឧត្តមមានគោលបំណងធ្វើឲ្យ
មជ្ឈមណ្ឌលភូមិមួយផលិតផលមួយសុខអានទន្លាប់នេះ
ក្លាយជាកន្លែងសម្របសម្រួលរវាងអ្នកលក់ និងអ្នកទិញ។