ចាប់ពីថ្ងៃទី២៩
ខែកុម្ភៈ ដល់ថ្ងៃទី០២ ខែមីនា ឆ្នាំ២០១២ នៅទីស្នាក់ ការអាជ្ញាធរអប្សរា
ទីក្រុងអង្គរ ខេត្តសៀមរាប មានរៀបចំសន្និសីទ
និងកិច្ចប្រជុំប្រចាំឆ្នាំ២០១២
នៃបណ្តាញធានាគុណភាពអប់រំអាស៊ី-ប៉ាស៊ីភិច
ដែលមានការចូលរួមពីវាគ្មិន អ្នកជំនាញវិស័យអប់រំនិងធានាគុណភាពអប់រំ
និងអ្នកសិក្សាស្រាវជ្រាវជាតិ និងអន្តរជាតិចំនួនប្រមាណ៣០០នាក់
តំណាងឱ្យស្ថាប័ន និងភ្នាក់ងារធានាគុណភាពអប់រំចំនួន១៣០ មកពី៣២ប្រទេស
នៅទូទាំងពិភពលោក
ដែលក្នុងនោះមានការចូលរួមពីគណៈគ្រប់គ្រងនៃសាកលវិទ្យាល័យចំនួន៤៧នៅ
កម្ពុជា។
សន្និសីទ
និងកិច្ចប្រជុំប្រចាំឆ្នាំ២០១២នេះ
ត្រូវបានរៀបចំឡើងដោយគណៈកម្មាធិការទទួលស្គាល់គុណភាព អប់រំនៃកម្ពុជា
និងបណ្តាញធានាគុណភាពអប់រំអាស៊ី-ប៉ាស៊ីភិច
និងមានកិច្ចសហការពីសមាគមគ្រឹះស្ថានឧត្តមសិក្សាកម្ពុជា
ក្រោមប្រធានបទ ៖ “ការធានាគុណភាពអប់រំពីខាងក្រៅ នៅក្នុងតំបន់អាស៊ី-ប៉ាស៊ីភិច ៖ តើមានការផ្លាស់ប្តូរអ្វីខ្លះក្នុងរយៈពេលមួយទសវត្សរ៍កន្លងមកនេះ? ”។
សន្និសីទ និងកិច្ចប្រជុំប្រចាំឆ្នាំនេះមានគោលបំណង ៖
- ពិភាក្សាអំពីការរំពឹងទុក និងសមិទ្ធផលដែលសម្រេចបានលើការងារធានាគុណភាពអប់រំថ្នាក់ឧត្តមសិក្សា
- សិក្សាស្វែងយល់អំពីបញ្ហាប្រឈមមួយចំនួនពាក់ព័ន្ធនឹងការធានាគុណភាពអប់រំថ្នាក់ឧត្តមសិក្សា
- ចែករំលែកបទពិសោធន៍ល្អៗស្តីពីការធានាគុណភាពអប់រំរបស់គ្រឹះស្ថានអប់រំ និងភ្នាក់ងារធានាគុណភាព អប់រំ
- ជំរុញកិច្ចសហប្រតិបត្តិការល្អប្រសើរ ក្នុងចំណោមភ្នាក់ងារធានាគុណភាពអប់រំនៅក្នុងតំបន់ និង
- ចែករំលែកចក្ខុវិស័យស្តីពីគុណភាពអប់រំថ្នាក់ឧត្តមសិក្សា។
គួររំលឹក
ផងដែរថា កាលពីខែកញ្ញា ឆ្នាំ២០០៥
កម្ពុជាបានទទួលរៀបចំសិក្ខាសាលាបណ្តុះបណ្តាលមន្រ្តីវាយតម្លៃគុណភាព
អប់រំ នៃបណ្តាញធានាគុណភាពអប់រំអាស៊ី-ប៉ាស៊ីភិច
ដោយមានការចូលរួមពីមន្រ្តីវាយតម្លៃជាច្រើននាក់
មកពីជាង១០ប្រទេសក្នុងតំបន់។ នៅឆ្នាំ២០០៦
កម្ពុជាបានចូលជាសមាជិកពេញសិទ្ធិនៃបណ្តាញធានាគុណភាពអប់រំអាស៊ី
-ប៉ាស៊ីភិច។
តាមរយៈការចូលរួមយ៉ាងសកម្មនៅក្នុងដំណើរការនៃស្ថាប័ននេះអស់រយៈពេលជា
ច្រើនឆ្នាំមក
និងបន្ទាប់ពីឆ្លងកាត់ការប្រកួតប្រជែងយ៉ាងស្វិតស្វាញជាមួយ
បណ្តាប្រទេសជាច្រើនក្នុងតំបន់មក កម្ពុជាបានទទួលទំនុកចិត្ត
និងការគាំទ្រពីបណ្តាញធានាគុណភាពអប់រំអាស៊ី-ប៉ាស៊ីភិច
ឱ្យទទួលធ្វើជាម្ចាស់ផ្ទះរៀបចំសន្និសីទ
និងកិច្ចប្រជុំប្រចាំឆ្នាំ២០១២នៃបណ្តាញធានាគុណភាពអប់រំអាស៊ី-ប៉ា
ស៊ីភិចនៅពេលនេះ។
នេះជាកិត្តិយសដ៏ធំធេងមួយទៀតរបស់កម្ពុជាក្នុងការបង្ហាញឱ្យឃើញថា
កម្ពុជាមិនត្រឹមតែមានសមត្ថភាពចូលរួមក្នុងវេទិកាអន្តរជាតិសំខាន់ៗ
ប៉ុណ្ណោះទេ ប៉ុន្តែកម្ពុជាក៏អាចរៀបចំ
និងដឹកនាំវេទិកាទាំងនេះបានដែរ។ ជាងនេះទៀត
ការទទួលធ្វើជាម្ចាស់ផ្ទះរៀបចំកិច្ចប្រជុំនៅទីក្រុងអង្គរ ខេត្តសៀមរាប
នាពេលនេះ ក៏ផ្តល់ឱកាសដល់អ្នកចូលរួមឱ្យបានស្គាល់នូវប្រវត្តិសាស្រ្ត
ប្រពៃណី
និងវប្បធម៌ដ៏រុងរឿងរបស់កម្ពុជាដែលធ្លាប់ត្រូវបានគេស្គាល់ថាជាចក្រភ
ពអង្គរ។