តាមរយៈឯកឧត្តម យ៉ុងយុទ្ធ វិឆៃឌីត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៃ ព្រះរាជាណាចក្រថៃ សម្តេចអគ្គមហាសេនាបតីតេជោ ហ៊ុន សែន
បានស្នើឲ្យភាគីថៃបញ្ឈប់ការបាញ់សម្លាប់ប្រជាពលរដ្ឋខ្មែរដែល
ចូលក្នុងដីថៃខុសច្បាប់ ដោយត្រឹមតែធ្វើការចាប់ខ្លួន
ហើយអនុវត្តតាមផ្លូវច្បាប់ទៅបានហើយ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា នៅក្នុងសវនាការនៅវិមានសន្តិភាពនាថ្ងៃទី ២៧ ខែ មេសា ឆ្នាំ ២០១២ សម្តេចតេជោនាយករដ្ឋមន្ត្រីបានផ្តល់
អនុសាសន៍ ឲ្យក្រសួងមហាផ្ទៃប្រទេសទាំងពីរ ក៏ដូចជាអាជ្ញាធរ
នៅតាមព្រំដែនសហការគ្នាទប់ស្កាត់ បង្ក្រាបឧក្រិដ្ឋកម្មឆ្លងដែន
ការរត់ពន្ធគ្រឿងញៀន ជាពិសេសគឺ ការឆ្លងដែនខុសច្បាប់ទៅកាប់ឈើ ដែលសម្តេចតេជោបាន
គូសបញ្ជាក់ថា ករណីនេះវាអាចមាន ២ ប្រភេទ។ ប្រភេទទី១
ប្រជាជនស្លូតត្រង់ធម្មតាដែលដើរបោចវល្លិ៍ រកអុស
ដែលពុំស្គាល់ព្រំប្រទល់ច្បាស់លាស់ ឯប្រភេទទី ២ គឺជាក្រុម
ដែលមានការចាត់តាំងត្រឹមត្រូវ អំពីមេខ្លោង
ដែលបានប្រើប្រាស់ប្រជាជនស្លូតត្រង់ឲ្យកាប់ឈើ
ដែលករណីនេះសម្តេចនាយករដ្ឋ
មន្ត្រីបានស្នើសុំឲ្យធ្វើយ៉ាងណាកុំឲ្យមានការបាញ់សម្លាប់ដល់
ជនស្លូតត្រង់ ជាពិសេសប្រជាជនដែល
ត្រូវបានប្រើប្រាស់ឈ្មួញដើម្បីកាប់ឈើឬបោចវល្លិ៍នោះ
ដោយត្រឹមតែចាប់ខ្លួនអនុវត្តតាមច្បាប់ តែប៉ុណ្ណោះ។
ឯកឧត្តម អ៊ាង សុផល្លែត ឲ្យដឹងថា ក្នុងឱកាសនោះ ឯកឧត្តម យ៉ុងយុទ្ធ វិឆៃឌីត បានមានប្រសាសន៍គោរពពាំនាំនូវពាក្យផ្តាំផ្ញើសាកសួរសុខទុក្ខពីសំណាក់លោកជំទាវ យីងឡាក់ ស៊ីណាវ៉ាត់ត្រា នាយករដ្ឋមន្ត្រីនៃព្រះរាជាណាចក្រថៃជូនចំពោះសម្តេចតេជោនាយករដ្ឋមន្ត្រី និង បានគោរពរាយការណ៍ជូនសម្តេចនាយករដ្ឋមន្ត្រីអំពីកិច្ចពិភាក្សាយ៉ាងស៊ីជម្រៅរវាងរូបលោកជាមួយឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលើទិសដៅដែលសម្តេចតេជោ និងលោកជំទាវ យីងឡាក់ បានដាក់ចេញគឺការជំរុញពាណិជ្ជកម្ម សេដ្ឋកិច្ចរវាងប្រទេសទាំងពីរឲ្យបានកាន់តែធំ ឡើងៗ។
ឯកឧត្តម អ៊ាង សុផល្លែត ឲ្យដឹងថា សម្តេចតេជោនាយករដ្ឋមន្ត្រីបានស្វាគមន៍ចំពោះកិច្ចពិភាក្សាយ៉ាងស៊ី ជម្រៅពាក់ព័ន្ធនឹងបញ្ហាទិសដៅដែលបានដាក់ចេញ ហើយសម្តេចតេជោ
បានផ្តល់អនុសាសន៍ទៅលើ បញ្ហានេះ ដោយធ្វើយ៉ាងណាសហការគ្នា
ជំរុញធ្វើការកែប្រែតំបន់ព្រំដែនឲ្យទៅជាតំបន់សន្តិភាព មិត្តភាព
កិច្ចសហប្រតិបត្តិការ និងជំរុញពាណិជ្ជកម្ម ទេសចរណ៍
វិនិយោគឲ្យបានកាន់តែធំឡើង
តាមរយៈការយកចិត្តទុកដាក់បង្កើនកិច្ចសហប្រតិបត្តិការរវាង
អាជ្ញាធរ និងប្រជាជននៅតាមព្រំដែន
ហើយបានស្នើឲ្យមានការពិនិត្យមើលច្រកព្រំដែន
ដែលមានច្រកខ្លះបើកត្រឹមតែ ២ ឬ ៣ ថ្ងៃប៉ុណ្ណោះ ក្នុងមួយសប្ដាហ៍ ។
ក្នុងករណីដែលអាចបើកជារៀងរាល់ថ្ងៃបាននោះ សម្តេចតេជោ បាន
មានប្រសាសន៍បញ្ជាក់ថា គឺជាកត្តាមួយដែលអាច
ជំរុញកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ
ហើយអាជ្ញាធរខេត្តនៅតាមព្រំដែនអាច ពិនិត្យមើល
ដោយលើកបញ្ហានេះជូនដល់រដ្ឋាភិបាលដើម្បីពិនិត្យមើល។
សម្តេចតេជោក៍បានស្នើឲ្យមានការពិភាក្សា
គ្នារវាងក្រសួងមហាផ្ទៃប្រទេសទាំងពីរ
នៅពេលដែលមានបញ្ហាអ្វីមួយកើតឡើងនៅតាមព្រំដែន
គឺដើម្បីចៀសវាងកុំឲ្យកម្ទេចភ្លើងមួយក្លាយទៅជាភ្លើងបាន។ សម្តេចតេជោនាយករដ្ឋមន្ត្រី
បានស្នើឲ្យឲ្យភាគីថៃពិនិត្យមើលលើការជំរុញកិច្ចសហប្រតិបត្តិការ
រវាងប្រទេសទាំងពីរ ជាពិសេសតាមព្រំដែនលើវិស័យសុខមាលភាព
និងការប្រយុទ្ធជាមួយជំងឺគ្រុនចាញ់
ដែលប្រទេសទាំងពីរកំពុងតែជួបប្រទះ ។ ឯកឧត្តម យ៉ុងយុទ្ធ វិឆៃឌីត បានទទួលយក អនុសាសន៍ទាំងស្រុងរបស់សម្តេចតេជោ ហើយ
ឯកឧត្តម យ៉ុងយុទ្ធ វិឆៃឌីត បានគូសបញ្ជាក់ថា
ពាក់ព័ន្ធជាមួយបញ្ហាសុខភាពនេះ ឯកឧត្តមនឹងលើក
ឡើងនៅក្នុងគណៈរដ្ឋមន្ត្រីថៃ ៕