ខេត្តបន្ទាយមានជ័យ ៖ កាលពីថ្ងៃទី៣០ កក្កដា កន្លងទៅនេះ លោក យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និង លោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បាននាំយកគោយន្តចំនួន១៤គ្រឿង ទៅផ្តល់ជូនដល់ក្រុមប្រឹក្សាឃុំចំនួន១៤ក្នុងខេត្ត ដើម្បីជួយជំរុញដល់វិស័យកសិកម្ម ។
លោក អ៊ុង អឿន អភិបាលខេត្តបានរាយការណ៍ឱ្យដឹងថា ខេត្តបន្ទាយមានជ័យមានស្រុកចំនួន៧ និងក្រុងចំនួន២ មានឃុំចំនួន៥៥ និងសង្កាត់ចំនួន១០ ភូមិចំនួន៦៦២ ក្នុងនោះភូមិទទួលស្គាល់ជាផ្លូវការមានចំនួន៦៣៨ ដែលមានប្រជាពលរដ្ឋសរុបចំនួន ៧០២.៣៦៩នាក់ (ស្រីចំនួន ៣៥៤.៨៦៩នាក់) ស្មើនឹង ១៥៥.៥៥៨គ្រួសារបើប្រៀបធៀបនឹងឆ្នាំ២០១០ កើនឡើងចំនួន ៤.១២៧នាក់ ។
លោកអភិបាលខេត្តបានបន្តទៀតថា នៅខេត្តបន្ទាយមានជ័យមានប្រជាពលរដ្ឋ៨០% ជាកសិករ និង២០%ជាអាជីវករ ហើយជាខេត្តជង្រុកស្រូវដ៏ធំមួយនៅក្នុងប្រទេសកម្ពុជា ។ ទោះជាខេត្តបន្ទាយមានជ័យ ជួបគ្រោះទឹកជំនន់រយៈពេល២ឆ្នាំជាប់គ្នា និងនៅឆ្នាំ២០១២ នេះជួបគ្រោះរាំងស្ងួតយ៉ាងណាក៏ដោយ ក៏រាជរដ្ឋាភិបាល ពិសេស លោកឧបនាយករដ្ឋមន្ត្រី យឹម ឆៃលី និងលោកឧបនាយករដ្ឋមន្ត្រី កែ គឹមយ៉ាន តែងតែយកចិត្តទុកដាក់ជួយដោះស្រាយជានិច្ចនៅក្នុងវិស័យកសិកម្មនេះ ។ ជាក់ស្តែងពេលនេះលោកឧបនាយករដ្ឋមន្ត្រី បាននាំយកគោយន្ត១៤គ្រឿងមកផ្តល់ជូនដល់ក្រុមប្រឹក្សាឃុំចំនួន១៤ក្នុងខេត្ត ដើម្បីជួយដល់វិស័យកសិកម្ម ។
លោកឧបនាយករដ្ឋមន្ត្រី យឹម ឆៃលី និងលោកឧបនាយករដ្ឋមន្ត្រី កែ គឹមយ៉ាន បានមានមតិសំណេះសំណាលបន្តបន្ទាប់ថា នៅប្រទេសកម្ពុជា គឺមានខេត្តមួយចំនួនធំដែលកំពុងជួបគ្រោះរាំងស្ងួត ទោះជាយ៉ាងណាក៏ដោយរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានកាកបាទក្រហមកម្ពុជា បានយកចិត្តទុកដាក់ជួយដល់ប្រជាកសិករដែលជួបការលំបាក ។ ដូចជានៅថ្ងៃនេះ លោកបាននាំយកគោយន្តចំនួន១៤គ្រឿង មកផ្តល់ជូនដល់ក្រុមប្រឹក្សាឃុំសម្រាប់ជួយដល់ប្រជាពលរដ្ឋដែលកំពុងប្រឈមនឹងការលំបាកផ្សេងៗ ពិសេសមធ្យោបាយបម្រើដល់ការងារកសិកម្ម ៕