ភ្នំពេញ: ខ្ញុំសូមអរគុណចំពោះអស់លោកអ្នកម្តងទៀត ចំពោះការឆ្លើយតបនឹងខ្ទង់សារព័ត៌មាន “សួរឯកអគ្គរដ្ឋទូត” របស់ខ្ញុំ។ ខ្ញុំចូលចិត្តអានអ្វីដែលលោកអ្នកផ្ញើមកខ្ញុំ ហើយខ្ញុំរីករាយដែលខ្ញុំអាចប្រាស្រ័យ ទាក់ទងជាមួយអ្នកមានភាពវៃឆ្លាតនិងមានការចង់ដឹង។ សូមបន្តផ្ញើសំណួរមកខ្ញុំតាមរយៈអ៊ីម៉េល AskAMBToddPP@state.gov ។
នៅពេលនេះ អ្នកកាន់សាសនាឥស្លាមនៅទូទាំងសាកលលោកអបអរខែបុណ្យរ៉ាម៉ាដាន (Ramadan) តាមសាសនារបស់គេ ហើយលោកអ្នកជាច្រើនបានសួរខ្ញុំថា តើនៅសហរដ្ឋអាមេរិកមាន អ្នកកាន់សាសនាឥស្លាមដែរឬទេ? ជនជាតិខ្មែរប្រហែលជាមានការភ្ញាក់ផ្អើលពេលលឺថា ឥស្លាមគឺជា សាសនាធំមួយដែលគេប្រតិបត្តិនៅសហរដ្ឋអាមេរិក។
ដោយសារសាសនាឥស្លាមមានចំណែកមួយ ទាំងក្នុងសង្គមកម្ពុជា ទាំងក្នុងសង្គមអាមេរិក ស្ថានទូតសហរដ្ឋអាមេរិកបានចូលរួមក្នុងការអបអរបុណ្យ រ៉ាម៉ាដានតាំងពីឆ្នាំ ២០០៣ មក។ យើងថែមទាំងបានរៀបចំពិធីអបអរបុណ្យរ៉ាម៉ាដានក្នុងរយៈពេល ៥ ឆ្នាំកន្លងមកនេះ។
នៅប្រទេសកម្ពុជាក៏មានអ្នកកាន់សាសនាឥស្លាមច្រើនគួរសមដែរ។
តាមពិតទៅ ស្ថានទូតរបស់យើងមានសំណាងដោយបានបង្កើតទំនាក់ទំនងជិតស្និទ្ធ ជាមួយក្រុមអ្នកកាន់សាសនាឥស្លាមនៅកម្ពុជា ហើយជួយគេនៅពេលយើងអាចជួយបាន។ អ្នកកាន់សាសនាឥស្លាមនៅកម្ពុជាបានរស់ឆ្លងកាត់ប្រវត្តិសាស្ត្រដ៏ឃោរឃៅនៃពួកខ្មែរក្រហម ហើយសព្វថ្ងៃនេះ គេប្រតិបត្តិសាសនាឥស្លាមដោយចំហ ដោយមិនខ្លាចការធ្វើបាប។ សហគមន៍របស់គេកំពុងតែរីកធំឡើង ហើយគេកំពុងតែរួមចំណែកក្នុងការកសាងប្រទេសកម្ពុជាអោយមានភាពប្រសើរឡើង។ ពិតមែនតែសាសនាឥស្លាមរបស់គេ មិនមែនជាសាសនា ដែលប្រតិបត្តិដោយមនុស្សភាគច្រើននៅក្នុងប្រទេសកម្ពុជាក្តី តែគេទទួលបានការអត់ឱន ដែលនេះ បង្ហាញពីការអភិវឌ្ឍន៍ផ្នែកលទ្ធិប្រជាធិបតេយ្យរបស់ប្រទេសកម្ពុជា។
ខ្ញុំបានចូលរួមពេញលេញជាលើកដំបូងក្នុងពិធីបុណ្យរ៉ាម៉ាដាន នៅពេលខ្ញុំធ្វើជាឯកអគ្គរដ្ឋទូតប្រចាំនៅប្រទេសព្រុយណេ។ វាជាការប្រសើរណាស់ដែលបានឃើញដោយផ្ទាល់នូវការឧទ្ទិស និងចិត្តសប្បុរសនៅរដូវបុណ្យនេះ។ រ៉ាម៉ាដានគឺជាពេលវេលាយ៉ាងសំខាន់សំរាប់អ្នកកាន់សាសនាឥស្លាម ពីព្រោះវាជាពេលដែលគម្ពីរកូរ៉ានត្រូវបានគេបង្ហាញជាលើកដំបូង។
វាជាខែដែលអ្នកកាន់សាសនាឥស្លាមទាំងអស់ រួមទាំងជនជាតិអាមេរិកកាន់សាសនាឥស្លាមរាប់លានអ្នកផង ធ្វើការថ្វាយបង្គុំសុំការណែនាំ និងការលើក លែងទោសចំពោះអំពើបាបកន្លងមក។ គេដឹងពីបុណ្យរ៉ាម៉ាដានដោយការតមអាហារពីពេលថ្ងៃជិតរះ ដល់ ពេលថ្ងៃលិច ហើយខ្ញុំមានការស្ញប់ស្ញែងចំពោះការតំរូវអោយប្រកាន់តំណមនេះអោយបានខ្ជាប់ខ្ជួន។ ការតមអាហារគឺជារឿងពិបាក តែឥស្លាមសាសនិកមានជំនឿយ៉ាងរឹងមាំលើបំណងនៃការតមនេះ ពោលគឺដើម្បីបង្រៀនពីវិន័យក្នុងខ្លួននិងការចេះអត់ទ្រាំ ដើម្បីយល់ចំពោះអ្នកដែលស្ថិតក្នុងស្ថានភាពខ្សត់ខ្សោយ។
ដូចប្រពៃណីរបស់ជនជាតិអាមេរិកកាន់សាសនាឥស្លាមរាប់លាននាក់ដែរ ឥស្លាមសាសនិកនៅកម្ពុជា បញ្ចប់ការតមអាហារជាមួយនឹងអាហារស្រាយបួស ដែលជាអាហារពិសេសនៅពេលថ្ងៃលិច។ ជាធម្មតា ឥស្លាមសាសនិកប្រារព្ធការបរិភោគអាហារនេះនេះជាមួយមិត្តភក្តិនិងក្រុមគ្រួសារ តែនៅក្នុងឱកាស ពិសេស សហគមន៍ទាំងមូលចូលរួមផងដែរ។
ហេតុដូច្នេះហើយបានជាស្ថានទូតសហរដ្ឋអាមេរិកបានរៀបចំពិធីបរិភោគអាហារស្រាយបួសនៅថ្ងៃទី២ សីហាកន្លងមកនេះ ដល់ក្រុមឥស្លាមសាសនិកនៅរាជធានីភ្នំពេញ។ វាគឺជាឱកាសមួយប្រសើរណាស់សំរាប់អោយយើងរៀនសូត្រពីសាសនាឥស្លាម នៅកម្ពុជា។
សំណួរមួយទៀតដែលគេបានសួរខ្ញុំជាញឹកញាប់គឺថា “តើលោកគិតយ៉ាងដូចម្តេចចំពោះសិទ្ធិមនុស្សនៅប្រទេសកម្ពុជា?” ខ្ញុំគិតថា ប្រទេសកម្ពុជាកំពុងតែមានភាពជឿនលឿនក្នុងផ្នែកសិទ្ធិមនុស្ស។
តាំងពីឆ្នាំ១៩៩២ មក ប្រទេសកម្ពុជាបានបង្កើតរដ្ឋធម្មនុញ្ញមួយ ដែលទទួលស្គាល់សិទ្ធិមនុស្សមួយចំនួន ដែលត្រូវបានគេទទួលយកជាសាកល បានរៀបចំការបោះឆ្នោតជាបន្តបន្ទាប់ និងបង្ហាញការឈានមុខគេ ក្នុងការរក្សាសន្តិភាព និងសន្តិសុខក្នុងតំបន់។ ទោះជាយ៉ាងនេះក្តី ខ្ញុំជឿជាក់ថានៅមានការងារជាច្រើនទៀតដែលត្រូវធ្វើ។
រដ្ឋាភិបាលសហរដ្ឋអាមេរិកមានមោទនភាពក្នុងការជួយដល់អង្គការក្នុងស្រុកមួយចំនួន ដើម្បីផ្តល់ សិទ្ធិអំណាចផ្នែកនយោបាយ សេដ្ឋកិច្ចនិងសង្គមដល់ពលរដ្ឋកម្ពុជា។ ជាពិសេសដូចជាមជ្ឈមណ្ឌលសិទ្ធិមនុស្សកម្ពុជាជាដើម បានកំពុងតែខិតខំបណ្តុះបរិយាកាស ដែលក្នុងនោះប្រជាជនកម្ពុជាគ្រប់រូបមាន សេរីភាពនិងសិទ្ធិមនុស្សជាមូលដ្ឋានរបស់គេ។
ជំនួយរបស់ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) បានជួយដល់មជ្ឈមណ្ឌលសិទ្ធិមនុស្សកម្ពុជាក្នុងការបង្កើតគេហទំព័រ sithi.org ដើម្បីប្រមូលនិងចែករំលែកព័ត៌មានស្តីពីសិទ្ធិមនុស្ស ដើម្បីអោយសកម្មជននិងសាធារណជនទូទៅមាន ការយល់ដឹងកាន់តែច្រើន ហើយអាចចូលរួមចំណែកក្នុងន័យស្ថាបនាដល់ការពិភាក្សាលើបញ្ហាដែលប៉ះ ពាល់ដល់ជីវិតរស់នៅរបស់គេ។ ទីភ្នាក់ងារ USAID ក៏បានជួយផងដែរដល់គំរោងតាមដានសវនាការ (Trial Monitoring Project) របស់មជ្ឈមណ្ឌលសិទ្ធិមនុស្សកម្ពុជា ដើម្បីជួយកែលំអនិតិវិធីនិងការ ប្រតិបត្តិរបស់តុលាការនៅប្រទេសកម្ពុជា ដែលនាំអោយមានការគោរពតាមបទដ្ឋានកាន់តែច្រើនឡើងក្នុង ការកាត់ក្តីប្រកបដោយភាពត្រឹមត្រូវ។
ក្នុងនាមជាឯកអគ្គរដ្ឋទូតសហរដ្ឋអាមេរិក ខ្ញុំមានការតាំងចិត្តក្នុងការ លើកកំពស់តំលៃនៃសិទ្ធិមនុស្ស និងក្នុងការពិភាក្សាជាមួយសង្គមស៊ីវិល ជាមួយរាជរដ្ឋាភិបាល និងប្រជាជន ស្តីពីការខិតខំដើម្បីរក្សាឧត្តមគតិទាំងនេះនៅក្នុងប្រទេសកម្ពុជា។
សូមអរគុណចំពោះសំណួររបស់លោកអ្នក។ សូមបន្តធ្វើការទាក់ទងមកខ្ញុំតាមអ៊ីម៉េល AskAMBToddPP@state.gov ។
លោកអ្នកអាចសួរខ្ញុំនូវសំណួរអ្វីក៏បានដែរ។ សូមចូលរួមបើកមើល Blog របស់ខ្ញុំតាមអាសយដ្ឋាន http://blogs.usembassy.gov/todd/ ដើម្បីទទួលបានព័ត៌មានថ្មីៗបំផុត!៕
