ភ្នំពេញ: ចំការដំនាំជីវថាមពលដែលជាប្រភេទដំនាំសំរាប់ធានាផ្គត់ផ្គង់ប្រេងជីវម៉ាសនិងជីវៈអេតាណុល ដើម្បីកាត់បន្ថយ ផលប៉ះពាល់ ដល់កំណើន កំដៅ នៅលើផែនដី ពីការប្រើប្រាស់ ប្រេងឥន្ធនៈ និងឧស្ម័ននោះ ត្រូវបានគេអះអាងថា មានប្រមាណជា ៣០.០០០ហិកតា។
លោក តូច សុវណ្ណា ប្រធាននាយកដ្ឋានបច្ចេកទេសថាមពល នៃក្រសួងឧស្សាហកម្មរ៉ែនិងថាមពល បានមានប្រសាសន៍ តាមរយៈបទបង្ហាញ នៅក្នុងសន្និសីទ ស្តីអំពីប្រសិទ្ធិភាព ថាមពលនាកិច្ចប្រជុំកំពូលអាស៊ីខាងកើតលើកទី២ថា កម្ពុជាជាប្រទេសដែលមានសក្តានុពលលើផ្នែកនេះ។
លោកបានឲ្យដឹងថា នៅក្នុងប្រទេសកម្ពុជានាពេលបច្ចុប្បន្ននេះ មានផ្ទៃដីដាំល្ហុងក្វង ចំនួនប្រម៉ាណជា១.០០០ហិកតា ផ្ទៃដីដាំដូងប្រេង មានចំនួន ៤.០០០ហិកតា ដែលអាចនឹងពង្រីកសក្តានុពលនៃការដាំដុះ រហូតដល់ទៅ១០.០០០ហិកតា ហើយក្រៅពីនេះកម្ពុជា ក៏នៅមានផ្ទៃដី ដាំចំការអំពៅ ចំនួន២០.០០០ ហិកតាទៀត។
លោកបានបន្តទៀតថាជាមួយនឹងសក្តានុពលនេះ ឥឡូវកម្ពុជាមានក្រុមហ៊ុនកំពុងតែដាំល្ហុងក្វងនេះចំនួន១០ ប៉ុន្តែ ទោះបីជា យ៉ាងណាក៏ដោយ នៅក្នុងចំណោមក្រុមហ៊ុនទាំង នេះនៅមិនទាន់មានក្រុមហ៊ុនណាមួយដែលមានគម្រោងពង្រីកការដាំដុះមានលក្ខណៈធំដុំ នៅឡើយទេ។
លោកបានបន្តទៀតថា សំរាប់ប្រេងជីវៈអេតាណុលនេះវិញ កម្ពុជាមានក្រុមហ៊ុនកូរ៉េមួយ ដែលបានកសាងរោងចក្រ មានសមត្ថិភាព ផលិត អេតាណុល បាននៅក្នុងមួយឆ្នាំ ៣៦.០០០តោន ដោយស្រូបយកនូវវត្ថុធាតុដើមពីតំឡូងមី ប្រមាណជា ១០០.០០០តោន៕