កំពង់ធំ ៖ ការចេញប្រតិបត្តិការបង្ក្រាបបទល្មើសជលផលជាបន្តបន្ទាប់ក្នុងរដូវបិទនេសាទនៅស្រុកកំពង់ស្វាយប៉ែកលើនោះ បានឆ្លុះបញ្ចាំងពីអសមត្ថភាពឬអត់ទទួលខុសត្រូវរបស់សមត្ថកិច្ចជលផលសង្កាត់កំពង់ស្វាយ។
ប្រជាពលរដ្ឋដែលអញ្ជើញចូលរួមក្នុងការដុតបំផ្លាញឧបករណ៍នេសាទល្មើសច្បាប់កាលពីព្រឹកថ្ងៃទី៣ ខែសីហា ឆ្នាំ២០១២នៅក្នុងឃុំកំពង់គោ បាននិយាយឲ្យដឹងថាជាញឹកញាប់ក្នុងពេលកន្លងមក និង បច្ចុប្បន្នបទល្មើសនេសាទក្នុងរដូវបិទនេសាទ និង បើកនេសាទ ក្នុងដែនសមត្ថកិច្ចរដ្ឋបាលជលផលសង្កាត់កំពង់ស្វាយខាងលើនោះ ពុំសូវឃើញសមត្ថកិច្ចនេះ ចេញបង្ក្រាបឲ្យមានប្រសិទ្ធភាព និង តម្លាភាពខាងផ្លូវច្បាប់នោះទេ ផ្ទុយទៅវិញ មានមន្ត្រីខ្លះបានទៅជំរិតយកលុយពីបទល្មើសទាំងនោះ បង្កើតរឿងអាស្រូវពុំចេះចប់ទៀតផង។
បទល្មើសជលផលដែលដុតបំផ្លាញចោល ដែលមានការចូលរួមពីមន្ត្រីជលផលខណ្ឌ និង អាជ្ញាធរព្រមទាំងប្រជាពលរដ្ឋនេះ គឺជាលទ្ធផល ការបង្ក្រាបរបស់សមត្ថកិច្ចនគរបាលអធិការដ្ឋានស្រុកកំពង់ស្វាយរួមសហការជាមួយអង្គការអភិរក្សជលផលបរិស្ថាន សត្វព្រៃ និង ព្រៃឈើនៅក្នុងភូមិសាស្ត្រឃុំ កំពង់គោ និង ឃុំសានគរ។
ឧបករណ៍បទល្មើសនេះមានលូស្បៃមុងចំនួន៥៧លូ របាំងសាច់ឈឹម ប្រវែង ២២៤០ ម៉ែត្រ អួនក្រហមប្រវែង១០០ម៉ែត្រ បង្គោល៧៤១ដើម និង លែងកូនត្រីរៀល និង លិញ ចំនួន១៥០គីឡូក្រាម។
លោក អនុសេនីយ៍ឯក យន់ ឆៃយាន អធិការរងស្រុកកំពង់ស្វាយដែលដឹកនាំចេញបង្ក្រាបនេះ បាននិយាយថា ការចេញបង្ក្រាប២លើកគឺថ្ងៃទី២៧ ខែកក្កដា និង លើកទី២ នៅថ្ងៃទី២ ខែសីហា គឺសមត្ថកិច្ចជលផល ខណ្ឌកំពង់ធំមកសហការជាមួយកម្លាំងរបស់គាត់(យាន់ឆៃយាន) និង អង្គការ។ ចំណែកសមត្ថកិច្ចរដ្ឋបាលជលផលសង្កាត់កំពង់ស្វាយនេះវិញ លោកសុំមនបរិយាយទេ គឺស្រេចតែការមើលឃើញរបស់ប្រជាពលរដ្ឋចុះ៕
កងចេស្ដា