កំពង់ចាម: សមត្ថកិច្ចខណ្ឌរដ្ឋបាលជលផលកំពង់ចាម នឹងចុះទៅពិនិត្យ និងស៊ើបអង្កេតដីព្រៃលិចទឹក ដែលឈ្មួញបាន និងកំពុងប្រមូលទិញរាប់រយហិកតា ពីប្រជាពលរដ្ឋនៅតំបន់កូនដំរី ព្រែកយួន បឹងប្រាំ និងតំបន់តម្រុយតាមបណ្តោយមាត់ទន្លេតូច ក្នុងភូមិសាស្ត្រឃុំប្រាំយ៉ាម ស្រុកស្រីសន្ធរ ខេត្តកំពង់ចាម នៅសប្តាហ៍ក្រោយ គឺថ្ងៃអង្គារ ទី៧ ខែសីហា ឆ្នាំ២០១២។
ទាក់ទិននឹងការចុះពិនិត្យ និងស៊ើបអង្កេតនេះ នៅបន្ទាប់ពីមានព័ត៌មានថា ដីព្រៃលិចទឹកនៅរដូវវស្សាក្នុងតំបន់ឃុំប្រាំយ៉ាមនោះ គឺមានឈ្មួញបាន និងកំពុងប្រើប្រាស់គ្រឿងចក្រឈូសឆាយ បានប្រហែលជិត ១០០ ហិកតា និងជាច្រើនរយហិកតាផ្សេងទៀត ឈ្មួញកំពុងដើរបាញ់ថ្នាំពណ៌ក្រហម ដើម្បីសម្គាល់ថាជាដីរបស់ខ្លួនកាន់កាប់។ ប៉ុន្តែសកម្មភាពចូលទៅទន្ទ្រានកាន់កាប់រយៈពេលជិតមួយឆ្នាំនេះ គឺនៅពុំទាន់មានការហាមឃាត់ពីខាងអាជ្ញាធរ ឬខាងសមត្ថកិច្ចជលផលនោះទេ។
ឈ្មួញបានចូលទៅប្រមូលទិញដី ហើយធ្វើការកាប់រានឈូសឆាយយកដីដាក់ដាំដំណាំ ពីប្រជាពលរដ្ឋ ក្នុងមួយហិកតាថ្លៃពី ៧០០ ទៅ ៨០០ ដុល្លារ បានដីរាប់រយហិកតាតាមបណ្តោយមាត់ទន្លេតូច ដែលជាព្រៃលិចលិចទឹកតភ្ជាប់ទៅនឹងបឹងធម្មជាតិជាច្រើន នៅជុំវិញតំបន់នោះ។ បច្ចុប្បន្នឈ្មួញកំពុងឈូសឆាយបានប្រហែលពី ៣០ ទៅ ៤០ ហិកតា និងកន្លែងមិនទាន់ឈូសឆាយ គេបានបោះបង្គោលព្រំចំណាំ។
ប៉ុន្តែលោក ឡេង ហម មេឃុំប្រាំយ៉ាម ធ្លាប់បានប្រាប់គេហទំព័រ CEN ថា ពិតជាមានឈ្មួញបានមកប្រមូលទិញដីព្រៃលិចទឹក នៅក្នុងឃុំប្រាំយ៉ាមនេះមែន ហើយដីទាំងអស់នោះ មិនមែនជាព្រៃលិចទឹកស្ថិតក្នុងដែននេសាទទេ គឺជាដីដែលប្រជាពលរដ្ឋបានកាប់រានដើម្បីធ្វើស្រែប្រាំង តែអត់មានប្រភពទឹកសម្រាប់ស្រោចស្រព ក៏នាំគ្នាលក់ឲ្យឈ្មួញទៅ ហើយការទិញលក់នោះ មានការឯកភាពពីខាងអាជ្ញាធរ គឺអត់មានការឃុបឃិត ឬបិទបាំងនោះទេ។
ផ្ទុយពីអះអាងរបស់លោក ឡេង ហម តាមការបង្ហើបពីមន្ត្រីស្រុកស្រីសន្ធរម្នាក់ បានឲ្យដឹងថា កាលពីឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលទើបបានកន្លងផុតទៅប៉ុន្មានខែនេះ គឺមានក្រុមការងារចុះជួយគណបក្សប្រជាជនកម្ពុជាមួយក្រុម ប្រចាំស្រុកស្រីសន្ធរ មានបំណងចុះទៅពិនិត្យ និងស៊ើបអង្កេត ស្រាវជ្រាវ ដីព្រៃលិចទឹកដែលបាន និងកំពុងរងការកាប់ទន្ទ្រានយកជាកម្មសិទ្ធិ នៅក្នុងភូមិសាស្ត្រឃុំប្រាំយ៉ាមនោះ តែកាលណោះមានអភិបាលរងស្រុកនេះម្នាក់ បានចេញមុខមករារាំងក្រុមការងារនោះមិនឲ្យចុះទៅ។ ប៉ុន្តែសង្ឃឹមថា ការចុះពិនិត្យ ស្រាវជ្រាវ និងស៊ើបអង្កេតរបស់សមត្ថកិច្ចខណ្ឌរដ្ឋបាលជលផលកំពង់ចាម នៅសប្តាហ៍ក្រោយនេះ ទំនងជាគ្មានការរារាំង និងលូកដៃចូលមកជ្រៀតជ្រែក ពីអភិបាលរងស្រុកម្នាក់នោះទៀតទេ។
លោក យឹម ប៊ុនរ៉េត នាយរងខណ្ឌរដ្ឋបាលជលផលកំពង់ចាម បានប្រាប់ CEN កាលពីថ្ងៃទី៤ ខែសីហា ថា ខាងលោកបានទទួលផែនការពីនាយខណ្ឌរួចហើយ នឹងទៅកាន់តំបន់តាមមាត់ទន្លេតូច ក្នុងភូមិសាស្ត្រឃុំប្រាំយ៉ាម ស្រុកស្រីសន្ធរ ដែលលេចឮព័ត៌មានថា មានការកាប់ទន្ទ្រានព្រៃលិចទឹក នៅថ្ងៃអង្គារ ទី៧សីហា សប្តាហ៍ក្រោយនេះ។ ប៉ុន្មានថ្ងៃនេះ ខាងជលផលកំពុងជាប់រវល់ចុះបង្ក្រាបបទល្មើសនេសាទ ដោយទឹកទន្លេមេគង្គនៅខេត្តកំពង់ចាមកំពុងសម្រុកឡើងខ្លាំង ធ្វើឲ្យសម្បូរអ្នកលួចចាប់កូនត្រី និងមេត្រីដែលកំពុងពងកូន៕
