ភ្នំពេញ: មន្ត្រីជាន់ខ្ពស់គណបក្សប្រជាជនកម្ពុជា មិនបានបង្ហាញនូវការព្រួយបារម្ភអំពីគម្រោង របស់ចលនាប្រជាធិបតេយ្យសង្គ្រោះជាតិ ដឹកនាំដោយលោក សម រង្ស៊ី មេគណបក្សប្រឆាំងដែលកំពុងនិរទេសខ្លួននៅក្រៅប្រទេសនោះ ខណៈដែលចលនាបានកំពុងអន្ទងគណបក្សប្រជាធិបតេយ្យដែលគ្មានអសនៈក្នុងរដ្ឋសភា ឲ្យចូលរួមនៅក្នុងចលនានោះដែរក៏ដោយ។
ជាប្រតិកម្មតប លោក ទិត សុធា អនុប្រធាន និងជាអ្នកនាំពាក្យ នៃអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានមានប្រសាសន៍ថា ការបង្រួបបង្រួមគណបក្សនយោបាយ ជាសិទ្ធិរបស់អ្នកយោបាយ ក៏ប៉ុន្តែគណបក្សនយោបាយដែលបម្រុងនឹងចូលរួម ក្នុងចលនាគណបក្សប្រឆាំងទាំងពីរហ្នឹង សុទ្ធតែជាគណបក្សចុះខ្សោយបំផុត គឺមិនមានការគាំទ្រពីប្រជាពលរដ្ឋទេ សូម្បីគណបក្សប្រឆាំងទាំងបីនោះ ក៏ខ្វះការគាំទ្រពីប្រជាពលរដ្ឋផងដែរ សម្រាប់គណបក្សដែលរួមគ្នានោះ គ្មានអី្វដែលគណបក្សប្រជាជនកម្ពុជាមានការព្រួយបារម្ភទេ។
លោក ទិត សុធា បានមានប្រសាសន៍ថា “ទោះបីជាមានការរួបរួមគ្នា ក៏ប៉ុន្តែជាការរួបរួមគ្នាដោយក្រុមដែលមានកម្លាំងខ្សោយ ធ្វើឲ្យទាញទម្លាក់ការរួបរួមគ្នានោះឲ្យរឹតតែខ្សោយថែមទៀត”។
លោក គង់ ប៊ុនធឿន ប្រធានគណបក្សចលនាប្រជាធិបតេយ្យ បានឲ្យដឹងថា ខាងក្រុមការងារចលនាប្រជាធិបតេយ្យសង្គ្រោះជាតិ បានធ្វើការទំនាក់ទំនងមកខាងលោករួចហើយ ប៉ុន្តែនៅមិនទាន់លម្អិតពីការងារដែលត្រូវជួបគ្នានោះនៅឡើយទេ។
លោកបានបញ្ជាក់ថា “គោលជំហររបស់ខ្ញុំ គឺនឹងរួបរួមជាមួយចលនាអ្នកប្រជាធិបតេយ្យ ពីព្រោះគណបក្សខ្ញុំ ជាចលនាគណបក្សប្រជាធិបតេយ្យស្រាប់។ ការរួបរួមនេះ ដោយខ្ញុំសម្លឹងឃើញថា ប្រជាពលរដ្ឋទាំងអស់ស្រឡាញ់ការរួមសាមគ្គីគ្នា មិនចង់មានការបែកបាក់ គឺសុំឲ្យខ្មែររួបរួមជាតិខ្មែរតែមួយ មិនឲ្យមានការបែកបាក់សាមគ្គីគ្នា ហើយដោយសារលោក កឹម សុខា និងលោក សម រង្ស៊ី គាត់បានបង្រួបបង្រួមគ្នាទៅហើយ វាត្រូវទៅនឹងចំណង់ចំណូលចិត្តរបស់ខ្ញុំ និងមនសិការរបស់គណបក្សចលនាប្រជាធិបតេយ្យ ចង់បានការរួបរួមជាតិមួយ ដើម្បីឲ្យឆ្ពោះទៅរកការឯកភាពជាតិមួយ ឲ្យបានដំណើរការល្អ”។
លោក យ៉ែម ប៉ុញ្ញរិទ្ធ អនុប្រធាននៃចលនាប្រជាធិតេយ្យសង្គ្រោះជាតិ និងជាអ្នកតំណាងរាស្ត្រមណ្ឌលព្រៃវែង នៃគណបក្សសិទ្ធិមនុស្ស បានមានប្រសាសន៍បញ្ជាក់ថា គោលការណ៍របស់ចលនាប្រជាធិតេយ្យសង្គ្រោះជាតិ ស្វាគមន៍ដោយការចូលរួបរួមគ្នាទាំងអស់គ្នា ក៏ប៉ុន្តែមកដល់ពេលនេះ លោកមិនទាន់បានជួបពិភាក្សា ជាមួយតំណាងគណបក្សចលនាប្រជាធិតេយ្យនៅឡើយទេ តែនឹងមានពេលវលាសមរម្យ ដើម្បីជួបជជែកគ្នាពេលឆាប់ ហើយមកដល់ពេលនេះមានគណបក្សមួយចំនួន ដែលធ្លាប់បានចូលរួមក្នុងការបោះឆ្នោតកន្លងមក និងគណបក្សខ្លះទៀតមិនទាន់បានចូលរួមក្នុងការបោះឆ្នោត សុទ្ធតែមានគម្រោងចូលរួមជាមួយចលនាប្រជាធិតេយ្យសង្គ្រោះជាតិ នាពេលខាងមុខ៕
