ភ្នំពេញ: លោកទេសរដ្ឋមន្ត្រី ឱម យ៉ិនទៀង ប្រធានគណៈកម្មាធិការសិទ្ធិមនុស្ស របស់រាជរដ្ឋាភិបាល បានបញ្ចេញប្រតិកម្មផ្ទាល់មាត់ តបនឹងរបាយការណ៍របស់លោក សូរិយា ស៊ូប៊ែរឌី អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា។ លោក ឱម យ៉ិនទៀង បានលើកឡើងថា លោក ស៊ូប៊ែរឌី គួរតែទៅធ្វើជាទីប្រឹក្សារបស់គណបក្សប្រឆាំង ជាជាងធ្វើជាអ្នករាយការណ៍ពិសេសរបស់អង្គការសហប្រជាជាតិ។
ថ្លែងទៅកាន់ក្រុមអ្នកកាសែត នៅពេលជូនដំណើរសម្តេចនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំនៅអ៊ីរ៉ង់ និងនៅប្រទេសចិន នាព្រឹកថ្ងៃទី២៩ ខែសីហា ឆ្នាំ២០១២ លោកទេសរដ្ឋមន្ត្រី ឱម យ៉ិនទៀង បានលើកឡើងថា ស្ថានភាពសិទ្ធិមនុស្សនៅកម្ពុជា មានលក្ខណៈល្អប្រសើរ មិនដូចអ្វីដែលលោកស៊ូប៊ែរឌី បានលើកឡើងនោះទេ។
លោក ឱម យ៉ិនទៀង បានបន្ថែមថា លោក សូរិយា ស៊ូប៊ែរឌី គ្រាន់តែនិយាយតាមអង្គការសង្គមស៊ីវិលមួយចំនួន និងនិយាយតាមបក្សប្រឆាំងប៉ុណ្ណោះ។ ពោលគឺលោកសូរិយា ស៊ូប៊ែរឌី ជាអ្នកបន្ទររឿងរំលោភសិទ្ធិមនុស្សនៅកម្ពុជា។ ដូច្នេះលោកសូរិយា គួរទៅធ្វើជាទីប្រឹក្សារបស់គណបក្សប្រឆាំង ល្អជាងធ្វើជាអ្នករាយការណ៍ពិសេសរបស់អង្គការសហប្រជាជាតិនៅពេលនេះ។
លោកទេសរដ្ឋមន្ត្រី ឱម យ៉ិនទៀង ក៏បានលើកឡើងថា គណបក្សប្រឆាំង ដែលមានឈ្មោះថា គណបក្សសង្គ្រោះជាតិ រួមគ្នាបង្កើតដោយគណបក្សសមរង្ស៊ី និងគណបក្សសិទ្ធិមនុស្ស កំពុងតែមានផែនការបំផ្លាញ គ.ជ.ប. ដែលជាស្ថាប័នរៀបចំការបោះឆ្នោត ហើយក៏មានគម្រោងឲ្យសមាជិក ២ រូប របស់គណបក្សសមរង្ស៊ី ដើរចេញពី គ.ជ.ប. ផងដែរ។
សូមរម្លឹកថា របាយការណ៍របស់លោកសូរិយា ស៊ូប៊ែរឌី ដែលត្រូវបានចែកចាយ កាលពីព្រលប់ថ្ងៃទី២៧ ខែសីហា ឆ្នាំ២០១២ បានលើកឡើងអំពីការរំលោភបំពានរបស់រដ្ឋាភិបាលកម្ពុជា លើបញ្ហាសិទ្ធិសេរីភាពនៃការបញ្ចេញមតិ និងសិទ្ធិលំនៅដ្ឋាន ករណីជម្លោះដីនៅបឹងកក់ និងបុរីកីឡា ការផ្តល់ដីសម្បទានសេដ្ឋកិច្ចរបស់រដ្ឋាភិបាលកម្ពុជា នាំឲ្យកើតមានជម្លោះដីធ្លីស្ទើរទូទាំងប្រទេស និងអំពីបញ្ហាប្រព័ន្ធបោះឆ្នោត នៅកម្ពុជា ដែលនាំឲ្យមានការតវ៉ាពីអង្គការសង្គមស៊ីវិលមួយចំនួន និងការតវ៉ាពីគណបក្សប្រឆាំង ជាដើម។
លោក សូរិយា ស៊ូប៊ែរឌី ក៏បានគូសបញ្ជាក់ក្នុងរបាយការណ៍ថា កម្ពុជាទទួលបានអនុសាសន៍ជាច្រើន ទាំងទ្វេភាគី និងពហុភាគី ដោយអង្គការផ្សេងៗ ប៉ុន្តែវាគួរឲ្យសោកស្តាយ ដែលអនុសាសន៍ភាគច្រើនបំផុតដែលកម្ពុជាទទួលបានដើម្បីកែលម្អស្ថានភាពសិទ្ធិមនុស្ស និងសិទ្ធិនយោបាយ នៅតែមិនមានការអនុវត្ត។
អ្នករាយការណ៍ពិសេស លោក សូរិយា ស៊ូប៊ែរឌី បានសរសេរទៀតថា “ការគ្មានការពិគ្រោះយោបល់ និងគ្មានការចរចាសមស្របជាមួយប្រជាជន ដែលរងការប៉ះពាល់នៅពេលផ្តល់សម្បទានដីសេដ្ឋកិច្ច" គឺជាក្តីបារម្ភមួយនៅកម្ពុជា។
លោក សូរិយា ស៊ូប៊ែរឌី ក៏បានកត់សម្គាល់ថា ការបំភិតបំភ័យ និងការយាយី គឺនៅតែកើតមានជុំវិញការបោះឆ្នោតនៅកម្ពុជា។
ក៏ប៉ុន្តែភ្លាមៗនោះ លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស របស់ស្តីទីការគណៈរដ្ឋមន្ត្រី នៃរាជរដ្ឋាភិបាលកម្ពុជា បានចាត់ទុកថា ព័ត៌មានរបស់លោកសូរិយា ស៊ូប៊ែរឌី ដែលទទួលបាន គឺជាការសម្លឹងឃើញតែផ្នែកអាក្រក់ដ៏តិចតួច ដែលជាកង្វះខាតរបស់រដ្ឋាភិបាល។ រីឯស្ថានការណ៍សិទ្ធិមនុស្សនៅកម្ពុជា ក៏មិនមែនអាក្រក់ ដូចអ្វីដែលលោកសូរិយា ស៊ូប៊ែរឌី តែងតែលើកឡើងអំពីការមិនពិតនៅកម្ពុជានោះទេ៕
