ថ្លែងក្នុងពីធីបិទសន្និសីទអន្តរជាតិលើកទី៥ ស្ដីពីភាពអ្នកដឹកនាំនៃបញ្ញវន្តឆ្នើម ឆ្នាំ២០១៤ នាព្រឹកថ្ងៃទី៦ ខែសីហា ឆ្នាំ២០១៤ នៅសណ្ឋាគារសូហ្វីតែល ក្នុងរាជធានីភ្នំពេញ សម្ដេចអគ្គមហាសេនាបតីតេជោ ហ៊ុន សែន បានជំរុញឲ្យមានការផ្ដល់ ឱកាសដល់យុវជនកម្ពុជាឲ្យបានច្រើនដោយសម្ដេចបានចាត់ទុកថា ភាពអភិរក្សនិយមរបស់មនុស្សចាស់ប្រៀបដូចជាដុំថ្មសង្កត់លើពន្លក ដែលមិនអាចដុះបាន ដែលនេះជាចំណុចដែលត្រូវយកចិត្តទុដាក់។
សម្ដេចតេជោនាយករដ្ឋមន្ត្រីបានមានប្រសាសន៍ពន្យល់ថា សូមកុំភ្លេចថាគ្រប់ចលនានៃការវិវត្តប្រែប្រួលមិនត្រឹមតែក្នុងសតវត្សទី២១ទេ ប៉ុន្តែតាំងពីសតវត្សទី២០ គេបានមើលឃើញនូវគ្រប់ទីកន្លែងយុវជន គឺជាកម្លាំងនាំមុខនៃការផ្លាស់ប្ដូរ ដូច្នេះប្រសិនបើយើងមិនផ្ដល់ការយកចិត្តទុកដាក់លើបញ្ហានេះទេ អាចនឹងមានបដិវត្តចេញពីយុវជននេះតែម្ដង បើសិនជាយើងធ្វើមិនត្រូវ និងបម្រើផលប្រយោជន៍ឲ្យចំរបស់យុវជនទេ នោះហើយជាបញ្ហាហើយបទពិសោធន៍នេះជាបទពិសោធន៍ផ្ទាល់ខ្លួនរបស់ខ្ញុំ។ សម្តេចតេជោថ្លែងថា ខ្ញុំគ្រាន់តែរំឭកឡើងវិញថា យើងមិនត្រូវភ្លេចទេ ពេលខ្លះ ឪពុកម្ដាយបំពេកូនតែរឿងនេះជារឿងធម្មជាតិ ប៉ុន្តែសម័យនេះកូនបំពេឪពុក ម្ដាយវិញ ព្រោះចំណេះដឹង ចំណេះធ្វើដែលពួកគេបានរៀន គេយកទៅជួយ ឪពុកម្ដាយរបស់គេ។ កាលពីមុនក្នុងស្ថានភាពអភិរក្ស និងខ្វះការបណ្ដុះបណ្ដាល គឺមេបំពេកូនតែឥឡូវកូនបំពេមេវិញម្ដង ដូច្នេះបញ្ហានេះត្រូវផ្ដល់ឱកាស គ្រប់គ្រាន់ឲ្យកាន់តែច្រើនឡើងសម្រាប់យុវជន ហើយយុវជនត្រូវការអ្វី ត្រូវសិក្សាឲ្យទាន់ដើម្បីតម្រូវការទៅលើការចាំបាច់។
ទោះបីយ៉ាងនេះក្តី សម្ដេចតេជោបានមានប្រសាសន៍ផ្តល់ជាដំបូន្មានថា យុវជនក៏មិន ត្រូវមើលឃើញមនុស្សចាស់ថា សុទ្ធតែជាមនុស្សអន់ដែរ នេះជាចំណងទាក់ទងវិចារវិទ្យា។ មនុស្សចាស់ត្រូវផ្ដល់សារៈសំខាន់ឲ្យយុវជនវ័យក្មេង ដែលហៅថា រលកក្រោយច្រានរលកមុន ប៉ុន្តែយុវជនខ្លួនឯងមិនត្រូវមើលឃើញតែថា ឲ្យតែចាស់អន់ទាំងអស់ មិនមែនដូច្នេះទេ។ ដូច្នេះស្ថានភាពបោះចម្រុះរវាងមនុស្ស ដែលមានវ័យចំណាស់ វ័យកណ្ដាល និងយុវជន គឺត្រូវទៅជាមួយគ្នា។
សម្តេចអគ្គមហាសេនាបតីតេជោ ហ៊ុន សែន ក៏បានប្រកាសឲ្យដឹងពីការរៀបចំសមាសភាពរាជរដ្ឋាភិបាលអាណត្តិទី៥ នៃរដ្ឋសភា របស់សម្តេចថា ខ្ញុំបានរៀបចំនូវស្ថានភាពបោះចម្រុះនៅក្នុងរាជរដ្ឋាភិបាល ដោយមានដាក់អ្នកអាយុជាង២០ឆ្នាំ ជាអនុរដ្ឋលេខាធិការ អាយុជាង ៣០ឆ្នាំជារដ្ឋមន្ត្រី និងជារដ្ឋលេខាធិការ បើមិនដូច្នោះទេដល់ដំណាក់កាលណាមួយគឺរលំគ្រេងទៅទាំងអស់ដោយសុទ្ធតែអាយុ៧០ឆ្នាំ ទៅ៨០ឆ្នាំ អីចឹងបញ្ហានេះទាមទារឲ្យមានការស៊ីសង្វាក់គ្នាធ្វើសុខដុមនីយកម្ម។
សម្តេចតេជោបានមានប្រសាសន៍ពន្យល់អំពីមូលហេតុ ដែលសម្តេចប្រើប្រាស់សមត្ថភាពយុវជនក្មេងៗដែលមិនទាន់មានបទពិសោធន៍ថា យើងកុំស្ទាក់ស្ទើរ មានពេលខ្លះយើងត្រូវតែហ៊ានឲ្យគេលោតទៅក្នុងទឹក ទើបគេចេះហែលទឹក ជួនកាលតាមអ្វីដែលខ្ញុំធ្លាប់បានដឹង ថ្នាក់ដឹកនាំរបស់យើងមួយចំនួន ដែលមានភារកិច្ចលើកនូវសំណើតែងតាំងមន្ត្រី គិតថាគេនៅក្មេងពេក មិនទាន់មានបទពិសោធន៍ មានពេលខ្លះខ្ញុំក៏បានប្រាប់ថា បើមិនទាន់ប្រគល់ការងារឲ្យគេ ផងរួចយើងថាឲ្យគេគ្មានបទពិសោធន៍យ៉ាងម៉េច។ ដូច្នេះបានជាមានពេលខ្លះ ខ្ញុំប្រើពាក្យខ្លះសូមឲ្យលោតទៅក្នុងទឹកបានចេះហែលទឹក ទាំងអ្នកដែលត្រូវបានជ្រើសរើសដើម្បីតែងតាំង និងអ្នកដែលត្រូវទទួលការតែងតាំង។ ខ្ញុំនិយាយនេះអ្នក ដែលត្រូវទទួលការតែងតាំងកុំនិយាយភាសាហ្នឹង ខ្លួនឯងមិនទាន់ទៅធ្វើផងធ្វើម្ដេចដឹងថាធ្វើកើត ហើយនៅលើពិភពលោកនេះពុំមានសាលាណាដែលបង្ហាត់បង្រៀនឲ្យធ្វើជានាយករដ្ឋមន្ត្រីធ្វើយ៉ាងម៉េច ប្រធានាធិបតីធ្វើយ៉ាងម៉េច ឧបនាយករដ្ឋមន្ត្រីធ្វើយ៉ាងម៉េច រដ្ឋមន្ត្រីធ្វើយ៉ាងម៉េច គឺគ្មានសាលាហ្នឹងទេ សាលាហ្នឹងវាកើតចេញពីការជាក់ស្ដែង នៃការដោះស្រាយបញ្ហាតាមប្រទេសមួយៗ តែគេអាចមានសញ្ញាណរបស់វាគឺអ្វីខ្លះនោះ។
ទាក់ទងនឹងទស្សនាទានអំពីការផ្លាស់ប្តូរ សម្ដេចតេជោនាយករដ្ឋមន្ត្រីក៏បានលើកឡើងជាបទពិសោធន៍អំពីផលវិបាកដែលត្រូវប្រឈមនាពេលកន្លង និងដាក់ចេញជាសំណួរថា ការដូរមនុស្សម្នាក់ ដែលបានលទ្ធផលមកវិញនូវការស្លាប់មនុស្សរាប់សែនលាននាក់ តើជា ការត្រឹមត្រូវទេ?។ សម្តេចតេជោបានមានប្រសាសន៍ឲ្យដឹងថា ការដូរសម្ដេចព្រះនរោត្ដមសីហនុឆ្នាំ១៩៧០ កម្ពុជាធ្លាក់ក្នុងសង្គ្រាម ៥ឆ្នាំ គ្រាប់បែកអាម៉េរិកដែលទម្លាក់នៅកម្ពុជាស្មើនឹងគ្រាប់បែកដែលអាម៉េរិកទម្លាក់ក្នុងសង្គ្រាមលោកលើកទី២ ឬលើសចំនួននឹងផង បន្ទាប់ទៅរបបប្រល័យពូជសាសន៍ ប៉ុល ពត បានមកដល់ស្លាប់មនុស្សរាប់លាននាក់ សង្គ្រាមរ៉ាំរ៉ៃរបស់ កម្ពុជា ជាភ័ព្វសំណាងដែលនយោបាយ ឈ្នះ ឈ្នះ បានទៅប៉ះនឹងយុទ្ធសាស្ត្រ ច្រេះស៊ីដែករបស់ខ្មែរក្រហម ប៉ុន្តែស្ថានភាព ឈ្នះ ឈ្នះ បានផ្ដល់ឱកាសសម្រាប់ប្រទេសកម្ពុជាមកដល់ពេលនេះ ហើយនេះក៏ជាការចែករំលែកមួយដែរ ព្រោះជួនកាលវាទៅជាភាពជ្រុល។
នៅក្នុងសុន្ទរកថា សម្ដេចតេជោនាយករដ្ឋមន្ត្រីបានផ្ដល់នូវអនុសាសន៍សំខាន់ៗមួយចំនួនសម្រាប់ជួយអភិវឌ្ឍន៍យុវជនកម្ពុជា ជាអាទិ៍៖
ទី១- ត្រូវបង្កើនកាលានុវត្ដភាពដល់យុវជនក្នុងការចូលរួម ក្នុងការអភិវឌ្ឍសេដ្ឋកិច្ច។ បច្ចុប្បន្នប្រទេសកម្ពុជា មានប្រជាពលរដ្ឋវ័យក្មេងច្រើនជាងគេ នៅតំបន់អាស៊ាន។ ពោលគឺប្រជាជន ប្រមាណ៥លាននាក់ ស្មើនឹង ៣០ភាគរយនៃប្រជាជនសរុប គឺជាយុវជនដែលមានអាយុចាប់ពី១៥ឆ្នាំ ដល់ ២៩ឆ្នាំ ហើយចំណុចនេះនឹងកើនឡើងដល់ ៤០ភាគរយ នៃប្រជាជនសរុបនៅឆ្នាំ២០២០។ ក្រសួង ស្ថាប័នពាក់ព័ន្ធ វិស័យឯកជន អង្គការជាតិ អន្ដរជាតិសុំបង្កើនកិច្ចសហការនិងខិតខំធ្វើឱ្យប្រសើរឡើងនូវឱកាសទីផ្សារការងារសម្រាប់យុវជន និងពង្រឹងភាពជាដៃគូរវាងយុវជនគ្រប់ស្រទាប់វណ្ណៈ ដោយផ្ដល់នូវការអប់រំ ការបណ្ដុះបណ្ដាល ហើយឈានទៅរកទីផ្សារការងារ និងពង្រឹងការចូលរួមរបស់យុវជន។
ទី២- ពង្រឹងការអប់រំនិងការអភិវឌ្ឍ ជំនាញរបស់យុវជន។ ជារួមរាជរដ្ឋាភិបាលកម្ពុជាបាន និងកំពុងយកចិត្ដទុកដាក់ ពីការអភិវឌ្ឍសង្គម សេដ្ឋកិច្ចកម្ពុជាឱ្យកាន់តែមានភាពរីកចម្រើន និងការប្រកួតប្រជែងជាមួយនឹងបណ្ដាប្រទេសក្នុងតំបន់ និងផ្ដល់ឱកាសការងារដល់ គ្រប់ស្រទាប់យុវជន។ សូមស្ថាប័ន ក្រសួងពាក់ព័ន្ធ វិស័យឯកជន អង្គការជាតិ អន្ដរជាតិ និងដៃគូអភិវឌ្ឍន៍បន្ដចូលរួមនូវការអប់រំ និងការបណ្ដុះបណ្ដាល មួយប្រកបដោយគុណភាពនិងប្រសិទ្ធភាពក្នុងការពង្រឹងសមត្ថភាព ចំណេះ ដឹងពិតប្រាកដដល់យុវជនកម្ពុជា។ ត្រូវបង្កើន និងពង្រឹងការបណ្ដុះបណ្ដាលជំនាញ ដល់យុវជនក្រៅសាលា ឬចាកចេញពីសាលាមុនកម្រិតទុតិយភូមិ និងយុវជន ដែលបោះបង់ការសិក្សាឱ្យមានជំនាញ និងផ្ដល់លទ្ធភាពឱ្យពួកគាត់អាចចាប់ យកកាលានុវត្ដភាពការងារ ។
ទី៣- ផ្ដល់ជំនាញឱ្យយុវជនក្លាយជា អ្នកជំនាញវិជ្ជាជីវៈមួយដ៏ពិតប្រាកដ។ ក្នុងចំណុចនេះខ្ញុំសូមលើកទឹកចិត្ដដល់វិស័យឯកជនសូមផ្ដល់ឱកាសឱ្យកាន់តែ ច្រើនដល់សិស្ស និស្សិតដែលកំពុងសិក្សា នៅតាមបណ្ដាសាកលវិទ្យាល័យ ឬវិទ្យាស្ថានអប់រំបច្ចេកទេសនានាឱ្យទទួលបាន នូវវគ្គកម្មសិក្សាមួយមុននឹងបញ្ចប់ការសិក្សារបស់ខ្លួន ដើម្បីសិស្ស និស្សិតដែល ជាយុវជនអាចទទួលបានមិនត្រឹមតែ ចំណេះដឹង និងជំនាញខាងទ្រឹស្ដីប៉ុណ្ណោះទេ ប៉ុន្ដែថែមទាំងអាចទទួលបាននូវកាលានុវត្ដភាពថ្មី តាមរយៈការចូលរួម ការអនុវត្ដផ្ទាល់ក្នុងមជ្ឈដ្ឋានការងារ ជាក់ស្ដែង។
សម្ដេចតេជោបានអំពាវនាវដល់គ្រឹះស្ថាននានា ទាំងរដ្ឋ និងឯកជនផ្ដល់នូវចំណែកនៃការចុះធ្វើកម្មសិក្សានិងការចូលរួមនានា ដែលអាចទទួលទៅបាន។ ចំពោះក្រសួងសុខាភិបាលបានអនុវត្ដបានច្រើនចំណុចទាំងអស់នេះទាមទារនូវការចូលរួម ទាំងផ្នែករដ្ឋទាំងផ្នែកឯកជនដើម្បីឱ្យមានកម្មសិក្សាឱ្យពួកគេទាញយកផលប្រយោជន៍ពីកម្មសិក្សា និងទស្សនកិច្ចដកពិសោធន៍។
ទី៤- ជំនាញការចូលរួមសេវាយុវជន ក្នុងសេវាសាធារណៈសង្គមក្នុងបរិការណ៍ សាកលភាវូបនីយកម្ម។ ការវិវត្ដនៃរបបសង្គម ការអភិវឌ្ឍឥតឈប់ឈរ បានទាមទារឱ្យមានការគិតគូរឈរលើចីរភាពបរិស្ថាន។ ការចូលរួមរបស់យុវជនតាមរយៈ និងចំណេះដឹងរបស់ខ្លួន បាន និងកំពុងដើរតួនាទីយ៉ាងសំខាន់ក្នុង វិស័យបរិស្ថាន និងបេតិកភណ្ឌ។ ការចូលរួមក្នុងសកម្មភាពបរិស្ថាន ការដាំដើមឈើ ការថែរក្សាអភិរក្សសម្បត្ដិបេតិកភណ្ឌវប្បធម៌សុទ្ធសឹងជាភារកិច្ច ចូលរួមចំណែកក្នុងកិច្ចការបរិស្ថាន និងវប្បធម៌ប្រកដោយប្រសិទ្ធភាព។
ដោយឡែកប្រតិកម្មទៅនឹងការផ្សាយរបស់កាសែតដឺណេសិនរបស់ថៃ (The Nation) ដោយបាន និយាយអំពីលោក ហ៊ុន ម៉ាណែត ថា ជាអ្នកស្នងតំណែងរបស់នាយករដ្ឋមន្ត្រីពីឪពុកនោះសម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍បញ្ជាក់ថា នៅក្នុងប្រទេសប្រកាន់របបលទ្ធិប្រជាធិបតេយ្យដូចកម្ពុជា មិនអាចអនុវត្តន៍ដូចនេះបានទេ វាអាស្រ័យទៅលើការបោះឆ្នោតរបស់ប្រជាពលរដ្ឋប៉ុណ្ណោះ។
សម្ដេចតេជោមានប្រសាសន៍ថា ខ្ញុំគ្រាន់តែបញ្ជាក់ជូនត្រឡប់ទៅវិញថាប្រទេសនៅលើពិភពលោកដែល អនុវត្តន៍នូវលទ្ធិប្រជាធិបតេយ្យតាមរយៈនៃការបោះឆ្នោត តើការផ្ទេរតំណែងបែបណាទៅៗដល់កូនបាននោះ។ បើខ្ញុំមិនច្រឡំទេនៅលើពិភពលោកដែលបានកើតនូវរឿងរ៉ាវតត្រកូល យ៉ាងនេះ នៅពេលដែលខ្ញុំចាប់ផ្ដើមជារដ្ឋមន្ត្រីការបរទេសក្នុងវ័យ២៧ឆ្នាំ ហើយនឹងចាប់ផ្ដើមជានាយករដ្ឋមន្ត្រីក្នុងវ័យ៣២ឆ្នាំ ប៉ុន្តែអ្វីដែលខ្ញុំបានដឹង បានឮ គឺខ្ញុំបានដឹង នៅប្រទេសបីដែលឪពុកស្លាប់កូនបានឡើងជំនួស។ ទីមួយ គឺនៅប្រទេសស៊ីរី ទីពីរនៅប្រទេសកុងហ្គោ(ហ្សាអៀរ) និងទីបី គឺប្រទេសកូរ៉េខាងជើង ប៉ុន្តែសម្រាប់ប្រទេសដទៃទៀត គឺមិនយ៉ាងដូច្នោះទេ ដំណើរការនៃការបោះឆ្នោត គឺទាមទារនូវសន្លឹកឆ្នោតនៃការជឿទុកចិត្ត ពីសំណាក់ប្រជាជន។ ដូច្នេះបញ្ហានេះគ្រាន់តែបញ្ជាក់ ហើយជាការជូនសារត្រឡប់ទៅវិញឲ្យកាសែតដឺណេសិននៅប្រទេសថៃបានឮផង ហើយឲ្យយល់អំពីដំណើរការប្រជាធិបតេយ្យមិនអាចផ្ទេរពីឪពុកទៅកូន តាមចិត្តចង់នោះទេ។ ខ្ញុំអាចរៀបចំកូនអ្នកដទៃដែលមានសមត្ថភាពឲ្យកាន់តំណែងនេះ តំណែងនោះ ក៏ប៉ុន្តែមិនអាចរៀបចំកូនខ្លួនឯងទេ។
សម្តេចតេជោនាយករដ្ឋមន្ត្រីមានប្រសាសន៍ថា កូនប្រុសច្បងរបស់ខ្ញុំ គឺជាជនជាតិកម្ពុជាទីមួយដែលរៀននៅសាលាយោធា សហរដ្ឋអាមេរិក ហើយបន្តយកអនុបណ្ឌិតនៅឯសាកលវិទ្យាល័យញូវយ៉ក បន្ទាប់មកទៅយកសញ្ញាបត្របណ្ឌិតនៅឯចក្រភពអង់គ្លេស ប៉ុន្តែយើងមិនមានលទ្ធភាពណាដើម្បីរៀបចំបាននោះទេ នៅពេលដែលឪពុកកំពុងតែធ្វើការបែបនេះ។សម្ដេចថ្លែងបន្តថា នៅក្នុងអតីតកាលខ្ញុំមានបងប្រុសម្នាក់ដែលលទ្ធភាពរបស់គាត់នោះ ស្ទើរតែខ្ពស់ជាងខ្ញុំ ប៉ុន្តែអកុសលដោយសារតែការកាន់តំណែងជានាយករដ្ឋមន្ត្រីរបស់ខ្ញុំ គឺបានក្លាយជាឧបសគ្គរារាំងបងប្រុសមួយនេះ នៅត្រឹមកម្រិតអភិបាលខេត្ត ហើយចូលនិវត្តន៍ មិនអាចក្លាយជាសមាជិករាជរដ្ឋាភិបាលបានទេ។
សម្តេចតេជោនាយករដ្ឋមន្ត្រីថ្លែងថា ឥឡូវនេះមកដល់ខ្ញុំៗមានកូន៥នាក់ និងមានកូនប្រសា៥នាក់ទៀត ដែលសុទ្ធតែរៀននៅកម្រិតឧត្ដមសិក្សា និងក្រោយឧត្ដមសិក្សា ក៏ប៉ុន្តែពួកគេពិតជាមានការលំបាកដោយមិនអាចបញ្ចូលពួកគេ ទៅក្នុងក្របខណ្ឌនៃកិច្ចការងារមកដូចជា សមាជិករាជរដ្ឋាភិបាលបានទេ ព្រោះវានឹងអាចចោទជាសំណួរសួរថា តើនេះគឺជាការរៀបចំបែបបក្ខពួកនិយម ឬយ៉ាងម៉េច?។ មិនមែនគ្រាន់តែជាបញ្ហាដាច់ដោយឡែករបស់គណបក្សនៅក្នុងរដ្ឋាភិបាលទេ ហើយព្រឹកនេះអត្ថបទកាសែតភ្នំពេញប៉ុស្តិ៍ក៏ បានចុះផ្សាយអំពីកូនរបស់គណបក្សប្រឆាំងដែលនឹងត្រូវរៀបចំខ្លួន ចូលទៅក្នុងគណៈកម្មាធិការជាតិរៀបចំការបោះឆ្នោត គ្រាន់តែផ្ទុះរឿងនេះឡើងគេក៏អាចទិតៀនដែរ។ ដូច្នេះធ្វើជាឪពុកគេពិតជាមានការលំបាកណាស់សម្រាប់ការរៀបចំអនាគតកូនចៅ។
ឯកឧត្តម ថោង ខុន រដ្ឋមន្ដ្រីក្រសួង ទេសចរណ៍ និងជាប្រធានគណៈកម្មការ អន្ដរក្រសួងរៀបចំសន្និសីទអន្ដរជាតិ លើកទី៥មានប្រសាសន៍ឲ្យដឹងថា ក្រសួងទេស ចរណ៍បានសហការជាមួយសហភាព សហព័ន្ធយុវជនកម្ពុជា ក្រសួងបរិស្ថាន ក្រសួងអប់រំ យុវជន និងកីឡា និងអង្គ ការ Humanitarian Affaire UK រៀបចំ សន្និសីទអន្ដរជាតិលើកទី៥នេះឡើង ដោយមានអ្នកចូលរួមនិស្សិត សិស្ស ៦២៩នាក់មកពីសាលា និងសាកលវិទ្យា ល័យល្បីៗពី ៤២ប្រទេសលើសកលលោក ក្នុងនោះមកពីទ្វីបអាស៊ីចំនួន២០ប្រទេស សរុប៤៧៨នាក់។ មកពីទ្វីបអាមេរិក ចំនួន៥ប្រទេស សរុប៩នាក់, ទ្វីបអឺរ៉ុប ចំនួន១០ប្រទេស សរុប២២នាក់, ទ្វីបអូសេអានីចំនួន ៣ប្រទេស សរុប១១៣ នាក់, ទ្វីបអាហ្វ្រិកចំនួន៤ប្រទេស សរុប៧នាក់ ។ ចំណែកនិស្សិតកម្ពុជាមានការ ចូលរួមចំនួន៦០នាក់ដែលជ្រើសរើស រើសឡើងដោយសហភាពសហព័ន្ធ យុវជនកម្ពុជា ។
សន្និសីទអន្ដរ ជាតិលើកទី៥នេះក៏មានការចូលរួមពី វាគ្មិនជាតិ និងអន្ដរជាតិមកពីសហរដ្ឋ អាមេរិក២ នេប៉ាល់១រូប បារាំង១រូប អូស្ដ្រាលី១រូប នូវែលហ្សេឡង់១រូប ហ្វីលី ពីន១រូប ម៉ាឡេស៊ី១រូប និងវាគ្មិនកម្ពុជា ចំនួន៤រូប ។ សន្និសីទចាប់បើកតាំងពី ថ្ងៃទី២ ខែសីហា ឆ្នាំ២០១៤ ក្រោមអធិបតី ភាពលោកឧបនាយករដ្ឋមន្ដ្រី សុខ អាន និងជាតំណាងដ៏ខ្ពង់ខ្ពស់របស់សម្ដេច តេជោនាយករដ្ឋមន្ដ្រីរហូតដល់ថ្ងៃទី៦ ខែសីហា ឆ្នាំ២០១៤ ។
ជាមួយនឹងការថ្លែងអំណរគុណ ដល់វាគ្មិនជាតិ-អន្ដរជាតិដែលបាន ចូលរួមចែករំលែកក្នុងអង្គសន្និសីទ សម្ដេច អគ្គមហាសេនាបតីតេជោ ហ៊ុន សែន នាយករដ្ឋមន្ដ្រីបានចាត់ទុក សន្និសីទ អន្ដរជាតិលើកទី៥នេះ មិនត្រឹមតែជាព្រឹត្ដិការណ៍អន្ដរជាតិមួយដែល ចូលរួមគាំទ្រដល់យុទ្ធនាការឃោសនា ផ្សព្វផ្សាយនូវសក្ដានុពលទេសចរណ៍កម្ពុជា “កម្ពុជាព្រះរាជាណាចក្រអច្ឆរិយៈ” នៅលើឆាកអន្ដរជាតិប៉ុណ្ណោះទេ ប៉ុន្ដែថែមទាំងផ្ដល់កាលានុវត្ដភាពឱ្យយុវជនកម្ពុជាបានធ្វើការផ្លាស់ប្ដូរនូវចំណេះដឹង និងបទពិសោធន៍ល្អៗជាមួយនឹងយុវជនដទៃទៀត ដែលជាឱកាសសិក្សាឈ្វេងយល់ និងប្រាស្រ័យទាក់ទងគ្នា ពិសេសបានផ្លាស់ប្ដូរបទពិសោធន៍ជាមួយវាគ្មិន ដែលមានបទពិសោធន៍ក្នុងការងារមនុស្សធម៌ ការងារសង្គម និងបរិស្ថាន និងការបំផុលគំនិតពីក្រុមសាស្ដ្រាចារ្យល្បីៗ ដែលពោរពេញទៅដោយបទពិសោធន៍នៅក្នុងតំបន់ និងនៅក្នុងពិភពលោក៕