ប្រទេសកម្ពុជាបានប្រកាន់យកលទ្ឋិប្រជាធិបតេយ្យ។ រាល់ច្បាប់ និងលិខិតបទដ្ឋានទាំងអស់នៅកម្ពុជា ដែលបានធានាការពារបាននូវទ្រព្យសម្បត្តិរដ្ឋ សិទ្ធិសេរីភាព និងទ្រព្យសម្បត្តិត្រឹមត្រូវតាមច្បាប់បុគ្គល និងសមស្របប្រយោជន៍ជាតិ នោះត្រូវបានគាំពារដោយរដ្ឋធម្មនុញ្ញ ជាច្បាប់កំពូលនៃព្រះរាជាណាកចក្រកម្ពុជា។ តែបើគ្រប់សម្មភាពមិនប្រក្រតីណាមួយសាងទ្បើងដោយរូបវន្តបុគ្គល ឬនីតិបុគ្គល ដែលស្តែងចេញពីស្ថានភាពផ្ទុយទៅនឹងស្មារតីនៃច្បាប់ខាងលើនោះនាំឲ្យកម្ពុជាចាំបាច់ត្រូវអនុវត្តតាមនីតិវិធីច្បាប់ ឈរលើបាតុភាពណាមួយ ផ្តល់ផលប៉ះពាល់ដល់ប្រយោជន៍ជាតិកម្ពុជាទាំងមូល។
ជាក់ស្តែងនាពេលកន្លងទៅថ្មីៗនេះ មាននីតិបុគ្គលមួយបង្កទ្បើង ដោយអង្គការមាតាធម្មជាតិ គឺលោក អាទ្បិចហ្សង់ដ្រូ ហ្សន់ហ្សាទ្បេ ដាវីតសុន (Alexjandro Gonzalez Davidson) ជាជនជាតិអេស្ប៉ាញ និងជាប្រធានសកម្មជននៃអង្គការមាតាធម្មជាតិ បាននិងកំពុងប្រើប្រាស់សកម្មភាពអង្គការខ្លួនជ្រុលហួសព្រំដែនកំណត់នៃច្បាប់ ដោយបំផុសគំនិតអគតិរបស់ខ្លួន ធ្វើការ កៀងគរ ខ្ចីកម្លាំងប្រជាពលរដ្ឋខ្មែរផង ថែមទាក់ទាញផលចំនេញពីជំនួយជាតិ និងអន្តរជាតិ ក្រោមរូបភាព យកលេសការពារព្រៃឈើនៃតំបន់អារ៉ែងជាដើមទុនផង។ ទង្វើនេះវាជាការផ្ទុយ ទៅនឹងបច្ចុប្បន្នភាពរបស់កម្ពុជា ជាពិសេសក្នុងដំណាក់កាលនេះ ក្រសួងរ៉ែ និងថាមពលបាន ខិតខំស្រាវជ្រាវលើ គម្រោងសាងសង់វារីអគ្គិសនីជាយអារ៉ែងថា ស្ថិតនៅក្នុងដំណាក់កាលសិក្សា ផ្ទៀងផ្ទាត់លទ្ឋផលនៃបច្ចេកទេសនិងការសិក្សាលម្អិតពីផលប៉ះពាល់បរិស្ថាននិងសង្គមនៅទ្បើយ។
នេះបញ្ជាក់ថាសកម្មភាពរបស់ លោក អាទ្បិចហ្សង់ដ្រូ មិនត្រឹមតែជាអ្នកបញ្ចេញមតិ និងសម្មភាព មិនគប្បីមួយចំនួននោះទេ គឺជនបរទេសមួយរូបនេះ រួមទាំងក្រុមការងារខ្លួន បានបញ្ចេញសកម្មភាពល្មើសច្បាប់របស់កម្ពុជាទាំងស្រុង។ ដោយធ្វើការបិទផ្លូវសាធារណៈក្នុងគោល បំណងរារាំងប្រឆាំងអាជ្ញាធរដែនដីលើការចុះសួរសុខទុក្ខប្រជាពលរដ្ឋ អមនឹងការចុះត្រួតពិនិត្យ តំបន់គម្រោងសាងសង់ទំនប់វារីអគ្គិសនីជាយអារ៉ែងដែលស្ថិតនៅស្រុកថ្មបាំង ខេត្តកោះកុង។
នៅក្នុងការបិទផ្លូវសាធារណៈ មិនថាខេត្តកោះកុង ឬរាជធានី ភ្នំពេញកន្លងមក សកម្មភាពមាតាធម្មជាតិ ក្នុងការធ្វើបាតុកម្មឥតសណ្តាប់ធ្នាប់សាធារណៈ ដោយគ្មានការសុំច្បាប់អនុញ្ញាតិ បញ្ជាក់ត្រឹមត្រូវពីសាលារាជធានីភ្នំពេញឬអាជ្ញាធរខេត្តនោះទេ។ ទាំងនេះជាការបង្ហាញឲ្យឃើញ ថា អង្គការមាតាធម្មជាតិ ដែលមានលោក អាទ្បិចហ្សង់ដ្រូ ជាប្រធានដែលបាន និងកំពុងធ្វើ គឺរំលោភលើច្បាប់កម្ពុជាទាំងស្រុង។ យោងតាមច្បាប់ចរាចរផ្លូវគោក មាត្រា ៧៨ បានចែងយ៉ាង ច្បាស់ថា «ជនណាប្រើប្រាស់មធ្យោបាយណាមួយ ដើម្បីជាឧបសគ្គដល់ចរាចរណ៍សាធារណៈ ត្រូវផ្តន្ទាទោសដាក់ពន្ឋនាគារពីមួយ(១)ខែ ទៅមួយ(១)ឆ្នាំ និងពិន័យជាប្រាក់ពីម្ភៃម៉ឺន (២០០.០០០)រៀល ទៅពីរលាន(២.០០០.០០០) រៀល»។
ទន្ទឹមនឹងនេះ សកម្មភាពដែល លោក អាទ្បិចហ្សង់ដ្រូ ព្រមទាំងក្រុមការងាររបស់លោកបានបង្កទ្បើងនាកន្លងមក កាន់តែឆ្លុះឲ្យឃើញ ពីឆន្ទៈបង្កអស្ថេរភាពក្នុងប្រទេសកម្ពុជាជាថ្មីម្តងទៀត។ស្របពេល ដែលកម្ពុជាទើបទទួលបានការស្រុះស្រួលនយោបាយ រវាងគណបក្ស ប្រជាជននិងគណបក្សសង្រោ្គះជាតិ។ កម្ពុជាកំពុងពង្រឹងនិងលើកស្ទួយនីតិរដ្ឋ តាមរយៈ ការតាក់តែងបង្កើតច្បាប់ និងជម្រុញឲ្យមានដំណើរការគោរពអនុវត្តច្បាប់ ដើម្បីយុត្តិធម៌ និងវឌ្ឍនភាពសង្គម។ទាំងនេះ គឺជាមោទនភាពរបស់ជាតិខ្មែរ ដែលប្រកាន់យក”អាវុធច្បាប់” ដើម្បីដោះស្រាយនូវរាល់បញ្ហាដែលបានកើតទ្បើង ក្នុងសង្គមជាជាងបណ្តែតបណ្តោយឲ្យមាន ការធ្វើសកម្មភាពអាណាធិបតេយ្យ។ អញ្ចឹងទង្វើរបស់ប្រធានអង្គការធម្មជាតិដែលប្រឆាំង និង ផែនការកសាងទំនប់វារីអគ្គិសនី ការចតរថយន្តបិទផ្លូវសាធារណៈ ការប្រឆាំងជាមួយអាជ្ញាធរ ដែនដី គឺជាការអនុវត្តផ្ទុយពីគោលការណ៍ច្បាប់។ បើជនបរទេសរូបនេះ នៅតែមានចេតនាគ្មាន ភាពទទួលខុសត្រូវវិជ្ជាជីវៈខ្លួន ដោយដើរផ្ទុយនឹងមាគ៌ាច្បាប់កម្ពុជាដដែលនោះ លោក អាទ្បិច ហ្សង់ដ្រូ ពិតត្រូវប្រឈមមុខនឹងការអនុវត្តច្បាប់អន្តោប្រវេសន៍ ដោយការបណ្តេញចេញពីទឹកដី កម្ពុជា។
ដូចនេះ ឈរលើស្ថេរភាពនយោបាយកម្ពុជានិងស្មារតីនៃច្បាប់ សូមលោក អេទ្បិច ហ្សង់ដ្រូ គួរគប្បីធ្វើសកម្មភាពណាដែលត្រឹមត្រូវ សមស្របតាមច្បាប់កម្ពុជា និងត្រូវស្ថិតក្នុង ព្រំដែននៃវិជ្ជាជីវៈរបស់ខ្លួន ដែលជាអង្គការឯករាជ្យ មិនត្រូវប្រាស់ចាកពីវិជ្ជាជីវៈ ហើយមក ពាក់ព័ន្ឋ នឹងរឿងនយោបាយ ឬប្រកាន់និន្នាការនយោបាយខាងបក្សណាមួយនោះទ្បើយ៕
ដោយ៖ លី ចិន្តា
អ្នកសិក្សាស្រាវជ្រាវ គោលការណ៍នីតិរដ្ឋនៅកម្ពុជា