នៅព្រឹកថ្ងៃទី៣ខែសីហានេះ មន្ត្រីជាន់ខ្ពស់នៃគណៈកម្មាធិការជាតិអូឡាំពិកកម្ពុជា ដឹកនាំដោយលោក នុត សាអាន អនុប្រធានទី ១ និង លោកប៊ុន សុខ អនុប្រធានទី២ បានដឹកនាំមន្ត្រីអូឡាំពិកនិងតំណាងសហព័ន្ធជាតិទៅគោរពវិញ្ញាណក្ខន្ធលោកឧកញ៉ាវិសេសវិជ្ជាវេជ្ជបណ្ឌិត មី សាមឺឌី ប្រធានកិត្តិយសអូឡាំពិកមួយជីវិត ដែលទទួលមរណភាពកាលពីថ្ងៃទី ១ ខែសីហាកន្លងមក។
លោកនុត សាអាន បានថ្លែងនៅក្នុងវិយោគកថាបញ្ជាក់ថា មួយជីវិតរបស់លោកមី សាមឺឌី គឺបាន លះបង់ទៅលើការបណ្ដុះបណ្ដាលធនធានមនុស្សលើវិស័យវេជ្ជសាស្ត្រ និងកីឡាបានយ៉ាងច្រើន។ បន្ទាប់ពីឆ្លងកាត់របបប៉ុល ពតនោះ លោកមី សាមឺឌីបានតស៊ូលើឆាកអន្តរជាតិពិសេសអូឡាំពិកអន្តរជាតិ រហូតដល់ថ្ងៃទី១៥ ខែមិថុនា ឆ្នាំឆ្នាំ១៩៩៦ អូឡាំពិកអន្តរជាតិបានផ្ដល់អាសនៈមកដល់កម្ពុជាវិញ។
ជាមួយនឹងការទាមទារបានមកវិញនូវអាសនៈអូឡាំពិកកម្ពុជាលើឆាកអន្តរជាតិនោះ លោកមី សាមឺឌី បានកាន់កាប់តំណែងជាប្រធានគណៈកម្មាធិការជាតិអូឡាំពិកកម្ពុជាដល់ទៅ២អាណត្តិ ហើយចុងក្រោយលោកបានដកខ្លួនថយដោយសារវ័យកាន់តែចាស់។ ទោះបីដកខ្លួនថយក៏លោកនៅតែបន្តជួយដល់អូឡាំពិកកម្ពុជាទៅតាមអ្វីដែលអាចធ្វើបាន។
ដោយសារគុណសម្បត្តិបែបនេះ ទើបនៅថ្ងៃទី១២កុម្ភៈ២០១១ លោកថោង ខុនប្រធានគណៈកម្មាធិការជាតិអូឡាំពិកកម្ពុជា សម្រេចផ្ដល់ឋានៈកិត្តិយសដល់លោកវេជ្ជបណ្ឌិត មី សាមឺឌី ជាប្រធានកិត្តិយសអូឡាំពិកកម្ពុជាមួយជីវិត។
លោក នុត សាអាន បានបញ្ជាក់ទៀតថា ក្នុងនាមលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា ជាមួយមន្ត្រីនៃគណៈកម្មាធិការជាតិអូឡាំពិកកម្ពុជាទាំងអស់ សូមចូលរួមសំដែងនូវមរណទុក្ខដ៏ក្រៀមក្រំចំពោះការបាត់បង់សកម្មជន នៃចលនាអូឡាំពិក ក្នុងព្រះរាជាណាចក្រកម្ពុជា ដែល លោកអ្នកឧកញ៉ាវិសេសវិជ្ជាវេជ្ជបណ្ឌិត មី សាមឺឌី ប្រធានកិត្តិយសមួយជីវិត របស់គណៈកម្មាធិការជាតិអូឡាំពិកកម្ពុជា ដែលបានទទួលមរណភាពដ៏គួរឲ្យសោកស្តាយនេះ៕
វិសិទ្ធ