ខេត្តកំពង់ចាម ៖ សមាគមនិស្សិតមូស្លីមកម្ពុជា កាលពីថ្ងៃទី៣០ កក្កដា ឆ្នាំ២០១២ បាននាំយកអំណោយរបស់អង្គការមូស្លីមហេលហ្វិននៃប្រទេសអាល្លឺម៉ង់ ទៅចែកជូនប្រជាពលរដ្ឋខ្មែរអ៊ិស្លាមក្រីក្រ និងចាស់ជរាចំនួន៥៨០គ្រួសារ រស់នៅស្រុកកងមាស និងស្រុកពញាក្រែក ដោយមានការអញ្ជើញចុះចែកផ្ទាល់ពីសំណាក់លោកវេជ្ជបណ្ឌិតសុះ មុះសិន រដ្ឋលេខាធិការ ក្រសួងធម្មការនិងសាសនា និងជាប្រធានសមាគមនិស្សិតមូស្លីមកម្ពុជា ។
ចូលរួមក្នុងពិធីនោះមានលោកសាន់ សាប់អុីអនុរដ្ឋលេខាធិការក្រសួងសុខាភិបាល និងជាអនុប្រធានសមាគម លោកម៉ាន សុគ្រី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទនិងលោកពាស់ មូស្លីម អនុប្រធានសមាគមនិស្សិតមូស្លីមកម្ពុជា ។ ការនាំអំណោយយកទៅចែកជូនដល់ប្រជាពលរដ្ឋខ្មែរអ៊ិស្លាមនេះ នៅព្រឹកថ្ងៃទី៣០ កក្កដា ចែកជូនដល់ប្រជាពលរដ្ឋចំនួន២៨០គ្រួសារនៅឃុំអង្គរបាន និងឃុំរកាគយ ស្រុកកងមាស និងពេលល្ងាចចែកជូនដល់ប្រជាពលរដ្ឋចំនួន៣០០គ្រួសារ នៅឃុំដា ស្រុកមេមត់ និងឃុំជីមាន់ ស្រុកពញាក្រែក ។
លោកវេជ្ជបណ្ឌិតសុះ មុះសិន បានឱ្យដឹងថា អំណោយដែលនាំយកមកចែកជូនដល់ប្រជាពលរដ្ឋខ្មែរអ៊ិស្លាមក្រីក្រនៅពេលនេះជាអំណោយរបស់អង្គការមូស្លីម ហេលហ្វិននៃប្រទេសអាល្លឺម៉ង់ ផ្តល់តាមរយៈសមាគមនិស្សិតមូស្លីមកម្ពុជា ដែលក្នុង១គ្រួសារៗទទួលបាន អង្ករ១៨គីឡូក្រាម មីចំនួន១៥កញ្ចប់ ស្ករស៤គីឡូក្រាម ត្រីខ៥កំប៉ុង ទឹកស៊ីរ៉ូ២ដប អូវ៉ាល់ទីន២ដប ទឹកដោះគោ២កំប៉ុង តែ៤កញ្ចប់ និងអំបិល២គីឡូក្រាម។
លោកវេជ្ជបណ្ឌិតសុះ មុះសិន ថ្លែងទៀតថា ការបួសរបស់សាសនិកអ៊ិស្លាមនេះជាកាតព្វកិច្ចមួយក្នុងចំណោមកាតព្វតិច្ចទាំង៥របស់សាសនាអ៊ិស្លាម ដែលបួសក្នុង១ខែរ៉ាម៉ាដាន និងជាខែទី៩របស់សាសនាអ៊ិស្លាម ។ អ្នកបួសចាប់ពីពេញវ័យទៅ គឺតមពេលថ្ងៃចាប់ពីម៉ោង៤និង២០នាទីទៀបភ្លឺរហូតដល់ម៉ោង៦និង៣០នាទីល្ងាច ដោយអត់អាហារ និងទឹកសូម្បីតែទឹកមាត់ក៏មិនឱ្យលេបដែរ។ ក្រៅពីនេះតមពាក្យសម្តី អត់ធ្មត់ និងជួយគ្នាទៅវិញទៅមក ជាពិសេសទៀតសាសនិកអ៊ិស្លាមបរិច្ចាគទានធ្វើបុណ្យទើបបានបុណ្យច្រើន ។
លោកវេជ្ជបណ្ឌិតបានបន្តទៀតថា ហេតុដូចនេះហើយបានជានៅក្នុងខែរ៉ាម៉ាដាននេះសាសនិកអ៊ិស្លាមកម្ពុជាបានទទួលអំណោយជាបន្តបន្ទាប់ពីសប្បុរសជនក្នុងប្រទេសនិងនៅក្រៅប្រទេសយកមកចែកជូនដល់ប្រជាពលរដ្ឋក្រីក្រ ចាស់ជរា ជនពិការដែលមានជីវភាពខ្វះខាត ដើម្បីឱ្យពួកគាត់មានលទ្ធភាពទិញអាហារថែបំប៉ននៅពេលយប់ ។ ដោយឡែកនៅឆ្នាំនេះសមាគមនិស្សិតមូស្លីមកម្ពុជាបានទទួលអំណោយជាថវិកាពីអង្គការមូស្លីមហេលហ្វិននៃប្រទេសអាល្លឺម៉ង់ ដើម្បីទិញគ្រឿងឧបភោគបរិភោគមកចែកជូនដល់សាសនិកអ៊ិស្លាមសម្រាប់៣ខេត្តក្នុងនោះរាជធានីភ្នំពេញចំនួន៣០០គ្រួសារ ខេត្តកំពង់ធំចំនួន២៥០គ្រួសារ និងខេត្តកំពង់ចាមដែលនាំមកចែកជូននៅពេលនេះ ។
លោកវេជ្ជបណ្ឌិតបានបញ្ជាក់ថា រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី បានយកចិត្តទុកដាក់យ៉ាងខ្លាំងដល់ប្រជាពលរដ្ឋ ដោយផ្តល់សិទ្ធិគ្រប់បែបយ៉ាងក្នុងការជឿលើសាសនា ហេតុនេះបានធ្វើឱ្យគ្រប់ជាតិសាសន៍ និងសាសនាទាំងអស់រស់នៅជាមួយគ្នាយ៉ាងសុខដុមរមនា ។ លោកវេជ្ជបណ្ឌិតសុះ មុះសិន ក៏បានថ្លែងអំណរគុណយ៉ាងជ្រាលជ្រៅដល់សប្បុរសជនក៏ដូចជាអង្គការនានា ដែលតែងតែផ្តល់អំណោយដល់សហគមន៍អ៊ិស្លាម ជាការចួលរួមអភិវឌ្ឍន៍ប្រទេសកម្ពុជាឱ្យកាន់តែរីកចម្រើនថែមទៀត ៕