ភ្នំពេញ ៖ លោកស្រី មូរ សុខហួរ អ្នកតំណាងរាស្ត្រមណ្ឌលកំពតមកពីគណបក្សប្រឆាំង សម រង្ស៊ី មានពេលមួយខែទៀតទើបទទួលបានអភ័យឯកសិទ្ធិប្រសិនបើគ្មានបណ្តឹង ដែលការសំរេចបែបនេះ ធ្វើឡើងនៅក្នុងសវនារយៈពេលខ្លីមួយនាព្រឹកថ្ងៃទី០៣ខែសីហាឆ្នាំ២០១២ នៅតុលាការសាលាឧទ្ធរណ៍។
លោកស្រី មូរ សុខហួរ បានថ្លែងប្រាប់អ្នកការសែតក្រោយពីបញ្ចប់សវនាការថា ការសំរេចរបស់សភាស៊ីបសួរនៃសាលាឧទ្ធរណ៍នេះ គឺជាការសំរេចដ៏ត្រឹមត្រូវ ដែលអាចទទួលយកបាន ហើយនៅក្នុងរយៈពេលមួយខែនេះ លោកស្រីនៅតែបំពេញតួនាទីជាអ្នកតំណាងរាស្ត្រ ព្រោះរាស្ត្របោះឆ្នោតឲ្យ មិនមែនឲ្យមកនៅស្ងៀមបិទមាត់ទេ លោកស្រីមិនស្តាប់អ្នកណាក្រៅពីរាស្ត្រទេ ។
លោកស្រីបញ្ជាក់ថា បានរង់ចាំយុត្តិធម៌អស់រយៈពេលជិតបីឆ្នាំមកហើយ ហើយបានកាត់ប្រាក់បៀវត្សរបស់លោកស្រីអស់១៦,៥ លាន ។
សូមបញ្ចាក់ថា លោកស្រី មូរ សុខហួរ កាលពីឆ្នាំ២០១១ ត្រូវបានប្រធានមជ្ឈមណ្ឌលអប់រំព្រៃស្ពឺ ប្តឹងថាបានរំដោះពលរដ្ឋបុរីកីឡាពីមជ្ឈមណ្ឌល ហើយតុលាការមិនទាន់ចាត់ការយ៉ាងណានៅឡើយ ហើយនៅក្នុងសវនាការនាព្រឹកនេះ ក៏បានលើកឡើងពីបញ្ហាបណ្តឹងនៅព្រៃស្ពឺនេះដែរ តើលោកស្រីមានឱកាសទទួលបានអភ័យឯកសិទ្ធិប៉ុណ្ណា៕កោះកែវ