ភ្នំពេញ ៖ នៅព្រឹកថ្ងៃទី១៣ ខែតុលាឆ្នាំ២០១២លោកអ៊ុំ សារិទ្ធអគ្គលេខាធិការព្រឹទ្ធសភានៃព្រះរាជាណាចក្រកម្ពុជានិងជាប្រធានក្រុមការងារចុះជួយខណ្ឌឫស្សីកែវនិងសហការីបានអញ្ជើញប្រារព្ធពិធីបាំងបង្សុកូលរាប់បាត្រចំវេនទី១៣នៃបុណ្យភ្ជុំបិណ្ឌនៅវត្តសូរិយាពោធិមាសហៅវត្តក្តីចាស់ក្នុងសង្កាត់បាក់ខែងខណ្ឌឫស្សីកែវរាជធានី ដែលពិធីបុណ្យនេះមានការចូលរួមជាកិត្តិយសពីសំណាក់មន្ត្រីជាន់ខ្ពស់ក្នុងជួររាជរដ្ឋាភិបាលថ្នាក់ដឹកនាំគ្រប់ជាន់ថ្នាក់នៅអគ្គលេខាធិការព្រឹទ្ធសភានិង មន្ត្រីរាជការទាំងអស់ព្រមទាំងអាជ្ញាធរដែនដីផងដែរ។
ក្នុងឱកាសនោះលោកអ៊ុំ សារិទ្ធបាននាំបច្ច័យបុណ្យប្រគេនដល់ព្រះសង្ឃចំនួន២១អង្គ ក្នុងមួយអង្គ២ម៉ឺនរៀល អង្គធំ៤ម៉ឺនរៀល យាយជីតាជី៥០នាក់ម្នាក់ៗថវិកា១ម៉ឺនរៀលព្រមទាំងគ្រឿងឧបភោគបរិភោគភេសជ្ជះមួយចំនួនទៀត។ បច្ច័យបុណ្យទាំងអស់មាន២លានរៀលនិង៧៣០ដុល្លាត្រូវបានលោក អ៊ុំ សារិទ្ធប្រគល់ជូនទៅគណៈកម្មការពិធីបុណ្យចាត់ចែងក្នុងពិធីបុណ្យនិងការកសាង។
ជាមួយគ្នានោះលោក អ៊ុំ សារិទ្ធបានថ្លែងនូវការអរគុណចំពោះថ្នាក់ដឹកនាំបុគ្គលិកមន្ត្រីរាជការទាំងអស់ក្នុងព្រឹទ្ធសភាអាជ្ញាធរគ្រប់លំដាប់ថ្នាក់ដែលបានចំណាយថវិកានិង កំលាំងកាយចិត្តចូលរួមក្នុងពិធីបុណ្យកាន់បិណ្ឌនៃរដូវភ្ជុំបិណ្ឌប្រពៃណីខ្មែរយើងនិងសូមជូនពរឲ្យប្រាថ្នាអ្វីៗបានដូចបំណង។
លោកអគ្គលេខាធិការព្រឹទ្ធសភានិងសហការីតែងតែអញ្ជើញមកប្រារព្ធពិធីបុណ្យកាន់បិណ្ឌរាប់បាត្រនៅវត្តខាងលើនេះរាល់ឆ្នាំនិងវត្តដទៃទៀតផងដែរតាមទំនៀមទម្លាប់ប្រពៃណីខ្មែរយើង។
លោក អ៊ុំ សារិទ្ធបានឧទ្ទិសកុសលផលបុណ្យជូនដល់វិញ្ញាណក្ខន្ឋអ្នកមានគុណទាំងអស់ក៏ដូចយុទ្ធជនអង់អាចក្លាហានដែលពលីជីវិតដោយសារការពារទឹកដីមាតុភូមិនិងឧទ្ទិសកុសលបុណ្យនេះដល់វិញ្ញាណក្ខន្ឋប្រជាជនខ្មែរស្លូតត្រង់រាប់លាននាក់ដែលបានស្លាប់ទាំងអយុត្តិធម៌ក្រោមអំពើសាហាវយង់ឃ្នងបំផុតរបស់ប៉ុលពតតែម្តងតាំងពីឆ្នាំ១៩៧៥-១៩៧៩។
ជាមួយគ្នានោះលោកអ៊ុំ សារិទ្ធបានបួងសួងសូមឲ្យវត្ថុសក្ដិសិទ្ធិក្នុងលោកតាមជួយសម្តេចទាំង៣ប្រមុខដឹកនាំដ៏ឈ្លាសវៃរបស់គណបក្សប្រជាជនកម្ពុជាពិសេសបីបាច់ថែរក្សាសម្តេចតេជោនិងលោកជំទាវកិត្តិព្រឹទ្ធបណ្ឌិត ព្រមទាំងក្រុមគ្រួសារសាច់ញាតិទាំងអស់និងប្រជាពលរដ្ឋខ្មែរទូទាំងប្រទេសជួបតែសុខសន្តិភាពនិងការអភិវឌ្ឍន៍ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីជារៀងរហូត៕