ភ្នំពេញ: សម្តេចអគ្គមហាសេនាបតីតេជោ ហ៊ុន សែន នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូល កម្ពុជា ឡាវ និងវៀតណាម ( CLV ) លើកទី៧ ស្តីពីការអភិវឌ្ឍន៍តំបន់ត្រីកោណរយៈពេល ២ ថ្ងៃ នៅទីក្រុងហូជីមិញ ប្រទេសវៀតណាម។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី១២ ខែតុលា ឆ្នាំ២០១២ បានឲ្យដឹងថា តាមការអញ្ជើញរបស់លោក ង្វៀន តាន់យុង ( Nguyen Tan Dung ) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូល កម្ពុជា ឡាវ និងវៀតណាម ( CLV ) លើកទី៧ ស្តីពីការអភិវឌ្ឍន៍តំបន់ត្រីកោណ ដែលនឹងប្រព្រឹត្តទៅពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០១២ នៅទីក្រុងហូជីមិញ សាធារណរដ្ឋសង្គមនិយមវៀតណាម។
តាមសេចក្តីប្រកាសព័ត៌មានដដែលនោះបានបញ្ជាក់ថា គណៈប្រតិភូដែលនឹងអមដំណើរសម្តេចតេជោ ហ៊ុន សែន ទៅចូលរួមកិច្ចប្រជុំកំពូលកម្ពុជា ឡាវ និងវៀតណាម ( CLV ) លើកទី៧ ស្តីពីការអភិវឌ្ឍន៍តំបន់ត្រីកោណ នៅទីក្រុងហូជីមិញនោះរួមមានលោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម និងសមាជិកនៃរាជរដ្ឋភិបាលកម្ពុជាដទៃទៀត។
សេចក្តីព័ត៌មានបានបញ្ជាក់ថា នៅចុងបញ្ចប់នៃកិច្ចប្រជុំកំពូលនេះ នាយករដ្ឋមន្ត្រីកម្ពុជា ឡាវ និងវៀតណាម នឹងចុះហត្ថលេខាលើសេចក្តីថ្លែងការណ៍រួមមួយ។
សូមបញ្ជាក់ថា ថ្មីៗនេះ គណៈកម្មការកិច្ចការបរទេសនៃរដ្ឋសភាទាំងបី ប្រទេស (កម្ពុជា វៀតណាម និងឡាវ) បានបញ្ជាក់ស្តីពីតួនាទីសភាក្នុងការគាំទ្រ និងការអភិវឌ្ឍន៍តំបន់ត្រីកោណ កម្ពុជា វៀតណាម និងឡាវ បានរៀបចំសន្និសីទលើកទី៤ នៅខេត្តង៉េ អាន (NGHE AN) ប្រទេសវៀតណាម ដែលសន្និសីទនោះ ចាប់ពីថ្ងៃទី១ ដល់ថ្ងៃទី៤ ខែសីហា ឆ្នាំ២០១២ ហើយភាគីកម្ពុជាដឹកនាំដោយលោក ឈាង វុន ប្រធាន គណៈកម្មការកិច្ចការបរទេសសហប្រតិបត្តិការអន្តរជាតិ ឃោសនា និងព័ត៌មាន នៃរដ្ឋសភា កម្ពុជា។ ភាគីវៀតណាម ដឹកនាំដោយលោកបណ្ឌិត ត្រឹន វ៉ាន់ហាំង ប្រធានគណៈកម្មការកិច្ចការបរទេសនៃរដ្ឋសភាវៀតណាម និងភាគីឡាវ ដឹកនាំដោយលោក គូកែវ អាកាមន្ត្រី ជាប្រធានគណៈកម្មការបរទេស នៃរដ្ឋសភាឡាវ ហើយសន្និសីទនោះ បានប្រព្រឹត្តទៅក្រោមអធិបតីភាពលោក អ៊ុង ឈុលីវ (Uong Chuluu) អនុប្រធានរដ្ឋសភា នៃសាធារណរដ្ឋសង្គមនិយមវៀតណាម និងដោយមានការអញ្ជើញចូលរួមពី តំណាងអាជ្ញាធរដែនដីខេត្ត ង៉េអានផងដែរ។
លោក អ៊ុង ឈុលីវ មានប្រសាសន៍ថា អង្គសន្និសីទលើកទី៤នេះ បានប្រារព្ធធ្វើឡើងក្នុងឆ្នាំ២០១២ គឺជាខួបលើកទី៤ នៃទំនាក់ទំនងការទូតកម្ពុជា វៀតណាម និងក៏ជាឆ្នាំមិត្តភាពវៀតណាម ឡាវ ផងដែរ ហើយដែលកិច្ចប្រជុំមានសារសំខាន់ក្នុងកិច្ចសហប្រតិបត្តិការនៃប្រទេសទាំងបី កម្ពុជា វៀតណាម និងឡាវ ដែលជាកម្លាំងចលករមិនអាចខ្វះបានក្នុងការជំរុញ ឲ្យមានប្រសិទ្ធភាពក្នុងការអនុវត្តពីរដ្ឋាភិបាល ដើម្បីឆ្លើយតបទៅនឹងតម្រូវការជាក់ស្តែង និង ការអភិវឌ្ឍរបស់ប្រជាពលរដ្ឋរស់នៅតាមតំបន់ត្រីកោណ នៃប្រទេសទាំងបី ជាពិសេស ការប្រឈម ទាំងឡាយដែលត្រូវដោះស្រាយតាមផ្លូវច្បាប់។
ចំណែកលោកឈាង វុន បានថ្លែងនៅក្នុងសន្និសីទសារព័ត៌មានក្រោយពេលត្រឡប់មកដល់នៅព្រលានយន្តហោះអន្តរជាតិភ្នំពេញ កាលពីយប់ថ្ងៃទី៥ ខែសីហា ឆ្នាំ២០១២ ថា សន្និសីទនោះបានចេញសេចក្តីប្រកាសរួមមួយ ក្នុងនោះមានចំណុចសំខាន់ៗចំនួន៣ គឺទី១ សន្និសីទបានឯកភាពស្តីពីតួនាទីរបស់រដ្ឋសភា ក្នុងការតាមដានត្រួតពិនិត្យនូវគម្រោងទាំងឡាយរបស់ប្រមុខរដ្ឋាភិបាល ដែលបានសម្រេចរួចមកហើយ ព្រមទាំងជំរុញគម្រោងទាំងអស់នេះឲ្យដំណើរការល្អ។ ទី២ រដ្ឋសភានៃប្រទេសទាំងបីនៅពីក្រោយរដ្ឋាភិបាលប្រទេសទាំងបី ដើម្បីបញ្ជាក់ឲ្យប្រជាពលរដ្ឋដឹងថា ការអភិវឌ្ឍន៍តំបន់ត្រីកោណនេះ ជាមួយការគាំទ្រគម្រោងរដ្ឋសភាត្រូវជំរុញដល់រដ្ឋាភិបាល នៃប្រទេសទាំងបីក្នុងការពន្លឿនការរៀបរៀងសេចក្តីព្រាងច្បាប់ និងធ្វើឲ្យប្រសើរឡើងនូវប្រព័ន្ធច្បាប់ស្តីពី វិនិយោគ ធុរៈកិច្ចបណ្តាគោលនយោបាយទាក់ទងដល់សកម្មភាពផ្តល់អាជ្ញាប័ណ្ណវិនិយោគធុរៈកិច្ច ហើយចាំបាច់ត្រូវពន្លឿន និងធានានូវតម្លាភាពព្រមៗគ្នា និងឯកភាពគ្នាតាំងពីថ្នាក់ជាតិរហូតដល់មូលដ្ឋាន សំដៅកាត់បន្ថយពេលវេលា និងការចំណាយរបស់អ្នកវិនិយោគ ដើម្បីលើកកំពស់សមត្ថភាពប្រកួតប្រជែងរបស់សហគ្រាសក្នុងតំបន់ត្រីកោណអភិវឌ្ឍន៍ និងទី៣ ស្នើឲ្យភាគីទាំង៣ប្រទេសជួយសម្រួលឲ្យប្រជាពលរដ្ឋ ដែលរស់នៅតាមតំបន់ព្រំដែនទាំង៣ ពិសេសបញ្ហាជនអន្តោប្រវេសន៍ធ្វើយ៉ាងណាឲ្យមានការយោគយល់គ្នា។
លោក ឈាង វុន បានឲ្យដឹងដែរថា អស់រយៈកាលបីឆ្នាំកន្លងមកនេះ គណៈកម្មការកិច្ចការបរទេស នៃរដ្ឋសភាប្រទេសទាំងបី កម្ពុជា វៀតណាម និងឡាវ បានរៀបចំឡើងនូវសន្និសីទ ចំនួនបីលើករួចមកហើយ ក្នុងគោលបំណងពង្រឹងទំនាក់ទំនងមិត្តភាពជាប្រពៃណីកម្ពុជា វៀតណាម និងបន្តកិច្ចសហប្រតិបត្តិការលើគ្រប់វិស័យ ដែលមានស្រាប់រវាងស្ថាប័ននីតិប្បញ្ញត្តិ នៃប្រទេស ទាំងបី ដោយចាត់ទុកជាកត្តាដ៏សំខាន់ចំពោះស្ថិរភាព និងការអភិវឌ្ឍ នៃប្រទេសទាំងបី។
តាមឯកសារមួយចំនួនឲ្យដឹងថា តំបន់ត្រីកោណកម្ពុជា ឡាវ វៀតណាម ត្រូវបានបង្កើតឡើងតាមគំនិតផ្តួចផ្តើមរបស់នាយករដ្ឋមន្ត្រី នៃប្រទេសកម្ពុជា ឡាវ វៀតណាម កាលពីឆ្នាំ១៩៩៩ នៅក្នុងកិច្ចប្រជុំកំពូលនាទីក្រុងវៀងចន្ទន៍ ប្រទេសឡាវ។ តំបន់អភិវឌ្ឍន៍ត្រីកោណនោះ ដើមឡើយគ្របដណ្តប់លើខេត្តចំនួន១០ គឺខេត្តស្ទឹងត្រែង រតនគិរី និងខេត្តមណ្ឌលគិរី (កម្ពុជា) ព្រមទាំងខេត្តអាតាពី ខេត្តសារ៉ាវ៉ាន់ ខេត្តសេកុង (ឡាវ) និងខេត្តដាក់ឡាក់ ខេត្តដាក់ណុង ខេត្តកុនទុំ ខេត្តយ៉ាឡាក់ (វៀតណាម)។ ក៏ប៉ុន្តែបន្ទាប់មក នាយករដ្ឋមន្ត្រីនៃប្រទេសទាំងបី បានឯកភាពគ្នាដាក់បញ្ចូលខេត្តចំនួនបីទៀត រួមមាន ខេត្តក្រចេះ (កម្ពុជា) ខេត្តចម្ប៉ាសាក់ (ឡាវ) និងខេត្តបិញភៀក (វៀតណាម)។
ឯកសារគោលដែលប្រើប្រាស់ការអភិវឌ្ឍន៍រួមគ្នារវាងប្រទេសទាំងបី គឺផែនការមេ ស្តីពីការអភិវឌ្ឍន៍សេដ្ឋកិច្ចសង្គម សម្រាប់តំបន់ត្រីកោណអភិវឌ្ឍន៍កម្ពុជា ឡាវ វៀតណាម បានអនុម័តដោយនាយករដ្ឋមន្ត្រីនៃប្រទេសទាំងបី កាលពីឆ្នាំ២០០៤ នាកិច្ចប្រជុំកំពូលនៅទីក្រុងវៀងចន្ទន៍ ប្រទេសឡាវ ក្នុងគោលបំណងអភិវឌ្ឍន៍ផែនការមេ ស្តីពីស្ថានភាពសេដ្ឋកិច្ច សង្គម ធនធាន សក្តានុពល ព្រមទាំងរចនាសម្ព័ន្ធ និងយន្តការសម្រាប់សម្របសម្រួលការអភិវឌ្ឍន៍រួម និងដោយឡែកៗរបស់ប្រទេសទាំងបី។ ឯកសារនោះបានបង្ហាញថា ការអភិវឌ្ឍន៍តំបន់ត្រីកោណ ត្រូវបានប្រទេសជប៉ុនសម្រេចផ្តល់ជំនួយក្នុងទឹកប្រាក់ចំនួន ២០ លានដុល្លារ។ ក្នុងនោះប្រទេសកម្ពុជាទទួលបានចំនួន ៧,៥ លានដុល្លារ ប្រទេសឡាវទទួលបានចំនួន ៧,៥ លានដុល្លារ និងប្រទេសវៀតណាម ទទួលបានចំនួន ៣,៥ លានដុល្លារ។ រីឯទឹកប្រាក់ចំនួន ១,៥ លានដុល្លារ សម្រាប់សិក្សាស្រាវជ្រាវរួមទាំងបីប្រទេស ធ្វើឲ្យប្រសើរឡើងនូវផ្លូវគមនាគមន៍ ក្នុងតំបន់ត្រីកោណ។
ក្នុងពេលកន្លងមក ប្រទេសកម្ពុជាបានអនុវត្តន៍គម្រោងចំនួន ៤ រួចហើយ គឺទី១-គម្រោងសាងសង់ផ្លូវក្រួសក្រហម និងស្ពានពីអូតាឡាស់ ទៅសុភ័ក្រមិត្ត ក្នុងឃុំរំកិល ខេត្តស្ទឹងត្រែង។ គម្រោងនោះអនុវត្តន៍ដោយក្រសួងអភិវឌ្ឍន៍ជនបទ។ ទី២-គម្រោងសាងសង់អន្តេវាសិកដ្ឋាន សម្រាប់វគ្គបំពាក់បំប៉នគ្រូបង្រៀន អនុវត្តន៍ដោយក្រសួងអប់រំ យុវជននិងកីឡា។ទី៣-គម្រោងសាងសង់ផ្លូវក្រួសក្រហម ពីទីក្រុងបានលុង ទៅស្រុកលំផាត់ប្រវែង១៩ គីឡូម៉ែត្រ ទទឹង៦ម៉ែត្រ អនុវត្តន៍ដោយក្រសួងអភិវឌ្ឍន៍ជនបទ និងទី៤-គម្រោងធ្វើឲ្យប្រសើរឡើងនូវសាលាបឋមសិក្សាក្នុងខេត្តទាំងបី នៃតំបន់ត្រីកោណ មាន៥សាលា សាងសង់ដោយក្រសួងអប់រំ យុវជន និងកីឡា៕