ដោយ ៖ វិច្ឆិកា
ខេត្តបន្ទាយមានជ័យ ៖ នាវេលាម៉ោង៣និង៣០នាទីរសៀលថ្ងៃទី១២ ខែតុលា ឆ្នាំ២០១២ ត្រូវនឹងថ្ងៃទី១២រោច ខែភទ្របទ លោក ផាន់ ភីរម្យ ព្រះរាជអាជ្ញារង និងជាតំណាងលោក ផាន់ វណ្ណរ័ត្ន ព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យ រួមនិងលោកស្នងការង លោកមេបញ្ជាការ រងកងរាជអាវុធហត្ថខេត្តបន្ទាយមានជ័យ បានចូលរួមបុណ្យកាន់បិណ្ឌ ទី១២ នាំយកថវិកាចំនួន៦លានរៀល និងគ្រឿងឧបភោគ បរិភោគមួយ ទៅប្រគេនព្រះសង្ឃគង់នៅក្នុងអាស្រមធម្មបុត្រ ខ្លាកូនថ្មី ស្ថិតនៅភូមិខ្លាកូន សង្កាត់កំពង់ស្វាយ ក្រុងសិរីសោភ័ណ ដើម្បីឧទ្ទិសដល់វិញ្ញាណ ក្ខន្ធជនរួមជាតិដែលពួកបដិវត្តអាវខ្មៅសម្លាប់ ក្នុងរបបប្រល័យពូជសាសន៍៣ឆ្នាំ៨ខែ២០ថ្ងៃ។
លោក ផាន់ ភីរម្យ បានមានប្រសាសន៍ថា គ្រាដែលប្រជនកម្ពុជា ដែលជាអ្នកជឿជាក់លើព្រះពុទ្ធសាសនា នាំគ្នាប្រារព្ធធ្វើបុណ្យកាន់បិណ្ឌដែលមានរយៈពេល ១៥ថ្ងៃនៅថ្ងៃនេះ ស្ថាប័នអយ្យការនៃសាលាដំបូងខេត្តបន្ទាយមានជ័យ បានមូលមតិគ្នា ប្រារព្ធពិធីកាន់បិណ្ឌទី១២នេះឡើង ជាមួយគ្នានោះក៏មានការចូលរួមពីសំណាក់កងកម្លាំង នគរបាលខេត្ត និងកងកម្លាំងរាជអាវុធហត្ថខេត្ត ដើម្បីឧទ្ទិសកុសលជូនដល់វិញ្ញាណក្ខន្ធជន រួមជាតិ ដែលបាត់បង់ជីវិតក្នុរបបប្រល័យពូជន៍សាសន៍និងឧទ្ទិសនជូនវិញ្ញាណក្ខន្ធយុទ្ធ ជន យុទ្ធនារី ដែលបានពលីជីវិតក្នុងបុព្វហេតុជាតិមាតុភូមិ ក៏ដូចជាឧទ្ទិសជូនជីដូនជីតា ញាតិកា៧សន្តាន ដែលបានចែកឋានទៅកាន់លោកខាងមុខ ឲ្យមកទទួលយកកុសលផលបុណ្យដែលកូនចៅឧទ្ទិស ជូននាពេលនេះ។
លោកព្ររាជអាជ្ញារងបានបន្តទៀតថា បងប្អូនដែលនាំគ្នាប្រារព្ធធ្វើបុណ្យកាន់បិណ្ឌ និងភ្ជុំបិណ្ឌនេះឡើងរហូតមកដល់ពេលនេះគឺបានគុណបុណ្យថ្ងៃ៧មករា ឆ្នាំ១៩៧៩ ដែលបានរំដោះប្រជាពលរដ្ឋរួចផុតពីបនប្រល័យពូជសាសន៍ ដែលបានកាប់ សម្លាប់ជាតិឯងយ៉ាងសាហាវយង់ឃ្នង ហើយវត្តអារាមជាទីសក្ការៈបូជារបស់ប្រជាជនកម្ពុជា ត្រូវពួកអាវខ្មៅប៉ុលពត បំផ្លិចបំផ្លាញចោលស្ទើរតែទាំងស្រុង វិស័យព្រះពុទ្ធសាសនាត្រូវពួកបនប្រល័យពូជសាសន៍បំបាត់ ចោល ព្រះសង្ឃត្រូវពួកវាកាប់សម្លាប់ និងធ្វើទារុណកម្មយ៉ាងព្រៃផ្សៃ ហើយឥឡូវនេះដោយគុណសម្តេចទាំងបី និងគណបក្សប្រជាជនកម្ពុជា វិស័យពុទ្ធចក្រនិងអាណាចក្រ និងវិស័យផ្សេងៗទៀតកំពុងរីកចំរើនគ្រប់ ។ រហូតដល់ថ្ងៃនេះ បងប្អូនប្រជាជនទូទាំងប្រទេសបាននាំគ្នាធ្វើបុណ្យតាមប្រពៃណី និងជំនឿព្រះពុទ្ធសាសនាដែលជាសាសនារបស់រដ្ឋ ។
គួរបញ្ជាក់ថា ដោយពិនិត្យឃើញពីការលំបាករបស់លោកយាយ លោកតា និងពុទ្ធបរិស័ទ ចំណុះជើងវត្តអាស្រមធម្មបុត្រខ្លាកូនថ្មី ក្នុងការធ្វើដំណើរទៅប្រារព្ធពិធីផ្សេងៗនៅទីនោះ លោក ផាន់ វណ្ណរ័ត្ន ព្រះរាជអាជ្ញាអមសាលាដំបូងខេត្តបន្ទាយមានជ័យ បានកសាងផ្លូវចាក់បេតុង១ខ្សែប្រវែង៤០០ម៉ែត្រ ចំណាយថវិការបស់លោក ផ្ទាល់ចំនួន២៥លានរៀល ក្នុងនោះលោកបានគ្រោងកសាងសាលាឆាន់១ខ្នងបន្ថែមទៀតនៅបរិវេណអាស្រមនោះផងដែរ ៕