កំពង់ចាម: សម្តេចតេជោហ៊ុន សែន បានអញ្ជើញជាអធិបតីភាព ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋ នៅវិទ្យាល័យហ៊ុន សែន ស្ទឹងត្រង់ ភូមិ/ឃុំព្រែកកក់ ស្រុកស្ទឹងត្រង់ ខេត្តកំពង់ចាម ចំនួន ១.០៥៧ គ្រួសារនៅព្រឹកថ្ងៃទី១៣ ខែតុលា ឆ្នាំ២០១២។ សម្តេចតេជោហ៊ុន សែន បានមានប្រសាសន៍បញ្ជាក់ជាថ្មីម្តងទៀតថា រាជរដ្ឋាភិបាលកម្ពុជាបានធ្វើការតម្លើងប្រាក់បៀវត្សមន្ត្រីរាជការ ក្នុង មួយឆ្នាំចំនួន ២០% ចាប់តាំងពីឆ្នាំ២០០៨ ជាបន្តបន្ទាប់មក។ សម្តេចតេជោនាយករដ្ឋមន្ត្រី បានមានប្រសាសន៍យ៉ាងនេះ គឺជាការឆ្លើយតបទៅនឹងកណបក្សប្រឆាំងដែលបានលើកឡើងថា រាជរដ្ឋាភិបាលពុំបានតម្លើងប្រាក់ខែជូនមន្ត្រីរាជការ។
សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់យ៉ាងថា "រាជរដ្ឋាភិបាលសព្វថ្ងៃតម្លើង ២០% ក្នុងមួយឆ្នាំស្តាប់ឲ្យបានអីចឹងចាប់តាំាំងពីឆ្នាំ២០០៨ មកឡើងរហូត ២០% ៗរហូតមកដល់ពេលនេះប៉ុន្មាន ១០០ ភាគរយទៅហើយឡើងបៀវត្សនោះប៉ុន្តែឮគេនិយាយគ្នាថា លោកហ៊ុន សែន មិនព្រមឡើងប្រាក់ខែទេ គេឡើងតើតែគេឡើងមានរបៀប វាមិនដែលអាណាជណ្តើរ ៩ កាំហើយឡើងទៅដល់កាំទី ៩ តែម្តងនោះទេវា មានអា កាំទី១ កាំទី២ កាំទី៣ ទំរាំឡើងដល់កាំទី៩"។ សម្តេចតេជោបានមានប្រសាសន៍បន្តថា នៅឆ្នាំក្រោយ គឺឆ្នាំ២០១៣ ប្រាក់ខែមន្ត្រីរាជការឡើងបាន ២០% ទៀតហើយ។
សម្តេចតាជោនាយករដ្ឋមន្ត្រីបានមានប្រសាសន៍បន្តថា គណបក្សប្រជាជនកម្ពុជាក៏កំពុងរៀបចំអំពីដែលគេហៅថា "គោលនយោបាយស្តីអំពីបៀវត្សសម្រាប់អាណត្តិ២០១៣ ដល់ ២០១៨"។
សូមបញ្ជាក់ថា លោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ កាលពីថ្ងៃទី៥ ខែតុលា ឆ្នាំ២០១២ ទិវាគ្រូបង្រៀនពិភពលោកបានធ្វើបាតុកម្មនៅទីលានប្រជាធិបតេយ្យ បាននាំគ្នាំធ្វើការទាមទារទៅប្រមុខដឹកនាំរាជរដ្ឋាភិបាលកម្ពុជា តម្លើងប្រាក់បៀវត្សដល់គ្រូបង្រៀនឲ្យទទួលបានប្រាក់ទាបបំផុតនូវប្រាក់ខែចំនួន ១ លានរៀលក្នុង១ខែ។ ចំពោះការទាមទារនៅដែរគណបក្សប្រឆាំង ក៏បានធ្វើការទាមទារទៅរាជរដ្ឋាភិបាលឲ្យមានការតម្លើងប្រាក់ខែ មន្ត្រីរាជការបាន ១ លានរៀលផងដែរ៕
