កែប ៖ នៅព្រឹកថ្ងៃទី១៣ ខែតុលា ឆ្នាំ២០១២នេះ ក្រុមយុវជនស្ម័គ្រចិត្តវាស់វែងដីធ្លីជូនប្រជាពលរដ្ឋនៅក្នុងមូលដ្ឋានខេត្តកែប នឹងត្រូវសំរាកមួយរយៈដើម្បីទៅចូលរួមក្នុងពិធីបុណ្យភ្ជុំបិណ្ឌ នៅតាមលំនៅដ្ឋានរៀងៗខ្លួន បន្ទាប់ពីគេបានបំពេញបេសកកម្មអស់ពេលជាច្រើនខែមកហើយនោះ។
ក្នុងពេលជូនដំណើរឡើងរថយន្តនាឱកាសនោះ លោកកែន សត្ថា អភិបាលខេត្តកែប បានមានប្រសាសន៍ផ្តាំផ្ញើនិងកោតសរសើរ ព្រមទាំងថ្លែងអំណរគុណរបស់វីរភាពដ៏ឧត្តុង្គឧត្តមរបស់ក្មួយៗយុវជនទាំង២ក្រុមគឺក្រុមទី៩៥និង៩៦ដែលមានចំនួន៣២នាក់ហើយបានលះបង់ពេលវេលាសិក្សា ឃ្លាតឆ្ងាយពីក្រុមគ្រួសារ បងប្អូន ញាតិសន្តាន ពិសេសឪពុក ម្តាយជាទីស្រឡាញ់ ដើម្បីមកបំពេញបេសកកម្មជាប្រវត្តិសាស្ត្រក្នុងការអនុវត្តន៍គោលនយោបាយចាស់ សកម្មភាពថី្ម ចុះវាស់វែងដីធ្លីជូនប្រជាពលរដ្ឋនៅលើទឹកដីខេត្តកែប ដែលរហូតមកដល់ពេលនេះសម្រេចបានលទ្ធផលយ៉ាងល្អប្រសើរ។
ទន្ទឹមនេះដែរ លោកក៏សូមឲ្យក្មួយៗទាំងអស់ ត្រូវយកចិត្តទុកដាក់អនុវត្តឲ្យបានម៉ឺងម៉ាត់
តាមបទបញ្ជាលេខ០១ របស់សម្តេចតេជោ ហ៊ុន សែន ដោយកុំទោទន់ ឬលំអៀងទៅតាមមហិច្ឆតា លោភលន់ហួសប្រមាណ របស់បុគ្គលមួយក្តាប់តូច ដែលបានវាតទីយកដីព្រៃភ្នំនោះ។
ក្នុងឱកាសដ៏វិសេសវិសាលនេះ លោកកែន សត្ថា អភិបាលខេត្តកែប ក៏បានជូនថវិកាដល់យុវជនស្ម័គ្រចិត្តទាំង២ក្រុមដែលមានចំនួន៣២នាក់ នូវថវិកាម្នាក់ៗចំនួន១០០.០០០រៀល(ដប់ម៉ឺនរៀល)សំរាប់ជាសោហ៊ុយធ្វើដំណើរទៅកាន់លំនៅដ្ឋាន នាពិធីបុណ្យភ្ជុំបិណ្ឌ ដែលប្រជាពលរដ្ឋខ្មែរ តែងតែប្រារព្ធធ្វើជារៀងរាល់ឆ្នាំ តាមទំនៀមទំលាប់ ប្រពៃណី ព្រះពុទ្ធសាសនាដ៏រុងរឿង៕