ភ្នំពេញ: ការសោយទិវង្គតរបស់សម្តេចឪ កាលពីម៉ោង ១ និង ២០ នាទី ព្រឹកថ្ងៃទី១៥ ខែតុលា ឆ្នាំ២០១២ មិនត្រឹមតែបានធ្វើអោយប្រេះស្រាំដល់បេះដូងប្រជាជនកម្ពុជា ដែលគោរព និងស្រឡាញ់ព្រះអង្គនោះទេ ប៉ុន្តែសារព័ត៌មានពិភពលោក ក៏បានចាត់ទុកថា នេះជាដំណឹងដ៏សំខាន់បំផុតមួយ ហើយធ្វើការផ្សព្វផ្សាយយ៉ាងទូលំទូលាយ។
ទាំងនៅប្រទេសចិន វៀតណាម ជប៉ុន បារាំង អង់គ្លេស និងអាមេរិក ជាដើម សារព័ត៌មានល្បីៗ និងធំៗ បានធ្វើការផ្សាយព័ត៌មានអំពីការសោយទិវង្គតរបស់សម្តេចឪ នរោត្តម សីហនុ។
ទីភ្នាក់ងារព័ត៌មានធំៗ ដូចជា ស៊ីនហួររបស់ចិន អាអេហ្វប៉េរបស់បារាំង អាសូសីអេធីត របស់អាមេរិក ក្យូដូរបស់ជប៉ុន និងសារព័ត៌មាន ប៊ីប៊ីស៊ី របស់អង់គ្លេស សុទ្ធតែ បានប្រណាំងគ្នាធ្វើសេចក្តីរាយការណ៍ព័ត៌មាន អំពីការសោយទិវង្គត របស់សម្តេចឪ ដែលបានធ្វើអោយមានការភ្ញាក់ផ្អើល ទូទាំងពិភពលោក។
សារព័ត៌មានទាំងនោះ បានធ្វើការផ្សាយនៅលើទំព័រមុខរបស់ពួកគេផងដែរ។ សេចក្តីរាយការណ៍ កើតមានចាប់ពីការផ្តល់ដំណឹងអំពីការចូលទិវង្គត ការនិយាយអំពីប្រវត្តិរបស់ព្រះអង្គ និងឈានដល់ការវិភាគទៅលើភាពពាក់ព័ន្ធនៃនយោបាយ និងសេដ្ឋកិច្ចដែលអាចកើតមានពីការសោយទិវង្គតរបស់ព្រះករុណា សម្តេចព្រះ នរោត្តម សីហនុ របស់កម្ពុជា។
ចំណែកប្រព័ន្ធផ្សព្វផ្សាយជាតិ ពិសេសទូរទស្សន៍ជាតិកម្ពុជា ទទក នៅថ្ងៃទី១៥ ខែតុលា ឆ្នាំ២០១២ បានចាក់ផ្សាយនូវឯកសារវិដេអូ អមដោយបទភ្លៀង ដោយបង្ហាញពីការរីកចម្រើនរបស់ប្រទេសកម្ពុជា លើវិស័យឧស្សាហកម្ម ក្នុងសម័យសង្គមរាស្ត្រនិយម ពិសេសលើការផលិតស៊ីម៉ង់ត៍ និងរោងចក្រកែច្នៃ ជ័រកៅស៊ូ ជាដើម៕