ភ្នំពេញ: ការសោយទីវង្គត់របស់សម្តេចឪនៅក្នុងព្រះជន្ម៩០ព្រះវស្សាជាដំណឹងយ៉ាងក្រៀមក្រំបំផុតសម្រាប់ ប្រជាជនកម្ពុជានៅក្នុងប្រវត្តិសាស្ត្រកន្លះសតវត្សរ៍មកនេះ។ ជាអតីតព្រះមហាក្សត្រដែលធ្វើអោយប្រទេស កម្ពុជាមានការរីកចម្រើននៅក្នុងសង្គមរាស្ត្រនិយម ជាបិតាឯករាជ្យ សម្តេចឪបានទទួលការគោរពបំផុតពីប្រជារាស្ត្រកម្ពុជាជាង១៤លាននាក់។
ភ្លាមៗបន្ទាប់ពីដំណឹងនៃការសោយទីវង្គត់របស់ព្រះអង្គបានផ្សព្វផ្សាយចេញពីក្រុងប៉េកាំងតាំងពីព្រឹកព្រលឹមនោះ ប្រជាជនកម្ពុជាបាននាំគ្នាបញ្ចេញទឹកចិត្តស្រឡាញ់ សោកស្តាយ និងក្រៀមក្រំក្នុងបេះដូងយ៉ាងលឿនបំផុតតាមសារព័ត៌មានសង្គមដូចជាFacebookជាដើម។ នេះដោយសារតែការរន្ធត់ចិត្តខ្លាំងដោយសារតែកម្ពុជាបាត់បង់ព្រះវរក្សត្រនិងបិតាឯករាជ្យជាតិ។
ព្រះមហាក្សត្រនិងសម្តេចនាយករដ្ឋមន្ត្រីបានយាងនិងចាកចេញទៅទទួលព្រះរាជសពសម្តេចឪ កាលពីព្រឹកថ្ងៃច័ន្ទ ខណៈគណរដ្ឋមន្ត្រីបានប្រកាសអំពីការរៀបចំរាជពិធីបុណ្យព្រះរាជសព។ ចំណែកទង់ជាតិប្រទេសកម្ពុជាក៏បានបង្ហូតពាក់កណ្តាលដងភ្លាមៗដើម្បីជាការកាន់ទុក្ខ។ មនុស្សគ្រប់គ្នានៅកម្ពុជាសុទ្ធតែខ្វល់ខ្វាយនិងឈឺចាប់បំផុតដោយសារតែការបាត់បង់គ្មានវិលវិញនូវក្សត្រមួយអង្គដែលពួកគេតែងតែគោរពនិងស្រឡាញ់បំផុត។
សម្តេចឪបានទទួលការគោរពខ្លាំងដោយសារតែសម័យសង្គមរាស្ត្រនិយម ប្រទេសកម្ពុជាមានការរីកចម្រើនគួរអោយកត់សម្គាល់ហើយព្រះអង្គបានដណ្តើមឯករាជ្យភាពពីប្រទេសបារាំង។ បន្ថែមលើនេះ ព្រះមហាវរក្សត្ររបស់យើងនិងសម្តេច ហ៊ុន សែនបានរួមគ្នាកសាងសន្តិភាពដែលនាំមកនូវភាពរីកចម្រើននិងការអភិវឌ្ឍប្រទេសដូចសព្វថ្ងៃ។ គុណបំណាច់របស់ព្រះអង្គនិងសម្តេច ហ៊ុន សែន ក្នុងការកសាងព្រះរាជាណាចក្រកម្ពុជាលើកទីពីរនេះពិតជាមានតម្លៃមិនអាចកាត់ថ្លៃបានឡើយ ហើយយើងទាំងអស់គ្នាមានអារម្មណ៍ជំពាក់គុណរបស់ព្រះអង្គក៏ដូចជាសម្តេចហ៊ុន សែន ផងដែរ។
យើងគិតថាបើគ្មានការខិតខំអស់ពីកម្លាំងកាយពលនិងព្រះរាជបញ្ញាញាណរបស់សម្តេចឪ និងសម្តេច ហ៊ុន សែន នៅក្នុងទសវត្សរ៍ឆ្នាំ១៩៩០ទេ កម្ពុជានឹងមិនអាចមានសន្តិភាពព្រមទាំងការរីកចម្រើនដល់សព្វថ្ងៃឡើយ។
ទោះបីជាព្រះអង្គបានលាចាកយើងទាំងអស់គ្នាគ្មានថ្ងៃត្រឡប់វិញក្តី ប៉ុន្តែព្រះរាជកិត្តិនាមរបស់ព្រះអង្គនិងស្នាដៃរបស់ព្រះអង្គដែលបានសម្រេចជូនជាតិនៅតែក្រអូបនិងដិតជាប់បេះដូងយើងទាំងអស់គ្នា។ ព្រះអង្គនឹងត្រូវបានចងចាំថាជាព្រះមហាវរក្សត្រនិងបិតាឯករាជ្យដែលបានកម្ពុជាបាន ទទួលពីបារាំងនៅក្នុងឆ្នាំ១៩៥៣។
យើងទាំងអស់គ្នានៅតែចងចាំនូវអ្វីៗដែលព្រះអង្គបានកសាងចំពោះជាតិ។ ព្រះរាជកិត្តិនាមរបស់ព្រះអង្គ នឹងត្រូវបានចារិកនៅក្នុងប្រវត្តិសាស្ត្រកម្ពុជាហើយជនកម្ពុជាគ្រប់ជំនាន់នឹងនៅតែសម្តែងការគោរពចំពោះព្រះអង្គ។
សូមព្រះមហាវរក្សត្រយាងទៅកាន់សុខគតិភពជារៀងរហូត៕