ព្រះរាជសារនោះ មាន ៣ ចំណុច ដែលសម្តេចឪ នរោត្តម សីហនុ មានព្រះរាជសំណេរខ្លីៗ។ ទី១ គឺព្រះអង្គបញ្ជាក់ពីការលុបចោលព្រះរាជបណ្តាំមុនៗ ដែលព្រះអង្គធ្លាប់ប្រកាសថា មិនអោយគេបូជាព្រះសពរបស់ព្រះអង្គ។ ទី២ នៅពេលដែលព្រះអង្គ សោយទិវង្គត ព្រះអង្គផ្តាំអោយមានការរៀបចំពិធីបូជាព្រះសពរបស់ព្រះអង្គ នៅលើវាលមេន ទៅតាមប្រពៃណីសាសនាខ្មែរ និងទី៣ មួយថ្ងៃបន្ទាប់ពីពិធីបូជាព្រះសព ព្រះអង្គបានផ្តាំផ្ញើថា អដ្ឋិធាតុរបស់ព្រះអង្គ នឹងត្រូវលាងសំអាត ហើយដាក់នៅក្នុងកោដ្ឋមួយ ជាកោដ្ឋធ្វើអំពីមាសក៏បាន ឬកោដ្ឋធម្មតាក៏បាន។
ព្រះរាជសាររបស់ព្រះករុណា សម្តេចព្រះ នរោត្តម សីហនុ កាលណោះ បានបន្តថា កោដ្ឋនោះ ត្រូវយកទៅតំកល់នៅក្នុងចេតិយគន្ធបុប្ជា នៅក្នុងព្រះវិហារព្រះកែវមរកត ក្នុងព្រះបរមរាជវាំង។
សម្តេចព្រះ នរោត្តម សីហនុ ក៏បានបញ្ជាក់ក្នុងព្រះរាជសារដដែលថា នៅពេលដែលសម្តេចម៉ែ សោយទិវង្គត ព្រះអង្គក៏សូមអោយគេរៀបចំធ្វើដូចករណីរបស់ព្រះអង្គដែរ។
រាជរដ្ឋាភិបាលកម្ពុជា ដឹកនាំដោយសម្តេច ហ៊ុន សែន បានរៀបចំព្រះរាជពិធីដ៏វិសេសវិសាល ថ្វាយសម្តេចឪ នរោត្តម សីហនុ កាលពីថ្ងៃទី៣០ ខែតុលា ឆ្នាំ២០១១ នៅមុខព្រះបរមរាជវាំង ដើម្បីឧទ្ទិសដល់ព្រះរាជពិធីរម្លឹកខួប ២០ ឆ្នាំ នៃការយាងមាតុភូមិនិវត្តមកកម្ពុជា និងព្រះរាជពិធីចម្រើនព្រះជន្ម គម្រប់ ៨៩ យាងចូល ៩០ ព្រះវស្សា៕