Monday, October 15, 2012
ព្រះមហាក្សត្រ នរោត្តម សីហមុនី និង សម្តេចតេជោ ហ៊ុន សែន យាងនិងចាកចេញពី កម្ពុជា ទៅកាន់ ទីក្រុងប៉េកាំង
ភ្នំពេញ: ព្រះមហាក្សត្រ នរោត្តម សីហមុនី និង សម្តេចតេជោ ហ៊ុន សែន យាងនិងចាកចេញពី កម្ពុជា ទៅកាន់ ទីក្រុងប៉េកាំង នៅព្រឹកថ្ងៃទី១៥ ខែតុលា ឆ្នាំ២០១២ ដើម្បីទទួលយក ព្រះរាជសព របស់ អតីតព្រះមហាក្សត្រកម្ពុជា សម្តេចព្រះ នរោត្តម សីហនុ ដែលបានសោយទីវង្គត់ មកកាន់កម្ពុជាវិញ។
យោង ព្រះរាជបន្ទូល របស់ព្រះអង្គម្ចាស់ ស៊ីសុវត្ថិ ធម្មិកោ បានឲ្យCEN ដឹងថា អតីតព្រះមហាក្សត្រកម្ពុជា សម្តេចព្រះ នរោត្តម សីហនុ បានសោយទីវង្គត់ នៅក្នុងព្រះជន្មាយុ ៩០ ព្រះវស្សា យាងចូល ៩១ ព្រះវស្សា កាលពីយប់រំលងអធ្រាត្រ ឈានចូលថ្ងៃទី១៥ ខែតុលា ឆ្នាំ២០១២ នៅក្នុងទីក្រុងប៉េកាំង ប្រទេសចិន ដោយព្រះរោគ គាំងបេះដូង។
ព្រះអង្គម្ចាស់ ស៊ីសុវត្ថិ ធម្មិកោ ទីប្រឹក្សាផ្ទាល់របស់សម្តេចឪ នរោត្តម សីហនុ បានមានព្រះបន្ទូល ប្រាប់ CEN នៅព្រឹកព្រលឹមស្រ៊ាង ថ្ងៃទី១៥ ខែតុលា ឆ្នាំ២០១២ថា ព្រះករុណា នរោត្តម សីហនុ បានសោយទីវង្គត់ ដោយសារគាំងបេះដូង កាលពីវេលាម៉ោង ១ និង ២៥ នាទី ម៉ោងនៅប្រទេសកម្ពុជា នាយប់ថ្ងៃទី១៥ ខែតុលា ឆ្នាំ២០១២។
ព្រះអង្គម្ចាស់ ស៊ីសុវត្ថិ ធម្មិកោ បានមានព្រះបន្ទូលថា "សម្តេចឪ បានសោយទវង្គត់ហើយ។ នេះជាការខាតបង់មួយដ៏ធំសម្រាប់ប្រទេសកម្ពុជា"។
ព្រះករុណាសម្តេចព្រះ នរោត្តម សីហមុនី នឹងយាងទៅកាន់ទីក្រុងប៉េកាំង ដើម្បីទទួលសពព្រះរាជបិតារបស់ទ្រង់។
ទីភ្នាក់ងារ ស៊ីនហួរ របស់ចិន ក៏ផ្សព្វផ្សាយអំពីដំណឹងសោយទីវង្គត់របស់ព្រះបិតាជាតិកម្ពុជា សម្តេចព្រះ នរោត្តម សីហនុ ផងដែរ។ ព្រះករុណាព្រះមហាក្សត្រ សម្តេចព្រះ នរោត្តម សីហនុ បានយាងទៅសម្រាកព្យាបាលព្រះរោគ នៅក្នុងប្រទេសចិន ជាយូរមកហើយ៕