នៅសល់តែ ៣០ថ្ងៃទៀតទេ សម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោក ដែលមានប្រទេសចូលរួមចំនួន ១៩០ប្រទេស នឹងប្រព្រឹត្តទៅនៅព្រះរាជាណាចក្រកម្ពុជា។ នេះជាមោទនភាពជាតិខ្មែរ ដែលកម្ពុជាជាម្ចាស់ផ្ទះ និងជាផ្លែផ្កា ក្រោមការដឹកនាំដ៏ឧត្តុង្គឧត្តមរបស់សម្តេចអគ្គមហាសេនាបតីតេជោ ហ៊ុន សែន។
ក្នុងនាមរាជរដ្ឋាភិបាល និងប្រជាជនកម្ពុជា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានគណៈកម្មាធិការបេតិកភ័ណ្ឌពិភពលោក បានទៅចូលរួមប្រជុំផ្តល់ព័ត៌មាននៅទីស្នាក់ការកណ្តាល នាទីក្រុងប៉ារីស ប្រទេសបារាំង ពីថ្ងៃទី៣ ដល់ថ្ងៃទី៩ ខែឧសភា ឆ្នាំ២០១៣។ ការដឹកនាំប្រជុំរបស់ឯកឧត្តមបណ្ឌិតសភាចារ្យ សុខ អាន ក្នុងនាមជាប្រធានបេតិកភ័ណ្ឌពិភពលោក ទទួលបានជោគជ័យដោយអ្នកដឹកនាំកំពូលៗនៃស្ថាប័ន UNESCO បានកោតសរសើរ និងជឿជាក់ថា កម្ពុជាបានត្រៀមខ្លួនរួចជាស្រេចហើយ ដើម្បីទទួលព្រឹត្តិការណ៍ជាសកល និងលើកទី១ នៅកម្ពុជា និងកម្ពុជាជាប្រទេសទី៣ ក្នុងទ្វីបអាស៊ី ដែលមានឱកាសធ្វើជាម្ចាស់ផ្ទះ។
មួយសប្តាហ៍បន្ទាប់ពីទស្សនកិច្ចរបស់ឯកឧត្តមសភាចារ្យ សុខ អាន នៅទីក្រុងប៉ារីស ដើម្បីបញ្ជាក់ពីវឌ្ឍនភាពនៃការត្រៀមរៀបចំសម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោក ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានអនុគណៈកម្មការព័ត៌មាន និងសារគមនាគមន៍ បានដឹកនាំប្រជុំ នារសៀលថ្ងៃទី១៦ ខែឧសភា ឆ្នាំ២០១៣ នៅទីស្តីការគណៈរដ្ឋមន្ត្រី។
ប្រធាន និងអនុប្រធានលេខាធិការដ្ឋាន និងអនុគណៈកម្មការទាំង៥ បានចូលរួមប្រជុំយ៉ាងផុលផុស ដើម្បីក្តាប់ការងារតាមផ្នែករៀងៗខ្លួន និងសហការគ្នាបានយ៉ាងល្អ ដើម្បីធានាធ្វើយ៉ាងណាឲ្យសម័យប្រជុំពេញអង្គលើកទី៣៧ ប្រព្រឹត្តទៅប្រកបដោយជោគជ័យ ដែលការនេះ វាគឺជាមោទនភាពថ្មីមួយទៀតរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន និងក៏ជាមោទនភាពរបស់ប្រជាជនកម្ពុជាទាំងអស់។
ឯកឧត្តម សួស យ៉ារ៉ា អនុរដ្ឋលេខាធិការទីស្តីការគណៈរដ្ឋមន្ត្រី និងជាប្រធានលេខាធិការដ្ឋានរៀបចំសម័យប្រជុំពេញអង្គលើកទី៣៧ បានជម្រាបជូនអង្គប្រជុំថា គណៈប្រតិភូដែលដឹកនាំដោយឯកឧត្តមបណ្ឌិតសភាចារ្យ សុខ អាន ប្រធានគណៈកម្មាធិការបេតិកភ័ណ្ឌពិភពលោក នៅទីក្រុងប៉ារីស បានជម្រាបជូនព័ត៌មានទូទៅ ជូនសមាជិកអង្គប្រជុំចំនួនជាង២០០នាក់ មកពី៨០ប្រទេស ហើយសមាជិកចូលរួមដែលមកពីទ្វីបទាំង៥ បានស្វាគមន៍យ៉ាងកក់ក្តៅ ចំពោះអ្វីដែលកម្ពុជាបាន និងកំពុងត្រៀមរៀបចំ ដើម្បីបដិសណ្ឋារកិច្ចគណៈប្រតិភូទាំងអស់ ចំនួនប្រហែលពី ៨០០ ទៅ១០០០នាក់។
រហូតមកដល់ពេលនេះ លេខាធិការដ្ឋានបានទទួលការចុះបញ្ជីពីប្រទេសចូលរួមចំនួនជាង ៩០ប្រទេស និងគណៈប្រតិភូចំនួនជាង ៥០០រួចមកហើយ។
ក្រៅពីព័ត៌មានវឌ្ឍនភាពនៃការត្រៀមរៀបចំ ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានអនុគណៈកម្មការព័ត៌មាន និងសារគមនាគមន៍ បានរំលឹក និងបញ្ជាក់ជូនអង្គប្រជុំ នូវអ្វីដែលបានចាត់ចែងរួចហើយ រួមមានជាអាទិ៍៖
-ពិធីបើកសម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោក នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់បំផុតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយពិធីបើកនេះ នឹងមានពិធីអបអរសាទរយ៉ាងឱឡារិកតាមរយៈការសំដែងសិល្បៈ នៅសាលធំនៃវិមានសន្តិភាព។
-ពិធីបិទសម័យប្រជុំពេញអង្គលើកទី៣៧ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅទីលានជល់ដំរី ក្រុងសៀមរាប បន្ទាប់ពីភ្ញៀវបរទេសមកពីប្រទេស ១៩០ប្រទេស នឹងមានឱកាសរបកគំហើញរមណីយដ្ឋានអង្គរ ដែលជាបេតិកភ័ណ្ឌពិភពលោកតាំងពីឆ្នាំ១៩៩២។
-យុវជនស្ម័គ្រចិត្ត ដែលនឹងត្រូវចូលរួមរៀបចំសម័យប្រជុំពេញអង្គលើកទី៣៧ នឹងត្រូវបណ្តុះបណ្តាលនៅថ្ងៃទី៧ ដល់ថ្ងៃទី៩ ខែមិថុនា ឆ្នាំ២០១៣ ដើម្បីឲ្យយុវជនយល់ច្បាស់ពីការចូលរួមរៀនសូត្រ ហើយយុវជនអន្តរជាតិមកពី ១៤ប្រទេស និងយុវជនសង្កេតការណ៍មកពី២១ប្រទេស នឹងចូលរួមវេទិកាយុវជនអន្តរជាតិពីថ្ងៃទី៨ ដល់ថ្ងៃទី១៦ ខែមិថុនា ឆ្នាំ២០១៣ នៅសៀមរាប ក្នុងគោលបំណងថាតើយុវជនរៀនសូត្រអ្វីខ្លះ ពីមនុស្សជំនាន់មុន លើផ្នែកបេតិកភ័ណ្ឌ ដើម្បីយុវជនជំនាន់ក្រោយបន្តវេន។
ឯកឧត្តម ស្វាយ ស៊ីថា បានបិទអង្គប្រជុំដោយកំណត់ថា គណៈកម្មាធិការរៀបចំសម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោក នឹងធ្វើពិធីសាកល្បងនាថ្ងៃទី១០ ខែមិថុនា ឆ្នាំ២០១៣៕