សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១៧ ខែឧសភា ឆ្នាំ២០១៣ ក្នុងឱកាសទទួលជួបសវនាការជាមួយ ឯកឧត្តម ផាន គ័ងស៊ា ឯកអគ្គរដ្ឋទូតចិនប្រចាំនៅកម្ពុជា ដែលត្រូវបញ្ចប់អាណត្តិ បានមានប្រសាសន៍វាយតម្លៃខ្ពស់នូវការរីកចម្រើនលើផ្នែក ទំនាក់ទំនង និងសហប្រតិបត្តិការរវាងកម្ពុជានិងចិន។
ឯកឧត្តម អ៊ាង សុផ្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា នៅក្នុងជំនួបដែលប្រព្រឹត្តទៅនៅវិមានសន្តិភាព ឯកឧត្តម ផាន គ័ងស៊ា (Pan Guangxue ) បានជម្រាបជូនសម្តេចតេជោថា នៅក្នុងអំឡុងពេល៣ឆ្នាំ នៃបេសកកម្មការទូតនៅកម្ពុជា ទំនាក់ទំនងនិងកិច្ចសហប្រតិបត្តិការវាងកម្ពុជានិងចិន បានរីកចំរើន ហើយឯកឧត្តម ផាន គ័ងស៊ា បានសន្យាថា នឹងបន្តជំរុញទំនាក់ទំនងជាប្រពៃណីនេះបន្តទៀត។
ឯកឧត្តមឯកអគ្គរដ្ឋទូតចិន បានមានប្រសាសន៍ឲ្យដឹងទៀតថា ដោយសារឆ្នាំនេះជាឆ្នាំខួបទី៥៥ឆ្នាំ នៃទំនាក់ទំនងរវាងកម្ពុជានិងចិន ក្នុងនោះនៅថ្ងៃទី១៩ ខែមិថុនា ឆ្នាំ២០១៣ ខាងមុខនេះ ស្ថានទូតនឹងរៀបចំ អបអរសាទរខួបនេះ នឹងមាននាំមកនូវសិល្បៈ សៀក របាំផ្សេងៗ ពីប្រទេសចិនមកសម្ដែង។ នៅខែកញ្ញាខាងមុខ នាវាចិនមួយគ្រឿងនឹងធ្វើដំណើរមកកម្ពុជា ដើម្បីផ្តល់សេវាសុខាភិបាល ព្រមទាំងមានការបង្ហាញ ពិព័រណ៍ខ្សែភាពយន្តចិន ផ្នែករូបភាពរបស់ចិនផងដែរ។
សម្តេចតេជោនាយករដ្ឋមន្ត្រីបានថ្លែងអំណគុណដល់រដ្ឋាភិបាល និងប្រជាជនចិន ដែលគាំទ្រដល់ការអភិវឌ្ឍនៅក្នុងប្រទេសកម្ពុជា ហើយក៏បានសម្ដែងនូវការអរគុណចំពោះឯកឧត្តម ផាន គ័ងស៊ា ដែលបានខិតខំប្រឹងប្រែង និងបានចូលរួមក្នុងពិធីបើកការដ្ឋានជាច្រើនក្នុងការសាងសង់ និងសម្ពោធសមិទ្ធផលនានា៕