យោងតាមការស្ទង់មតិរបស់វិទ្យាស្ថានសាធារណរដ្ឋអន្តរជាតិ (IRI) របស់សហរដ្ឋអាមេរិក ចំពោះប្រជាប្រិយភាពរបស់សម្ដេចតេជោនាយករដ្ឋមន្ត្រី ដែលបានប្រកាសផ្សាយកាលពីចុងឆ្នាំ២០១១ បានឲ្យដឹងថា ប្រជាប្រិយភាពរបស់សម្តេចអគ្គមហាសេនាបតីតេ ហ៊ុន សែន ចាប់តាំងពីឆ្នាំ២០០៦ មកដល់ ឆ្នាំ២០១១ កើនឡើងដល់ ៨៧% ដែលត្រូវបានសម្តេចតេជោចាត់ទុកថា ជាមូលហេតុដែលគណបក្សប្រជាជនកម្ពុជា ដាក់សម្តេចជាបេក្ខជននាយករដ្ឋមន្ត្រី។
ក្នុងពិធីសម្ពោធសាលាពុទ្ធិកអនុវិទ្យាល័យ ហ៊ុន សែន សិរីសារពេជ្រ និងសមិទ្ធផលនានានៅក្នុងបរិវេណវត្ដសិរីសារពេជ្រ ដែលមានតម្លៃច្រើនម៉ឺនដុល្លារអាមេរិក ស្ថិតនៅក្នុងឃុំល្វា ស្រុកព្រះស្ដេច ខេត្ដព្រៃវែង សម្តេចអគ្គមហាសេនាបតីតេជោ ហ៊ុន សែន បានលើកយករបាយការណ៍ IRI របស់សហរដ្ឋអាមេរិកមកបង្ហាញដោយមានប្រសាសន៍ឲ្យដឹងថា ការទុកចិត្តចំពោះនាយករដ្ឋមន្ត្រី ហ៊ុន សែន មាន ៨៧% បានសេចក្តីថា នៅពេលដែល IRI ចាប់ផ្តើមស្ទង់មតិខ្ញុំមានជាង ៨០%ទៅហើយ ដូច្នេះខ្ញុំរក្សានូវប្រជាប្រិយភាពរបស់ខ្ញុំបាន ៧ឆ្នាំ ក្នុងអត្រាជាង ៨០% ។ “នេះជាមូលហេតុមួយក្នុងចំណោមមូលហេតុដែលគណបក្សប្រជាជនកម្ពុជាដាក់ ហ៊ុន សែន ធ្វើជាបេក្ខជននាយករដ្ឋមន្ត្រីជាបន្តទៀត” ។
សម្រាប់ការស្ទង់មតិរបស់វិទ្យាស្ថានសាធារណរដ្ឋអន្តរជាតិ(IRI) សម្តេចតេជោមានប្រសាសន៍ឲ្យដឹងថា ការស្ទង់មតិថាតើប្រទេសកម្ពុជាកំពុងដើរលើផ្លូវត្រូវ ឬផ្លូវខុសនោះ ចម្លើយបានបង្ហាញថា ៨១% ស្មើនឹង ១៦២២នាក់ ឆ្លើយថា ដើរលើផ្លូវត្រូវដែលកាលពីខែកក្កដាឆ្នាំ២០១០ មានតែ ៧៦%។ ១៦% ស្មើនឹង ៣៧៨ នាក់ ឆ្លើយថា មិនបានត្រឹមត្រូវក្នុងពេលដែលខែកក្កដា ឆ្នាំ២០១០ មាន ២៣% បានសេចក្តីថា រយៈពេល ១ឆ្នាំ ក្រោយការមិនពេញចិត្ត យល់ថា កម្ពុជាដើរលើផ្លូវខុសធ្លាក់មកនៅ ១៦% ឯការស្ទង់មតិថា កម្ពុជាដើរលើផ្លូវត្រូវគឺបានកើនឡើងពី ៧៦% ដល់ ៨១%។ IRI បាននិយាយនៅក្នុងរបាយការណ៍របស់ខ្លួនថា នៅខែ៨ ឆ្នាំ២០០៦ ការស្ទង់មតិបង្ហាញថា កម្ពុជាដើរលើផ្លូវត្រូវមាន ៦០% មកដល់ចុងឆ្នាំ ២០១១ ឡើង ៨១%, កម្រិតឆ្លើយថាមិនត្រឹមត្រូវនៅឆ្នាំ២០០៦ មាន ៣៧% ដល់ចុងឆ្នាំ ២០១១ នៅសល់តែ ១៦% ដូច្នេះបានសេចក្តីថា គណបក្សប្រជាជនដឹកនាំត្រូវហើយ ត្រូវសម្រាប់មនុស្សភាគច្រើន។
ពាក់ព័ន្ធនឹងការលើកឡើងរបស់ព្រះអង្គម្ចាស់ធម្មិកោ ដែលថាគណបក្សប្រជាជនបានចាញ់ឆ្នោតទៅហើយ បើពិនិត្យពីតួរលេខនៃការបោះឆ្នោតក្រុមប្រឹក្សាឃុំ-សង្កាត់ កាលពីឆ្នាំ២០១២ នោះ សម្តេចតេជោមានប្រសាសន៍ពន្យល់ថា ប្រជាជននៅឆ្នាំ២០១២ មាន ១៤ ០៨៣ ៩៤៩ នាក់ ប្រជាជនបានចុះបញ្ជីបោះឆ្នោតឆ្នាំ២០១២ មាន ៩ ២០៣ ៤៩៣ នាក់ត្រូវជា ៦៥,៣៥% នៃប្រជាជនសរុបនៅទូទាំងប្រទេស។ ប្រជាជនចូលរួមបោះឆ្នោតឆ្នាំ២០១២ មាន ៥ ៩៩៣ ២៩២ នាក់ ត្រូវជា ៦៥,១៣% នៃចំនួនប្រជាជនបានចុះបញ្ជីបោះឆ្នោត។
សម្រាប់តួរលេខប្រជាជនចូលរួមបោះឆ្នោត សម្តេចតេជោបានមានប្រសាសន៍បញ្ជាក់ថា ចំនួន ៦៥,១៣% ជាអត្រាសមរម្យបើប្រៀបធៀបជាមួយនឹងស្ថិតិដែលដកស្រង់ពីគេហទំព័រនៃប្រទេសមួយចំនួនអំពីវត្តមានប្រជាជនចូលរួមបោះឆ្នោត។
ចំពោះលទ្ធផលនៃការបោះឆ្នោត សម្តេចតេជោបានមានប្រសាសន៍ឲ្យដឹងថា សន្លឹកឆ្នោតបានការមាន ៥ ៨៧៥ ៧១៩ សម្លេងត្រូវជា ៩៨,០៣% នៃសម្លេងឆ្នោតសរុប។ សន្លឹកឆ្នោតដែលមិនបានការមាន ១១៨ ២៧៣ សន្លឹកត្រូវជា ១,៩៧% នៃសន្លឹកឆ្នោតសរុប។ ដូច្នេះសន្លឹកឆ្នោតបានការមានតែ ៤ ៧៥០ ៧១៩ សន្លឹកទេ ដែលសន្លឹកឆ្នោតគាំទ្រគណបក្សប្រជាជនមានចំនួន ៣ ៦៣១ ០៨២ សម្លេង ត្រូវជា ៦១,៨០% នៃសន្លឹកឆ្នោតបានការសរុប។ គណបក្សសមរង្ស៊ី ទទួលបាន ១ ២២៤ ៤៦០ សម្លេងត្រូវជា ២០,៨៤%នៃសម្លេងឆ្នោតបានការសរុប។ ដូច្នេះ គណបក្សនេះទើបនឹងមាន ២០,៨៤% ទេ ក្នុងពេលដែលគណបក្សប្រជាជនមានទៅដល់ ៦១,៨០% ដូច្នេះខុសត្រូវគ្នាក្នុងទំហំ ៤០%។ គណបក្សសិទ្ធិមនុស្សទទួលបាន ៥៨ ០៤៨៣ សម្លេងត្រូវជា ៩,៨៨% នៃសម្លេងឆ្នោតបានការសរុប ដូច្នេះគណបក្សនេះត្រូវនៅទាបជាងគណបក្សប្រជាជនជាង ៥២%។
សម្តេចតេជោថ្លែងថា បើគិតជាសន្លឹកឆ្នោតគណបក្សប្រជាជន ៣ ៦៣១ ០៨២ សម្លេង, គណ បក្សសមរង្ស៊ីបាន ១ ២២៤ ៤៦០ សម្លេង បានសេចក្តីថា សមរង្ស៊ីនៅចាញ់គណបក្សប្រជាជនចំនួន ២ ៤០៦ ៦២២ សម្លេង។ គណបក្សសិទ្ធិមនុស្សទទួលបាន ៥៨០ ៤៨៣ សម្លេងដែលនៅចាញ់គណបក្សប្រជាជន ៣ ០៥០ ៥៩៩ សម្លេង។ បើគណបក្សទាំងពីរបូកបញ្ចូលគ្នាបាន ១ ៨០៤ ៩៤៣ សម្លេង យកមកសងគណបក្សប្រជាជនកម្ពុជា គណបក្សទាំងពីរនៅចាញ់គណបក្សប្រជាជន ១ ៨២៦ ១៣៩ សម្លេង ថែមទៀត។ ដូច្នេះបើចង់ឈ្នះគណបក្សប្រជាជនត្រូវរកឲ្យបាន ៣ លានទៅ ៤ លានសម្លេងទៀត ដែលនេះជាតួលេខជាក់លាក់ដែលបានចេញមក។
សម្តេចតេជោសែន មានប្រសាសន៍ថា បើយើងគិតតាមរបៀបក្រុមប្រឆាំងវិញឃើញថា គណបក្សប្រជាជនទទួលបាន ៣ ៦៣១ ០៨២ សម្លេង ប្រៀបធៀបនឹងប្រជាជនដែលបានចុះឈ្មោះបោះឆ្នោត ៩ ២០៣ ៩៩៣ នាក់ មានន័យថា អ្នកដែលមានសិទ្ធិបោះឆ្នោត ដែលមិនទាន់បានមកបោះឆ្នោតឲ្យគណបក្សប្រជាជនមាន ៥ ៥៧២ ៤១១ ថែមទៀត ប៉ុន្តែបើពិនិត្យពីគណបក្ស២នោះវិញ គណបក្សសមរង្ស៊ីបាន ១ ២២៤ ៤៦០ សម្លេង។ ដូច្នេះបើប្រៀបធៀបអ្នកមានសិទ្ធិបោះឆ្នោតនៅខ្វះ ៧ ៩៧៩ ០៣៣ នាក់ទៀត នៅពេលដែលគណបក្សប្រជាជនខ្វះតែជាង ៥លាន ប៉ុន្តែគណបក្សសមរង្ស៊ី នៅខ្វះជិត ៨លាននាក់។ ចំណែកគណបក្សសិទ្ធិមនុស្ស ៥៨០ ៤៨៣ សម្លេង ប្រៀបធៀបទៅនឹងអ្នកដែលមានសិទ្ធិបោះឆ្នោត ៨ ៦២៣ ០១០ នាក់ទៀត ដែលមិនគាំទ្រគណបក្សសិទ្ធិមនុស្សតើគិតយ៉ាងដូចម្តេច ហើយបើគណបក្សទាំងពីរបូកបញ្ចូលគ្នាក៏បានតែ ១ ៨០៤ ៩៤៣ សម្លេង ដូច្នេះអ្នកដែលមិនគាំទ្រគណបក្សទាំងពីរមានទៅដល់ ៧ ៣៩៨ ៥៥០ នាក់ទៀត។
ផ្អែកតាមការលទ្ធផលខាងលើនេះ សម្ដេចតេជោបានបង្ហាញឱ្យឃើញទៀតថា ទោះបីជាគណបក្សប្រឆាំងពីរ រួមបញ្ចូលគ្នាជាគណបក្សសង្គ្រោះជាតិនោះក៏លទ្ធផលបោះឆ្នោតនៅតែមិនមានសំឡេងអាចឈ្នះគណបក្សប្រជាជនដែរ ដែលក្នុងនោះដែរសម្ដេចតេជោបង្ហាញនូវការជឿជាក់យ៉ាងមាំថា ចំនួនអ្នកបោះឆ្នោតគាំទ្រគណបក្សប្រជាជននឹងមានចំនួនកាន់តែច្រើនឡើងតាមរយៈអ្វីដែលសម្ដេចហៅថា ជាអ្នកដែលបោះឆ្នោតប្រចាំត្រកូលឱ្យគណបក្សប្រជាជនមានន័យថា យុវជនស្រករក្រោយ ដែលដល់អាយុបោះឆ្នោតដែលត្រូវជាកូនជាចៅរបស់មន្ត្រីគណបក្សប្រជាជន ឬជាកូនចៅប្រជាជន ដែលតែងតែបោះឆ្នោតគាំទ្រគណបក្សប្រជាជនរហូតមកនោះ នឹងបន្តក្លាយជាអ្នកបោះឆ្នោតឱ្យគណបក្សប្រជាជនកាន់តែច្រើនឡើង។ “ខ្ញុំមិនជឿថា អ្នកដែលបោះឆ្នោតជូនគណបក្សប្រជាជន នឹងមិនផ្លាស់ប្តូរទេ ព្រោះគណបក្សយើងមិនដូរឈ្មោះ អត់ដូរសញ្ញា ដែលវាខុសគ្នាពីការបោះឆ្នោតតាមបែបពនេចរ ព្រោះបក្សគេបានដូរឈ្មោះ ដូរស្លាកសញ្ញា ដូររហូតដូច្នេះបើបក្សពនេចរហើយអ្នកបោះឆ្នោតក៏ពនេចរដែរ”៕