សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍នាព្រឹកថ្ងៃទី១៥ ខែឧសភា ឆ្នាំ២០១៣ថា តាមក្រឹត្យក្រមនៃសេដ្ឋកិច្ចទីផ្សារ រាជរដ្ឋាភិបាលអាចបញ្ចុះបញ្ចូល និងគាំពារខ្លះៗបាន ប៉ុន្តែមិនអាចបញ្ជាទីផ្សារបាននោះទេ ហើយការស្នើឲ្យធនាគារបញ្ចុះអត្រាការប្រាក់មកនៅត្រឹម ១% គឺជាសម្លាប់ធនាគារ។
នៅក្នុងពិធីសម្ពោធរោងចក្រកែច្នៃកៅស៊ូ នៅក្នុងស្រុកសេសាន ខេត្តស្ទឹងត្រែង សម្តេចតេជោនាយករដ្ឋមន្ត្រី ដែលរួមដំណើរដោយសម្តេចកិត្តិព្រឹទ្ធបណ្ឌិត បានមានប្រសាសន៍ថា រាជរដ្ឋាភិបាលកម្ពុជា កំពុងរៀបចំពិនិត្យ អំពីការរៀបចំនូវទិសដៅផ្សេងៗ ដែលក្នុងនោះក៏រាប់បញ្ចូលទាំងបញ្ហាឥណទានខ្នាតតូច ដើម្បីជំរុញឲ្យកសិករអាចមានលទ្ធភាពរកប្រាក់ធ្វើដើមទុន ដោយទាក់ទងជាមួយនឹងអត្រាការប្រាក់ផងដែរ។ សម្តេចតេជោមានប្រសាសន៍ថា ខ្ញុំសូមនិយាយថា យើងមិនអាចបញ្ជាទីផ្សារទាំងស្រុងបាននោះទេ យើងអាចបញ្ចុះបញ្ចូល និងគាំពារបានខ្លះ ប៉ុន្តែមិនអាចដូចក្រុមប្រឆាំងដែលសន្យាថា ធ្វើឲ្យការប្រាក់មកនៅត្រឹម ១%នោះទេ។
សម្តេចតេជោមានប្រសាសន៍ឲ្យដឹងថា មានសារនយោបាយពីមនុស្សខ្លះបាននិយាយថា សុំទំលាក់ការប្រាក់ធនាគារ ឲ្យមកនៅត្រឹមអត្រាការប្រាក់ ១% នៅពេលដែលពួកគេចងការប្រាក់គ្នាឯងក្រៅប្រព័ន្ធធនាគារ គិតការប្រាក់យ៉ាងធ្ងន់ធ្ងរ។ សម្តេចតេជោនាយករដ្ឋមន្ត្រីមានប្រសាសន៍ថា យោងទៅលើសេដ្ឋកិច្ចទីផ្សារ មិនអនុញ្ញាតឲ្យរដ្ឋកាន់កាប់ធនាគារពាណិជ្ជទេ ហើយគ្រាន់តែធនាគារក្រៅប្រទេសមួយ មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) បានស្នើឲ្យយើងទុកភាគហ៊ុនរដ្ឋតែ ៦% ប៉ុណ្ណោះ ដើម្បីគេងាយស្រួលគ្រប់គ្រងលើបញ្ហាផ្សេងៗ។ យើងមានធនាគារជាតិហើយ ប៉ុន្តែមិនអាចធ្វើសេវាបានទេ ដូច្នេះសេវាធនាគារត្រូវធ្វើដោយធនាគារឯកជននានា ដោយមានការប្រកួតប្រជែង។
សម្តេចតេជោនាយករដ្ឋមន្ត្រីបានលើកជាឧទាហរណ៍ថា ប្រភពទុនរបស់ធនាគារ ជាសំខាន់ បានមកពីអ្នកយកមកផ្ញើនៅធនាគារ ដោយផ្តល់ការប្រាក់ដល់ម្ចាស់បញ្ញើ ៥% ហើយនៅពេលដែលធនាគារយកទៅចងការ ត្រូវយកការប្រាក់ពី ៧% ឬ៨% ឬ១០% ទៅតាមមុខរបរ ប៉ុន្តែធនាគារមិនអាចយកការប្រាក់ ១% បានទេ ព្រោះវាជាការសម្លាប់ខ្លួនឯង។ សម្តេចតេជោថ្លែងថា ធនាគារមួយបានផ្តល់ប្រាក់កំចីទៅឲ្យរោងចក្រម៉ាស៊ីនកិនស្រូវ ដើម្បីទិញស្រូវពីប្រជាពលរដ្ឋចំនួន ១០លាន បើសិនជារោងចក្រម៉ាស៊ីនកិនស្រូវទ្រទ្រង់មិនរួច គឺរាជរដ្ឋាភិបាលជួយធានាហានិភ័យ ហើយនេះជាអ្វីដែលរាជរដ្ឋាភិបាលអាចធ្វើទៅរួច។ បើយើងទៅបិទធនាគារមានន័យថា យើងដូចអា ប៉ុល ពត ហើយសូម្បីតែវិបត្តិនៅទ្វីបអឺរ៉ុប តើមានអ្នកណាហ៊ានដាក់កំរិតឲ្យធនាគារអឺរ៉ុប ឬធនាគារដទៃទៀតជំរុញការប្រាក់ឲ្យមកនៅទាបអញ្ចឹង វាផ្ទុយពីក្រឹត្យក្រមសេដ្ឋកិច្ចទីផ្សារ ដូច្នេះសារនយោបាយបោកប្រាស់នេះ ល្មមឲ្យយើងតាមទាន់ជាន់កែងហើយ។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា ការដាំកៅស៊ូ គឺជាការបង្កើតឡើងវិញនូវគម្របព្រៃឈើ ព្រោះយើងចាត់ទុកថា កៅស៊ូជាប្រភេទនៃគម្របព្រៃឈើ ប្រសិនបើយើងដាំបាន ១ លានហិកតា វាជាគម្របព្រៃឈើ ១លាន ហិកតា ឡើងវិញដែរ ដូច្នេះយើងលើកទឹកចិត្តឲ្យមានការដាំនូវដំណាំកៅស៊ូនេះ។
សម្តេចតេជោបានមានប្រសាសន៍បញ្ជាក់ថា បន្ទាប់ពីការដាក់ចេញគោលនយោបាយផលិតកម្មស្រូវ និងការនាំចេញអង្ករ សម្រាប់រាជរដ្ឋាភិបាល គោលនយោបាយជំរុញផលិតកម្មកៅស៊ូ និងការនាំចេញកៅស៊ូសម្រាប់បណ្តាឆ្នាំខាងមុខ គឺជួយជំរុញលើកទឹកចិត្តដល់ប្រជាពលរដ្ឋ ដោយឈរលើកត្តាគន្លឹៈសំខាន់ៗ ចំនួន៤ គឺទី១-ផ្តល់ប្រាក់ចំណូលដល់សេដ្ឋកិច្ចជាតិ និងសេដ្ឋកិច្ចគ្រួសារកសិករ និងចូលរួមកាត់បន្ថយភាពក្រីក្រ, ទី២-បង្កើតការងារ និងមុខរបរមានស្ថិរភាពជូនប្រជាពលរដ្ឋនៅតាមទីជនបទ និងជួយកាត់បន្ថយការធ្វើចំណាកស្រុក ទី៣-ផ្តល់ឈើសម្រាប់ប្រើប្រាស់ជាគ្រឿងសំណង់សង្ហារឹមជាឈើឥន្ធនៈ ជួយកាត់បន្ថយការកាប់បំផ្លាញព្រៃធម្មជាតិ និងទី៤-ការការពារហូរច្រោះដី និងបង្កើតជាគម្របបៃតងឡើងវិញ ដើម្បីកាត់បន្ថយផលប៉ះពាល់នៃការប្រែប្រួលអាកាសធាតុ ដែលជាមូលហេតុបញ្ហាក្នុងបច្ចុប្បន្នភាព។
ក្រសួងកសិកម្ម រុក្ខាប្រមាញ់ និងនេសាទឲ្យដឹងថា គិតមកដល់ ឆ្នាំ២០១២ កន្លងទៅនេះ ផ្ទៃដីដាំកៅស៊ូសរុបជាង ២៨០ ៣៥៥ ហិកតា ក្នុងនោះផ្ទៃដីចំការកៅស៊ូកសិ-ឧស្សាហកម្មអតីតចំការកៅស៊ូរដ្ឋមានផ្ទៃដី ៥៤ ២០៩ ហិកតា ស្មើនឹង ១៩,៣៤% ចំការកៅស៊ូសម្បទានសេដ្ឋកិច្ចមាន ១១៨ ៤៣៩ ហិកតា ស្មើនឹង ៤២,២៥% និងចំការកៅស៊ូគ្រួសារខ្នាតតូច និងខ្នាតមធ្យមមាន ១០៧ ៦៩៦ ហិកតា ស្មើនឹង ៣៨,៤១% នៃផ្ទៃដីសរុប។
លើផ្ទៃដីដាំដុះសរុបផ្ទៃដីចៀរជ័រមាន ៥៥ ៣៦១ ហិកតា ដោយបានផ្តល់ជាជ័រកៅស៊ូស្ងួតប្រមាណ ៦៥ ០០០ តោន សម្រាប់ការនាំចេញទៅបរទេស។ ការវិនិយោគលើដំណាំកៅស៊ូនៅខេត្តស្ទឹងត្រែងមកដល់ពេលនេះ មានក្រុមហ៊ុនចំនួន៩ ដែលបានវិនិយោគលើដីសម្បទានសេដ្ឋកិច្ច ក្នុងការដាំដំណាំកៅស៊ូលើផ្ទៃដីទំហំ ៧១ ៨៤៥ ហិកតា ក្នុងនោះផ្ទៃដីដែលបានដាំរួចមានប្រមាណ ១១ ៨៦២ ហិកតា ក្នុងនោះផ្ទៃដីដាំដុះរួចរបស់របស់ក្រុមហ៊ុន សុភក្តិនីកាអ៊ិនវេសមេនអាហ្រេ្គអ៊ិនដាសស្ទ្រៀលផ្លេនមាន ៣៨០០ ហិកតាក្នុងនោះផ្ទៃដីដែលត្រូវចៀរជ័រក្នុងឆ្នាំ ២០១៣ មាន ៣០០ ហិកតា៕