ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដី បានអញ្ជើញជាអធិបតី ក្នុងពិធីប្រកាសតែងតាំងចូលកាន់មុខដំណែង អភិបាល អភិបាលរងខេត្ត និង អភិបាលក្រុង ស្រុក នៃខេត្តតាកែវ កាលពីព្រឹកថ្ងៃទី ១៦ ខែ ឧសភាឆ្នាំ ២០១៣ សំរាប់អាណត្តិទី២ ឆ្នាំ ២០១៣ - ២០១៧។
យោងតាមព្រៈរាជ្យក្រិត និងអនុក្រិត ព្រមទាំងសេចក្ដីសំរេចរបស់ក្រសួងមហាផ្ទៃ ក្នុងនោះ ឯកឧត្តម ស្រី បេន ត្រូវបានតែងតាំង ជាអភិបាលខេត្តតាកែវ និងមន្រ្ដីមួយចំនួនទៀត ត្រូវបានតែងតាំងជាអភិបាលរងខេត្ត អភិបាលក្រុង ស្រុកក្នុងខេត្តតាកែវ។
បន្ទាប់ពីឯកឧត្តម ស្រី បេន អភិបាលខេត្ត បានធ្វើការប្តេជ្ញាចិត្តបន្ត ការងារសម្រាប់អាណត្តថ្មីរួចមកមានប្រសាសន៍សំណេះសំណាល ឯកឧត្តមបណ្ឌិតសភាចារ្យ សុខ អាន បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្ត មន្រ្តីរាជការគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទដែលមានឆន្ទៈស្រួចស្រាល់ និងការប្តេជ្ញាចិត្តមោះមុតយកអស់កម្លាំងកាយចិត្ត និងបញ្ញាក្នុងការបន្តបំពេញតួនាទី ភារកិច្ច និងកាតព្វកិច្ច ដើម្បីបម្រើ និងការពារជាតិមាតុភូមិ និងប្រជាជនក្នុងដែនសមត្ថកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់។
ឯកឧត្តម ក៏បានបន្តទៀតថា៖ ការប្រកាសតែងតាំង រដ្ឋបាលថ្នាក់ក្រោមជាតិ ដែលយើងស្គាល់ថា ជាអាជ្ញាធរដែនដីនេះមានតួនាទីមិនត្រឹមតែជាអ្នកផ្តល់សេវាសាធារណៈប៉ុណ្ណោះទេ ប៉ុន្តែថែមទាំងជាសេនាធិការផ្ទាល់ និងជាតំណាងឱ្យរាជរដ្ឋាភិបាលក្នុងមូលដ្ឋានទៀតផង។ ការគ្រប់គ្រងរដ្ឋបាលថ្នាក់ក្រោមជាតិត្រូវធ្វើឡើងតាមគោលការណ៍រដ្ឋបាលឯកភាពដើម្បីបង្កើតជំរុញ និងធ្វើឱ្យមានចីរភាពដល់ ការអភិវឌ្ឍតាមបែបប្រជាធិបតេយ្យតាមរយៈនយោបាយវិមជ្ឈការ និងវិសហមជ្ឈការ។ ការបង្កើតរដ្ឋ បាលឯកភាពនៅរដ្ឋបាលថ្នាក់ក្រោមជាតិ សំដៅដល់ការពង្រឹងអង្គឯកភាពរបស់រដ្ឋ ដើម្បីសម្របសម្រួលនូវរាល់សកម្មភាពរដ្ឋបាលសាធារណៈនៅក្នុងដែនដីរបស់ខ្លួន។
ឯកឧត្តមឧបនាយករដ្ឋមន្រ្តីក៏បានបញ្ជាក់ផងដែរថា៖ បន្ទាប់ពីទទួលបាននូវសុខសន្តិភាព និងស្ថិរភាពនយោបាយក្នុងប៉ុន្មានទសវត្សចុងក្រោយនេះ កម្ពុជាសម្រេចបានកំណើនសេដ្ឋកិច្ចខ្ពស់ និងការកាត់បន្ថយភាពក្រីក្ររបស់ប្រជាពលរដ្ឋជាបន្តបន្ទាប់។ ជាក់ស្តែង ផលិតផលក្នុងស្រុកសរុបសម្រាប់មនុស្សម្នាក់ៗបានកើនឡើងពី៧៦០ដុល្លារអាមេរិកក្នុងឆ្នាំ២០០៨ដល់ជិត១.០០០ដុល្លារអាមេរិកក្នុងឆ្នាំ២០១២ ហើយរំពឹងថា នឹងកើនឡើងដល់ជាង១.០០០ដុល្លារអាមេរិកក្នុងឆ្នាំ២០១៣នេះ។ អត្រានៃភាពក្រីក្របានធ្លាក់ចុះពី២២,៩%ក្នុងឆ្នាំ២០០៩មកនៅត្រឹម២០%នៅឆ្នាំ២០១១ ហើយរំពឹងថា នឹងចុះមកក្រោម១៩%នៅឆ្នាំ២០១៣នេះ។ ទន្ទឹមនឹងនេះរាជរដ្ឋាភិបាលបានដាក់ចេញ និងអនុវត្តនូវកម្មវិធីកំណែទម្រង់ស៊ីជម្រៅលើគ្រប់វិស័យសំដៅកសាងសមត្ថភាពស្ថាប័ន ធ្វើឱ្យប្រសើរឡើងនូវហេដ្ឋារចនាសម្ព័ន្ធសេដ្ឋកិច្ច-សង្គម និងបង្កើតឱ្យមានបរិយាកាសអនុគ្រោះ សម្រាប់ទាក់ទាញការវិនិយោគពីបរទេស និងក្នុងស្រុក។ ថ្មីៗនេះរាជរដ្ឋាភិបាលបានអនុវត្តកំណែទម្រង់ដីធ្លីតាមរយៈ«គោលនយោបាយចាស់ សកម្មភាពថ្មី» ដោយមានការចូលរួមពីមន្ត្រីបច្ចេកទេស និងក្រុមវីរយុវជនស្ម័គ្រចិត្តសម្តេចតេជោ ដើម្បីធ្វើការវាស់វែងដីសម្រាប់ផ្តល់ប័ណ្ណកម្មសិទ្ធិដីធ្លីជូនប្រជាជន។
ឯកឧត្តមឧបនាយករដ្ឋមន្ត្រី សុខ អាន បានបន្តថា ក្នុងវិស័យការពារជាតិរាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន បានប្តូរផ្តាច់ការពារថែរក្សាបូរណភាពទឹកដី និងអធិបតេយ្យភាពជាតិ ដោយប្រកាន់ខ្ជាប់គោលការណ៍អត់ធ្មត់ខ្ពស់បំផុតនិងប្រឹងប្រែងដោះស្រាយជម្លោះព្រំដែនតាមច្បាប់ជាតិ អន្តរជាតិក្នុងជំហររក្សាទំនាក់ទំនងល្អជាមួយប្រទេសជិតខាងដើម្បីផលប្រយោជន៍ជាតិ និងប្រជាជន។
ដោយឡែក រាជរដ្ឋាភិបាលសម្រេចបាននូវសមិទ្ធផលជាច្រើនក្នុងការដ្ឋាននៃកំណែទម្រង់វិមជ្ឈការ និងវិសហមជ្ឈការ។ការបោះឆ្នោតជ្រើសរើសក្រុមប្រឹក្សាឃុំសង្កាត់ជាបន្តបន្ទាប់ ព្រមទាំងការបោះឆ្នោតជ្រើសរើសក្រុមប្រឹក្សារាជធានី-ខេត្តក្រុមប្រឹក្សាក្រុង-ស្រុក-ខណ្ឌ បានប្រព្រឹត្តទៅយ៉ាងរលូន ហើយលទ្ធផល នៃការបោះឆ្នោតនេះក៏បានជំរុញឱ្យដំណើរការកែទម្រង់វិមជ្ឈការ និងវិសហមជ្ឈការនេះមានលក្ខណៈ ល្អប្រសើរ និងកាន់តែស៊ីជម្រៅថែមទៀត។ជាងនេះទៀតរាជរដ្ឋាភិបាលបានដាក់ចេញនូវកម្មវិធីជាតិរយៈពេល១០ឆ្នាំ (២០១០២០១៩) ដែលជាផែនទីបង្ហាញផ្លូវរយៈពេលវែងមួយដោយបានរៀបចំផែនការអនុវត្តរយៈពេល៣ឆ្នាំម្តងៗ ដើម្បីការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។បច្ចុប្បន្នកំណែទម្រង់នេះកំពុងស្ថិតក្នុងឆ្នាំទី៣ នៃផែនការអនុវត្តរយៈពេល៣ឆ្នាំដំបូងនៃកម្មវិធីជាតិរយៈពេល១០ឆ្នាំ។ ជាលទ្ធផល រចនាសម្ព័ន្ធ និងប្រព័ន្ធគ្រប់គ្រងនៅរដ្ឋបាលថ្នាក់ក្រោមជាតិត្រូវបានរៀបចំឡើងវិញដើម្បីកំណត់តួនាទី ភារកិច្ច និងការទទួលខុសត្រូវរបស់មន្រ្តីជាប់ឆ្នោត និងមន្រ្តីតែងតាំងថ្មីចំពោះប្រជាជន និងរាជរដ្ឋាភិបាល។ ជាក់ស្តែង មន្រ្តីរាជការស៊ីវិលប្រមាណ១០.០០០នាក់ ដែលបម្រើការងារនៅសាលារាជធានីខេត្ត ក្រុង ស្រុក ខណ្ឌ ត្រូវបានធ្វើសមាហរណកម្មចូលទៅក្នុងរចនាសម្ព័ន្ធ និងប្រព័ន្ធគ្រប់គ្រងថ្មីនេះ។
ឯកឧត្តមក៏បានបញ្ជាក់ ថា៖ កម្ពុជាក៏ទទួលបានជោគជ័យធំៗគួរឱ្យកត់សម្គាល់នៅលើឆាកអន្តរជាតិផងដែរ។ ជាក់ស្តែងនៅឆ្នាំ២០១២ ក្នុងឋានៈជាប្រធានអាស៊ាន កម្ពុជាបានរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដោយទទួលបាននូវការកោត សរសើរពីមជ្ឈដ្ឋានជាតិ និងអន្តរជាតិ។លើសពីនេះ ក្នុងនាមជាប្រធានគណៈកម្មាធិការបេតិកភណ្ឌពិភពលោក កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំពេញអង្គលើកទី៣៧ នៃគណៈកម្មាធិការបេតិកភណ្ឌពិភពលោកនៅក្នុងខែមិថុនាខាងមុខដោយមានការចូលរួមពីបណ្តារដ្ឋភាគីទាំង១៩០ប្រទេស នៃអនុសញ្ញាបេតិកភណ្ឌពិភពលោក១៩៧២។
ឯកឧត្តមបានធ្វើការផ្តាំផ្ញើ ដល់ឯកឧត្តមអភិបាល អភិបាលរងខេត្ត អភិបាលក្រុងអភិបាលស្រុកទាំងអស់នៃខេត្តតាកែវរបស់យើងដែលត្រូវបានតែងតាំងឱ្យបន្តការងារក្នុងអាណត្តិទី២នេះ រួមទាំងក្រុមប្រឹក្សា មន្រ្តីរាជការ កងកម្លាំងប្រដាប់អាវុធ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវរួមសហការគ្នាត្រូវបន្តរួមគ្នាថែរក្សាការពារសុខសន្តិភាពស្ថិរភាពនយោបាយ សណ្តាប់ធ្នាប់សង្គម ឱ្យបានល្អប្រសើរដើម្បីបង្កបរិយាកាសឱ្យការបោះឆ្នោតជ្រើសតាំងតំណាងរាស្រ្តនីតិកាលទី៥ ដែលនឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣ ខាងមុខប្រកបដោយលក្ខណៈសេរីត្រឹមត្រូវយុត្តិធម៌ និងមានសុវត្ថិភាពហើយ ត្រូវប្រកាន់ខ្ជាប់នូវអព្យាក្រឹត្យភាពក្នុងការអនុវត្តតួនាទីភារកិច្ចរបស់ខ្លួន និងត្រូវគោរពឱ្យបានខ្ជាប់ខ្ជួននូវគោលការណ៍ច្បាប់បទបញ្ជានីតិវិធី និងក្រមសីលធម៌នៃការបោះឆ្នោតក្នុងឋានៈជារដ្ឋបាលដែលនៅជាប់នឹងប្រជាជនរួមសុខរួមទុក្ខជាមួយប្រជាជន អាជ្ញាធរដែនដីត្រូវប្រកាន់ខ្ជាប់នូវជំហរជាអ្នកការពារ និងបម្រើប្រជាជន តាមរយៈការធានាឱ្យបាននូវសន្តិសុខ សណ្តាប់ធ្នាប់ សុវត្ថិភាព ស្ថិរភាពសង្គម ការអភិវឌ្ឍក្នុងមូលដ្ឋាន និងអភិបាលកិច្ចល្អ ជាពិសេសការទប់ស្កាត់ឱ្យបានទាន់ពេលវេលារាល់ទង្វើអសកម្មដែលប៉ះពាល់ដល់សុខុមាលភាពរបស់ប្រជាជន។ ជាងនេះទៅទៀត អាជ្ញាធរដែនដីគ្រប់លំដាប់ថ្នាក់ត្រូវបន្តយកចិត្តទុកដាក់ធ្វើយ៉ាងណាឱ្យប្រជាជនក្នុងមូលដ្ឋាន មានជំនឿទុកចិត្តលើរដ្ឋបាលរបស់ខ្លួន ហើយក៏ត្រូវបន្តបំផុសចលនាមហាជនឱ្យយល់ដឹងកាន់តែស៊ីជម្រៅថែមទៀតអំពីតួនាទីរបស់បងប្អូនប្រជាពលរដ្ឋ ក្នុងការចូលរួមជាមួយរាជរដ្ឋាភិបាល ក្នុងកិច្ចអភិវឌ្ឍសង្គមជាតិលើគ្រប់វិស័យ។