ឯកឧត្តម រី អិនស៊ុក (RI IN SOK)
ឯកអគ្គរដ្ឋទូតសាធារណរដ្ឋប្រជាមានិតប្រជាធិបតេយ្យកូរ៉េ ដែលបញ្ចប់ បេសកកម្មការទូតនៅព្រះរាជាណាចក្រកម្ពុជា
បានមានប្រសាសន៍ឲ្យដឹងនាថ្ងៃទី ២៨ ខែវិច្ឆិកា ឆ្នាំ ២០១១ថា
សាធារណរដ្ឋប្រជាមានិតប្រជាធិបតេយ្យកូរ៉េកំពុងតែធ្វើ
ការសិក្សាដើម្បីសាងសង់សារៈមន្ទីរនៅក្នុងខេត្តសៀមរាប ដែលនេះបានឆ្លុះបញ្ចាំងនូវទំនាក់ទំនង
រវាងកម្ពុជាជាមួយកូរ៉េខាងជើងលើវិស័យវប្បធម៌។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីថ្លែងថា នៅក្នុងឱកាសចូលជួបសម្តែងការគូរសម
និងជម្រាបលា សម្តេចអគ្គមហាសេនាបតីតេជោ
ហ៊ុន សែន ឯកឧត្តម RI IN SOK បានពាំនាំនូវការផ្តាំផ្ញើ
សាកសួរសុខទុក្ខពីសំណាក់លោកសេនាប្រមុខ គីម
ជុងអ៊ីល នៃសាធារណរដ្ឋប្រជាមានិតប្រជាធិបតេយ្យកូរ៉េនិង
ថ្នាក់ដឹកនាំប្រទេសកូរ៉េ ជូនសម្តេចតេជោនាយករដ្ឋមន្ត្រី និង បានសំដែងនូវការអបអរសាទរជូនចំពោះព្រះរាជាណាចក្រកម្ពុជា
ដែលនឹងធ្វើជាប្រធានអាស៊ាននៅឆ្នាំ ២០១២ ខាងមុខនេះ។ ឯកឧត្តមឯកអគ្គរដ្ឋទូតមានប្រសាសន៍ថា
រយៈពេល ៤ ឆ្នាំកន្លងមកនេះ ក្នុងពេលបំពេញបេសកកម្មការទូតនៅកម្ពុជា
លោកបានកត់សម្គាល់ឃើញថា កម្ពុជា បានទទួលនូវសុខសន្តិភាព និង ការអភិវឌ្ឍយ៉ាងឆាប់រហ័ស
ជាពិសេសការអភិវឌ្ឍផ្នែកសេដ្ឋកិច្ចបាន ធ្វើឲ្យកម្ពុជាមានភាពរុងរឿង និង
មានកិត្យានុភាពកាន់តែខ្លាំងឡើងៗនៅលើឆាកអន្តរជាតិ ដែលការ
នេះបានបង្ហាញពីការដឹកនាំដ៏ឈ្លាសវៃរបស់សម្តេចតេជោ ហ៊ុន សែន។
សម្តេចអគ្គមហាសេនាបតីតេជោ
ហ៊ុន សែន បានថ្លែងអំណរគុណចំពោះការផ្តាំផ្ញើសាកសួរសុខទុក្ខពីថ្នាក់ដឹកនាំកំពូលរបស់កូរ៉េខាងជើង
និង មានប្រសាសន៍ថា វិបត្តិសេដ្ឋកិច្ច និង
ភាពមិនច្បាស់លាស់នៃប្រព័ន្ធសេដ្ឋកិច្ច និង ហិរញ្ញវត្ថុពិភពលោកបាន
ធ្វើឲ្យកិច្ចសហប្រតិបត្តិការរវាងកម្ពុជា-កូរ៉េខាងជើងមិនបានដូចអ្វីដែលបានរំពឹងទុកនោះឡើយ។
ប៉ុន្តែទោះជាយ៉ាងណាក៏ដោយ ក៏សម្តេចតេជោបានផ្តោតនូវសេចក្តីសង្ឃឹមថា
កម្ពុជា និង កូរ៉េខាងជើងនឹង រួមគ្នាពិនិត្យមើលលើចំណុចណាដែលអាចសហការបានកាន់តែច្រើនកាន់តែល្អ។
សម្តេចតេជោនាយករដ្ឋមន្ត្រីក៏បានវាយតម្លៃខ្ពស់ចំពោះបេសកកម្មការទូតរបស់ឯកឧត្តម
RI IN SOK នៅកម្ពុជា ដែលក្នុងនោះបានរួមចំណែកក្នុងកិច្ចការយ៉ាងច្រើន
រួមមានទាំងការរៀបចំឲ្យមានដំណើរ ទស្សនកិច្ចរបស់នាយករដ្ឋមន្ត្រី និង
ដំណើរទស្សនកិច្ចរបស់គណបក្សដើម្បីចូលរួមក្នុងកិច្ចប្រជុំ ICAP
នាពេលកន្លងមក៕