ភ្នំពេញ: កិច្ចប្រជុំថ្នាក់រដ្ឋមន្ត្រីថាមពលអាស៊ាន លើកទី៣០ និងកិច្ចប្រជុំពាក់ព័ន្ធ ព្រមទាំងវេទិកាធុរកិច្ចថាមពលអាស៊ាន បានប្រព្រឹត្តទៅ ចាប់ពីថ្ងៃទី១០ ដល់ថ្ងៃទី១៤ ខែកញ្ញា ឆ្នាំ២០១២ នៅសណ្ឋាគារ កាំបូឌីយ៉ាណា ក្នុងរាជធានីភ្នំពេញ។ ចំណែកពិធីបើកកិច្ចប្រជុំទាំងនេះ នឹងធ្វើឡើង នាព្រឹកថ្ងៃទី១២ ខែកញ្ញា ឆ្នាំ២០១២ នៅវិមានសន្តិភាព ក្រោមអធិបតីភាពសម្តេចហ៊ុនសែន។
តាមកម្មវិធី ដែលបានព្រៀងទុក គឺនៅថ្ងៃទី១ នៃកិច្ចប្រជុំថ្នាក់រដ្ឋមន្ត្រីថាមពលអាស៊ាន លើកទី៣០ និងកិច្ចប្រជុំពាក់ព័ន្ធ ព្រមទាំងវេទិកាធុរកិច្ចថាមពលអាស៊ាន ត្រូវនឹងថ្ងៃទី១០ ខែកញ្ញា ឆ្នាំ២០១២ នាពេលរសៀល ជាកិច្ចប្រជុំរវាងឧត្តមមន្ត្រីថាមពលអាស៊ាន ដើម្បីត្រៀមរៀបចំដល់កិច្ចប្រជុំថ្នាក់រដ្ឋមន្ត្រីថាមពលអាស៊ាន លើកទី៣០។ ចំណែកនៅថ្ងៃទី១១ ខែកញ្ញា ឆ្នាំ២០១២ ជាកិច្ចប្រជុំរវាងឧត្តមមន្ត្រីថាមពលអាស៊ាន ១០ ប្រទេស បូក៣ គឺឧត្តមមន្ត្រីចិន ជប៉ុន និងកូរ៉េខាងត្បូង។ រីឯនាពេលរសៀល គឺជាកិច្ចប្រជុំរវាងឧត្តមមន្ត្រីអាស៊ាន និងប្រទេសដៃគូអាស៊ាន ដែលរួមមាន អូស្ត្រាលី ចិន ឥណ្ឌា ជប៉ុន ញូវហ្សឺឡេន កូរ៉េខាងត្បូង រុស្ស៊ី និងអាមេរិក។
សម្រាប់កម្មវិធីនៅព្រឹកថ្ងៃទី១២ ខែកញ្ញា ឆ្នាំ២០១២ គឺជាពិធីបើកកិច្ចប្រជុំថ្នាក់រដ្ឋមន្ត្រីថាមពលអាស៊ាន លើកទី៣០ និងកិច្ចប្រជុំពាក់ព័ន្ធ ព្រមទាំងវេទិកាធុរកិច្ចថាមពលអាស៊ាន ក្រោមប្រធានបទ "ការតភ្ជាប់ថាមពលបៃតង អាស៊ាន" នៅសាលប្រជុំ នួនស្រី ក្នុងវិមានសន្តិភាព ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន។
នៅមុនពេលចូលរួមបើកកិច្ចប្រជុំនោះ រដ្ឋមន្ត្រីថាមពលអាស៊ាន ទាំង ១០ ប្រទេស ត្រូវចូលសំដែងការគួរសមជាមួយសម្តេចនាយករដ្ឋមន្ត្រី ហ៊ុន សែន។ បន្ទាប់មក សម្តេចនាយករដ្ឋមន្ត្រី ហ៊ុនសែន នឹងថ្លែងសុន្ទរកថាបើកកិច្ចប្រជុំ។
បន្ទាប់ពីពិធីបើកកិច្ចប្រជុំ រដ្ឋមន្ត្រីថាមពលអាស៊ាន នឹងត្រូវបន្តកិច្ចប្រជុំ នៅសណ្ឋាគារ កាំបូឌីយ៉ាណា ក្នុងក្របខណ្ឌអាស៊ាន ព្រមទាំងជួបប្រជុំនឹងប្រទេសដៃគូអាស៊ាន និងកិច្ចពិភាក្សាធុរកិច្ចអាមេរិក-អាស៊ាន។ កិច្ចប្រជុំនឹងបន្តរហូតដល់ថ្ងៃទី១៣ ខែកញ្ញា ឆ្នាំ២០១២។ រីឯនៅថ្ងៃទី១៤ ខែកញ្ញា ឆ្នាំ២០១២ ជាការវិលត្រឡប់របស់រដ្ឋមន្ត្រីថាមពលអាស៊ាន ប្រទេសដៃគូអាស៊ាន និងគណៈប្រតិភូ ចាកចេញពីកម្ពុជា៕