ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក រួមជាមួយសមត្ថកិច្ចប៉ូលិសខេត្តកណ្តាលបានអញ្ជើញចុះចែកអត្តសញ្ញាណប័ណ្ណ ដល់ប្រជាពលរដ្ឋ ចំនួន ៦៣១៤សន្លឹក ក្នុង១១ឃុំ នៅទូទាំងស្រុកពញាឮ ខេត្តកណ្តាល កាលពីព្រឹកថ្ងៃទី៩ ខែកញ្ញា ឆ្នាំ២០១២ នេះនៅក្នុងបរិវេណស្នាក់ការគណបក្សស្រុក។
លោក ចាន់ យុត្ថា នាយខុទ្ទកាល័យក្រសួងធនធានទឹក និងឧតុនិយម មានប្រសាសន៍ឲ្យដឹងថាកាលពីព្រឹកថ្ងៃទី៩ ខែកញ្ញា ឆ្នាំ២០១២ នេះ លោករដ្ឋមន្ត្រី បានដឹកនាំមន្ត្រីក្រោមឱវាទសហការជាមួយអាជ្ញាធរនិងសមត្ថកិច្ចនគរបាលខេត្តកណ្តាលអញ្ជើញទៅស្រុកពញាឮ ដើម្បីចែកអត្តសញ្ញាណប័ណ្ណ ចំនួន៦៣១៤សន្លឹកដល់ ប្រជាពលរដ្ឋទាំង១១ឃុំនៅទូទាំងស្រុកធ្វើយ៉ាងណាឲ្យពួកគាត់បានទៅចូលរួមពិនិត្យនិងចុះឈ្មោះបោះឆ្នោត ជាតិនៅឆ្នាំ២០១៣ខាងមុខនេះឲ្យបានទាន់ពេល។
លោកបន្តថានៅក្នុងឪកាសនោះលោក លឹម គានហោរដ្ផមន្ត្រីក្រសួងធនធានទឹកនិងឧត្តុនិមយនិងជាប្រធានគណះពង្រឹងមូលដ្ផានស្រុកពញ្ញឮ បានមានប្រសាសន៏ថ្លែងអំណរគុណដល់អាជ្ញាធរនិងស្នងការនគបាលខេត្តកណ្តាល ដែលបានចូលរួម គ្រប់ភាគីពាក់ព័ន្ធដែលបានខិតខំប្រឹងប្រែងរួមគ្នាចុះជួយធ្វើអត្តសញ្ញាណប័ណ្ណដល់ពលរដ្ឋនាពេលកន្លងមកដោយមិនខ្លាចនឿយហត់។
លោករដ្ឋមន្ត្រីបន្តថាបើទោះបីកាធ្វើអត្តសញ្ញាណប័ណ្ណមានការយឺតយ៉ាវបន្តិចក្តីក្នុងការផ្តល់ឲ្យក៏ដោយ ប៉ុន្តែអាជ្ញាធរមានការស្វះស្វែងដើម្បីធ្វើ យ៉ាងណា ឲ្យបានគ្រប់គ្នា។ ប៉ុន្តែការយឺតយ៉ាវនេះ ដោយសារតែពលរដ្ឋនៅទូទាំងខេត្តមានចំនួនច្រើនទើបនាំឲ្យមានកាយឺតយ៉ាវ។
លោក រដ្ឋមន្ត្រីក៏បានផ្តាំផ្ញើទៅដល់ប្រជាពលរដ្ឋ ដែលបានទទួលអត្តសញ្ញាណប័ណ្ណហើយ ត្រូវចេះថែរក្សាទុក ឲ្យបានល្អ ដើម្បីផលប្រយោជន៍ខ្លួន និងប្រើប្រាស់សម្រាប់ការងារផ្សេងៗទៀត ដោយស្របច្បាប់ហើយសិនមានការបាត់បង់បងប្អូនត្រូវរាយការណ៍ប្រាប់សមត្ថកិច្ចមូលដ្ឋានភ្លាម។
លោកបញ្ជាក់ថាអត្តសញ្ញាណប័ណ្ណនាពេលនេះមានសារៈសំខាន់ណាស់ពិសេសប្អូនៗ ដែលទើបតែមានអាយុគ្រប់បោះឆ្នោតត្រូវទៅចុះបោះឆ្នោតឲ្យបានគ្រប់គ្នា ហើយក៏ស្នើឲ្យពលរដ្ឋត្រូវទៅពិនិត្យ ឈ្មោះ និងចុះឈ្មោះបោះឆ្នោតឲ្យបានទាន់ពេលវេលាផងដែរ៕
ឌួងវិរៈជ័យ