ភ្នំពេញ: ខុទ្ទកាល័យសម្ដេចក្រុមព្រះ នរោត្តម រណឫទ្ធិ បានធ្វើការបដិសេធចំពោះអ្នកនយោបាយខ្លះ បានដើរឃោសនាថា ក្រោយច្របាច់បញ្ចូលគ្នារវាងគណបក្សរាជានិយមទាំងពីរ ពួកគេនឹងយាងសម្ដេចក្រុមព្រះ ទៅដឹកនាំគណបក្សហ្វ៊ុនស៊ិនប៉ិច។
សេចក្ដីប្រកាសព័ត៌មាន ចុះថ្ងៃទី១០ ខែកញ្ញា ឆ្នាំ២០១២ បានបង្ហាញថា ថ្មីៗនេះ ខុទ្ទកាល័យសម្ដេចក្រុមព្រះ នរោត្តម រណឫទ្ធិ បានទទួលព័ត៌មានពីមូលដ្ឋាន នៃអ្នករាជានិយមមួយចំនួន ឲ្យដឹងថា ក្រោយពីការរៀបចំរចនាសម្ព័ន្ធច្របាច់បញ្ចូលគ្នា រវាងគណបក្សជាតិនិយម ( អតីតគណបក្ស នរោត្តម រណឫទ្ធិ ) និងគណបក្សហ្វ៊ុនស៊ិនប៉ិចរួចហើយ ពួកគេនឹងយាងសម្ដេចក្រុមព្រះ នរោត្តម រណឫទ្ធិ ទៅដឹកនាំគណបក្សហ្វ៊ុនស៊ិនប៉ិច។
សេចក្ដីប្រកាសព័ត៌មាន បានបញ្ជាក់ថា “ខុទ្ទកាល័យសម្ដេចក្រុមព្រះ នរោត្តម រណឫទ្ធិ សូមធ្វើការបដិសេធចំពោះអ្នកនយោបាយណា ដែលបាន និងកំពុងផ្សព្វផ្សាយនូវព័ត៌មានដ៏មហាអកុសលនេះ។ ការនិយាយបែបនេះ គឺពិតណាស់មានចរិតឆបោក បំភ័ន្ដអ្នករាជានិយមពិតប្រាកដ ព្រោះថា សម្ដេចក្រុមព្រះ នរោត្តម រណឫទ្ធិ ព្រះអង្គបានប្រកាសជាសាធារណៈ នាថ្ងៃទី១០ ខែសីហា ឆ្នាំ២០១២ ឈប់ធ្វើនយោបាយ”។
សេចក្ដីប្រកាសព័ត៌មានបានបន្ថែមថា ការដែលអ្នកនយោបាយខ្លះ ឃោសនាផ្សព្វផ្សាយតាមបណ្ដាមូលដ្ឋានអ្នករាជានិយមនានាថា ពួកគេនឹងយាង សម្ដេចក្រុមព្រះ នរោត្តម រណឫទ្ធិ ទៅដឹកនាំហ្វ៊ុនស៊ិនប៉ិចនោះ គឺពិតជាការភូតភរ បោកបញ្ឆោត លួងលោមទឹកចិត្តអ្នករាជានិយមពិតប្រាកដ ឲ្យទៅគាំទ្រពួកគេ ដោយយកព្រះនាម សម្ដេចក្រុមព្រះ នរោត្តម រណឫទ្ធិ ទៅប្រើប្រាស់ក្នុងន័យកេញចំណេញនយោបាយអស់សង្ឃឹមតែប៉ុណ្ណោះ។
សេចក្ដីប្រកាសព័ត៌មានដដែលនោះ បានបន្ថែមទៀតថា សូមសាធារណមតិជាតិ និងអន្តរជាតិ ជាពិសេសមូលដ្ឋាន នៃអ្នករាជានិយមពិតប្រាកដ មេត្តាកុំជឿសម្ដីកុហក ភូតភរ បោកបញ្ឆោតនេះតទៅទៀត ព្រោះថា សម្ដេចក្រុមព្រះនរោត្តម រណឫទ្ធិ ទ្រង់ពិតជាប្រកាសថា ឈប់ធ្វើនយោបាយហើយ៕